Mittui Toh Ka First Love..!!
(Real-Life Story)
Written By: K Lianthansang

“ Hun hongpai zek dia, damdawi inn bangleng - siangthou gawp, nuam gawp, khiatlah huai ngoihngoih, khitui-naptui toh pawtsan ngaih hun tuang hongtung diing!. Nungak-tangval kihelna mun di’n  leng, damdawi inn sang a nuamzaw hong ompah diing hi, lungkham sawh! ” – Lianzamang Tonsing@ ZM Tonsing.

Mite’n a hinna uh itlou in ‘necktie leh-oh(awklum)’ mahle uh; ken zaw, ka tapa khawthei nailou in hon sihsan di nangawn leng ka ngaingam kei.!.  Lamka Damdawi Inn ah ‘Paupu Auto’ zangin ka pawlut  a, lam-etna lianpi toh ka ang ah ka pombelh thiintheen hi.  Ka tapa in deihteelna neuchik nangawn aneithei naikei na a, a nu’ anglum zaw ngai lawsam di hiven.!. Anu’ nawitui teep a, anu’ angsung mahmah aa khanglian diing in ka tapa deih mahleng,  hithei di vual ahi nawn kei.

Hon panpih diing in, ka unu(ka sanggam numei) om mahleh, ama’n leng naungek pomlai ahihman in, a deihbang in hon panpih theikei zel. Ka tapa ka en zel a, gentheih dang ka nei tuankei. Nurse-te’ melputdan in bel, ka tapa khahsuah di ka hihlam ka haihkei. Himahleh, lam-etna ka nei lailai a, Pathian’ kiang ah ka thuum hi. Pathian, bangkim hihthei in, pha asak bangbang a vai hon hawmsak diing in, akhut hat leh muanhuai ah ka laan khe top mai hi.

Ka tapa hichilou hileh;  a pi leh pute(kei’ nu leh pa) kiang a paipih di chi’a, Train ticket leh bangkim ka sai felsa diam leng ahi bok. Damdawi inn ahitheitan in pumpelh sawm mahleng, ka tapa’ hinna ka humbitna di’n alou theilou asuak veve. Ka tapa’ meel ka muhchiang in ka khasiat tha asuak a, projector a kapkhiat mahbang in, a nu’ meel bang ka mu dundun hi. Kipasal sak in khapet zeen in pang mahleng, ka mittui in om maimai a sawmkei. Phur deuhdeuh abang zawsop ua, a chaang in apawlam ah hong kinawn pawt thepthup uhi. Kei, beidongtak in om mahleng, ka mittuite bel kipaak in apawlam peuh ah hong laam pawt dialdial nilouh uhi.

Nurse te’n ‘Oxygen’ hon bulhsak ua, lupna tung ah ka sial uhi. Sisan leng unit khat poimoh chih ahih zawkmah ziakin, kei a di’n lungkhamna hong kisuang sawn hi. Blood Bank a’lah sisan koihkholh(stock) omlou(Electric ginatlouh ziak himaithei). Alungkham huai tel mai….’bang doh-ai tui dawnkha ka hiam?’ chih vungvung louh ngal lah, gen didan dang kithei tuanlou. Huchi’a ka om laitak in, media-te mi bangzah hiam toh, “kei ka hi”  kichi khenkhat hongpai ua, Vote zonna diing in hon zat sawm uhi. Ka tapa in sisan ataksap ziakin  sihna liimguam tawn mahleh, amah zaw Vote(simlei vai ah) zonna diing in ka phalkei.

Akhawnung in, “kei ka hi” kichi lou a; ”nang na hi” chithei zel , social worker khat hongpai a, ama’ tungtawn in sisan ka poimoh zah uh ka ngah u(hi). Mi hontheikha khenkhat in, “nang’ na sisan pe mai ve..na tapa itlou na hiam?” hon chi atam mahmah. Ka piaklouh ziak gen di chi leng, ka gen sung in ka tapa ka khahsuah diing. Huaiziak in, huchia hon chite’ kiang ah, “ka tapa ka itluat ziak in sisan ka pethei kei..” chih, ka dawnna ahi mai hi.
Zankhua a gilna sa a kipeek ahihman in ka beidong mahmah a, zingkal dak 5:00 (khua vaakta) in Lamka Damdawi Inn aa ‘Casualty(kezualti)’ ah ka vataipih ‘zual’ hi(huailai a casualty omna building pen, sim-le-mal  kawk aa kikhamphei pen ahihlai ahi). Lam-et banglou takin kongkhak ana kikhak bikbek mawk hi. Pasal pitou, nau pawkawm(ka nau lah kapkap zomah) a beidongtak a om ka hihman in, nupi khat in hon awlmoh lua a, ka nau hon pomsak zozen hi. Akiang ah,”doctor omlou hia?” ka chihleh, “theilou ka hi, kei le damlouh giahpih a om maimai hi’ng a…” chi’n hon dawng hi.
Huchia, minute 20 vel ka omnung un, kongkhak hong kihong niatniat(awlchik in) a, pasal sangsim(ngou lawlou) khat hong pawtkhia hi. Akiang ah ka buaina ka tun ngal a, himahleh hon dawnna in ka lung hon neem zoukei. Huai pa’n(amin ka theikei),”Doctorpa innlam a giak ahi, dak 6:00 a hongpai di..!” hon chi hi. Ka lungsim in,’Casualty(kezualti) ahih ziaka, innlam khawng a…duty lai va giak khezual(casual) khawng hi’n teh..’ ka chisuk mai hi. Himahleh, akhawnung pek in thu omdan ka thei khia a, kikheel ahita. Mawl law kei leng zaw, huaihun in ka,’power’ ka lakkhe ngeingei di.!
Daktolpa lah hongtung pah lou di ahihman in, ka innlam uah(New Lamka lam ahi) ka kik a, Bethel Veng a om Dr. Nengkhanmang ka va phawng hi. Aman ahihtheih tawp suah in hon veel pah tettet a, damdawi bangzah hiam hon  gelhsak in, innlam ka zuan nawnta hi. Ka tha bang azoi demdum a, ka khaw-ul bang kai neunuau zozen hi. Gari neu(Activa) neilou hi maizen leng, bang zahta in ka buai phet diam aw(alang-alang a taituah ngai ahihman in). Huaini ziingkal mah in, damdawi ka lei a…piaktheih liai teng ka pengal hi.

Hong hoihtheih khaak leh chi’a, huai sun ka hungaih hang in aphtuam tuankei. Nitaaklam in, ka innkong ua hongtaisuk ‘Paupu Auto’khat ka khaam a, kintak in Damdawi Inn ah hong kha hi. Damdawi inn ka lutdan hichidan ahi lel a, adang gen di lua ka thei bunkei. Ka khawnung ngaihtuah kik chiang in leng, ka omdan ka theihzoh nawnlouh atam. Ahai zaw hizen kei mahleng, ka lunggim luat ziakin ka thil chiamteh theihna bang ka mansuah phial hi.
Damdawi Inn aa ka lut zaan uh, kha a vaak phingpheng zozen hi. Ka sanggamnu leh apasal honghoh ziak un, khawphawklou a lum dildel ka tapa’ kiang ah ka omsak a, kei ahihleh damdawi inn veranda ah(hulliap innka) ka va omkhia hi. Ka daakkhia a, compound sung a waitingshed chihdan, buuk kibawl ka gaal et a, ka lung aleeng tel mai. Ka lawinu(ka zi) toh, ka kingaih lai ua itna thu ka genkhopna mun uh ahihman in, mittui luang zungzung kawm in, huai buuk neuchik khat ka en nilouh hi.

Ka kiang ah, kei’ zuan behlaptu diing in; damlou veh uh hia, kiheel uh? Chih, theihbut huailouh in nungak-tangval a phe souhsouh uhi. Khapi in lah a vaaktheihna zahzah suah in, Damdawi inn huangsung hon salvaak phingpheng a, kei di’n mittui luanna lel asuak hi. Ka tapa ka ngaihtuah zel a, alangkhat ah ka zi ka ngaihtuah kha zel hi.  Ka zi toh ka kingaih lai ua hiai huangsung, kiheelna diing a ka zatkhak uh ka kisiik mahmah mawk hi. Ka lawmpa, ZM Tonsing in “…Nungak-tangval kihelna mun di’n  leng, damdawi inn sang a nuamzaw hong ompah diing hi, lungkham sawh! ” chi’a, hongen lai khawng ka ngaihtuah khekha a, a chaang in ka ‘tuike nuih’ veivuai  zel hi.

Khavaak en in, lungzuan zatam sialsial mah leng, ka zi’n kei lungzuan hon phawkpha nawnkei. Khitui nuul a, solkha taang nuai a kei kia ka omom in omzia neilou ahihdan ka thei a, ka tapa’ kianglam ka zuan nawn hi. Ka luut nung sawtlou in, ka tapa hon hak a…akhut bang taangsak in, thil gennuam nei bangmai in om siamsiam zozen hi. Ka tapa ka hehpih tel mai. Anu’ anglum ngailaw di zaw hiven maw..? Hiaihun in zaw kideek ahaksa tel mai. Pasal himahleng, ka mittui khaam vual di ahikei. Akapkhia bel ka hikei a, ahihhang in ka lungtang ah sisan ki-pump kin mahmah ahihman in, ka mittui leng hong ki-pump pawt zungzung hizaw hi.

Sawtlou nung in, ka tapa pa’n hon beisanta. Ka pawna mahmah a, hihtheih dang ka nei tuankei. Mohsak didang le ka nei tuankei. Pauthei hileh, ka tapa pa’n a mohsak di pen  zaw, ken leng gentan haksa ka sa. Pathian’ kiang ah, ka tapa’ hinna ding in thuum mai leng zaw, dam kha mohlou di hiven. Ka tapa’ hinna tung a thuneipen, ahon pepa Pathian ahihman in, ama’ khut ah bangkim ka nga hi. Achaang in, kei ka kimohsa  mahmah. Himahleh, bangkim hihthei Pathian in ahoihzaw di atheih ziak a, ahinna hon laaksak ahi chi’n, pomsiamdan ka kizil tawm hi.

Ka khonung ngaihtuah chiang in, Pathian’ thupina ka musuah deuhdeuh hi. Ka tapa dam hileh, hiai leitung ah ka omnawn kei diing. Ka gen omzia bel; Pathian in ka maban saupi a muhkhawl ziak a, ka tapa damlou sak ahi, ka chihna ahi zaw. Aziak ahihleh, kei’ lemgelna zang aa ka nu-le-pa’ kiang phak ka sawm pen lemthei hileh, Train accident in ka sikhin diing. Train ticket man ka seen teng ka muhkik louh hang in, ka hinna humbit in om aa, ka tapa’ tungtawn in Pathian’ mel ka mu zawta hi. Pathian’ lemgeldan zaw lamdang in thupi hina tel ee..

Pathian in ka tapa’ hinna hon laksak in le’ng, gen nei mahmah diing in ka gingta. Kei’ ngaihtuahdan in ahihleh; ka tapa in, alawm-le-vualte eng ngoihngoih a akhawsak di Pathian in phallou a, ahinna laksak ahi, ka chimai hi. Aziak ahihleh, ama’ utthu hilou in tagah asuak maimah a, tagah asuah kia hileh phave…natna lauhuaitak leng avei hi..!!. Huai natna lauhuai pen, ka tapa in adeih ziak a avei ahikei. Ken leng ka vei kha a,  ka deih ziak a ka vei ahi sam kei. Sisan piak angaih hun in, natna lauhuai vei ahihlam ka theikei a, ka sisan ka penuamkei hi. Aziak ahihleh, ka tapa in kei’ sisan sianglou, a damsung akepdet di ka deihlouh ziak ahi zaw. Huaiziak leng ahi,” ka tapa ka itluat ziak in sisan ka pethei kei..” chi’a ka genkhiat top.

Hunlui suut in, hon lehkik zual leng, ka tapa’ sihziak achiang mai diing. Ka pa’ sepna ziak in, mun tuamtuam ah ka kisuan kual zelzel uhi. Ka pa’n Shillong aa aposting lai in leng ka innkuan un huaimun ah ka khawsa uhi. Huaimun ah, ka College kaipihte eimi(anu Khasi, apa eimi) khat toh ka kingai uhi. Apa’ ziakin eipau asiam mahmah mai a, ken leng ka ngaisang pah hi. Anu’ ziaka Shillong a inn nei a, teeng uh leng ahi bok hi. Ka kingai mahmah mai ua, a nu-le-pa’n leng hon deihsak mahmah uhi.

Hunte hongpai zel in, ka ki-itna uh hong kip deuhdeuh hi. Ka ‘First Love’ ahih ziak in ka ngai diak a, aman leng hon ngai huntawk mahmah hi. Kum bangzah hiam ka kingaih nung un, Lamka lam a ka pa kisuan di ahihdan thu ka thei ua, ‘order’ asuah phetphet chia paikhe pah di ka hihdan uh ka haihkei. Ka sungkuante’n, Lamka a om di akipahpih mahmah ua, ken bel ka ngaihnou tellou a hinkhua zat di hithei ka sakei. Ka om anuamthei mahmah kei a, ka sunglam aa akimlou khat om bangin ka kithei hial hi.

Lamka lam a ka pai dek nitaak un ka va pawt a, ka ki-aam tel mai uh. Anu-le-pa’n leng sawtpi kimulou di ka hihdan uh hon theih man un, hon theisiam mahmah ua, hon lupsan hial uhi. Amau bel hausa mahmah ahihman un, room tuamtuam tampi petmah anei uhi. Mi’ luah diing leng anei lai uh. Zaan sawtnung aa, kou gel kia om ka hihman un leh sawtpi kimu nawnlou di ka hi uh chih ka kitheih man un, ka kipomthoh hial uhi. Huchia bangtan hiam ka omnung un, ka nungak nu’n “n’on phawk gige na diing in, thilkhat k’on pe nuam, ka room ah hong lut in…” chi’n hon zawn a, ka va lut hi. Hon thil piakdek ka ngaihtuah chiang in, ka thei bunkei.

Mitsi diing in hon sawl a, ka mitsi nilouh hi. Hak diing a hon sawltak in, ka gintak ngeilouh pentak piak honsawm ahihdan haih di vual ahikei.  Nidang a, “I kiteen chiang a k’on piak pat di’n, hoihtak in ka na kem siang gige di aw…” chi’a hon gen pen, honpiak sawm ana hidaih hi. Ka nial hang in, ka khut tung ah a omta..!!. Lakik di’n sawl leng, sumualphoutu lel suak di ka bangta(kei utthu hilou in). Joseph te khawng ka ngaihtuah hang in, ka iit mahmah in hon piak ka nial thei tuankei. Hon thilpiak tuh, atawp in ka saangta..!!. Huchi’n, khelahtak in huai nitak ka kikhenta uhi.

Ni bangzah hiam nung in, Lamka ka tung uhi (k’on la tom suk ziauziau di). Shillong a ka om sung un, ka pa’n innmun(Khominthang lam ah) lei mahleh, a inn bawllouh ahihman in, bawltawm zual a teen nadan omlou chi’n, inn khat ka luah uhi. Kou innkuan mi 4 kia ka hihman un, mi’ compound sung khat a inn kibawl ah ka om ua, ka talah tuankei uh. Huai inn neite ahausa mahmah mai ua, a compound uh leng a kidaih mahmah hi. Atate uh le’ng aduatzou mahmah mai ua, aduh-adeih uh pezou gige uh hi’n ka thei.

Kha bangzah hiam ka omnung un, ka innluahnate’ uh tanu toh k’ong ki maikha uhi. Apa’n bel atanu’ adingin kaam hoihtak nei mah deihsak a, kei toh bel hon deihsak vetkei hi. Anu’n ahihleh, ka mihoihdan hon theih ziakin hon deihsak mahmah a, apa’ omlouh kal bang in hon samsam maimah hi. Atanu laihilh di peuh in hon ngen a, ka hihtheih tawp suah in  ka hilh zelzel hi. Kei ahihleh, ka First Love(Shillong a nu) toh ka kihoukhak nawnlouhna uh sawtpi ahita. 2012 kum aa, Aircel network khakhat vaal hongsiat apan kihoukha nawnlou ka hi uhi. Himahleh, ka iitna abei ngeikei a, ka innluahnate’ uh tanu amelhoih zawk hang  in, ka ngaithei tuankei.

Hunte hongpai zel in, tangsaam te khawng hongpaak hi. Chrismass leh 31st nitaak khawng k’on zatkhop chiang un, ka kingaina deuhdeuh mawk uhi. Kumthak honghi a, School(High School) hong lut nawn uhi. Class – 10 ahihtaak ziakin, a nu’n naak zawsem a laihilh diing in hon ngen hi. Nitaak khat, apa khotang vai a meeting dia apawt kal in lai ka vahilh nawn a, anu’n…atanu’ adia hon deih ahihdan hon gen a, atanu in leng ana ‘amen’ mahmah pah hi. Huai nitaak apan in, ka itna ka na pekha mawk hi. Ka first love nu toh lah kihoulou aa akum asim om ka hihman un, nungak ka neithuah ta hi.

Ka naute, kumkim in school hong khawl ua, ka nu leh pa’n akhawl sung uh suam in, zodawn lam a ka pute’ kiang ah va zinpih uhi. Ka sungte’n hon zinsan uapan in ‘free’ ka kisa mahmah mai a, ka nungak(2na) leng hong dianglut mun mahmah hi. Meh limdeuh khawng ameh chiang un, hon hawm gusek ua( apa’ theihlouh in), ka kipak thei mahmah hi. Himahleh, ka lungsim anuamthei taktak kei.

Nitaak khat, lum dia ka kisak leh…ka innluahnate’ uh pa, a han(hang) loiloi ging ka za hi. Ka nungaknu’ kahging leng ka za a, lamdang ka sa mahmah hi. Va enkhe di chi’a kongkhak vang a ka etguk leh, a tanunu kong ah hon hawlpawt a, chiang in anungzang teng zeepsak gawp zomah hi. Ka hehpih mahmah mai a, ka ki-ip tuntun laitak in,”inn ah le hongpai nawnken…ka tanu di’n le k’on deih nawnkei. Kei’ nopsakna di hilou a, nang nopsakna di eive ka khual, pawtmang oh..” chi’n, a pa’n genkhum loihloih hi. Zaan sawtnung ahihman in, angaih tel mai a, zaaklouh di vual ahikei.

Apa alutzoh phet in, anu hong diangpawt a..awl in ka kongkhak lam uh hon zuan uhi. Ken leng, kong ka hon ngal a, hong lut khialkhial uhi. Anu’n, “apa ahehlaw kha a..tuzan nang kiang ah hong giak mai heh aw” chia, hon nget ziakin ka ‘aw’ pah hi. Atanunu bel, apa’ vuaknate na salua himahleh, anu’ tongdam azaak in, hong nuui cheuh hi. Itpen toh ekbuk sung nangawn nuamsate’ a di’n, innsung nuamtak a omkhawm anuam tel mai. Huai zaan, ka lumkhawm ua…thil tuamtuam gen in ka ihmu thei tuankei uh.

Zingkhua avaak ma in, inn apan ka taikheta uhi. Aziak ahihleh, kei kiang a agiah lam a pa’n thei maizen leh dawn hetlou di ahihziak in, taipih mai ka teel zaw hi. Amah ka itluat ziak leng ahipen  mai. Huaini mah in ka nu leh pa hongtung ua, zon theih nana hon zong mahle uh, ka sunghnu’ khuak zatsiamna ziakin, sum bangzah hiam ka kemkha ua, hotel(amin gendah ni) khat ah ka giakden uhi. Ka inn ua lah paingam huai lou ahihman in, Tuibuang lam ah inn ka va luah uhi (ka classmate te khat panpaihna in).

Hunte hongpai zel in, ka sum neihsa teng uh hong beipah hi. Ka sum neihsa teng uh bei ahihman in, kiloh tawm a neek zonlouh ngal, ‘upai lei-tere’.  Koimah a cement tok ngeilou pa’n, cement k’on tok taktak zaw…agentheih huai tel mai. Himahleh, ka mizuihte toh ka pa akitheih ziak un, hon theisiam mahmah uhi. Ka zi’n inn ana ngak zel a, huchi’n hinkhua ka zangtou zel uhi.

Kum 1 leh akim ka kiteen nung un tapa melhoihtak ka nei ua, akipahhuai tel mai. Himahleh, ka kipahna in sawt adaihkei. Nikhat, nnasem dia kakuan leh, akiang ah misi ana om ziakin ka semtheikei ua, ka kiik hi. inn ka lut leh, ka zi toh midang ana omkhawm ua, bangteng ana kipetuah ahi ua chih, theikei mah le’ng, ka thilneih manpha mahmah ana hawm hi di’n ka gingta. Alawmpa bel kisuanglah meltak in ana pai diindiin zozen hi.

Huai nitaak apan ka innsung uh abuaimun mahmah a, lungkimlou a konglam a pawt hun bang leng a om zeuhzeuh. Parliament aa Bill kipawlut khenkhat deihlouh ziak a, buaina a omsek bang in, ka innsung uah leng buaina hong piang hi. Speaker ka kisak lai in, ka zi pen speaker dinmun ah hong tutou a, apoi tel mai. Ka naungek uh lah damtheilou in, sisan bang kitasam hideuh gige mawk hi. Ka khonung theih thakthak chiang in, ka zi’n sawtpek apan honna angkawm santa a, natna hoihlou in a sisan teng luahdimta ahihdan ka theikhia hi. Huai natna in, kei hon pehsawn man a, ka tapa leng a peh khit ka gingta.

Huai thu, ka theihkhiat nitaak mah in ka zi’n inn a pawtsan a, ka tapa tuh kei khut a kinga ahitamai. Ka zi’n bel pasal dang abeel ngal a, khawk asa himhim kei. Ka nu leh pa lah, gamdang a kisuan kheman uh ahihman in, kei di’n a beidot huai ngei mai. Bawngnawi peuh ka pia a, akhenchiang in asung khawng puak  zozen hi. Ni 2 ka kep ni zaan in agil na honsa a, aninawn zingkal ah casualty a taipih khial zual in, anitaaklam in damdawi inn ka lut uhi. Huai zaan mah ahi, ka tapa in hiai leitung anutsiat..!!

Kei leng, Lamka a ka omom nadan omlou chi’n, ka nu leh pa kiang ka zuan hi. Tapa taimang hihial kei mah le’ng, a zumhuai tel mai. Shillong tan bus in ka pai a, huaimun ah giah ka sawmta hi. Ka first love nu’ kiang a pai di lah ka kisiamtan kei a, hotel a giah di lah sum ka neikei zel. Atawp in, ka first love te’ innlam awl in ka zuan nelnel hi. Innsung ka luut a(nitaak hita), amah kia ana om hi. Anu leh pate mundang a zinkhia uh ahihdan hon hilh a, ka lunggim adan a omdeuh hi.

Himahleh, lungsim khat anuam hetkei. Natna hoihlou vei ka hi a, ka mel mahmah le a segawp. Ka first love nu’n bel hoihtak in honna houpih a, kipahmel mahmah hi. Ka kisilna di khawng hon sai felsak vek in, ann khawng hon suansak pah hi. Aguuk in ka hehpih mahmah mai a, ka mittui ka nuul guuk hun atam tel mai. ‘Aman lah bangmah theilou hi a maw….thei himazen leh zaw…’ chi’n, ka lungsim in ka gengen a, aphatuam tuankei.  
Lup ahuntak in, ka lupna di hon bawlsak a, lungnuamtak a lum diing in hon vaikhak hi. Ka lupzoh in, ka biang ah hon kiss cheuh a, huaihun in ka biang teng leng ka mittui in a kawt ta. Mak asa mahmah mai a, ka mittui pawt ziak hon dong nilouh hi. Akhut kiptak in ka leen a, akiang ah “n’on ngaidam zou diam?” ka chi hi.  Thildang bangmah hon gen nawnkei a, aziak hon dong tinten hi. Atawp in, ka omdan teng ka pulaak a, a khaselou ka omkei uh. Akikhem zawsam di omlou in ka kikahkhum ekhkeh mai ua, a phatuam tuankei. Huai zaan a,  ‘Mittui Toh Ka First Love’ nu’n honna vaidawn hun, ka mangngilh ngeikei diing.

Kisiik in, bangteng gen mahle ung, kikheel ahita. Bangteng a kikheel ta..!!. Kei bangbang a omlou diing in ka vaikhak a, pasal hoihtak mu dia deihsak ka hihdan ka hilh zawh in, ka paisanta hi. Ka hinkhua kisegawp ahita a, ka nu leh pa ka belh hang in, lungmuanna ka nei tuankei. Huai hun apan, lungmuanna kiching hon petu zaw – Toupa Jesu Christ ahi. Amah amuanhuai a, hon zuausan ngeikei. Muangtak a ka zuih ziakin, a pa Pathian mai ah leng, nung chiang aa hon gum diing in ka gingta hi.

Laigelhtu’ Lungsung Pan:
Hiai na sim hunsung in, na lungsim ah bang hong luut dia aw? Mi’n ana tuahsa diam uh hong kigelhkhia ahihman in, en i tuahkhak ma in pilvang ni. Hiai toh kibang tuakkha i om ua leh leng, Jesu mah masuan ni’u maw. Hiai tangthu sung aa,’pikpik’ a chiteng paikhia in, ‘mengmeng’ a chiteng la in lungsim ah vom gige ni.
1707 - Ka Kipak - 2015