Savdhan Lamka (Lamka Mipite Pilvang Ni)..!!
Written By: K Lianthansang

Niangbawi in,” U Sang, na khedap teng nangawn kawtgai vek  hiven, I kimawk khen pah ka gingta kei..!” hon chi hi. Hon gendan ka theisiam kei a, “bang chidan in e Niang? Khedap kawt toh I kal a itna grape gui zaam pen a kizomkha himhim a eita?” chi’n, ka dong(asked) kik pah hi.  Aman leng kintak in,”Ash…huai le thei nawnlou tel…nikum lam in, ‘ hawktui leh mihingte, lampi I  kituh lai siah uh k’on itna abei ngeikei di’ n’on chi hilou maw? Tu’n le, vuahzuk ziaka hawktui in lampi teng ‘captured’ a, na khedap teng nangawn kawtsuak dimdem sa in n’ong tung voi…” hon chihleh, ka halh kuau zozen hi.

Hunlui-te bang ka phawksuah thak dundun a, Niangbawi in “U Sang, I gam ua ‘free and fair election’ a-om masiah k’on iit den diing ”, hon chihlai khawng ka khonung ngaihtuah khekha hi. Niangbawi in I gam uh a itna thupi ka sa.  Aziak ahihleh, kei sanga….i gam ua ‘free and fair election’ a om diing deihzaw hiven. Huai kia hilou lai, “Lanva lui a tui aluanlai siah k’on itden diing..” hon chih in leng, thilteng genchiang mai hi’n ka thei hi. Ken ahihleh,”Tom in Jerry a thahzoh masiah k’on itna abei ngeikei diing..” chi’a chiamnuih a ka gen in, etsak thupilua a neikei.
Niangbawi’ hoihdan bel gensiam thu a gentheih di vual hi’n ka koih kei. Khalkal a piang ahi thou a, himahleh midang toh ahoihdan tehkak di vual hilou hi. Ama’n leng, amelhoih dan a kithei hoih mahmah mai a, bawltawm hoihnate(make-up)  khawng apoimoh ngaih kei. Akhutchin leh khechinte leng a ‘colour’ a kheng sese kei a, a ‘figure’ behlaptu diing in khedap tuul, sanglaw velvul abun ngei sam kei. Amah bel; Lamphei ah asuk pai teitei tuankei a, din kaang sa in leng a pai ngeikei  hi.

Ama’n ahihleh; Gold(sana) leh diamond(suangmantam) te manphalua ahihziak ua, miteng’ muhphak dia omlou uh ahihdan athei hoih mahmah hi. Huaiziak in,  a thilmanpha neih sunsun-te(private parts) mitangpi’n a muhpah theih diing ua koih nuamlou in, khekol leh puan-ak in hoihtak in tuam hi. Ama’ ngaihdan in ahihleh, ‘mitangpi’ muhtheih leh ngahtheih pah diing a thil om himhim tuh, amanphatna khat leng a om nawnkei chihna ahi’ chih, hi giugeu lel dan ahi.
Huaiziak in, khekol tomlua a teen lam ka mu ngeikei a, puan-ak ngawng lianlua a silh lam leng ka mu ngeikei bok. Ahihhang in, Burma nektheih bawm khawng a nungak lim tuang sihsiah-te, melhoihna lam ah a phalah tuankei. Athilmanpha neih-te leng a kembit zou gige a, a kuhkal zouzou in angah diing un kem thiinthen hi. Gensau zek lai le’ng; unau melhaih khak zual(1997 kum in) ziak in, tagah hinkhua ana paltou a, unau a upapen ahih zawkmah man in, asanggam te ana kemtou den hi. Asanggam te’n leng, amah a sun vek ua,’beven’ lua a omkei uh.

Khedap kawtsuak dimdem sa a ka vahoh nitaak in leng, a unau un ana omkim uhi. Niangboi in siam ana nitaak gat a, asanggam-te’n(numei 2 leh pasal 1) ahihleh lai sim uhi. Ka khedap kawtgawp ahihman in, ka suah pah hi. Inn tuang lah leilak himai ahihman in, bench(tutna sau) tung ah ka khe ka koihtou a, atawp in ka lumsuk hi. Niangbawi in ahihleh; sun chiang in a pute’ innlam ah siamkhawl aa va gaan zel in, nitaak chiang in inn ah kawng aa duap baat thohte in gaanzel hi.

Akiang zek aa lum ka hihman in, ngaih lua a kihou a poimoh kei. Asanggam te’n, ka kihouna thute uh a zaak uh leng ka gingta kei bok hi. Kum 2 hial kingai himah le ung, Niangbawi in bangbang haksatna ana thuak mualsuah khin ahia chih ka theikei. Akampau leh omdan apan in bel; I gam uah selung phawngthei omkei hen la’n, nuamtak in khawsa diamdiam le’ng, chih adeih leh lunggulh pen ahihdan ka muchian mahmah hi.

Niangbawi’ kiang ah,”Niang, na gimthei mah di maw? K’on hehpih lua…ahihhang in hon panpih zou di ka hihlouh man in poi ka sa…” ka chihleh,”U Sang, I tenna uh State ah, sum tellou in kaam muhtheih pahpah leh zaw…hon panpih zou saam ta di hi chin a maw..? Ei’ sep dia Pathian in hon piak louhpi va lei toptop le’ng le aphattuamna di ka theikei. Huaiziak in, ei sepdia ana geel kholh om di hiven, huai lam-en kawm in, lungkelou in hong pangtou le chin, n’on panpih zou pah di cu….” hon chi a, dik ka sa mahmah hi.

Ka pau nawn ma in,” U Sang, naupang chik hilai mah leng, haksatna tampi ka na tuak kha aaa…..” chih teng gen in, hong nehnou pian pah a, ka om didan bang ka theikei zozen hi. Ka bilkha ah,”haksatna tampi ka na tuak kha aaa…” chih, a gingging mai a, aging a beithei ngeikei. Haksatna atuah tengteng abul-abal in ka theinuam a, hon hilh vek diing in ka ngen ngal hi.

Niangbawi in,” ka thiltuah tengteng gensuak zoh vual di le ahi sam a, U Sang. Himahleh; kei’ hinkhua a ka tuahkhakte, midangte kiang a na gensawn a, phattuamna nengchik bek aneih khak leh chih deihna ziakin k’on gen di aw. Tagah ka hi chih n’on theihsa ahi a, himahleh n’on pampaih tuankei. K’on gen nuampen ahihleh; kum 3 paisa(nang toh I kingaih ma) in, tangval hausa mahmah khat toh ka na kingai uh. Ahihhang in, ka gentheihdan khawng uh hon theihkhiat hoih taktak chiang in, hon sit(lungtung lou) a, hon khen hi. Ka itna ka piaksa ahihman in, ka pawna mahmah mai a, sih mai bang ka na ut hi..” chih teng gen in, hon khawl zual hi.

Aban hon genzom zel a,”Ka ngawng aa khauhual baat a, sihsuk mai ka sawm laitak in, ka lungsim ah ‘kei omkei leng ka sanggamte bang suak d’uh..?’ chih honglut guih a, ka tawpkik hi. Ken ahihleh, kei hon itlou tangval khat ka chaan a; aman bel, amah iit mahmah nungak khat chaan ahihman in, hon chaan lianzaw hi’n ka koih hi.  Pathian in kei hon iit man in, a tapa neihsun cross ah hong sisak a; ke’n tangval hon itlou khat lel ziak a ka hinna ka laak in omzia neilou ahihdan ka musuah hi. Tangval hoihtak bawlthei a, kei a dia leng hon pethei pa Pathian kiang ka naih zawta a, Itna ziak a hong si Jesu ka beel zawta hi…” chi’n, hon gen hi.

Sawtlou nungin,”huai banah, ka nu-le-pa’ omlouh ziakin school ka na kai sunzom theikei a, poi ka sa. Ka lawm-le-vualte ka engthei mahmah a, achaang in ka kingaise vungvung sek.  Ka khanvualte’ hon muh di bang ka lauthei mahmah a; tagah chi a hon kou zialzial di khop leng a bei kei. Ka zumthei mahmah a, kingaih siat ziakin necktie ka leh-oh sawm(awklup sawm) hi. Alamdang mahmah khat bel; necktie leh-oh(awklum) dia ka kisak laitak in, ‘kei sang aa khauhual hia na teel zawk diing. Nang ziak in simmoh leh engbawlna chiteng ka na tuak a, vuak sidup in leng ka om hi. Nang hiaite thuak mualsuah peihlou tel di na hiam? Chilphih khum in bangzah vein a om a eita? Nang adia ka thuakna te ngaihtuah thak in la’n, thathak la in keilam hon zuan ve maw..?’ chih, ka lungsim ah hong gingging mai a, ka tawpkik thak hi.
Ka nu-le-pa’ omlouh nung in, ka tung ah bangkim hong kingak a, haksa ka satel mai U Sang. Ka naute, ann ka ngolhpih hun leng atam mahmah. Achaang in, Lanva lui peuh ah suang ka la a, huaite seek in neek ka zong zel. Deihteelna kamkhat bek kidot hileh; suang seek a neek zon zaw ka teel kei hial di. Ka lunggim thei mahmah mai a, ann lak a poison hel a…ka naute teng toh sihkhawm vek bang ka ut hi. Nikhat, huchibang a hih ka sawm laitak in, ka lungsim ah ‘Matthai 11:28 (Nou sem gim leh puakgik po tengteng aw, ka kiangah hongpai unla, keiman khawlna konpe ding)’ hong suak guih a, ka ngamkei thak hi. Pathian mah beel in, amah kiang zuan le’ng..aman bangkim ah hon lamkaih di ahihdan ka musuah hi. Huai ni apan in, ka sanggamte toh hiai leitung nutsiat khawm utna lungsim himhim ka nei nawnkei..” chi’n, aw neemtak in hon gen nawn hi.

Gennop nei mah leng, a omdan apan thildang gennuam lai ahihdan ka theih man in, bangmah ka gen ngamkei. Agawl hon khuah cheuh a,”  damtheihna lam ka chau mahmah mai a, ka gim zek chiang bang in ka pukse pahpah hi. Nagum semthei zaat ka hikei chih ka kithei a, himahleh alou theilou ahih man in, ka sep teitei angai. Kum 4 hiam paisa hi’n ka thei. Election kuan in, tagah-meithaite iit dan a kigen tam in hongtam maimah ua, ken leng ka na gingta hi. Amau zui leng, ka innkuan khosak khiatna diing ua hon panpih di ahihdan khawng uh hon gen ua, ka na gingta pah hi. Himahleh, a khonung in phawkphak ka hinawn kei uh. Ka kingaise mahmah a, ka hinna laak bang ka utmai hi. Hinna la di hial a ka kisak tak in,’ I Korinth-te 10:13 (Mihing thuak theih val khemna himhim na tuang uah a tung ngei kei hi. Pathian jaw a muanhuai ahi, aman na thuak theih val uh khemna na tuah uh a phal kei ding; na thuak theihna ding un khemna peuhah taikhiak na lampi abawl pah zo ding hi) chih Bible chang, ka lungsim ah hong lut guih a, ka hinna ka langam kei” chi’n, aw liing sim kawm in hon gen hi.

Niangbawi kiang ah,”Niang, na thupi lua…hiai thu n’on gente miteng in zathei le uh chih ka deih e. Tulai a mahni kithat I cihte khawng leng, ‘kingaihsiat ziak’ hivek thou di hi a, himahleh nang bang vek hile uh zaw hoih di hiven..!” ka chih hi. Aman leng,” U Sang, ka neu apan Bible sim di’n ka nu-le-pa’n honna hasuan den ua, huai aa ka simkhakte’n ka hinna hon humbit zel uhi. Indirect tak in gen  le’ng, Bible tungtawn a Pathian’ houpihna ka tan ziak a, tua hing leh dam a omlai ka hi. Huaiziak in, Bible ah hinna om ahi chih ka chian mahmah. Christian I kichih ngal leh, Bible sim pibawl thei chiat le’ng hoih mahmah di ahi..” chi’n hon dawng hi.

Zaan sawtgawp mahleh, Niangbawi toh ka houlimna uh a nuam mahmah mai a, pai ka sawm naikei. Aman leng, a theihlouh kal in asiam saupi ana ganzou hi. Akiang ah,”Niang, tulai in I gam uah khauhual natna(necktie leh-oh) kichi  hong kithang lawmawk a, bangziak hipen ding in na gingta…” ka chih leh,” kingaihsiatna (depression) ziak hipen ding in ka gingta, U Sang..” chi’n, hon dawngkik pah hi. Aban ka dotnawn ma in,”kingaihsiatna kichi miteng in atuah uh ahi. Hinman omlou leh  lam-et bei kisa mahmah in ka om mun mahmah. Huaihun in, ken leng sih mai ka sawm sek chih, k’on thugenna apan na theih ngei ka gingta. Mi khenkhat in, aneu uapan khoiliantu te thulaak lou in, taihilhna atuah chiang un hehsan ua, necktie leh-oh sawm pahpah sek uhi. Nu-le-pa’n hon sukheh ziakin kithat maizen le’ng, I luang tung ah bang simthu a leel taphet di ua? Nu-le-pa neilai te’n, tuadan khawng sawm nawn mahmah kei le uh chih ka deih lua…” hon chi a..

Ka pau dek chet leh,” Hinna ei kibawl theih himawklou ahihman in, hinna beisakna ding in leng thuneihna neuchik leng I neikha kei uh. Haksatna leh kingaihsiatna tawpkhawk tuak mah le’ng, ei sanga haksatna leh bawlsiatna tam ana tuakzaw – Jesu’ kiang ah tai le’ng, aman hon panpih mahmah diing hi. Aman ei sang in ‘experienced’ ana hau zaw a, amuanhuai louhna di ka theikei. Nang leng haksatna na neih leh, a Helpline number;  Jeremiah 33:3 ahi. Network hoihlou chih a omkei a,na call(sap) nakleh hon dawng(answer) diing a mansa gige ahi” chi’n, hon genbeh khum hi.
Ka gendi pen le ka theikei. Salam hi’n khalam hitaleh Niangbawi ka muang mahmah a, ka iitna leng alian deuhdeuh hi. Niangbawi’ kiang ah, “ Niang, nang ziak a haksatna  maituah didan thei ka hi, Lamka mipite’n (Zosuan Namchih) leng, nang apan pilvanna di tampi musuah le uh chih ka deih” ka chih  leh,” U Sang, Pathian mah muantak pen ahi. Hiai laa ana ngai mah, ka hinna hon humbit tu leng ahi bok.” chi’n, Gloria leh Biakson in, kidem(compete) hihial lou a, atuam tuak aa asak uh “…Simlei ka chim paisan nuam ing nopna mukeng chi. Lunglelin zatamin phamin hankhuk kibawl uh ©Lunglel ken aw, lunglel ken la tawntung nopna a nei TOU JESU beel in, lunglel ken la akiang thumin, tawntung muanna hong pia ding na lungnuam ding .Nang bek kei bek lungkham natnate'n hong tuam hi lou, Azawng ahau zatam lungkham mangbatna simlei. Neihsa kiching lungnuam sihna natna vui om lou, lungkham lua ing phamning chi-in Meidiil zuan ding maw? Lunggelin Doctorte zong natna-in a tuam hi, Muanna Damna Toupa kiang zuanin ..” chih laa, a phone apan hon ‘play’  hi. Huai la abei toh kiton in, mangpha hoihtak ka kikhak ua, lungnuamtak in innlam ka zuanpah vengveng hi.
 
Laigelhtu’ Lungsung Pan:
Lamka zaang ah necktie leh-oh hong kithang law mawk ahihman in, pilvang tak a huai apan I suahtak theihna diing  uh ngimna a k’on gelh ahi. Adiakin, Tuailai te’n I haksatnate uh ‘sialpi vuahthuak’ mailou in, JESU’ kiang tun pahpah ni. Lamka Mipite’n Pilvangtak aa Kingaihsiatna doudal sawm in - “Savdhan Lamka..!” chithei chiat ta le’ng maw?
1407 – Ka Kipak - 2015