Dubai vs Gingtute
By: Hauzel Gou
Lawmte khenkhat, pastor leh missionary banah saptuam upa bangzah hiamte'n hiai Ishmael suante uk-na gam a biakna kichi om thei dia koih khollou in, dotna tampi ka na tuak sek a; huai dawnna lah hikawm thou in Dubai vs Gingtute chih thupi a zang in, gingtute’ dinmun bang hi hiam chih tamlou gelh din kong kisa hi. Kei dotna tuah bangbang, hiailam a om lawmte khenkhat in leeng ana tuak sam uh ahi chih leng ka thei a, amau dotna leng dawng khawm hi ngal mai di'n ikoih hi. Dubai khopi tuh Middle East adia khopi khangtou hatpen a chiamteh ahih ban ah, gingtute’ tamna pen dia hisaap leeng ana hi hi. Himahleh, hiai mun a gingtu i chihte tuh agam mi diktak ahikei uh chih thei masa le a uthuai hi.
Tulai in khovel mun tuamtuam ah Christian-te soisakna uang leh pung deuhdeuh in kilang a; hiai in zaanmial beidek mahmahta, khuavak ding hita ahi chih hon musak hi. Tulai a thiltung lamdang taktakte i et chiang in, i laisiangthou mahmah in ana genkholhte tangtung zel in huaipen mah i laisiangthou a dikna leeng ahi ngal hi. Hun nanung petmah ah ding i hita uh chih tulai khovel huihnungte apat muhtheih in om hi. Gingtute soisakna khovel mun tuamtuam ah imu ding a, gingtu hihna ziak a sihna tanpha tuak leeng i om ding hi. Abiiktak in hiai Middle East gamte ah gingtute naktak a soisak leh huat-in a om uh chih news khawng ah niteng phial a muhtheih in om hi. Huchi kawmkal ah, tua kou omna (Dubai-United Arab Emirates) le Middle East gam in huamkha ahihman in; gingtute’n biakna neithei di’ ua ana koihlou mi bangzah hiam ana om ahi chihte ka thei hi. Kei mahmah in le hiai mun katun tung-in, biakinn chihte khawng om di'n kana koih kha kei mah hi. Muslim gam ahihbanah a kulmut-te omna mun chihte thei in, lungsim khat ah lau-thawngna khat chu ka nei giugiau mahmah sam hi. Himahleh koimun peuh ah omle leeng; Pathian a om gige a, Jona in Pathian om louhna omdi ana sa in, athupiakte zui nuamlou a taimangsan ana tum hi. Himahleh Pathian zaw taimangsan theihvual ahi kei a, atawptawp in ngapi gilsung na-ngawn ah leeng Toupa om ahi chih hon theikhia hi. Huchi'n amah leh amah kiphawk a kisik in Pathian kiang ah ngaihdam ngen in hotdam in a om a, ngapi gilsung apat in suahtakna ana mu hi.
Atung a i gen mah bang in, mitampite'n hiai Middle East buaina i theitham ding uhi. Hiai buaina mun gamte ataangpi in ISIS-te hatna mun Iraq, Syria leh tu’n Yemen gamte ah thuneihna deih in a Muslim (Shia) pihte mah uh toh kidou nilouh uhi. Hiaibang a kidouna pen tawp ngeilou ding a gintak ahi. Bangziaka amau leh amau kithat a, kidou gige ahi di ua…. aw na chi maithei, tomchik a gen in gindan kibatlouh ziak ahi pen mai hi. Tulai pau le, a doctrine uh kibatlouh ziak ana hilim veh aw...Huchi kawmkal ah Christian te’n leng naktak in ana thuakkha chih haihvual ahikei hi.
Hiai Middle East a gam changkang kin mahmah UAE sung ah gingtute (Christian) bang dinmun lel a om hi uh hiam chih tamlou in i ensukta ding. Sorkal in a chiamteh dungzui in 2010 kum a UAE milip kisimpina dungzui in, agamsung pumpi ah Christian 9% sang a tawmzawlou om dia tuat ahi hi. Hiai Christian-te tuh avek sipsip un gamdang a kipan ahi ua, hiaimun a sepna nei leh sumdawng ahi taangpi uhi. Agam-mi diktak (Emirati-te) Christian om uh ahi chih theihkhak hivetlou hi. Christian-te pen official tak a theihpihna piak in omkei mah le uh, gingtute adi’n thawveng taka biaktheihna leh sahkhaw dungzui a kicheinate a poimoh dungzui in phal ahivek hi. Huaibanah, sahkhua toh kisai van chituam-tuamte leng zuak theih tham hi. Himahleh Muslimte lak a tangthupha gen a hilh pen kham bikbek ahihban ah siamsinna skulte ah leeng Christian tanchin kigelhna subject-te tawi phal ahi kei hi. Agam sorkal in biakinn bawl ding bangmah nialna anei kei a, himahleh biakinn tung a cross (mun khenkhat ah om) lim leh dak koih phal hilou hi. Alehlam ah signboard takkhiak bang phal thepthup zel ua, huaiziak in biakinnte ah saptuam min muh ding hunkhop om hi.
Bazar leh shopping mall-te ah Christmas tree leh Christian-te toh kisai a vanzat chituam-tuamte zuak ding a koih theih himah leh Muslimte’n kumteng-a, a zat uh holy month (Ramadan) hunsung in bel hichibangte koih phal ahi kei hi. Media zang a saptuam program suahkhiak leeng phal ahi bok a, Christmas hunchia shopping mall leh mun tuamtuam a carol pai a lasak leeng phal ahi hi. Gingtu Christian pasalte'n Muslim numeite zi a neih phal ahikei a, himahleh Muslim pasalte'n bel sahkhaw dang zui numeite akitenpih ding uh phal ahi zel hi. Vai kulmut gamte toh teh in hiai Dubai leh Abu Dhabi state a hoih mahmahna khat bel Christian-te adi liauliau in hanmual mun ding ana pia uhi. Lei a bawl lei a kik ding chia i misi luang i vui banga amau le a kivui thoh mah ahihziak uh le ahikha ding.
Hiai a i gen Muslim gam pen ah gindan tuamtuam nei saptuam tampi om ahihna ah biakinn a kidaihlou lam hizaw kha ding hi. Biakinn mun tuamtuam ah akigawm in 34 sang a tamzaw om dia gintak hi a, huaite ah saptuam chi tuamtuamte’n khat-khit-khat in biakna hun zangzel in, awng man ngeilou hi. Hiai saptuam i gente bel doctrine tuamtuam nei ngen hi’n ataangpi in Roman Catholic-te tamdiak ua, a banah Protestant te hi uhi. Huan agam sorkal a heutu-lian taktakte’ zong Christian-te program zatna khawng ah ana kihel tham ua, apoimoh hun in sum-leh-pai ah leng huhna ana pezel sam uhi. Tunitan in sakhua ziak a kina a kisual chih police record ah om vetlou hi. Huaiziak mah adiam ah UK mi gingtu khat in UK a Christian hih sangin hiaimun a Christian hih abaihsamzaw chi hilhial hi.
Pathian hing neite a ding in a koi akoi ah om lele lampi om zel ahih chih a kilang a, thil khatpeuh nupi galgen a, agal a ngaihdan i neih toh a mun ah ana kibang kim khollou sek hi chih muh theih in om hi. Hiai Muslim-te etton tak kasakna mahmah tuh 'Thumna' a ngaih poimoh dan uh ahi. Niteng a ngavei thum ding chih ahi a, tatsat lou in ahun chetchet in thumna neithei mawk uhi. Ei gingtu-te leng hiaite bang in thum zoule hang igam, inam leh i innsung bangchi tuk in vualzawl in i om dia aw chih hon ngaihtuahsak sawnsawn hi. I laisiangthou in thumna ichih naakna ahi achih bang in, thum tam peuhle Pathian toh ikizopna hoih gige mailou ding hiam?