Muhlouh Lianu’ Tongluan..!!
Written By: K Lianthansang

Football ground sung aa loupa (grass) om dia kilawm hi awmtak; Khawsiat chiang a ‘Lawibual’ om in, khawphat chiangin ‘Sahara Gamkeu’ om a,  apawlam ah loupa( grass) a-om daih. Kimawl entu mi 65,000 ( Siing guk leh sang nga) val te’ tutna dingin bel, apawlam a loupa hing dipdip te a kizen kawikawi vanglak hi.  Mi khenkhat in, ‘Thillamdang hilele ataktak’ a chihte uh hiaite kan hi dingin ka gingta kei.!
Kei ngei leng, ka ommun aa ‘football coach’ khat ka hihman in, football kimawl di omnakleh, ka absent ngeikei. Huaiziakin, ‘ Zogal Memorial Shield, 2015’ kituhna nanung (final) omhun in leng ka va en hi. Zakai in Jesu amuhnuam tuk aa kimawl munuam leng tampi om ahi ngei dia, singkung omsun tengah kiluai dim uhi. Ken ahihleh seat nuamtak tangin, loupa tungah ka tu phenphan a, lunggulh di dang thupilua ka neinawn kei. Himahleh, ‘secondhand smoke (laizial khu)’ hong laang luailuai chiangin bel; Oxygen (huihsiang) ka lunggulh zeuhzeuh chihman thu..!!

Kimawl lunglut tak a ka et laitak in, ka taklampang khekol sakhau hong liing delhdelh a, ka ngaihsak pah kei. Ka phone  kuahna lam ahihman in, hon ‘call’ om ahi chih bel ka haihkei. Ball a out zual sungin ka phone  lakhia a, ka etleh; ka save khaklouh Idea Number +919089555437 apan ana hi a, ka dawng(answer) ngal hi. Kuamah pauging zaak di a omkei. Himahleh, ‘washing machine’ sung aa puan kipeiging vutvut didan thawmging bel ka zathei hi.

Sawtlou ka hungaih nungin, eipau siang sitset zangin numei aw khat in,”Na min… Thansang mah hiale..?” chi’n kisuanlah tuaktakin hon dong hi. Ke’n leng, “Hi…Himah ing ei, bang chisim e?” ka chih leh, “ E…thilkhat  hon hihsak zual lechin ka chisim a..” chi’n hon dawng kik pah hi. Aban ka paunawn ma in, “Facebook lam ah kithuzak ni aw, ‘Friend Request’ k’on khak a, honna ‘Confirm’ lechin aw U Sang…ka balance bei dek a, huailam ah aban k’on gen di..” chi’n kintakin hon koihkhum ngal hi.

Network in hoih hun nei vaang mahmah ahihman in, facebook natawm ka lut zohlouh hun atam. Kimawl etkawm in facebook lam ah lut ka sawm a, a ‘loading’ sung kimawl hoihtak a enthei ka hihman in, internet haatlouh bang leng kizen kawikawi vanglak abang hial hi. Friend Request khat ana om ngei ngut a, ka  Confirm pah ngal hi. Ka lawm hih ut a ngetna hon bawltu bangchi melpu a chih ka theikei. Aprofile ka check a, ama’ lim(photo) bangmah muh di a omkei. Lim omsun ahihleh; ‘Love Sign’ bangbang  suangpi kitung velvual khat om a, huai pen Paite puandum ki silhsak kheukhau  hi.

Huchia a profile ka veel sungin, kimawlna kimkhat(first half) zoh in hong om hi. Huai toh kiton in, ‘message’ khat honglut a, ka et leh ”Lim bangmah ka koihlou ziakin alem(a fake) hon chi ken aw U Sang, den a hon houpih pen mah ka hi a, pasal hizenpi numei bawl a hong kibawl leng ka hi sam kei. Na tangthu gelh te’n ka lungsim hon zou mahmah mai a, Pathian apan talent na ngah ahi chih ka theihchet mahmah ziakin, ken leng kei tangthu (hinkhua) k’on gelhsak nuam a, n’on gelhsak man dia aw..?” chi’n hon dong a, gelhsak man di ka hihdan ka theisak ngal hi.

Hun sawt kihallou in, message khat honglut nawn a, “ U Sang, ka mel n’on mukei a, kuamah hon muh di le ka utkei. Himahleh, ka tangthu tungtawn in mi’n Pathian’ mel amuhna uh ahih ka lam-en. Ka hinkhua a ka tuah utlouh, ka huat mahmahte nangawn in leng tuakkei le uh chih ka deih hinapi, ken ka na tuahkhak tamlou k’on gen di. K’on thilgente na sim chiangin, gintaak haksa na sasim maithei U Sang. Himahleh; ken atak a ka natuah, midang in hon tuaknawn mahmah kei le uh chih ka deih ziakin, gen siamlou himahleng, ka hihtheih dandan in k’on gensuk belbual di aw. Ka min ahihleh, Lunching ahi” hon chi hi. Ken leng,” Ching, huchi hial ahihleh, den a n’on houpihna number pen ah hon WhatsApp zaw lechin abaihlam zaw di…” chi’n ka thukkik (reply) hi.

Kimawlna 2nd Half kipan nawndek ahihman in, huailam ka mitsuan nawn a, muhlouh lianu’ hon thugen dite ka ngaihsak pha nawnkei. Khovel a kimawlsiam a minthang mahmah; Neymar leh Messi te khawng pangkha bel a hikei uh. Himahleh, Neymar’ naupa hongpan ziakin a etnuam mahmah mai a, kimawlsiam tampite’n ‘bawngnawi leh khuaizu’ eh..’buannawi leh leivui’ lak kihta hetlou a apal zialzial peih ziakun, ka ngaisang thei mahmah hi.
Kimawl a etnop mahmah ziakin, hun(time) bang nidang-hundang sang a paihat  zaw bangin ka thei hial hi. Himahleh; suangtu kibang, louma kikhat chichi zenpi a selung tuaklou ei Zosuante banglou tak in, Sana sunga poimohna neichiat- minute, second leh hour hand te’n kituaktak a asep di bang chiat uh hon sep chiang un, kuama’n a mohsa theikei. Louma kikhat (hun hilhkhiat)  hizenpi, Hour leh Second hand pen paipai in, a minute hand pen khawl dide mawk leh thilteng buaigawp di ahi chih, huai kimawl hun in ka phawksuah dundun hi. Kimawl a nopluat man in, hunbang paihat lua dan a ana koihkha mawk dan ka hi. Hiai I theihchian semna dingin; Biakinn sungah minute 30 sawt I sa mahmah ua, Kipolhlimna hun khawng ah minute 120 leng I deihkhop kei uh, chi’n k’on genchiang beh ding.

Kimawlna muhnop takmai abei toh kiton in, mipi aneu-alian dingpah supsup ua, mipi’ tamluat ziaka kibohlum kha bel a omkei vanglak.  Paikawm a ka phone ka etzual leh, WhatsApp ah message khat hong lut a, ka hong ngal hi. Lai kigelhte apan Lunching ahi chih haih di vual ahikei. Ka simnuam zok a, himahleh paikawm khawng a phone mekmek in sihna nullah kuaksung peuh hon tunthei ahihman in ka kidek hamham a, innlam ka zuan pah vengveng hi.

Inn ka tunphet in ka phone ka sawkkhe ngal a…bench (tutnasau) ah thallup zen in Lunching’ hinkhua sim diing in ka kisa hi. Message ka hong(open) ngal leh, “ U Sang, simmohna diing in hiai thute hon zang ken aw? Ka nu-le-pa’ kianga ka genngam ngeilouh thute ngen ahi k’on gen dek…” chih ka mu masa a, anuai ah thuvual tampi ana kivualsuk denduan mai hi. Khatvei ka simsuak a, ka deihkhop kei.!. Ka simthak nawn ma a ka lawmte’ kianga  khaksawn(forward) di ka chihleh, ka khuttal in ka nulmang(delete) kha a, poi ka sa petmah. Himahleh, khatvei ka simsuak khit ahihmanin, amawk mai in ka lungsim ah a beikei. Ka lungtang tawng hon vut vungvung mai a, kei tuah dia ka kikoih leh, thuakzoh di vual hi’n  ka koihkei.

Lunching in, hichi’n a hinkhua hon gelh hi. “ Kou unau, numei ngen mi 5 ka hi ua, kei alianpen’ zom ka hi. Ka pa ahihleh Sepaih ahi a, ka nu’ etkolna nuai ah ka unau numei hon un, Zodawn lam ah ka khosa uhi.  Himahleh, ka nu a damtheihlouh ziakin louna a semzoukei a, kum 2005 in Lamka lam ah ka pem uhi.  Huailai in, innmun nei mahle ung ka lamzoh nailouh ziak un, mi inn peuh luah in ka khosa nimnem uhi.
Ka pa ahihleh, mi numnem tak ahi a, atate hon salh toihtoih lam ka theikei. Mi hehpihna hau mahmah khat leng ahihman in, asanggamte a kankuah mahmah a, ama’ neek di taang nangawn mi apengam sek. Ka innmun ua inn ka lamzoh un leng, ka papi(ka pa’ uu) te ka omsak ua, kou ahihleh, khosathei dawmdeuh chihziakin mi inn ka luah charchar uhi. Ka nu ahihleh, amel-apuam aa gensiatna di ka theikei. Kou unau lak ah, ka nu banga melhoih ka omkei ua, himahleh ka nu’ sangin ka damthei zaw vek uhi.

March 26, 2010 nitak in leng ngeina bangin lai ka sim a, himahleh ‘Job Card’ nnasep toh teh ka diama, tawppah(luppah) ka ut hi. Tawpta di chi a sana ka etleh, dak 8:00 aging pan a, 8:30 tan bek sim teitei di chi’a ka kisak leh ka kongkhak uh hong kikiu ging keuhkeuh a, common room a om ka nu’n ‘honglut ou ’ ana chi pah hi. Apauging uapan, ka Ni’ tanu(ka pa’ naunu tanu) te ahi uh chih, haih di vual ahikei.
Huainitak, laisim lunglut vekvuk a sim ka hikei.  Ka dak chiam a chinnailouh ziak lel a sim ka hihmanin, ka room uapan ka pawtkhe ngal hi. Ka mitkha hia chih ka theikei, room apan ka pawtkhiat toh kiton in, ka U Nem(ka Ni’ tanunu min) kiangah tangval melhoih mahmah khat ana tu mawk hi. Melhoih ka salua a, hon muhlouh kal chiang in deihtheih in ka na enzel a, ka etlam hon theihkhak di bel ka lau mahmah.

Sawtlou nungin pai dingin a kisa ua, ken leng ka gate tan uh ka vakha hi. Apaikhit nung un leng, ka lungsim ah ka U Nem’ lawmpa kia a om den a, hoih ka sakdan bel dembei ahimai. Ka lawmte ka ban message a, ka inn ua honghoh pa’ melhoihdan leh amau mule uh leng hoih salou tuanlou diing uh ahihdan ka gen ngal hi. Huai nitak, apaikhit nung un lai le ka simthei nawnkei. Zou te’n chile uh, ‘ka lungsim kipahna a dim; B-a-b-a-r-e’ chi hial ding un ka gingta. Ihmut bang hon sulim zou mahmah mai a, Vitamin A-Z ahi ka chihial hi.
Ani nawn, School kai ka tawpphet un ka U Nem-te’ inn ah ka lawmte toh ka va hoh ua, alawmpa’ tanchin ka kan ngal hi. Ka u Nem in leng, ‘ amau mihausa ahi ua, apa leng milun mahmah ahi.  Zodawn lam toh Lamka kawmtuah in gari leng a taisak ua, ka lawmpa pen in a chaang in a enkai zel. Huai banah, amah ahihleh unau mi 5 lak a aneupen ahihman in, aduh-adeih apezou ua, duat leng aduat mahmah uh ahi. Amin ahihleh, Thangboi ahi a, kei toh kivual dingin ka kigingta.  Anu leh Pa ahihleh, Lamka sangin a kholui lam uah a-om tamzaw uh ’ chi’n hongen hi. Ken  leng, hoih ka sakdan ka hilh ngal a, huainung ka u Nem in leng ka inn uah hong pawtpih zeuhzeuh hi.

Kikhemnani dinga I zatsek uh; 1st April (2010) hongtung a, ken leng message tungtawn a lawmte khem dia ka kisak laitakin ka phone hong gingkhe doldol hi. Ka etleh, ka save khaklouh number apan ana hi a, ka pick-up nuamkei. Anung sawtlou in ka message tone hong ging a, ka et leh den a hon ki-call na number apan ana hi zomah hi.  Message ka et leh,’Chingno, hon lau na maw? K’on call leh na pick-up hetkei a, na u Thang kei ve….’  Chih teng kigelh leuhlauh hi.

Melhoih ka sakpa ahihdan haih vual ahikei. Ka kipak lua a, ka sanggam te khawng hon message khak ka simsak zozen a, ka nuinui mai hi. Kipak selua in, message bang ka thuk pah khakei zozen a…ka thukkik apan in bel tawp hun theilou zen in ka ki-message ua, chiamnuih peuh ka gen thepthup uhi. Huailaitak in zaw, kuamah ka engkei. Ka lawmte natawm ka phawk nawnkei. Ni 4 bang huchibang zel a ka kihou touhtouh nung un, ka U Thang in honngai ahihdan hon gen ngal a, ken leng tangval neilou ka hihman in, ka ‘Yessss’ pah mai.
Ebenezer Academy School ah Class-IX ka sim kum himahleh, tangval neih chihkhawng ah bel ka ‘Graduate’ zou thamta a, ‘Master degree’ ka sin laitak ahi. Mihausa chih mahtak; School kai ka tawp chiang un, School gate kong khawng ah honna ngak sek a, gari neu a hon pawkhia in, Damkam Bazar sak, GS Road aa ‘Donalds’   khawng ah hon lutpih zel hi. Ka tai thei khopmai a, midang himhim eng ka neinawn kei. Haksatna leh lunggimna kichi khawng khovel ah om dingin leng ka koih kei bok.
 
Hunte hongpai zel in, 5th June, 2010 ni’n Kum kim exam ka zou  ua, a nitaak in ka u Thang hongpawt ngal hi. Nalh taktak in hong kichei a, amel et in zaw demna di ka thei zoukei. TV khawng enkawm aa ka Nute toh ka houlim khawm zaizai ualeh, nuam salua ka d’uam…zansawt lam leng ka theikei zozen uhi. Zansawt gawp ahihtak manin, pai dingin kisa a, ken leng ka gate tan uh ka va kha hi. Ka gate bul uh ka tun un, ka khut a hon len kawm in,’k’on ngailua bawi’ hon chi a ka dawng ngamkei. Lut dia ka kisak leh, ka biang veilampang ah hon ‘kiss’ chenchen a, kei leng ka pian apan mi’n hon kiss patna uh ahihman in ka zumlua a, innsung ah ka tailut thoh zozen hi. Ka zumluat man in, ka biang khawng san tuaituai abang hial a, alangkhat lam ah kipak in ka nuinui mai hi.

Hun-awl aneih tengin ka U Thang hong hoh gige a, ka itna grape gui uh chu hun tomchik sungin a zaam luailuai mai hi. Amel ka muhtam peuh leh hoih ka sa deuhdeuh a, ka itna leng lian deuhdeuh hi’n ka thei. Hoihsakte toh kingaikha chih khawng ka ngaihtuah chiangin hampha ka kisalua a, ka kipak petmah. Ka U Thang in, June 19 a Birthday ahihdan hon hilh a, ken leng huai Ni a, a wish masapen hih sawm in ka phone ah alarm bang ka set zozen hi.

June 18, 2010 nitaak ka ihmu pah a, himahleh dak 12:00 am in ka alarm in hon phawng veve hi. Ka U Thang ka wish ngal a, amah leng ana ihmu nailou ahihman in, itna thu khawng gen in bangtan hiam ka kihou kha thepthup uhi. Huainungin mangpha hoihtak ka kikhak ua, ka ihmuta. Nop ka sak mahmah ahihleh; mangpha hoihtak a kikhak a ihmu in, zingkal thohma a morning wish message ana om chiang ahi. Ka lawmnu toh ‘gift’ lei dingin Bazar ka hoh ua; Card 1 leh nou 2 lei in ka packing sak ngal uhi.

Ka vanleite uh a inn ua va pengam mawklou ka hihman un, hong hoh dingin ka zawn zawta hi. Nitaak honghoh in, ‘Happy Birth Day U Thang’, chikawmin ka van leite uh ka pia a, aman leng kipahthu hon gen zuingal hi. Mi kamtam ahikei, himahleh a zaidam mahmah. Ka kianga a-om chiangin a smart thei petmah a, a perfume gim khawng bang leng tutan in ka theilai a, huai bangbang  gim ka zaak chiangin hunlui ngai in ka kapkha sek hi.
20th June, 2010 Sunday ahih a, honghoh manlou di a chih ziakin kou leng ka vek ua kikhawm in kong leh gate tanpha ka kalh uhi. Huai nitaak ahihleh, vuah a hahzuk sim a kikhawm tawp in leng ka paithei zok kei uh. Vuah theu phet in innlam ka zuanpah ua(ka sanggamte toh) . Gintaklouh pi’n, ka gate bul uah ka u Thang , a gari toh ana ding khinkhen a, apuanteng kawtgawp hialkei mahleh votsak chi mahmah hi. Ka U Thang in kei hon iit ziaka vuahnuai pi a honna ngak hidi hi a, chih ka ngaihtuah chiang in ka hehpih lua a, ka gen dipen ka theikei.

Innsung ah ka lutpih ngal a,  kinuulna di towel ka piak kawm in, ‘numei ngen om ung-ua, na kikhenna di nangawn le neilou tel ka hi uh…eh kei ate na silh mai diam…?’ ka chihleh, ‘nangziakin khatvei bek votsa in liing keuhkeuh le’ng le apoisam a Ching?’ chi’n hon chiamnuih zomah a, ka nuikhawm nainai uhi.  Huai nitaak bel, sawt a omkei a…a khosik di ka lauh ziakin ka paisak pah hi.

Hunte tuibang a luangliam zel in, a khanawn 5th July ni’n School ka lutnawn uhi. Ngeina bangin ka tawp chiangun hong pi zel a, hotel khawng ah ‘chow’ khawng hon nekpih zel hi. Niteng a ‘chow’ neek chih khawng, ka ‘daily evening routine’ ahi mai. Khatvei ahihleh, hotel ah hon paipih kei a, amau innlam ah hon paipih hi. Ka luutngam zok kei a, himahleh ka pi(piteek) leh ka ompihnu uh kia om a chih ziakin ka luutngam hamham. Kou inn toh tehtheih di vual ahikei. Amau ahihleh, teen senglouh nadi inn anei ua, mi bang leng luahsak seuhsouh maimah uhi.

Ka u Thang’ kiangah, ‘ Kou lah inn se niipneep ka luah ua, nou lah inn luah senglouh nei chin ua…den chiah n’on sit di e…’ ka chihleh, a ngaihdan ahi hetkei a, aban ka gensau nawnkei. Api’n ngai in honngai a,’hong omta mai ve, lawm ka ngaitheilua’  bang, honna chi thepthup hi. Huchia ka omlai un, a ompihnu un a room lam ah hon samlut a, ‘hiai ah hong om lechin nuam nasak didan… na U Thang lah a sungten zi neidia sawlsawl ua, nang toh bang deih a hon deihsak uh’ chi’n singpi leh puri bang hon pe thepthup hi. Neih-le-lam ah zaw kou toh teh in; Lei leh van ahi mai uh.

July 15, 2010 nitaak, ann nekhin phet ka kisil a, ka kisil zoh in ka U Thang hongpawt chet hi. Huailaitak, TK Jack (Kapis)’ vaanglai ahi a, a ‘Love Grammer’ te khawng mi’n agen vengvung laitak uh ahihmanin, kou leng ennuam ka hihdan uh ka hilh uhi. Ka U Thang in, kou  nei ka hi uh, na etnuam ualeh I va la di hon chihziakin, a la dingin ka va kuan uhi. Lampi a ka pailai un, ka khut ah hon len a, ahihhang in apautam kei.
Innsung ka lut tak un, a common room uah mi ana tamsim ua, ka zum mahmah hi. Bangthu om ahia chih ka theikei. Ka manglam leng a hisam kei. Common room a tu te’n honna chibai souhsouh ua, lamdang bang ka sa zozen hi. Anu leh Pa zodawn lam a om himahle uh, tua melmuh a a-om manin, ken leng apa’ kiangah,’Pa Gin, bang toh kisai a hongzin e?’ ka chihleh, ‘ na tungtang uh gen dia hongzin ka hi’ hon chita mai a, lamdang sa in, etna di mun le ka theikei. Ka dip bang ahawm zozen a, ‘ ka tungtang uh chih mawk, bang chidan in e?’ ka chihleh, hon dawnma in ka U Thang in, ‘pai nawnlou dia k’on pi na hi Ching’ hon chitamai hi.

Pasal neih utdek nailou ka hihman in, konglam ah ka paipawt ngal hi. Agate ua ka pawt leh ka U Thang in hon delhzui a, saulua ka tunma in hon lentang hi. Ka utnailouh dan khawng ka gen hangin, khah hon sawm tuankei. Ka tusuk a, kap zozen mahleng, phattuamna bei ahita. Mi’n hon et luakluak man un, aman leng nuam asakei a, a gate sung ah hon kailut hi. Himahleh, a innsung uah ka lutnuam tuankei. Inn nunglam ah hon paipih a, tanky gei ah hon ompih nilouh hi. Ka paisawm chiang in hon phalkei a, ka phone a ka nu ka houpih dekleh ka phone hon laksuh zomah a, ka nu’ kiangah ‘ Chingboi k’on paisak nawnkei di, ana lunghimoh kei le uchin’ chi’n gen a, ken ka houpih dek chiangin ka phone hon penuam tuankei.

Innsung ah ka lutnuam kei a, ka omna uah thoukang bangzah hiam ann ka pia uhi. Pasal nei di chih ka ngaihtuah chiangin, ka sisan in a ngamkei. Nopsak laitak, paallut laitak, tuailai lak a le kizang man nailou a pasal neih di chih mawk hi ka sathei mahmah kei. Dak 10:00 bang hong gin hial chiangin, ut leh utlouh kidot chih a om nawnkei. Ka khut ah hon kailut a, I ngaihpen ahihman in asungte muh a va kipeek guigui kilawm ka saklouh ziakin room ah ka lutsuak tamai uhi. Gen di a vaang tel mai. Amel ka muh chiangin leng ka heh a, ka kap kha zozen hi. Ka kineih nitaak uh, khatvei mah leng ka kiheetkha kei uh.

Zingkhua hong vaak a, thohkhiat di a lithuai ngei mai. Ka thohma a ka phone ka et leh ka U Mawi( ka nupi’ tanu) in honna call ahihdan ka thei a, message ah ‘ na nu damlou ahi Ching’ hon chi bangzaw, kinaupang lawlai ahihman in ka nu ka ngai tel mai. Ka nu ahihleh, a lunggim zek chiang bang a kongkaw phutphut sek ahih zawkmah toh ka hehpihtha suak mahmah hi. Pai lenglah, zankhat minse khin hita. Bangmah hihkei lele, mi’ theih a ‘nuthoi’ kihi maimah ta di, chih khawng ka ngaihtuah chiangin ka paingam kei zel.
Ka pasal’ sungkuante asiam mahmah mai ua, anuam mahmah vanglak. Anu leh pa inn a omngeilou ahihman un, inn nupi in ka pang a, sun chiangin ka pipi uh toh ka kithuah zel uhi. Ka poimoh te athei mahmah mai ua, nget angai ngeikei. Kei nget ma in amau hon dot hun uh leng atam mahmah hi. Ka Pasal in lah hon duat mahmah mai a, ka kingaihlai sang mah un leng hon duatzaw hi’n ka thei hi.

Kha khat bang huchia ka omtouh nungin, ka anntang uh sepsa hongbei hi. Ka neu uapan ka nu’n, annsep khawng hon kizil siamsak sa ngen ahih ziakin, kei leng annsep dingin ka kisa ngal hi. Ka U Thang in,’na gim lawkha di, den chiah ka lawmte’n hong sep unte Ching, nidang a le ka sepsak zelzel uh ahi’ hon chi a, ken leng ka sep teitei tuankei. Huainung in nungak 2 hongpai ua, ka ann uh hon sepsak uhi. Asep zohtak un, ka U Thang in, huai annsep-te damdawi - gap 3(strip 3 chisuk ni) apiak laitak ka mukha hi. Aguuk a ka va ethoih leh, ‘RP’ a chihte uh ahi a, ka teacher pa un,’hiai damdawite ana thuaknopna ahi a, hat ahat ahi. Himahleh, mi’n a neek chiang un, a damdoi hatluat ziakin a sisan uh tawpkang deuhdeuh a, a chi uh kaang in, ngou dan in kilang ua, huaiziak a ngouna damdoi chi a tulai ate’n a thansak mahmah uh ahi. Kuama’n na neek hetlouh d’uh ahi’ chi’a hongen lai khawng ka phawksuah zungzung a, ka pasal muangmoh ngal in, lungsim anuam hetkei.
Nnasemte apaikhit un, ka U Thang’ kiangah  thil omdan ka dot leh ahon  iim zomah a, ka dot teitei nungin, khamtheih hih ahihdan hon genkhum tamai hi. Huaihun in etna di mun le ka theikei, ka room uah ka tailut a, kong kikalhkhum in, ka kap charchar hi. Ka lawm leh naute kiangah leng bangmah ka genngamkei. Ka kingaihlai un thei himai leng zaw hoih di hi a, ka chi vungvung a lah bangmah a phatuamkei. Ka gentheihna di zaw hiai hun a kipan ahi tamai ve.

Kha 2 bang hong hihtakin, nau paai ka hihdan ka kithei a, ka kipak mahmah hi. himahleh, ka kipahna in sawt a daihkei. Ka pasal lah, khamtheih hihlou dia ka sawltam zoh peuh leh a uang deuhdeuh. Ka kingaih ma pek ua ana hih ahih manin, tawpsan zou di vual ahi nawnkei. Ka naupaai ka ngaihtuah a, ka hehpih mahmah hi. Ka lung gim theilua ahihman in, ka hihtheih omsun chi’n Pathian kiangah thuumna ka neinei mai a, innsung nna bel semtou theizel dingin Pathian in damna hon pezel hi.

Ka Pasal in lah muhna khat leng neilou ahihman in, ka kisuanglah mahmah sek a lah, hihtheih dang a om tuankei. Ka sungkuante un, hon pumvaak uh ka himai uhi. Zi nei leh hong kibawlhoih deuh khak leh chi’a ka U Thang, a sungte’n zi neidia ana sawlsawl uh ahihdan ka khonung theih sawnsawn hi. Ka sungte un, kei ah muanna koih ua, ka bawlhoih theih khak leh chih kinepna lianpi nei uh ahi chih ka theih chiangin, ken leng ka hihtheih tawp ka suah a, thuumna toh pang in beihpi k’on suah zomzel hi.

Kou unau, numei hon ngen’ lak a zugim zaak di omngeilou ahihman in, ka Pasal’ zugim khawng zak hak ka sathei mahmah hi. Lungkiat ngoihngoih hun tam mahleh, ka naupaai ka itluat ziakin ka pangtou charchar a, zingkal teng in Biakinn ah thuumna ka vanei gige hi. Ka veng ua upa khat in hon hehpih thei mahmah mai a, ahon hehpih dan khong hon genzel hi. Huaihun chiangin,  a thuumpihna poimoh gige ka hihdan uh ka hilh zel a, thuumna a honphawk gige di bang in ka ngen sek hi.

Huchia, lunggima toh hun ka zattouh neuhneuh sungin, ka nauneih hong hun hi. Doctor te’n normal a neitheilou ding hon chih ziakun, ka lung akham mahmah mai a, himahleh operation tungtawn in ka ta masapen dingin numei melhoihtak khat, 7th May, 2011 in ka neikheta hi.  Ka kipak petmah mai a, ka kinepna omsun chu, ka ta hong hita mai. Ka dahni a hon hehnemtu, ka kahni a hon nuisak leh hon kipaksaktu omsun chu ka tanu kia ahita.
Himahleh, ka tanu honglet di ka ngaihtuah chiangin, mite bang a pa hoih aneih di ka deihsak luat ziakin ka khasiatna khop a phazel. Naungek toh inn nnasep k’on thuah tou a, naupangchik a nupi sia ka himai. Inn hoihtak nei mah le ung, a sunga teengte ka hoih luatlouh ziakun, innhoih sunga teeng a nopna di himhim ka thei zoukei. Ka pasal neihnung, lawm himhim ka pawl ngam nawnkei. Kingaihsiat vungvung hun atam mahmah mai a, ka ta enkawm a khitui ka nuul hun leng a bei ngeikei.

Hunte hongpai zel in, ka tanu kha 3 bang hong phata a, atei mahmah hi. Himahleh, ka pasal in a khut leh khe te khamnat sa in, ka meek sakchiang in nuam a sa a, asun-azan in ka meek saksak mai hi. Doctor tampi kiang ah ka paipih ua, a phatuam tuankei. Imphal ah leng ka vahoh ua, anatna di atheihkhiat zohlouh ziakun, a nathuaknopna toh inn ka tungkik maimah uhi. Khamtheih hih a, innsung khawng a akitom bongbong lai khawng in ka iplah lawna a, hong damlouh hial chiangin ka hehpih lawzel hi. Ka itna alian deuhdeuh mai a, na salua a hongom chiangin a loh ngaihna ka theikei a, ka kahkhum top zel hi.

Ka pasal lah a nini a gawng hulhul maimah. Asuun-azaan in ka ompih den a, ka nau uh a gennop vanglak ziakin adandan om  ka sa. Azun-aek nangawn siaksak angai a, ka pasal ka iit luat ziakin a ek natawm ka kihkei. Atawp in, RIMS (Imphal) ah ka pawlut ua, azaan-zaan in Emergency Operation hon bawlsak uhi. Nengchik zekai le ung kikhelthei tampi om ahihdan, Doctor pa’n hongen in ka hihuai zozen hi. Akhut natna mun ah anai tampi hon lakhia ua, kei ahihleh naungek toh ka hihman in sawt ka ompih theikei. Khakhat vel Imphal a ka ki-etkol nung un, Doctor pa’n check-up hun di gen in hon pawtsak hi.
 
Ka kipak petmah mai a, kikhopna nei in Pathian kiangah kipahthu genna ka nei uhi. Ka kipahna sawnsawn ahihleh, a ki-etkol sunga khamtheih hihlou a omzou ahihman in, hihlou a omsuak thei di ahi chih ka gingtak ziak leng ahi bok. Himahleh, ka kipahna in hunsawt a daihkei. Hong hoihdeuh takin, a khamtheih hih mah hon sunzom a, ‘damlou sihsual a om chin a, zun leh ek siakngai hial a na omna apan Pathian in hiaitan hon pikai kipak lou maw? Na damlouh hunsung a na ngawl zoh leh ngawlsuak mahmah mai ve U Thang, chi’n ka ngen ngutngut a, a phatuam tuankei. Kidek zoulou a ka kahkhak nikhua in, ‘kahneh’ chih ka lohtaak ahi zel.

Doctor te’n doptheih tawp a kidop ding achih uh himahleh, a utnalam teng ah a dianpih sek hi. Pawtlou ding a ka khouh chiang bang in hon hehsan a, ka khouh tamzoh peuh leh agilou ka suak maimah. October 7, 2011(kiginni) in, Imphal ah check-up dingin ka hohsuk ua, gari sung ah thuumna ka neinei mai hi. Amun ka tung un, Doctor pa’n suty la ahi honna chi ua, anuai a te’n honna en uhi. Huchia, ka Doctor zat pa uh omlou vetvet chi’n, Lamka lam a ki-enkol zaw mai dingin ka gen uhi.

Huchi’n, Lamka ah Dr.Shyam Sunder (Ortho Doctor) ka pan ua, aman leng a hihtheih tawp  suah a hon etkol nungin, hoihlam ka manoh deuhdeuh ta uhi. Ken leng, inn na leh septheih tuamtuam k’on sem a, achaang in Bazar ah allu peuh bang ka vazuak hun atam mahmah. Ka vengte un hon hehpihthei mahmah mai ua, ka lunggim didan khawng bang honna suangtuahsak pawl leng a beikei.  Ka naupang tuk in kuhkal honsa ua, hon hehpih thei mahmah uhi. Kinei zouthou ahihman in, in a honpawt di ka tasam ngeikei uh. Hongpawt peuh in lungsim piching honsa ua, hon phat chiang bang un ka kipak thei mahmah a, tha leng honguan mahmah hi’n ka thei.

Himahleh, nuam kasaklou mahmah tuh; ka pasal’ khamtheih ngawl zohlouh mahmah ahi. Kei’ khaam a phatuam di vual hikei mahleh, ka khoukhou sek a, kei numei kamtam ka suak lel. Mi khawng a honghoh chiang un, lunggim mahleng maitai tak a ana houpih angai a, lunggimna bangmah neilou dan a om mahmah agentheih huai sawnsawn. Ka sanggam te’n ka nau’ poimoh di bangkim hon ngaihtuah sak ua, kei leng ka poimoh bangkim hon hihsak vek uhi. Huaiziakin, ka sanggamte ka zahtaak mahmah hi.
 
Bazar a mehzuak khawng a ka tut di chiangin, dak 3:30 khawng in ka thou a, ann leh meh huanminsa in ka koih sek hi. Huai zoh chiangin, biakinn ah zing devotion in ka hohzel a, Pathian kiang ah kipahthu gen in, panpihna leng ka vangen gige hi. Khua hongvaak chiangin Bazar ah mehzuak in ka tu a, ka lawm-le-vual te’ honmuhkhak di bang ka lauthei mahmah. Himahleh, bangzahvei hiam ka tut nungin bel adan ka omdeuh hi.  Piteek nei ka hihman un, agil akial di ka lauthei mahmah a, dak 7:00 tan khawng tu in, inn ka paiphet chiangin ann ka nekpih pah sek hi. Ka pasal lah ann nedia ka phawn chiangin hong thou nuamkei a, hon hehsan maimah sek.  Ka buaizoh peuh leh lunggimna hun di ka neitawm a, ka kipahna khat leng ahi.

Ka nute toh inn kigamla lua ka hihman un, ka vapawt ngeikei. Adiktak a gen in, ka inn ua va hoh di le ka utlam ahikei. Aziak ahihleh, ka  U Thang’ tanchin khawng honna dong di ua, ka nu’ theih di ka phalkei. Ka nu’n theileh, alunggim law dia..kongkaw suk mai diing in ka gingta. Ka pa ngei leng bangmah ka hilh ngeikei. Hon houpih chiangin, lunggimna neilou bangmai in ka omsek hi. Aziak ahihleh, ka pa’n thil omdan thei leh a omna vaigam lam ah amah kia, alawm leh vual lak ah lungnuamlou pi a a-om di ka phal mahmah kei. Huaiziakin, ka haksatnate Pathian’ kiang loungal tutna di ka neikei.

Hun hongpai zel in, mite’ ngaklah leh nopsak hun; Chrismass hunte bang hongnai hiaihiai a, nungak-tangval, nupi-papi khawng nuamtak leh kipaktak a Chrismass Carol paikhawm khawng ka muhchiang in, ka engthei mahmah a, ka khasiatna khop a phasek hi. Chrismass la kisa gingte khawng ka zaak chiangin, ka nungaklai a innkuan kim siausiau a ka omkhawm lai khawng uh ka phawksuah zungzung a, ka mittui apawt kha pahpah sek. Ka pasal lah asun-azan a pawt in, inn a hongpai sunsun chiangin a hehna di kia a zong a, achangin pai dingin hon sawl sek hi. Ama’ hon sawllouh a le pai utlua zaw hi’ng a…ka tanu ka hehpih luat ziakin, haksatna bangkim thuaktouh ka teel zaw.

Chrismass Ni hongtung petmah ta a, ann nekhin kikhawm dingin ka kisa uhi. Ka pasal lumlai ahihman in, zawn leng le uttuanlou dia, hon hehsan phet di ahi chih ka theih man in ka zawn sese kei. Ka tanu toh Chrismass ka zatkhawm masak nipen uh ahihman in, ka kipak petmah a, Pathian’ kiang ah kipahthu ka gen hi. Kikhawm mi atam petmah mai ua, mi innkuan khawng a kikhawm diamdiam-te ka muhchiang in ka engthei mahmah a, laa khawng hong kisak chiangin ka lung alengthei mahmah hi. Innkuan nuam leh kipak taka tukhawm diamdiam-te ka muhchiangin ka ngaihtuahna hong paisau lawkha a, kidek zoulou in ka mittui hong luang nilouh hi. Huchi pi a kikhopsuak nadan omlou chi’n inn ah ka pai uhi. Inn ka tun un, ka pasal ana thou in pawt leng ana pawtmang khinta. Nitaaklam leng, mi lak ah ann ka vane kei ua, inn ah a-omteng in ka ne liakliak lel uhi.

Chrismass zangzou in, maban ah nungak-tangval te ngaklah mahmah 31st in hon naih huaihuai nawn hi. Kumte bei dingin kisa mah leh ka pasal angeingei ahi lai. 31st ni hongtung petmah a, a nitaak in ka pasal leng a lawmte toh pawtmang vengveng hi. Kou nuta ahihleh, kuamah theihphak louh in ka lupna tung uah ka giautau mahmah mai uh. Ka tanu ka ang ah ka pombelh a, ka limlak luite uh enkawm in lunglen kahla ka sa ngoihngoih mai a, kuaman hon phawkpha tuankei. Ka nu leh pa banah ka sanggam-te ka ngai mahmah mai a, ka ngaih tuahtuah kawm a ihmukha ka hingei dia, zingkhua avaak in ka khanglou pan hi. January 1, 2012 ni zingkal in, ka nute  Kumthak chibai buuk di chi’n hong hoh ua, sawt bel a omkei uh.

Hunte hongpai zel in, ka Birth Day (February 20) hongtung a, huaini ahihleh Zomi Nam Ni leng ahi bok. Ka nu’ phone in, ka nau in hon houpih a, ‘U Ching, Happy Birth Day…’  hon chi a, ka kipak law petmah hi. Himahleh, hon wish dia ka gintak pen in hon wish louh ziakin a bukim tuankei. Nidang a zaw ka Birth Day chianga, lawm-le-vual hon wish di tasam ngeisam lou hi’ng a..!. Tu’n ahihleh, ka itpen (ka pasal) nangawn in leng hon wish louh ziakin kuamah apan Birth Day wish om di’n ka gingta kei. Nitaklam in, ka Birth Day ahihngalleh chi’n ka sanggam te’n bawngsa in hon lopsak uhi.
 
Ka pasal in, a khut dawmloulua ahihman in na hon sanawn a, Doctor pa’ kiangah ka taipah uhi. Huchi’n, Lamka Damdawi Inn ah ka ki-admit ngal ua, a ninawn 24th February (Nilaini)  in Operation ka neingal uhi. Akhut  hoihlouhnate siik in hon khengsak ua, huai mun mah a ki-enkoltou charchar in, 5th March in ka pawt uhi. Huai nung, bangmah hihlou in hongom a, ka lung akim petmah. Ka nau uh kumkhat achinna ding- Birth Day ka lawm ua, ka pasal in leng akhut hoihtak a zangthei nawnta ahihman in ka kipak petmah hi.

Nidang pek apan ana hih zongsat (addicted) ahihziak in sawt adaihkei a, ka kipahna in leng sawt a daihkei. Ama a sanga khawkzaw in khamtheih sal ah hong taang nawn a, asuahtaakna di’n zaw keivuak in ka zou kei diing chih ka thei. Akhut dawm mahmah lou ahih man in, anat ngei in hong nanawn a, Damdoi Inn ka lutnawn leuleu uhi.  May 1st week in, a 3vei na dingin Doctor pa’n operation hon bawlsak nawn hi. Dakkal 5 vingveng buaipih ahih nung in, lohchingtak in operation ka zouthei ua, kipak in Pathian’ kiang ah kipahthu ka genngal hi. Huchi’n, damdoi inn aa omtou charchar in, June 12 in ka pawtnawn uhi.

Damdoi Inn aa sawt ka omluat ziakun, ka nau in honna ngaikei man dek hial hi. Damlou pi’n leng alang-alang ah diang thouthou a, khamtheih chiteng phial hih in om veve hi. Ka lung agim ngeimai…paisan suk mai ka ut a lah, ka nau ka hehpih zel a, ka om didan ka thei zoukei. Khut hoihloupi pi’n mi bang toh kisubuai in hong om a, ngaihdam ngen a ka kuan hun leng a om. Kei naupang chik himah leng, ka pasal ziak a ngaihdam ngen a ka kuan chiangin ka zumthei mahmah hi.

Naupang chik a haksatna thuakvuallouh tuak ka hihman in, ka kingaise thei mahmah hi. Achaang in sih bang ka utmai a, himahleh ka lungsim ah ka tanu hong lian zaw sek. Ka pasal lah uang deuhdeuh in, innsung khawng ah akitom gige a, pai di’n hon sawl gige hi. Huchi’a haksatak leh lunggimtak a ka omlai in, ka veng uah ‘Numei Camp’ hong om zenzen hi. Suun hun chiangin ka va kikhawm zel a, Pianthakna hoihtak ka ngah loh hi. Huaihun apan ka thiltuah-te puakdan ka siam zawdeuh a, ka lungkham chiangin Bible ka sim a, Pathian kiangah ka haksatna te ka tun pahpah hi. Pathian in ka kah awging hon ngaihkhiatsak in, kipahdan siamna bang hon pia hi.

Ka pasal’ khut ahoihthei taktak kei. Beidong kisa in, Doctorpa’ kiangah ka vatai nawn pah uhi. Doctor pa’n, a hihtheihna zahzah a hon enkol khin a, aloh ngaihna hon theizou nawnlouh ahihdan hon genkhum in, Imphal a Dr.Ibomcha’ kiang ah hon sawlsawn hi.  Akhut  dawmthei a, khamtheih khawng hihlou hileh zaw damkhin thamta diing hiven…!!. Imphal a ka ki-etkol sung un, ka tanu ka ngaithei petmah a, ka ihmuthei ngeikei. Huaimun mah ah, 10th October ni’n a 4vei na diing in operation ka neinawn uh. Meitei pau ka siamlouh ziakin haksa ka sa mahmah a, himahleh ka pasal a diing in haksatna chiteng leng ka thuak peih. Azun-le-ek natawm ka siaksak gige ahi a, poi ka sakei. Huchi’a ki-enkol tou charchar in, 2nd November ni’n Damdawi inn apan ka pawtkhia uhi.

Ani zing in, Lamka lam ah ka paitou ua, innlum a ki-enkol kawmkawm in December kha bang kizang thei nimnem sam hi. Kumthak-2014 meel bang damtakin ka muthei ua, ka kipak petmah. Kumthak ahihtoh kiton in, kumlui a ka khelhna tengteng uh thupha tawi in, kumthak damtak a zangtou thei  dingin panpihna ka ngen hi.  Kumte thak in kidangzel mahleh, ka pasal’ omdan zaw a kidang ngeikei. Himahleh, Pathian in I thuakzohlouh di haksatna hon guanlou ahih manin, ka thuak mualsuah thei hamham sek hi.

Ka tanu kum 3 pha naikei mahleh; ateiluat ziakin school ka kaisak uhi. Zingkal chiangin ka vakha zel a, nitaklam chiangin ka va pi gige hi. Himahleh, muhna neilou a kihih manin, mi’ tate neek bangbang ka nesak zoukei a, mi eng vungvung a a-om hun atam mahmah. Ka ta ka hehpih a, mi pate khawng in a tate uh School a vakha sauhsauh ua, ka tanu in a pa’ chilum nangawn hetkha ngeilou chih khawng ka  ngaihtuah chiangin, ka khasiat tha asuak thei mahmah hi.

Hunte hongpai zel in; nikhat, innkong a puantuah a ka omlaitak in, ka pasal in thilsual ahih ziaka Police te’n man uh ahihdan ka za a, lung-am in ka puksuk top. Khua ka phawk in nitaak dak 9:00 lam agingta a, ka hi meimuai zozen hi. Aninawn in news teng ah hong kisuah souhsouh tamai zaw…etna di le ka theikei. Police te’n lah ka inn uh hongpha zihzeh ahihman un, ka lunggim a kibehlap deuhdeuh hi. Ka pa’n le huaithu ana zakha ahihman in, hon houpih a, bangmah ka gentheikei. ‘Papa’ chi’n ka sam a, aban ka genzom theikei. Seelguk vual ahih nawnlouh man in, dangawk kawm pipi in thil omdan ka gensuakthei hamham hi.

Ka unu’ kiang ah, innlam a va tawldam ding in ka kingen a, aman leng ka inn uah hong kha hi. Ka pasal’ hon maizumsak dan khawng ka ngaihtuah a, ka kapkap mai hi. Ka nu’n alohngaihna hon theilou in, thumna khawng hon neihsak a, glucose khawng leng hon khai uhi. Kar 1 zoh in Police Custody apan ka pasal (damlouhna neisa ahihman in) hongpawt pah a, hoihtak a omta di  chi’a hanchiam kawmin kei hongsam hi. Paikik nawn zaw ka utlam ahikei, himahleh ka tanu ka iitluat ziakin ka paikiknawn hamham hi.

Kar khat zoh in, ka pasal in ama a sanga uangzaw in khamtheih hon hihnawn a, a kikapthoh toh thuah ahihman in ka lung akham petmah. Ka paikik khak bang ka kisik ngoihngoih a, lah aphatuam tuankei. Alohngaihna theilou in, zingkal tengin biakinn ah ka va thuum gige hi. Pathian kiang ah, ‘ damsung aa ka pasal dia n’on piak ahihleh haatna hon pia in la’n, huchi ahihkeileh hiai apan hon pikhe zaw mai in, haksa ka salua..namai leh mipite mai ah lah kichiamna ka nanei nai ngalkei ua…’ chi’n ka thuum sek hi. Ka thuum chiang bang in mi’ hon zakkhak di ka lauthei mahmah a, mi’ omlouhna lamlam ah ka thuum zel hi.

Ka tanu lah pilthei gawp ahihman in, alawm leh vualte vanneihte engthei panpan ta hi. Ahihhangin ken bangmah ka guan zoukei. Himahleh, a ni te’(a pa’ sanggam numeite) deihsakna tangin, aduh-adeih pezou in guanzou ua, ka lungkim mahmah hi. Huai laiteng a ka Bible chang deih leh sim gige ahihleh; Sam 37: 1 – 8 ahi a, chang 4na hoih ka sa diak hi. Ka pasal lah a kikapna in achpum teng a nai gawp zozen a, tawp asawm tuankei. Ka lung akham petmah a, Pathian lou ngal pat di dang ka thei zoukei.

Ka pasal ka iitluat manin, khamtheih ziak a ahinkhua bei mai a, asihnung chiang a tua sanga haksa zawsem mun a apai di ka ngaingam mahmah kei. Huaiziakin, Pathian’ mizat khenkhatte  phone number ka la ua, ka pasal hun zatpih dingin ka ngen uhi. Huai ni Pathianni ahi a, Piching Sunday School exam ni ahihman in, heutute’n  leng man di ahihdan hon zasak pah ua, ka kipak law petmah hi. Suun in, amau kia innsung munkhat ah hun ka zangsak ua, ken ahihleh ka omna mun ah thuumna ka nanei den hi. Hun sawtsim mahmah nung in, heutute hongpawt khia ua, ‘bang a chihtuak a leh…heutute’ ka chihleh, ‘ apautawm lua a…houpih haksa…ka thugenpihte uh azuih ka deihsak ua, azuih ngei leng ka gingta uh..’ hon chi ua, singpi khawng dawn in, hon paisan ngal uhi.
Ka pasal’ omdan a kikheng tuankei. Ka beidong petmah a, asuahsuah suaksuk heh chi’a paisan bang ka ut tuntun hi. Ka itluat ziakin ka thuhilh kha naak a, ka hilhmun deuhdeuh leh a uang deuhdeuh hi. Nitak khat, ka lupdek aa Almirah ka hong leh vankawm ah damdawi kikoih ka mu a, lakhia in ka seelmang hi. Huainung in, ka pasal honglut a… Almirah sung a va-et leh a damdawi koih a omnawnlouh lam theipah in, kei hon ngoh ngal a, ka pekhe nuam tuankei. Atawpin, lupna tung apan hon kaikhia a, kong a hon sawnpawt in, kong leng hon kalhkhum zomah hi.

Kong aa mialnuai ah keikia ka kap ngeuhngeuh a, ahihhangin mi’n hon theih ding uh ka lauh ziakin angaihlua in ka kap ngamkei. Kong hon hong ngei mahmah kei a, ken leng ka inn ua hong zintung – ka ni’ tate khat phone in ka houpih a, aman kong hong hon ziakin innsung ka lutthei hamham hi. Ka damdawi seel pen ka pasal ka pia a, bangmah a genkei. Ka lungkham law mahmah ahihman in, Bible ka la a; Matthai 18: 8 (Huan, na khutin hiam, na khein hiam, a honhihpuk leh, tan inla, pai mang in; khut nih hiam khe nih hiam neia khantawn meia paih a om sang in, piangsualin hiam khebaiin hiam hinna a lut nang a ding in a hoihjaw.) chih,  ka simkhum a, atung aa Bible nga in, kapkawm in ka thuumsak hi. Huai hun a ka thumsak in a lungsim dengkha zek hiding in ka gingta. Ahihhang in asaltangna muanhuailua ahihman in, taisuah zoh di vual hi’n koih nawnlou hi.

Ka lungkham luatman in, kampau kilawm leh kilawmlou leng khendan ka siamkei. Ka nu’ kiang bang ah,’ ka U Thang toh kitheilou hile ung zaw hichi tellou di hi’ng a, midang le ama’ sanga hoihzaw muthou di hi’g a…’ bang ka chikha thepthup hi. Hun hongpai zel in, October 11, 2014 ni in, akhut pehna siikte lakhe di chi’n Imphal lam ka delh ua, honna admit uhi. Huchi’n, October 15 ni’n operation hon bawlsak ua, kar 1 val zek ka omnung uh 25 October ni’n ka pawtkhia uhi. Ka pasal akhut hoihdeuh mahleh, a hinkhua lam a se deuhdeuh hi. Ka kipah dek sun chiang in leng, dahna di tamzaw in hon buak zawzel a, hin thaman leng om ka sakei.

Kumtawplam bang hong hihtakin, ka pianna pa ngei leng Chrismass sungkuante toh zangkhawm di chi’n suty hon la hi. Kou leng, ka pasal leh tanu toh ka vahoh ua, chibai ka va buuk uhi. Ka nau in, ‘tukum inkuan kim in  Chrismass zangkhawm ni’u aw U’ hon chi a, ka na ut gige sa ahihman in, ka ‘aw’ pah hi. Chrismass ni hong hi petmah ta a, ka pasal kiang a, ‘ Tuni’n, I nute toh Chrismass zangkhawm ni aw, hon hahzot lua ua?’ ka chih chiangin, ‘nau nusia inla’n nang na utleh va zang ve..’ hon chih khum tamai zaw, ka kipahna teng a mang vek hi. Kei kia in bel, ka vazang ngam tuankei.

Chrismass zangzou in, kumlui le gentheihna leh lunggimna tampi toh ka khakhe zou hamham hi. Kumthak le a ni 1na zangzou, a ninawn in ka nu-le-pa hong hoh ua, Kumthak chibai hong buuk uhi. Huaihun in ka pasal ana thou naikei a, phawng leng hon hehsan di ahihman in ka phawng ngam tuankei. Huainung sawtlou a, paidia a kisak ualeh , ka tanu nu’n a pite apai diing uh a phalkei bilbel mawk hi. Apai di chiang un, ka nu’ ngawng ah kawi kip tinten mai a, mawk a khah di vual ahikei. Ka zol chiang in leng zolkhiat but di a  hikei.

Ka nu’n leng,’en le I ngaithou voi….ka tonpih di ua, nitaklam chiang in k’ong kha d’uh aw…’ hon chih ziakin ka zuisak hi. Ka unu’n a theihtak in a heh mahmah a, haan in hon haangkhum zialzial hi.  Api-apu’ kiang a hoh hiven, apoiluatna om ahia, chi’a theihsiamsak ka sawm hang in, ka theisiamsak zoukei. Huai naaksang in, nau va pi in la’n nang na innlam uah omzaw lechin hoihzaw inte, khawng hon chihkhum zialzial hi. Ka nute ka phone a, kap kawmin thil omdan ka zasak ngal hi. Innsung a ka muanpen in hiaibang kampau hon zat zawkmah chiangin, ka lung ke deuhdeuh ta hi.

Nitaklam in, ka nu-le-pa’n nau hongkha ua…ka unu’n ana chi zialzial hi. Kei bel a ut dandan in hon chi henla’n, hon that hial leh leng poi ka sakei. Himahleh, ka nu-le-pa kamsia chiteng a ahoupih ka pawna mahmah hi. Huaini mah in, ka nu-le-pa ka zui a( ut leh utlouh gentheih hi nawnlou)…..Khovel a ka utlouh penpen; Nuthoi ka suakta hi. Ka pai nung,   ni 4 tan in ka pasal lam te’n bangmah hon gen kei ua, ka pa’n indongta asawl ziakin, kihou dingin ni 4 nung in hong pai pan uhi.

Huaihun a ka pa’ thugen thupi ka sakluat ziakin k’on gen diing. Ka pa’n,’Ka tanu Chiching in haksatna chiteng thuakin, kum  4 bang a theihtawp suah in hong om a, na tapa uh bawlsiatna chiteng thuak hi. Ka tanu in, a haksatna te kou kiangah hon gen ngeikei a, amah vuak in athuak mualsuah zel chih ka thei. Huchia, ahatlai teng lungngai vungvung aa na koihnung un, alungkhamna in atawp apha a, kou kianglam hong zuan hi. Deih a naneih uh hingal, thu-le-la bangmah gen n’on neikei ua, ka tanu uh na deihlouh mah uh hia? Ka tanu in pilna siamna neikei mahleh, ken tapa banga ka et ahi a, alunggim di le ka phalkei.  Akhasiat di nangawn le ka phallouh ahi….’ chi’n, ka pa’n hon gen a…kidek zoulou in abiang ah khitui hongluang zungzung hi.

Ka pa’ khitui te ka muh chiangin, ahon iitna thupi ka sa a, akhitui bek nuulsak ka utlua. Kei lungtang leng puaktam di bangmai in om keihkuih a, ka ommun ah ka kidek zou samkei. Ka nau, kei etkol dia ka nget hang un, hon phalsak kei ua…ann le ka nezou kei. Ka kihehnepna omsun zaw; ka ngetlouh zawk vualzawlna ka tung ah Toupa’n hon tungsak in, ka hoihzawkna ding a thil bangkim hon sehsak ahi zaw, ka chi mai hi. Muana Ngaihte in,’Aw ka liimbelh selung vabang aa pil hileh zaw, ka vondeih toh gibing khenlou a heikhawm diing…’ chi’a, asak khawng ka phawk a, kei adia aphuah uh bang ka hisak hi.

Ka tanu’ omna peuh ah Pathian in a veng dia, khatvei tei amel ka mukha nawn ngei ding chih, ka tanu tung a ka kinepna omsun ahi. Deih a teel di hileh, ka teel louh diing; ka hinkhua a tuakngei dia le ka kikoih louh himahleh, thuakzou nawn mahmahlou ka hihman in, Nuthoi chu ka hita mai ve..! Mi te’n hon musit in, hon pampaih mah le uh, ka sanggam leh ka nu-le-pan hon iit mahmah ziak un ka kipak hi. Huai banah, Pathian in kei sanga a leng hon iitzaw a, naaktak a akhetbuuk leh chiang a hon khamuan in, khetbuuk zanga kiptak a ka luzaang a hon khet kipsuk man in ka kipahna alian diak hi….” chih teng hong kikhak a, mittui kai niuniau kawmin ka simsuak teitei hi. Ka simzoh in khua amial thamta a, kisil zual in ann ka ne loplop hi.

Laigelhtu’ Lungsung Pan:
Hiai tangthu atak ahi a, himahleh aminte uh ahithei tan a kheng lamdang ahi. Min kikhenna toh nang min a kituahkhak zenzen leh leng, nang hilou na hi chih ana kithei mai in. Hiai aa mizahtakhuai; Lianu’ meel ka mukei a, ka muh leng a poimoh kei. Apoimoh pen zaw, ama hinkhua tungtawn in mi kuahiam in kibawlphatna leh kimuhsuahna in hon zang le uh chih ahi zaw. Huai mah leng, Muhlouh Lianu’ Tongluan aa, thu kigelh te’n agennop pen leh atuppen leng ahi. Hiai tangthu pen; a MI TE mu a gelh hilou in, a MORAL muhtheih dia gelh ahihzaw.

0207 – Ka Kipak - 2015