ALARM BELL VIII – INNER LINE PERMIT SYSTEM

By R. Sanga

July 28, 2013 (22:25 Hrs.) Sunday ni in ZogamOnline.com ah Alarm Bell VII-na: Scheduled Tribe Status Demand chih thulu a zang in ‘Patau Daak 7^th khen khinta, tu in Patau Daak 8^th pen ‘Inner Line Permit System’ JCILPS pawl in beihpisuah uh ahidan kikum zual le’ng i chi ahi.

Hiai thilnih, ST Status Demand leh ILPS toh kisai thukzaw seem a ngaihsutna piaktuak hi lou hiam chih lungsim ah hong thuklut deuhdeuh hi. Agam mi diktak kichi a, tualsuak mi (indigenous people) kichi, phaijang a teeng, 33 AD akipan khangthu akizom a neitou ngitnget akichite in kum 1951 nunglam a Manipur ah hong lut a, Inn-le-Lou, gam-leitang hong leitawm khempeuh Kawlgam, Vaigam akipan Manipur gamsung a hong pemlutte baan ah, khamtung mite, Nagas leh Zosuante tengteng gamdang mi huangsung ah JCILPS in hon guanglut mawk uh ahihdan niteng thukizakna tuamtuam tungtawn in tangpi theih di’a puankhiak in om hi. Huchi hitaleh, Outer Manipur huapsung pen Manipur pawlam a teeng mite chihna toh kibang geih hi lou hiam chih ngaihtuahna piaktuak ahi chih hon phawksakpha kholdiak hi…!!

Kalkhat vaal kiphinna aneihnung un, ILPS Joint Committee in mailam nawt a paitouh zel diing chi in niteng thukizakna, Imphal Free Press, July 29, 2015 ah hiai bang a gelh in om hi:

“Iboyaima Shumang Leela Shanglen mun ah July 23 ni a mipi kipunkhawm a ILPS thu toh kisai thupukna JCILPS in abawl pen buchinsak ahihtheihna diing a State Sorkar in mit a muhtheih diing bangmah himhim tunitan bawlkhiak nei lou ahihdan taklangh hi.”

March 16, 2015 ni in “Manipur Regulation of Visitors, Tenants and Migrant Workers Bill- 2015” kichi Opposition MLAs 5, hehngoh kawm a Manipur Inpi pawtkhiaksan a anuaksan nung nangawn un zong, hiai Bill pen Manipur Legislative Assembly in paisuakpih thouthou hi. Hiai Bill Manipur Legislative Assembly ah apaisuak ziak in JCILPS thangpai petmah hi. Manipur Indigenous People kichite namdang leh ngalsaute nuaisiah a om khak diing lauhna toh singtang gam-leitang etlahna lianpi toh kigui zopna nei tinten, mipil, misiam tamtakte in alung geel vengveng uh chiang in mahni kihumbitna diing baan ah, gam-leitang kepbit ahih diing deihna toh Joint Committee on Inner Line Permit System kiphuantawm zok in State Sorkar ah thil Nga thungetna nei uhi. Tuate hiai anuai ah i taklangh diing:

1. Issue of Pass to all migrant workers at various entry points.

2. Cut off base year for implementation of the Bill should be – 1951. It was reportedly based on the earlier agreement signed on 22 July, 1980 between the All Manipur Students Union (AMSU) and all Manipur Students Co-ordinating Committee (AMSCOC) with the Government of Manipur followed by a second agreement signed on 9 November, 1994 between the AMSU with the Government of Manipur.

3. Giving no land ownership rights to all outside migrants entering Manipur after 1951.

4. Strengthening of labour department for registration and regulation of inter-state migrant labourers, and

5. Detection and deportation of illegal migrants (entering after 1951).

JCILPS in Manipur Sorkar a ngetna abawlte pen nguntak a i sim detdet aleh thupikuai petmah ka sa hi. Amaute lungsim a om ngaihsutna apan i galdotpih chiang in, huaiham mahmah uh ahih kawmkawm un, amaute a di’a bel hoih in phatuam mahmah diing ahihna ah chihtaktak a pangkhawm in kuhkaltak in michih, numei-pasal, pitek-putek leh naupang nasan akising souhsouh maimah uhi. Meeteite a kithutuahna uh etton taak lua uh ahi hon chisak pha mahmah ve…!! Pankhawmdan asiam ua, ILP omzia thei het lou zong mi bangzah hiam helna bawlte lak ah aom khamoh kei diing uh; himahleh kithalawp petmah a azu-a-haam thuak in sisan naisan toh sihna nangawn thuakngap in tunitan buaina abawltou zouden lai tel uhi. Nupi hon lamlian zul ah tu in, khenkhatte in lamlian zui a kikou in, nitaak nangawn a lampi zui a meiselde in ateek-a-khang akizui ngonngon maimah uhi.

August 04, 2015 nitaklam daak 06:00 pm akipan daakkal 48 (hrs) sung vingveng JCILPS – Student Wing Pawl in Bandh (General Strike) nei in Manipur pumpi ah buaina nasatak piang a, abiiktak in Imphal leh asehvel ah buaina nasa kholdiak hi. Tedim Road-Lamlian dung ah singtum-suangtum koih in, Airport Road-Lamlian laizang a singkung kisuan hing dipdip nangawn zungkalhkhia a, akahiang khenkhat kuaitan in thehthaang nengnung maimah uhi. August 05, 2015 ni a mun tuamtuam, Chennai, Delhi, Aizawl, etc., akipan Vaanleng a hong pai Zomi ngen pau tuamtuam mi 15 vel, Bandh ziak a atunna diing mun uh tungthei lou, Airport huangsung a taang omden uh ahihman in Imphal School of Preaching (ISP) Quarters, Airport Road, Changangei-Uchekon, Imphal ah ka na zintun kha thepthup uhi. Mrs. Sangte w/o Phungzathang Tonsing, Minister in Ambulance hon sawlphei a, August 06, 2015 zinglam daak 05:25 am in ISP Quarters akipan Lamka zuan in kipankhia uh a, zinglam daak 06:44 am in Lamka Vangkhua damtak in tungthei uhi. Mrs. Sangte leh Pu Thang tung ah kipahna asaang mahmah hi.

Tulihal-Imphal International Airport Main Gates nih nasan August 06, 2015 sunnung daak 01:15 pm akipan Bandh Volunteers-te in khaaksak uh a, buangnai gawphel a kaap in, mi kuamah paingam lou in Airport Compound sung ah sawtpi kikhum bichilh uhi. Indigo Flight Delhi akipan zinglam daak 11:45 am a hong tung diing: “Mrs. Maman, Dawrkai, Hebron Veng, New Lamka akipan ka hi”, chi in melmuh louh tongsan tungtawn in hon houpih hi: “Miss. Lulun, apa Truck tuahsiatna ziak a damzou lou, aluang lap teitei ut ziak a hong pai diing ahi a, Lamka ahong paisuak theihna diing hon ngaihtuahsak mai ve,” chi in hon gen hi. Huai phet in Mr. Mangkhogin Haokip SP, CCPur kiang ah athu omdan ka genleh, poimohngaih petmah ahihman in, Police Personnel 5 Lamka akipan zingsang baihtak a Airport ah mi hong khaa paikiik diing toh kituak lemgeih zenzen in, amaute hon sawl in, ka Inn uah zing-an nesak in ka ngaksak hi. Miss. Lulun leh Miss. Mary Tombing, anih un, Police Gari ah tuang in Lamka damtak in tungthei uhi. Miss. Lulun in apa it mahmah, akivuima a aluang, mit ngei a muman ahihna ah Pu Mangkhogin Haokip, SP CCPur hoihhawmna phatthamching ka sa petmah hi.

Midang hunkhop zing-anne lou a Vaanleng a hong pai zong omlai zawmah uhi. Nitaak daak 09:45 pm tan mahmah Bandh ziak a Airport huangsung a heentang a om, Lamka lam a pai diing mi 30 vel IRB pawlkhat in Airport huangsung akipan vapikhia in Press Club, Majorkhul, Imphal ah koih in om uhi. August 7, 2015 zinglam daak 02:00 am vel a paikhia in daak 03:10 am in Lamka damtak in tungthei bok uhi. JCILPS-Students’ Wing kichite in daakkal 48 (hrs) Bandh abawl uh ziak in mi tampi in buaina tuak uhi. Tutung a Bandh bel kituam petmah a, huaise mahmah hi. Moirang Lamkhai ah Lamka akipan Imphal a damlou hong ki-ensak, damlou puakna, Ambulance Gari kiiklam side-glass Bandh-volunteers-te in ana khetsiatsak uhi.

Mit ngei a mu a, bil ngei a ka zaakte in ngaihsutna hon vut vengveng lou thei kei hi. Maizen aw… maw…!! Banghang a ei pawl kikei-i-kikei-i i hi ua….? “Akta mangkuan kitu-kitu uh” ahi chih naupang neuchik ka hihlai apan, ka Pi’n hon hilh ka ngaihtuahna ah hong suak thakthak hi. Tup-le-ngim kikhat, deih kibang, selung tuak lou, bang hang hiam chihleh theihna leh theihkaakna taksap ziak bang, tungnun utna ziak bang, heutu hih kia ut a makaitu a lah pang taktak peih lou, Nambing-chibing, ‘Ka’ ahihke’h ‘Kei,’ mahni mimal angma sialna chihte baan ah, Setan in adeih pen hihtangtung diing a vanzat hoihtak azat gige: “Hazaatna” in Singtang mite lak ah tuni in vaihawm lellel ahihman in michih pilvan mahmah kisam petmah hi. Heutu dinmun luah a, Makaitu a pang khempeuh mi in tuni a ILPS nasatak a phaijang a ngetna apaitouh nilouh lai in; Ih pu-i-pa satsa gam-leitang taanthei diing dinmun ah om i bang maimah uh chih phawkthak a, Zodawn, khamtung gam ahihke’h Singtang gam (i.e., Hill/Tribal Areas of Manipur) humbitna diing a kalsuan diing in kihanchiam in, “Tak-kheh” chi in hanlungchiam dih ve ni…!!