AMULKIMHUAI KHOPI
By : Hauzel Gou

A khaw om dan mahmah le nuam; lumlah lum lawlou, vot lah votlaw lou in mihing leh ganhingte' adia thuaknuam hunlel in om hi. Hiai khopi pen mual sanglaw-lou te'n umkual in tua mual kitawite' sing-le-lou hing dipdip te'n tuam in,a kilawmnate uh suahkhe chiat ua, asiamtu' Pathian thupina pe sawnsawn uhi. Hiai khopi kiim-le-kiang a huan-hai leh lou neite' tuh van vualzawlna vuahtui a kinga liuliau uh ahih dungzui un, ahun hun in tua van vualzawlna vuahtuite'n chawm in gah tampi suangsek uhi. Amun leh mual omdan mahmah leeng nuam in, a gal a mualvumte apat et in hiai phaizang lianlaw loutuh, kilawm in kiphah zihziah mai a, suahlam ah lui lianlouluang zihziah muhtheih ding in om hi. Akimvel a mualte sanglou uh ahihman in nii (sun) suakbaih in tumhak zel a, nasep tha itte-a di’n hunsawt kuamtak septheih ding hi.

Tua igen hiai khopi ah nam chikim chihtheih phial, azawng-ahau leh pau tuamtuam zang hunkhop tengkhawm ua, ataangpi'n gingtu Christian hivek phial ding ua theih ahi. Biakinn kilawm taktak bang muhtheih ding tampi om a, Pathian phatna zang in nuamsa thei mahmah sek uhi. District HQ khat ahih dungzui in sorkal office leh siamsinna mun leeng muhtheih di’n hunkhop om a, huaibanah mihingte adia poimoh mahmah damtheihna ahih dungzui in damloute adia ki etkol theihna di’ damdawi inn leeng hunkhop muhtheih di’n om hi. Hiai khopipe'n sumsin mite' a di’nle mun poimoh mahmah khat ahih dungzui in, kuapeuh in enlah chiat uh ahi ngeiding, a kol-avaite nasan in khelah ua, tuni chiang in punlam manawh hiaihiai ua theih in om hi. Hiai khopi tuh kong tuamtuam ah khantouhna neizel in, minthanna tuamtuam leeng ana neikha zel sam hi. Tualou in asung a khosate, ataangpi’n aneizou sang in gentheitak a khosa atamzaw tham ua, a nei leh neilou kal nakpitak in kikhia hi. A neizou deuhte bang gari neih a kitaiteh bangmai in, niteng in gari thak muhding omsim gige a, kuapeuh in gari kineihchiat sim phial uhi. Huaibanah, Pathian in hiaimun, a leitang mahmah leeng vualzawl ahi ngeiding a, nakpitak a domsang in hiai khopi sung ah azonsuah namte tengsak hikha ding hi. Himahleh, amaute'n a vualzawltu' Pathian phawklou a leh-ngatsan uh ahi khading; amau ut dandan a om in, khuangbai bangmai a kine setuah in, ki-itna chihte’n agam uah vaihawm zou nawnlou chih phetlouh A MULKIMHUAIKHOPI a suahzawta uhi.

SORKAL OFFICE LEH SKUL TE:
Hiai khopi tuh District HQ ahih dungzui in, a gam sorkal in mipite khualna’n office mun tuamtuam ah koih in, laisiam taktakte tuamun ah agam mipite panpih ding in a buhpang sawksak kawm in koih ngal hi. Himahleh amaute muding a mi kuahiam khat office a avapai chiang un, a omlouh hun uh bang tamzaw sek a theih in om a, huchia a vamuh ni sunsun chiang un le ginatak a houpihtheih ding vang mahmah zel uhi. Hiaite lawi houpih hak namah mah uh e….chia mi khenkhat atheisiam nailoute’n a ngaihtuahlai un, huchi hizawlou in, amau leeng deih tenten khat ana neigu uh ana himai mah dan ahi. Thil paidan theilou a sorkal in, athawn a muhdia abawl hiven chia huai na vangak ringawt leh zaw hiai khopi a sorkal office munte ah na thilsai uh na mu ngeikei ding uhi. Sorkal in a khua-le-tui hihna zar a bangmah senglou a honpiak dingte na-ngawnleeng bangzah hiam senga, namuh angaizaw ding chih na mangilhlouh adeih- huai khading hi. Huaiziakin pilvang mahmah kul a, kineksiatna khopi leh a mulkimhuai khopi a teng nahi gige hi.

Huaibanah, agam sorkal in siamsinna munding hiai khopi ah skul hunkhop a koih a, himahleh lam-et theihding tawm mahmah in om hi. Khenkhat ngial naupangte sanga ahilhtu’ ding tamzawkna munleng om mawkdan ahi. Skul fee omna mun a kaisak zoulou nu-le-pa'n hiai skulte ah atate uh muangtak in akoih ngam tuan kei uhi. A haute a di'n bangmah poina omkei mah leh a neiloute’ a di’n maban bing de-deuh in, lam-etna ding omnawnlou suakthei ding dinmun ah om uhi. Sorkal in sum tampi seng a naupangte laihilhtu’ dia a gawihte lah poisakna neilou a loh lak hun ding zaw haihkei hialve uh aw !Amau tate’ asepna skul mah ua kaisak ding chih bang hileh a ut teuh kei ding uh kachi ngam hi.

DAMDAWI INN
Mihingte damlou a i om chiang in; damtak a om akipah huaidan itheikhe pan phet sek uhi. Damdawi inn kichi pen damlou chimoh beidongte adia kinepna omsun ahi a, ahuchih dungzui in hiai khopi a damdawi inn leeng dam-ut na ziak a honzuan tampi omsek uhi. A khopi mah a khosate chauh in honzuan kei ua, mun gamla zawdeuh,zodawn lam apatin lam-etna liantak toh, sum tampi-pi seng a hon naih atamzaw tham ding uhi. Hiai damdawi inn pen a gam sorkal etkolna nuai ah om in, doctor leh nurse siamtaktakte hiaimun ah koih in, amaute tuh damlou chimoh beidong a hongpaite adia lam-etna om sun ahi uhi. Hiai sorkal damdawi inn tuh Manipur singtanggam district 5 te’ lak a lianpen a chiamteh a om banah, ISO certified leeng ana hi hi. Huaibanah hiai damdawi inn ah damloute adia lupna bang 200 om ding in gen uhi. Hichibang hial a kigen thupi himahleh, sianthouna lam ah nakpitak in tasam mahmah lai a, toilet-te bang imuh leh ei adamte mahmah adia le va damlouh theihna dinmun ah om mawk hi.

Huai banah hiai damdawi inn tuh bangbang hiam a gen ne-neuh na di’n ana omden a, ki vaipuakna kichuptak neitheilou uhia chih a ut-huai ton tam mahmah hi. Damdawi innsung a vanzat poimoh man tampipi mang ahihke’h a compound sung mahmah a gari mang leh thil hoihlou tung chih kiza deuh gige hi. Tunaichin in le unaunu- Mrs Chingzanem (kei adia chu kapite mahmah ahi) damding lam-etna toh hiai mun ka vazuan ua himahleh ka lam-etna uh a thawnlel a suakzawta hi. Hiaithu atheikha taphot in lamdang sakawm in puaknat-huai isa chiat uh hilou hiam? Hiai thiltung pen apatna leeng ahi kei chih mi tampite’ gen kana zakha a hichibang thil mulkimhuaitak tung nawn kei leh achih huai mahmah hi. Hun paisa ah leng doctor leh staff khenkhat te’ ngaihsaklouh ziak a damlou beidong a sihna tanpha ana tuak omzel dan ahi chih tutung in mitampite’n theikhia uhi. Himahleh kuama’n serious tak a lalou hileh uh kilawm bang mai a, hun paisa a le thiltung zel ahi chikawm a chillum a valh mang mai mah bang mawk uhi. Hun paisa a hichibang thiltungte ziak a bangmah kikhekna leh awlmohna om mahmah lou ahih ziak ahi kha ding; hichibang thilte ahongtung zel. Hiai thiltung bangbang kei tungah leng tungthei gige ahi chihte mi tampite’ntheita ua, patauhna lianpi neiuhi. Himahleh minister-pa panlakna ziak in kikhekna banghiam tuh a omzek ahi chih hiai lai kagelh tan in kathei a kipahhuai kasa mahmah hi.

KIKAWM TUAHNA LAMPI&DAWNDING TUI :
Hiai khopi a lamliante tuh deihthusam a chingzou ngeikei a, lamlian nawl ah hawktui luanna di ginnatak omlou hi. Lamlian nawl a gari neiloute pai nang omlou in, khe a paite toh gari a taite lamlian kituh ban ah hawktui nangawn toh le kituh ngaisek maimah hi. Huaiziak mah ahidiam niteng chihtheih phial in accident report ding om thei hi. Lampi tanvaktu dia street light kikoihte nasan lah omsak man ngeilou in, a gu dia mansa bang om gige uh ahi dia aw chih in om hi. Hiai khopi lian huntawk himahleh, puahlouh a om lamliante niteng a taithei gari neite adi’ diak in ninghuai mahmah ding hi. A gam sorkal in lampi puahna dia fund honpe ngei ding in leng igingta a, himahleh lampi siatna-te tuh a ngeingei hidenlai hi. A bawl sunsun na munte uh lah sawt daihlou in kha khat/nih zoh chiah angei mah bangkik zel hi. Ak khawng in le athai siat theih di khawng hial a ibawl chiang ua zaw sawt daihdi chihna se omlou zaw hive aw maw chih tuh mipi houlimna ahi zawta hi. Mi’n agam uh a puahdante uh zaw a theichiat ding ua, lampi nuamtak mai leh sawtpi set-theih di’n abawl ua, agam sorkal uh hoihna ziak in a zarzoutu ding mipi te mahmah in zarzou kha uhi chihte atheitham ding uhi. Himahleh hiai khopi ah zaw alehlam daih ah mimal kuahiam chauh tuh, a zarzoutu in apang zaw daih a mipite’ nelhsiah in a om zaw uhi.

Sorkal in zaw fund tampipi honpia di zaw hive in, huaite koilam a kizang adia aw chih hiai khopi a tengte ngaihtuahna a om gige khat ahi. Tuisiang dawnding ki ningching omlou in, huaiziak mah ahiding damlouhna hileeng chiha om gige. Hiaithu pawlpi tuamtuam leh mimal khenkhat in ana tangkoupih zel mah le uh, tuni chiang in a ngeingei hilai hi. Guta mahmah le kidaihlua ahi kha ding; tuilawng nasan gu di khop leeng ana omlai zomah uhi. Makai a ineihte’n lah election kuan ding chauh in tuisiang dawn ding kidaihtak a bawl khiak hiding chih kamchiam in neiden ua, himahleh ahong ching hial chiang un vailakzunthak mah bang kikzel hi. Khuga Dam sorkal in sum tampi seng in bawlsak a, kingakna tak hituanlou in, mihing hinna latu in apang zawdaih in, luang bangzah hiam pholhkheta uhi.

THU KHITNA :
Hiai khopi pen kong tuamtuam ah ahoihna gending om mah leh asiatna gending tamzaw mawk hi. Khamtheih leh AIDS toh kisai in leeng amin thanna panpih mahmah hiding in uphuai a khopi lianzaw te toh a ki lamdan-na om tuan lou hi. Hiai khopi a thilhoihlou leh chindan hoihloute gelhseng ding leeng ahi kei hi. Minthanna dikloute’n zouzaw in, a selam a minthang hatlua hilou hiam chih ngaihtuahna honpe thei mawk a, apiltheite adi’n patauh huai huntawk hi. Kho lianlou chik khopi hongsuak ding a, akisak laitak ahihziak a, ahoih lam a minthanna omdia aselam a minthanna leeng om ding chia ki hehnep mai baihlam zaw ding hi. Sodom leh Gomora khopite bangmai a kisia pen tung ding ut in hiai khopi ah pawl tuamtuam tampi om a ‘land of presidents’ chihtheih khop phial in pawlpi dimzen hi. Himahleh , hiaite panlakna tulel dinmun in lohchin naaksang in niamkiak lam manoh zaw a theih in om hi. Hiai lai kagelh lai in i Laisiangthou a imuh “Sang tampite adia chitna nei, mohnate bangchimah a hihveng louh ding, gitlouhna, tatlekna leh khelhna ngaidampa; pate gitlouhna tate tung leh tate-tate tunga, khang thum, khang lina donga thuk, chiin a genkhia hi” Eks 43:7kalungsim ah hong om mawk hi. Igam Pathian in naktakin hon vualzawl mah eite’n avualzawlna theisiamlou in huaihamna, angmasialna leh giloutak tak in i om ua, hiaite ziak in itate’ lamdik a pii theihdi’n om nawnlou uhi. Ei anu-apate khelhnate ziak a itate tung a tu, ikhang thumna leh lina tanpha a leeng tungthei lai ahi chih honmu sak hi. Huaiziakin Pathian kiang ngaihdam ngen in Amah’ kiang zuan in, kagam uah vai hon hawmsakin chih hun mahmah ta hi. Pawlpi tuamtuam te’nle pan naktak a lathak in hiai khopi a mulkimhuaina-te paihkhiak sawm in, Kanan gam khuaizu a luanna gam batsak sawmzaw ta ni hang! Election dek chiang chauh a gam-le-nam it himailou a, election zawh chia le gam ittu hi a diktat tak a vaihawmheutu’ hihsawmzaw lehang hiai atung a haksatna ne-neuhte suveng thei ding ihi. Huaiziakin, I vang khopi zaw aA MULKIMHUAI KHOPIahihna pen thaimang sakta maiding in iki chial uhi. Mipite’nle gingtu Christian iki chih ngalleh election chiang inle; ahun tamzaw a i Christian dan mah in i omdan ah kilangsak zawta ni uh.

Hiai anuai ah ladawng saulou Heutupa H Mangtungnung in ana phuah kon taklang kawm a, ngaihtuah tham ching mahmah ana hi hi.

I vangkhua lawibang thanna geel dih ve,
Pian dang zatui leh zatang hang in maw,
Sakmin N0.4 AIDS leh HIV maw !
A na e Tunnu gam sakmin thanna.

Tun-le- zua lungmawlte lung a dam diam?
Deihlai vontawite'n vaimang namza leh,
Meldang N0.4 banzal sansi toh gawm,
Kotkawl ah omlaivei bang in leng uh.

Siamsil khaubang sut pih lawm vualte aw,
Seinou lia-le- tang vualngaihte aw e,
I tunnu Zogam lei sakmin thanna di
AIDS leh HIV lung na awi na diam ?