Kei Mi Kipilsak’ Ngaihdan In Tuh
By VzSiam

Kipilsak chih bang leng tawlhuaipi khat hi veh aw. Mi’ thilhih teng bang ei ngaihdan toh kituak kisalou in, ana kilunggim pih mahmah. Va kipaupau khanaak in, mi i va sukbuai hiam sang a leng i kipilsakna in ei a hon sukbuai pen gimhuaizaw hi lim veh. Mi khenkhat tuh chihnuam un, pil lawlam uhia, hai lawlam uh hia theihlouh, mi chih dandan pomthei un, ei kihuchi khollou in, thil teng a i lungnatna di ana kimu hamtang in, ei leh ei kigawt tuh kihi peuhmah.

Paite chih bang le paipai i sak kaal a hong kimuuktuk dek hileh kilawm! Paite pau i chih bang leng bang chituk a zai ding hiam chih bang leng kibuai phiing! Kipiilbuai hileh kilawm.

Tedim ana saat masa pen Guite hausa Guimang tuh Tedim khua a a hong sih chiang in a tapa upa pen Vumsum in vaihawmna len in Tedim khua ah a sanggamte toh luun in pha mahmah uhi. A sanggamte hong pichin chiang un kho tuamtuam guan hi. Himahleh khatvei chiang in a sanggamte’n kihazaat ziak peuh in a upa uh Vumsum thah ding vai hon hawm uhi. Nitak khat that ding in va kuan peetmah ua, Vumsum pen a zi’ baan kham in na ihmu a, a zi’n tau leh hakpi  a baantawn a bun leepluap hi ve’n, a taltang heita a a va tohsak ua leh a zi’ tau toukha in Vumsum pen silou in liam hi. Tua bang thubuai hong om chiang in kho mipite’n, ‘Innpi Pawi gaal in hong luh ei,’chi’n kikou ua, sun leh zan in tawlngalou in Vumsum hutna in innpi khomi a diakkhol in Phaipite’n uum kiimveel uhi. Vumsum pen hong damkhia a, Phaipite’ tung a kipaak mahmah ahih chiang in hichi’n la phuak hi:

A mi poh za in tam e luun i lai ah
Phaitui ta bang ka heh neemzou omlou e
Phaitui ta bang ka heh neemzou omlou e
Kol leh zou damtui bang luangkhawm ngawn hi e

 ‘Poh’ chih thahah laizang, Lusei pau hilou a maw? Ngawn chih bang chihna a set a?

Tedim a sawtpi vai a hawm nung un Guite hausa Thanggou’ makaih in Lamzang khua ah Ngaihte-te’ chial bang in hausa ding in va kuan a, huai a leng va luun mahmah uh ahihman in tuni tan a i zat ding Lamzang chih hong piang hi.

Lamzang khua a Guite hausa Pu Summang’ heu a lun leh pha mahmah a a omlai ua:

Khuamual a kai ziilzial aw e
I hiam aw tulpan hiam aw
Tulpan hilou besam hi e
Leidoute besam hi e

Chia tong leh ai a ana laam lunglung lai ua Paite pau a na zanglou hi di uh hiam? Ana zang uh ahihleh a vual nihna a “I” kichi bang chihna a set a? Paite pau a a omkei leh kuate’ pau ah a om a?

Guite Hausa ei lawi theih mahmah Goukhothang tuh Phaipi suangkulh a a omlai a Meitei leng pa’n, ‘Sukte mangpa Kamhau n’on doupih ding leh hon khah ding hi ing,’ a chih leh Pu Goukhothang ut bilbellou hi. Tua chiang in Meitei leng pa’n thah ding in vau hi. Pu Goukhothang thangpai law mahmah in a samtum tankhia in Mualbem khua a a u Ningvum lavui toh khaak hi: (Dawng nihna kia taaklang ni)

Thei bang sen a tanglai thah paal chih tuanna
Mimphung pianpih chinmang in na leel ve aw
Mim bang pianpih chinmang in na leel inla
Vangkho lai ah sawl sang in na leel ve aw

Goukhothang le Paite pau theiloupi khat higeet a set maw? A tawpna vual a ‘sawl SANG’ a chih bang gen nuam a sengsang a?

Goukhothang hong sih phet chiang in a tapa Sumkam hong kipan leuleu a, a pa’ phuba laak hon tha-it mahmah hi. A phuba laakna tung ah lavui tampi phuak a, dawng khat en leuleu ni:

Ka zua’ thaamna teitui luun aw
Batlei a sial ding aw e
Tan bang kimna vangkho nuamnou
Lunglai a sial ding aw e

A pa’n Paite pau a theihkei leh tuh a ta’n le theilou ding mah hi. Thaam chih khawng hon zang a, Paite pau lah hi hetlou. I neulai khawng a ling khawng kimawl hang a, i hihkhelh chia, “Thaam” kichi hang a, thaam bang ki-utlou lua in khen chia kisel sawksawk maimah. Paite pau a pau kihilou hia leh, phiing a?

Palkhuang kho hausa Pu Vungzakham in a khua leh tui taan a, a zi leh tate’n a sihsan chiang un tongkhong kisa in la phuak hi:

Pianna phungmang hi chi’ng e
Zoutaang chi bang khoi ing e
Al bang mang kha va chi’ng e
Huan khang tuu bang chi’ng ing e

‘Kha va’ chih thahah, Zou pau hilou a set maw?

Khangthu lam hiai zah hi hen la, i tangthu theih mahmah Galmatpa’ tangthu ah:

Ka zua’ pigo leel dawn a dit sumlu aw
Hong tualkum aw na namtem hong zuun ve aw
Hong tualkum aw na namtem hong zuun ve aw
Ka zua’ sumlu taangziik bang hong ban ve aw

‘Dit sumlu?’ Bang a set a dit?

Nikhat tuh la phuahsiam a minthang ka behpa Phungmangte’ vokpi hong si thahah hi veh aw. A pa’n vokpi emna ding gamsai va paw ding in Phungmang sawl hi. Phungmang leng thumang tak in va kuan a, gamsai toh hong tung luutluut hi. Vokpi em dia hong kisak chiang in a vokpi na om nawnlou a, a pa’n ana zuak ahi maimah hi. Tua chiang in,

Ka namtem hiam na sa hiam ka zuapa aw
Gamsai sainawng pheek bang va zial ve’ng e
Gamsai sainawng pheek bang va zial ve’ng
Lulvok phamsa singkhual ah mualkai hi e

Chi’n la phuahsiam chih mahtak la in hon gen hi. Huaitak in a pa a lunghikei mahmah a, ‘Phungmang, la phuakphuak nawn ke’n, na la phuahsate’n hon kaanlum khong di,’ chi’n sal hi. Huai leuleu chiang in Phungmang in phuah nawnlouh malak ah,

Kei ka zaila’n phial sihva ka zuapa aw
A sing limlian lang leh mawng in phial hi e

Ka behte ahih ngal leh tuh Paite hi sam ding hi a, ahi a, ‘phial sih va’ chih khawng Paite pau mah hia leh? Phungmang tuh Saizang khomi ahi.

Sannem la khawng ah luutsuk lai leng,

U-le-nau simthu kidawng dilldial leng aw
Tou chiilchial in siambel tu bang chiing le’ng
Tou chiilchial in siambel tu bang chiing le’ng
I hawmkhelh zong ziin’ hawmkhelh chi ve ni

 ana chi ua, ngaihpha mahmah ka sa hi. Himahleh ‘tou’ chihte, ‘siambel’ chihte Paite pau diktak ahihlouh ziak un ka sa-ik khanaak hi. I sannem la phuak vualluite leh khangluite’n le pau dang ana ngaina mahmah uh chih muhtheih in om. Huchi ahi diam?

Haam la ah:

Haampi chialdoh tam tung a saam bang ka zaal
Laukha’n luainau bang na hong nou ei maw e
Laukha’n luainau bang nou a deih duang ka zuun
Tak a baanzaal a ka kawi neemnou bang e

‘Ei maw e,’ va chih khawng tuh ei pau hikei deuh leh kilawm maw. La a hihziak a a kilawmna ding leh a kimsakna dia a bulh maimai uh hia leh?

Hiai a tung ate Paite pau ahihkei uleh bang pau hi ding ahia? A phuakte lah Paite pu-le-pate ngen hi ua? ‘Poh’ i chih Lusei pau chi hang a, ‘I’ i chih Teizang pau chi hang a, ‘Dit’ i chih Hmar pau chi hang a,  ‘Sih va,’ chih khawng, ‘Tou’ chihkhawng Zou pau chi hang a, ahihleh huailai a bang dia ana huchi zat tel uh ahi dia? La ahih ziak a pau dang a va kawm uh hiam, ahihkaleh ze tuam deuh azat uh ahi diam? Huai le hithei.

Hiai a tung a lou leng tampi gen ding om. Gawl bang puuk, um bang tou leh a dangdang. Gawl bang ahia? Banghang a Um bang Tu chilou uh ahia? Khanglui leh vuallui late a, ‘Kiak, kiaklouh’ kichi tam mahmah in, bang hi mahmah ding hiam chia i kan kawikawi leh, ‘loupa’ chihna a na hi nengnawn. Teizang pau mah ana hi zel.

Pau upa i zat gaihgaih uh, Kamsiam in sial lei a sang, chih bang, Neek tek pha, puak tek zaang, chih bang, Deek a tuktum zong gaal suakthei, Hawmsiam a nungta, Pau leh haam chih leh  dang tampite khawng leng Paite pau taktak hilou maimah a, mi i piak vek ngai maimah leh kilawm hi. Kamsiam in siallei a sang, chih bang houh, pawl kua hiam sawm hiam ka hihlai ua ka Paite pau hon sinsak pa’n, ‘Kamsiam le hang mite’n hon deihsak ding ua, sial’ lei hon khol ding ua, sa meh kine kha ding,’ chia hon sinsak tang hilhial! En leng huai chihna di mah sa zomah. A khonung a theikhe phiing in, nuih bang za law maimah.

Tu a Lamka zaang a i Paite pau zat hong hong pianna tuh Lamzang pau ahi mai ding e. Huai ma in leng Paite pau a hong pianna pau upa dang ana om ngei ding. Bang pentak hi ding hiam chih i suut bunkei. Tedim khua mahmah leng Guite hausa’ saat himahleh Tedim khua sang a Lamzang a luun leh phazaw ahi ngei ding ua, unau Thahdoute bang in tuh ‘Lamzangpa’ chi’n honna u bawl mahmah uhi.

Paite chih le zaw ei leh ei kitheihna le ana hih chi hetlou. Kuki chih bang deuh a i kiim leh kiang a te’n a hon theihna uh hi nengnawn leh kilawm. ‘N’on theihna uh ahih ngalleh,’ chia Kuki kichi a hon pom khong bang ua ei pawl in leng huai lai a Paite chih a na pom khawng hi le hang kilawm. Min hon pete’n zaw zapi huap a, Lamzang apan Sihzang tan huap a min hon piak uh hive’n, a koilak a bang kiloh kha i hi uhiam tu chiangchiang in tuh Lamka-te kia Paite suak ta i bang hi. Genkhelh a hih lelah ngaihsiam. Sihna khop khelhna le hisam ke’n teh.

Pawlkhatte’n Ngaihte-te peuh phungtuam bang in gen dekdek mah le uh Lamzang khua i chih Ngaihte (Leivang) leh Vualnam/Gualnamte’ khua hi a, hausa ding a Guite-te a chial uh ahih chiang in Ngaihte-te kheel a Paite ding kua a omlai dia chih theih leh kilawm. Ahihhang in Ngaihte  i chih leng khua tampi a teeng hi ding ahihman un Lamzang a tengte tuh tawmchik le hi maithei uh ei mah ve.  

Huchia Lamzang a nuamtak a a omlai un Thanggou tate Tonsing leh Summangte khua satthei hong hita ua, Thanggou’ nu’n, ‘I om khawmkhawm nuamta hal in innsung numei naupang’ ziak a zong kinak-kiseelna piangthei ahihma in Summang in innpi ngak henla, na upa Tonsing in huai gaal a Lousau khua va saat hen,’  chi’n vai hon hawm hi.A kikhen uh kinak kiseelna a neilou ding, sa leh gaal a kihuh dialdial ding in hasuan hi. Huchia Lousau a a va teen chiang un Ngente-te’n va sim ua, huchi bang a hong omtou vingveng in Lousau awphawi hong piang hi dingdan ahi. Tua bang mah a omna mun tuam ziak leh kiim-le-kiangte’ pau toh kichimatna  leh kideeptuah ziak a aw phawi tuamtuam, Val, Dapzal, Ngennung leh a dangdang hong piang hi peuhmah ding hi.

Lamzang awphawi pen Lamzang khua a Thanggou a va om a nung a hong piangkhia hiam, ahihkaleh Lamzang khua a ana omsate’ pau hi hiam chih theikhang. Lamzang a khang lii vive, Thanggou, Summang, Pumgou leh Mangsum’ khansung om uh ahihman in huai sung in pau thak piangman mahmah ding in uphuai hi. Thanggou’ khansung in leng inn zagiat (800) mahmah phaman a, huai apan leng lutlam manoh toulai ahihman in a lut taktak lai in inn sangkhat vaal mahmah ding hi. Mi hong tengkhawm teng pau kikhat hi vek khollou maithei uh ahihman in pau thak a pianna ding baihlam mahmah khat tuh ahi. Tedim pau bang leng tua bang a pau tuamtuam khokhat a hong tenkhop chiang ua kholai pau thak hong piang hi lel in. Huchia miteng’ theihsiam ding pau thak hong pian chia phaze sa in hon puah ek un, tua hiaitan tung. A pianna pau bel Lamzang/Lousau pau mah hi veve.

Lamzang a i omlai in a kikimpih Dim pau, Sihzang pau, Teizang pau chihte a kiim ah om a, tuate baan ah Zou, Vaiphei, Gangte leh adangdang leng om hi. Paite pau i suut chiang in houh Teizang, Zou, Vaphei, Gangte chih khawng kigawm a hong piang ade aw hon chisak dekdek hi. A ziak bel i pau upa, i kammal upa tampi hiai paute ah tutan a kizang pawl omlai uhi. Bul munkhat a pan kakhe vek chih genlouh a maang hitaleh, Paite pau pen a kakhe masapen hiam, ahihkaleh a kikheek haatpen khat hi ding chihna suak hi. En lapau ah Malzin, Zalkhun i chi a, Vaiphei pau in tutan in Malzin, Zalkhun chih ahilai hi. La pau ah um bang tou, chia tou i chih khawng Zou pau ah a kizang den lai hi. Mi sih chiang a Langkhen i chih khawng bang i bulsuut leh Zoupau tung. I kigamlaat pih mahmah Hmar pau a ‘dit’ chih bang pi-le-pute’n ana deih mahmah uh.

Huchi’n Tedim kiim leh kiang khawng  kivial lehleh in, khen chiang a Sailou gam naihlam bang a va om, taikhe zel, huchia kivial lehleh in tawp in mallam tua i tenna i tung khong uhi. Huchia i omna a hong gamlaat chiang in i pau awlawl in hong kikheek a, i kinaihpih mite’ pau toh awlawl in a hong kihel toutou hi. Sailou lal va beelte’ ziak leh Duhlian pau a Pathian thu i na awi masak ziak un Pathian chih bang i hon nei a, chikmah a R neiloute bang in R i hon neita a, Zingkar, Zirlai leh a dangdang, huan ah Tohtanni, Thohlehni chihte bang i hon nei a, huan ah T awlawl a hong bei in Ch in hon thakheek a, Chu, chuh, choh leh adangdangte hon nei in i pau utuh ah hong hausa mahmah ta hi. Vai pau, Meitei pau, Sap pau chihte bang leng kawmtou pek in i pau i hon phungvuh toutou a, tulai a Lamka zaang a i Paite pau theih tuh hong piang ahita mai hi.

Khenkhate’n khanglamte ‘INNPI’ a chih naakkhem uh theikhial hi un ka thei. Innpi tuh maallamte i hi zaw. Guite Innpi tuh i innpi uh ahi. Sim leh maal a i kikhen kuan ua Guite leh Sukte la a akikhaakna un gen chian hi:

Sukte:

Khawllai ve aw phungmang aw heilai ve aw
I phung simthu luaikhau bang suut ve ni e
I phung simthu luaikhau bang i suutmoh leh
Tongdam neem in zin bang kikha dialdial ni e

Guite:

Sing bang ka hiang hon khia chia tuaimang aw
I chiin phuhsing bang khuah leh n’ong chi ahiam
Phuhsing bang khauh tongdam neem na ngaih leh aw
Phungmang hi’ng e ka liim sawl bang beel ve aw

Huchia pau thak tawm toutou a, i pau hausa semsem ding hi na pi i pau luizaw deuhte peuh midang a hi, chihbawl in mi i piapia thei leuleu a, i pau tuh a hauhsak ding bang in hausa theitalou hi. Nungta, gol, hanchiam, vanglian leh a dang tampi tua ka ngaihsut khiat phut theihlouhte bang mi piakbawl i bang maimah uhi. Kihta, deihta leh a dangdang khawng bang leng zuak bawlbawl mah i bang uh.

Thumal tamzaw a malmal a et a hiai Paite, hiai Tedim chih omlou hi. Kikhat ahihman in a om ding leng hilou mah hi. Himahleh kum huaizah kikhen nung in awphawi leh thuvual lepdan hong kikheng a, huai in Tedim leh Paite chih hon khen lel hi. I omna chiat a thumal khangthakte’n i topthakte toh. Mihing a lungleng thei ki-om a, a lengthei hetlou leng ki-om sam hi. Pawlkhatte’n nidang a kikhat hinapi a tu-le-tu kaal a i kihichi gamlaat mawk hilou hiveh aw, chi in lunglenna hon nei in lamtuam tuak a pailai awlawl in kinaih hiaihiai leng a tawp chiang in kisutuah nawn khong na ni chih bawl uhiam lampi awlawl a hei hon sawm uhi. A huchih chiang in pawlkhat, a lungleng theilou pawl, ngat nalam kheek ut bilbellou nawnlou pawl hong om tageet hilehkilawm a in a lang hi. Mihing ngeina hizel in, a kua mahmah mohsak theih le hilou zel. A lunglengte hi in a leng theiloute hitaleh.

Ahi a, kei bang in tuh laimal zatdan kheek chih khawng poi sa hetlou vivet zel. Kipilsakman a diam a lah thei khang. A Aw, B, Chaw a chi uh hiam ah, A, B, C a chi uh hiam ah. O a chi uh hiam ah Ou, a chi uh hiam ah. A hoihzaw ding a hihpeuh leh ‘Ka kha ga’ zang ni chi le ule genhak hetlou dite pawl hi thepthup zel. Tua bang a kheek khawng mi masa, laimal masa ana bawlte simmohna a le thei hetlou, a hoihzaw ding a hih naak leh a mau leng thei hile uh kipaak thou ding un ka gingta. Sapte, en sapte i chih zazat vial na a, mangkangte chihman zaw Paite pau dik hizaw veh aw, i neu apan i na zangkhakei a, i zang utkei chihman hive’n, khawng in leng Shakespeare-te hilhial khawng in ana zat uh laimal leng kheek sam thou uh ahih chia. Shakespeare’ gelh dandan a sim di chi le simthei di kisa na hi umaw heuhou gouh. Hiai sapte le thil teng a va genkhak in a om naakkhem ua.

Sappau hong piandan khawng hoihtak in suut le hang pau kidamkheekdan (evolution) i theisiam dia, i puakgik tampi hon dawn leh kilawm. Kei leng ka bil leh ki a kikim lai a tuh purist khat ana hi lenglang sam. Zenmah a. Himahleh tua tuh liberal lawta. Bil sang ki sauzaw ta ahi diam ah. Pau i chih khawng kikheng ngiitngeet mah ana hi a, awlmoh ziak a khaam theih le hilou. Deihluat ziak a noh theih le hisamlou. Tua kei a dia pau dikpen a ka theih, Lamzang pau leng pau dang khat hiam bangzah hiam a pan hong piangkhia hi dia, a hong pian tung a mite’n pau phuahtawm chi maithei uh. Himahleh hun hong paizel a, ka pa’n a neu apan ana zang a, ke’n leng ka neu apan ka hon zat chiang in a dikmah, a gil mah, ahoih mah a pom hilel ing a. Tua bang in ke’n leng tulai a Lamka zaang a pau kizang pen kholai pau, pau bawltawm ka sakna a om hi. Bible skul a kai Lamka zaang a khangkhia a naupang deuhte’n pulpit tung  khawng a ‘Chih chuh, eih chu’ khawng hon chih chiang ua hon bi zozot om hileh kilawm. Himahleh tuate hong kizang toutou ding a, itu-itate’n a neu ua pan hon zang ding uh ahihman in a dikpen mah a hon theitou ding un, a bi ding om nawn tuanlou ding.   

I pau a awphawi tuamtuamte’n khang tam hon daihnawnlou ding uh a bang hi. Huchia i awphoite uh mangthang ding ka ngaihsut chiang in paammaih ka sa a, ka na lungnat pih mahmah hi. Ei lungnat a lah phatuam di bangmah om le hilou. Mi upa kuam Lamzang pau a pau khiitkhiite’ kiang a ka om chiang in ka kha muan in a muang maimah thei hi. Himahleh hichi bang awphawite’n sawt a hon daih nawnkei ding. Ikiim-ipaam a khangtou zawte’ a in a hon deep dia, a tawmzaw nana tuh nawmvalh in i om khong ding hi. Khovel paidan ahi a, dahpih-kahpih ding leng a hisamkei.

Tulai ngial houh Laisiangthou leh hu in a hon zaap a, i phe sauhsauh uhi. Laisiangthou kheek himhim phallou toh, thumal zatdan deihlou toh, i piilbuai uhi. A let ding maimai bawn hichi buai, huai a Laisiangthou a bangbang tuangsak ding i hi uhiam, chia a komiti lai un omkha le hang buai mah tel ni hang chih in a om phet hi. Namvai leh sahkhua polhlouh ding chi toh, i chiak vengvung uhi. Ahi a, Samuel-te khawng in siampu nna leh kumpi nna a na kop zeelzuul zel ua. Pathian thu in salam natan a kigawmna hon tut theihleh naak hoihlua hizawlou hiam chi nuamdan ka hi leuleu ve. KJV ma a kumpinu Elizabeth in Laisiangthou ana lehsak bang a kawm a ama’ lim tuangsak eu-au. Akua-akua in le sakhua leh nam vai tuh khen haksa ana sa chiat uh ahi di.

I ngaihnat mahmah KJV bang houh kumpi lah hi, saptuam a thuneipen leh sangpen lah hi Kumpi James thupiak a hong piang hi zel. Huai le a lalgam kikeek leh puksiat ding venna dia a hih ahi chi pawl bang om un. Kumpinu Elizabeth hunlai a saptuam a kikheekna deihkhoplou Puritan telawi’ vuina lah nawlkhin theilou, England saptuam Cotholic ah hong kiiknawn hen chia lunggulh Bishopte lah haat mahmah uh, saptuam’ thu ah Kumpi kigolhkha kei hen chia pang pawlte lah beilou, huchi vingveng kawmkal a hiai vaipi hon sawm tuh ahi peuhmah ve. Lah huai hunlai a omkhalou i hih chia, a gen teng’ gendan tuam chiat zel dia. Kua le gintaak di adiam ah. Thumal zat thu bang ah leng pau tualleng mah in hi heh i chi hi. Himahleh tehpih a i neih, i kawk gaihgaih KJV bang leng pau luipi, huai lai a kizang le hinawnlou a hon gelh thepthup zel ua. Thou, Thy, chihte khawng. Huai ziak mah a ei tan in leng Thou, thy khawng i chih chia vantung dengkha diak di mah ana kisa toutou hilim in, zang siam ngellou a zang kankan hi lim hang. Huaite zat lah haksa sa hetlou in, lah ei pau lui deuhte huat chihtak a haw bilbel zel. Thumal luite bel a omsa zang hi ua, huaite genlouh thubawng a phuahtawm vilvel bang uh le om.  A lehkhiat tuung ua mi’n zang pah huhut uh i sa kha thahah de. A tamzaw in deihlou uh. Koihdap a om. Kum tampi nung a hong kithangkhe phiing. Tua i koihdapte le khangthakte’n awl a hon deihlawtel maithei uh ahi aw aw.

‘Kamsiam in sial lei a sang’ chih bang a ‘sang’ chihpen bang pau hi ding ahia? Kamsiam le hang mi sial i bat na ngawn mite’n hon ngaidam thei uh ahi, chihna hi thepthup veh. Kamsiam le hang mi’n hon paakta ding ua, sial’ lei hon khol di ua, sa kimehkha di chih lamlam tuh ana hi hetlou. ‘Lum bang sung’ chi tageet. Lum tuh a haksa thouna a, a haksa lawmlawmkei a, a ‘sung’ pen tuh haksa mahmah ei ve. Liah/daal chihna hi leuleu in. Tu a Lamka zaang a Paite pau kithang pen kia Paite pau hisak ding i hih uleh tuh hiai a tung a pau upa leh lapau kigen duanduante leng ei pau hilou chia i koihkhiat vek ngai maimah leh kilawm. A gen i theihlouh bang chi’n ei pau ahi thei mahmah dia! Mi’ Paite a kichih utleh-utlouh ua buailou in, a pau uh suhsak le hang Paite pau hisuklel mai ding hi. Kamdam a gen a utlou tuh thagum a suh di hilel! A suhdan siampeuh le hang sutzou mahmah ni hang!

Huaiziak in kei mi kipilsak ngaihdan in tuh Laisiangthou leh toh kisai bang leng a grammar dik henla, thumal bel mallam Lamka apan simlam Saizang tan huam henla, i pau mal mangthang sate bang guanluut hi henla, a mangthang dia kisa lellelte bang leng telsak hi le uh chi kei ve.

Khatvei ka ni’n ka pate’ neulai thu hon gen thahah hivoh aw, “Na Pa Vung bang in a neulai a zu duh a duh maimah. Hai dim bang phailouh konkon maimah,” hon chih leh a hai pentak tuh lapau a a om man in sialki chihna ahi chih ka thei pah a, himahleh ‘phailouh’ a chih bang chihna hiam ka thei zoukei. Ka dot khong leh a gen a hon hilh hi. Huaiziak in kei’ theihlouh leh zat ngeilouh man a Paite pau hilou tuh ana hi hetlou eive ka chi phiing hi. ‘Hai’ bang leng chikkaal a ‘nou’ hong suak ahiam ah.

Pau i chih khawng kikhengkheng mah hi a, ei theihsung kia a leng kikheekman a hihman in khangnih-khangthum a tuh a kikheek luat di theihsa. I pute’n kammal zat teng bang leng theisiamlou hi tel hang a. Tuma kum zanih lai a Paite pau tuh ei te’n i theisiam heuhoukei ding ua, tunung kum zanih chiang a Paite pau ding leng i theisiam nawnkei ding uh. Paite pau bel ahi veve ding. Huaiziak in a ut dandan a kikheek sak in i nungzuih hiam, ahihkaleh laizomte kinaih seemna dinglam ngiim in i hei hiam, ei thuthu ahi. I lohching in i lohsam thei, himahleh tup tuh i tum himhim thei. Khai, ei theih khawng tawmchik hi veh, gentham le hilou. I theih sunsunte le dikdik u le ahi na di uam ah. I kipilsak man a hon se khiakhia hi lel hang.

Pu Goukhothangte khawng hong thoukiik bang hile uh, ‘Nang na paudan Paite hikei teh, Tedim a kipai aw,’ ana chi tawk ni hang. Juda-te’n a mingakpa uh ana khailup heekhuuk bang un.