SCHOOL A CORPORAL PUNISHMENT TOH KISAI..
By Thangkhanlal Ngaihte, Columnist Zogam.com
July 23 2015 a Blue Star Academy, Lamka a student te physical punishment ziak a liamna tuak hong omnawn ziak in Zomi Students Federation (ZSF) te’n a school khak ding in thusuah bawl uhi. Tunai deuh a India a danthak dungzui in school te ah thagum suah a kigawtna (corporal punishment) phallouh ahi.
Hichi bang buaina eilak kia a om ahi kei. Zanzek mah inle Telangana state ah student khat corporal punishment ziak in sihna tuak, chih facebook khawng ah hong kitaak lang hi.
Hiaithu ziak a kikup theih thu tampi om hi. Huaite lak a thubul mahmah khat tuh corporal punishment piak phallouh chihpeen eigam khawng adi’n thilhoih ahi hia, hilou, chih ahi.
Athu vasuut thak man kei mahleng katheih dan in hichibang dan te western (American) gam lamte idea leh hihdan ki lasawn ahi. Hiai kha issue lianpi ahi. India tebang ei dinmun, culture leh history enlou pi a America te hihdan copy mawk chih kithang sak mahmah. China khawng in bel western concept of human rights khawng bangle kou history, culture (deeply influenced by Buddhism and confucianism) leh khosak dan toh ki mil lou chi a ana contest thei unchin. Zanlam zek mahmah inle America te’ naupang kepdan (ut-ut hihsak, freedom pia) toh China te naupang kepdan (khauhtak a enkol) koi hoihzaw ahia, chih debate nasa tak ana omta hi. Tunai a laibu hiaitoh kisai minthak mahmah 'Battle Hym of the Tiger Mother', chihbang ahi. Hiai laibu ah China numei, America te pasal nei leh America a khosa Amy Chua, Yale University a professor in a nu-le-pan amah strict tak a ana etkol dan uh, China te method toh America te a compare in, aman bel China te'n strict tak a naupang a kolna uh deih huai sazaw chi hi (a laibu bel ken simlou).
School naupangte zeep louh di, physical punishment piak louh di, chih bang le western concept of individual autonomy, freedom and individual human rights apan a hongpiang hingei ding hi. America khawng ah bel hiaite khawng apan society ki phut le himai hi. Mahni hoihsak dan chiat a khosa, right to privacy bang kingai thupi peetmah, kipawt tuah zeel zuul omlou, sense of community omlou phial, I poimoh leh amau le hon poimoh techauh toh contract-basis a kizom, chih khawng. Kikawm tuahlou law zezen ua naupang khawng pimang a amau huangsung khawnga akhum chiang uale kum tampi nung khawng a mukhe panchauh zeel uh hilou hia…!!
Ei gam society kipuak dan huchi hidek lou ahi. I neih leh lam in adaihlouh ziak le hithou a joint family a innkuan tam pipi kiteeng khawm. Privacy chihte bangchu naupang gentak louh kiteeng tung nupa inle lamet phak di hilou. Individual sang a community kihah gen. Mahni a kitou delhzou pah omlou, nu-le-pa te support natoh amau toh teengkhawng a sawtpi ki omkhawm ahihchia kithu hilhna dan ale nu-le-pa te zahtaak di, athu thu uh man di, chih himai. Huaitoh kizui a school bang ale teacher te gen gen kha thudik, zuih di himai. America te’n anaupang te uh lak a spirit of inquiry, questioning, doubt chihte a cultivate lai ua eilam inbel spirit of order, conformity leh obedience ki cultivate.
America te paidan zuihtheih nadia chu hauhsak deuhvek bangle poimoh di eive. Eilawi in I paidan leh culture bangmah kikheng lou pi a dan (law) kibawl khat peen iva zatsawm mawk chia adik zoulou tampi hong om lou theilou ahi. Katheih dan a America te’n chu corporal punishment kha school chauh a khaamlou unchin, innsung mahmah ale khaam uh eive. Nu-le-pa bang inle atate vua in atate un complain le uh case lianpi suak di. En bel innsung lam genphak hilou, kholak le genphak hilou, school chauh a khaam mawk. School pu te adia haksat chi sa peuhmah kahi. Kei le kum 2000 apan 2004 sung Childrens Training School, Lamka ah teacher in kana pang a, naupang tamtak, innsung a etkol manglouh, ahihkei leh innsung a vuak thuakthuak, poisak le nei khollou khawng tampi ki om in, chiang zanglou a class control di chu haksa mahmah dia mu kahi.
Akiim akiang enlou pi a Bible chang eideih dan prove nadia zat hi ahoih hetkei a, hilele hiaitoh kisai Bible a context om hetlou, thupil liauliau a akigen na Proverbs achu naupang control nadia chiang (stick) leh gawtna apoimoh dan gen eive. Huchi dimah ahi, chih ka ngaihdan ahi. Ahi a, dan omsa ahi ta a, hiaite bel perspective ineih theihna dia kon gen ahi.
I thilgen toh kizom thou, thudang khat gen beh le: India te criminal justice system bangle western system kila hi’nchin, conviction ngah nadia proof leh evidence a demand kha sang mahmah. Huaitan sangtak a case vasui a, proof leh evidence court in apomtheih vangah nadia police leh investigator tekha training hoihtak nei, laisiam, vanzat hoihtak toh kivan hihngai. Huchi om deklou ahihchia case asui peuh uh conviction ngahzou ngeilou uh. Enve ua ahahsui diak te uh Aarushi case bang, or, Jessica Lall. Theihtawp suah akichih chiang ua third-degree methoh khawng himai, custodial death khawng pung dedeuh, chihkhawng. Atawp chia frustrate gawp in court a paipih a court in lack of evidence khawng ziak a akhah maimah di lau a kaplup thoh top, chihkhawng. Mulkim huailua hikei leh nuih anuih zaat huai di ahi.
Blue Star case alut nawn zual le: Bangteng hileh dan (law) om ahihman in huaibel zuih dimah ahi. Ahi a, ZSF te’n school khaksak asawm ukha thuvaal leh poimoh lou deuh bang hi. School ichih business dangtoh kibang hilou a, dawr dan a ikhak sak leh aneite’n sum mulou geih uh chih hilou hi. Athuak behseem dite chu naupangte leh anu-le-pa te uh ahi. A school ah hiaibang thil atung mun lawta chi ihih leh a school management leh teacher te hoihtak a kihou pih di ahi. Teacher te hoihtak a training poimoh lua ahi, tu dinmun in training nei ki omlou phial ahi. Akhut khial teacher khat ahi a, huaipeen in khengval leh dankalh ahihleh punishment hoihtak piak di mah ahi. India dan ahih dungzui in Government a hiailam saipawl te ban ah school association tetoh bangle pankhawm hoih ding hi. Report louh hichi bang case om lailai ahihleh student te zattheih di grievance redressal mechanism, complain bawl theihna, leh thuuk deuh (intrusive) a school a thil kihih te inspection bawl theihna regime khat school tengteng zat dia bawlkhiak hoih ding hi. Hiaite khawng lam ah ZSF leh pawl dangte’n panla honla le uh agah kuitung zaw piang ngei ding hi. Thu haksa ahi a, thakhat a bawlhoih guihtheih omlou ding hi.