Phoenix Pan Tulsa: Khualzinna leh Tuahphatna

By Pum Khan Pau, PhD
Post-Doctoral Fellow, Arizona State Univesity, USA.

America gam ah Zomi a tampenna khua Tulsa pen America gam ka tun ciangin pailoh/hawhloh a phamawh dinga ka ngaihsut ahi hi. Ahih hangin ka hawh  theihna dingin vai a om kei leh ka mawk pai thei tuan kei hi. Tulsa ah ka meltheih khat leh nih a om tei hangin ka omna Phoenix panin vanleng tawh nai 5 sung bang paina mun tua khua ah meltheih kawma zin ding zong ol lo veve hi. Sia David Kham in US a om laitak November 2014 kha tawp lamin Tulsa ah kituah ni, kimu nuam hang hong cih ciangin ut mahmah napi’n ka pai zo kei hi. January 9, 2015 nitakin Pu Go Sawm Khup, President, Zomi Innkuan, USA (ZIUSA) in phone tawh hong hopih a, February 20 Zomi Nam Ni Tulsa ah hong zang in ci-in hong cial ciangin ka lunggulh giugiau Zomite tamna mun phak theihna ding Pasian in lampi hong bawlsak hitah ci-in ka ngaihsun hi. Tua khit ciangin Zomi Innkuan Oklahoma (ZIOK) President Pa T. Sawm Lian tawh kizomin kivaihawm toto pah hi. Hih thului pen Zomi Nam Ni zang dingin Phoenix pan Tulsa ka khualzinna leh ka khualzin sunga ka tuah thuphate ciamtehna dan a ka gelh ahi hi.

Dallas leh Fortworth Ah

February 14 nitaklamin Phoenix panin American Airlines tawh Texas state a om Fortworth ka pai hi. Fortworth a om Zomi Mission Church pawlpi pan Sia Khaipu leh Pa Thawn in airport ah ong dawn uh hi. Tua nitakin Zomi Mission Church home cell kikhopna ah thugenna ka nei hi. Nitak nai 9:30 pawlin ka giahna ding motel ah Dongno leh Lam Thang in ong kha uh a, zan nai khat dong nuamtakin ka holim uh hi. Hih khangnote nih in thu thei-in zong theihbeh nuam uh hi. Shillong ah research ka bawl lai-in Dongno zong sangkah in hong om ahih manin tua panin a kitheisa ka hi uh hi. India ah high school ka kahpih lawm Kham Khan Chin Ngaihte in Fortworth ah Lai Siangtho a sin laitak hi-a, amah tawh kimu nuam mahmah napi’n hun kingahlo ahih manin phone bek tawh ka kiho uh hi.  
      
A zingciang, February 15, zingsang lamin Fortworth Zomi Innkuan makaite in ann hong nekpih hi. Makaipi Pa Lian Tuang, Tg Tung Thang leh Tg Lam Thang tawh holimna hun nuam ka ngah uh hi. Pa Lian Tuangte lawmta teng tawh ka holimna uh panin Cikha pen border town khat suak sak zo le’ng cih a lunggulhna uh thupi kasa hi. Khantohna a hatna dingin khuaneu ah I kikhen sangin khua lian bawlin tengkhawm le’ng a meetna tampi om takpi hi. Mizogam ah khantohna a manlang theihna a hang khat pen MNF leh kumpi a kido hun (1965-66) akipan India kumpi in village grouping nakpitakin na bawl ahih manin a ciilin Mizote adingin a haksat hangin a nung ciangin a thahatna/khantohna kipatna uh na suak hi. Lamka gam buaina hangin singtang/khamtung panin mitampitak in Lamka khuapi zuanin milip mahmah khang ahih manin tu-in Lamka ah khantohna hat mahmah hi. Mai lamah India leh Burma kikawmna hong hoih tetek leh border town I neih ding hong thupi mahmah ding hi. India lam panin Behiang khang dinga, Kawlgam lam ah zong tua bang khat I kisam ding hi. Moreh leh Tamu zong tua bang hi.
      
Zing ann nek khit ciangin Dallas pan hong dawn dinga hong pai Pa Daniel Mangpu tawh Dallas lam ka pai uh hi. Dallas leh Fortworth kikal pen mawtaw tawh nai 1 sung paina hi. Pa Daniel Mangpu pen Tedim a Dr Thuam Khan Thang I tapa ahi hi. Amau inn ah tawlngak khit ciangin nitaklam nai 2:00 PM in amau pawlpi Zomi Community Church ah kikhawmin thugenna ka nei hi. Hih pawlpi ah tulaitak Pastor a sem pen Sia Suang Khen Pau (Sia Paubawi). Kikhop man ciangin Pa Daniel Mangpu inn ah holimin nitak ann ka nekhawm uh hi. Sia Paubawi kiangah ka giak a, amah tawh hun nuamtak ka ngah theih manun ka lungdam hi. A diakin Sia Thang Ngaih Lian (Sia Lian) in a room/khan ah hong giaksak ahih manin ka nuam hi. Sia Lian-te innkuan pen kei tunma diakin Kawlgam Tahan ah na ciah uh hi. Dallas ka om sungin Pa Daniel Mangpu, Pa Piang, Pa Dal Khan Mang leh Nu Muang-te innkuan in ann limtak hong nekpih manun ka lungdam hi. February 17 nitaklamin Sia Paubawi in Airport tan hong kha-in American Airlines mah tawh Tulsa lam ka zuan hi.

Tulsa, America Zomite Khuapi

Dallas leh Tulsa kikal vanleng tawh nai khat lian ki-leeng hi. Tulsa pen Oklahoma state sungah om hi. February 17, 2015 nai 5:20PM in Tulsa International Airport ka tun ciangin ZIOK makaite, Mualnuam khua kipawlna makaite leh ZBCM siate mi 13 in ong na dawn uh hi. Dr Pum Khan Pau, Chief Guest, Zomi National Day 2015 cih a kigelhna name tag (I-D) khat leh paak khat hong piapah uh hi. Mi tampi in hong ngak cih ka gal muh ciangin Oh! kei kua himawk ka hiam hih zah a hong kidawnna dingin cih ka ngaihsun hi. Ka mi ka sate itna hong ngahsak Pasian ahihna ka phawk tetek hi. Airport sungah man kizaih ziahziah in tua pan ka pusuah lian uh leh vuk/guah hong zu ziahziah mawk hi. Tulsa pen US gam bupa huih nam tuamtuamte kituahna ahih manin khuahun kikhel pakpak thei hi kici hi. Ka zin tunna ding U Ngin Khan Lang (Pa Langno, Zuasiam ciin zong a kithei) inn ah ka kinga hi. Topa tungah lungdam kohna nei-in hong dawnte pawlkhat ong zuisuakte tawh ka holim uh hi.
    
ZIOK makaite in hotel ah tungsak dinga a geel laitak ama inn ngiat ah hong zindo nuam a hong kipiakhia Pu Langno leh Pi Cingtawng-te nupa thupi kasa mahmah hi. Pu Langno pen Mualnuam khua pan hi-a, kei zong ka pu ka pate Mualnuam pan ahih manin khuapihte omna mun buangah mun dangah tung theilo ding hi, ci-in ama inn ah hong tun sak ngiat pen thupi kasa hi. Amau innkuan Pasian in thupha pia ahih manin tanu thum leh tapa thum nei uh a, a tate laisiam mahmah in America President Award nangawn ngah uh hi. A diakin tanu upa pen Lia Dim Sian Mang @Mangnu bang ZIUSA tangmi in UN Youth Forum ah na kihel ngei hi. Tanu neupen Deihnu leh tapa neu pen Mungmung bang in hong maingapin hong ngai mahmah uh ahih manin nuam kasa hi. Gualnam beh ahih manun ka pute na hi sawnsawn a, ka angtang diak hi.
    
February 18, ni-in Sia Paul Zam Thang sanggam nu Nu Niang Ngaih Vung @Vungno galin Pu Langno tawh kava pai uh hi. Nidang pek panin Sia Paul’ pa Pu Awn Thang leh kei pa bang Lamka ah na kithuahin a kikawm mahmah a hi uh hi. February 19 zinglamin funeral service ah ZIOK Vice president Pa Khai tawh ka pai uh hi. Hall dim phitphet in Zomite paikhawm ka muh ciangin mi tam kasa mahmah hi; ahih hang tua pen Tulsa Zomite lak pan sawm ah thum zong hinailo ding hihtuak lai hi.

Rev Dr Chin Do Kham Han ah Hawhna

February 18 nitak lamin Pa T. Sawm Lian-te nupa in nitak ann ne dingin hong vakpih kawmun Rev Dr Chin Do Kham han ah ka pai uh hi. Kum October 13, 2013 in Siapa in hong nusiat ciangin leitung bup Zomite lakah tua zaha a om ngeilo dahna leh thawmhauna lianpi hong tung hi. Tua thu ka zak masakna pen meileng sung pan hi. Delhi ah holiday zang dingin ka innkuanpihte tawh Kolkata airport zuanin ka nasepna Visva Bharati University, Santiniketan panin ka pai laitakun Shillong pan ka sungnu in ka zi kiangah phone tawh Sia Kham sihna thu hong ko hi. Um theilo, um ngamlo napi’n dip sung ong kilok pah keei hi. Meileng sung mah pan internet hongin ka et ciangin Facebook ah tua thu kisuah ka muh ciangin a hitakpi mah hi ding hitah ci-in ka khualzin uh a nop nawn het kei hi.
     
Mitampi in Sia Do Kham ci-a I sap, siapa pen Pasian in Zomite lakah sangpitakin a laptoh khat hi-a, leitung bup Zomite lakah a muibun mahmah makai khat ahih manin ama damloh thu zakhollopi-a hong nusiat I zak vat pen thangah huai hetlo hi. Amah tawh ka kimuh ngeiloh hangin nidangin email tawh nihvei khawng ka kiho ngei tei uh hi. Tua leh nidang gamdang a paima-in Lamka a zin ciangin ka pano Do Khan Thang (Lanva) te inn ah zintung thei hi, cih ciang pen ka theihna hi. Ahih hangin Pasian in leitung bup Zomite lakah a lapsang mahmah laitakin nuntakna hu tawp a san mawk pen laigil ah na kasa mahmah hi. Delhi ka tun ciangin Vikaspuri ah ZCF makaihna tawh galna hun kizang ding hi cih ka zak ciangin ka lawmpa Dr L. Lam Khan Piang (JNU) tawh ka pai uh hi. Tua hun zatna ah ko lawmta zong thugenna tomna hong kipia ahih manin Siapa itna leh phawkna thu ka gen uh hi. Delhi ka om sung mahin Siapa luanghawm tawh kisai thu tangkona leh programme kizatnate nisimin internet panin ka en hi. Kuaman hong phawkpih loh hangin ka nupa-un ka thuak mahmah uh hi.
     
Tua ahih manin Tulsa ah Siapa haan ka mit mahmah tawh mu-in a mun ah ka paitheih ciangin dahna khitui hong kia kik hi. Ong paisan baih si teh, na maban tampi omlai hiven maw, ong zahtak mahmah ing ei Sia Kham ci-in a haan phungah lungsim kahtam ka lo hi. Zomi sungah Sia Do Kham’ kivakna bang lian a nei ding ka theihpak loh manin ama hong nusiatna in supna lianpi hi, ci-in ka ngaihsun hi. Nungta lai hi leh Zomite maban kalsuanna tampi hong makaih thei lai ding hiven cih khawng I ngaihsut ciangin I dah mahmah hi; ahih hangin Sia Kham om loh ciangin ama mun awng (void) a hudim zo dingin Pasian in kitangsapna bangin hong vaihawm ding hi cih zong ka um hi.

Zomi National Day Ah Chief Guest

February 20 nitak nai 7:00PM pan nai 9:30PM dong Marriot Hotel ah 67 veina Zomi National Day kizang hi. Hall lianpi sungah a dim phitphetin kitu demdam hi. Hun kipatma-in Sangi leh Kimpi-te unau in hong nohset/cibai kawmin puanlaisan tawh a kizem T-Shirt hoih mahmah khat hong pia uh hi. Amau unau pen Pasian la tawh Kawlgam-Vaigam a lok gawp khit uh ciangin Pasian in America ah puakin tulaitakin Tulsa khuapi ah om uh hi.
     
Hun kipat ding ciangin ka tutna lang tuakah tangval thagol nih puanvom tawh kizem, wireless phone tawh kizom earphone a bil ah kithuah, mit limlang vom bulh tuak hong tu hi. Puannuai thau a pua uh tam bel thei keng. Amau pen kei hong cing ding ahi hi. Ka ngaihsutna ah guai! lawmte’n kei pen inn lama ZRO makaipi Sia Pau hong sa a hong cing keei uh hiam? cih hong suak dektak hi. A ciil teng ka om nuamlo dek phial mawk hi. Kuama cin kul lo-a suakta a kisa mahmah khat tua nitakin hong kicin keei ciangin ka patau leh lam dektak hi. Puanvom silhte nih in “Tui na duh hiam, na zun a suak hiam, na kisap a om leh hong gen in”, ci-in amau pen a pualama a lawmte uh tawh kiho kawmkawm uh hi. A lang khat ah lah, kalaisai! Ni Khat Kumpi a cih bangin kei zong nai 2 khawng president a suak pak lah ka bang phial mawk a! ka ci hi. A taktakin lawmte’n kei hong theikhial hilo-in hong tawisang lua na hi gige ahih manin ZIOK vaihawmna leh ngaihsutna zahtakhuai kasa hi.
     
Hunuk nungak thumte (Ruth, Suih Lun leh Nu Toih) in hun kipanta ding hi hang, a cih lian teh ZIOK President Pu Sawm Lian stage ah kahto in A 67 Veina Zomi National Day ka hong hi cih pulakna nei-a, tua tawh kizomin Thawn Kham’ khui pan Zogam lapi Zogam, Zomi puak ziahziah in kihong hi. Tua la sak sungin mipi tanglo-in kiding khipkhep hi. Tua nitaka ka gei ah puanvom, mitlimlang vom a silhte kikal ah Zogam lapi kisak sung zahtakna tawh ka din laitakin ka lungtang tawng ah ka minam ka itna hong thak suakin hong suk khak dan kigen theilo hi. La leh laam tuamtuamte in bil leh mit taisak hi. Zopuan tawh kizem siamte pahtawina kipia-a, Jenks High School sangsiate zong lungdam lahna Zopuan kipia hi. Pawlpi tuamtuam pan pastor-te hong kihel banah vdo coverage nasiatakin kibawlin live in kikhah hi. Programme sungah thugenna nei nih bek om hi. Amasa in Lia Dim Sian Mang (Mangnu) in UN Khangno khawmpi a paina report pia hi.  
     
Tulsa Zomi National Day ah minute 30 sung ka thugenna ah ka lim gen pen nam nih in kikhen thei hi. Khatna ah February 20, 1948 a Falam ah Chin Special Division gambup panin Zo minam tuamtuamte in lungsim khat tawh a kipawl theihna uh a kha (spirit) pen nidangin a om ngeilo thu ahih hangin tuani-a thupiang tawm zong hi tuanlo hi. Tuabanga kipawl khop theihna lungsim pen a beisa kum 50 val panin sut kik kul hi. Mi tampite in Zomi Nam Ni thu I gen ciangin lungsim kigawm theihna hang kan lo ahih manin ahihna taktak bun kha theilo hi. Nidangin Hausa-te thuneihna a kimu theilo ukna a nei khuasiam in a piak hi, ci-in I pu leh pate in ngaihsunin zahtak uh hi. Ahih hangin tua thuneihna British-te in a laksak ciangin khuasiam mun British-ten a luah suak hi. Tua hun akipan hausa/ukpi leh mipi kikal ah nawngkaina kipan hi. Hausa/ukipite deihlohna hi masa lo-in, amau tunga thunei British-te thuneihna nialna hizaw hi.
    
Nihna ah, tuhun America gam a tung Zomite in I thupisak ding thute:
1.    Nidangin biakna (Christianity) in a kikhethang I pu leh pate gawm hi. Ahih hangin tua hong gawmkhawm biakna pen kikhenna I suaksak hi. Tua hangin lungsim gamgi hong piang hi. Biakna gawmkhop ding a haksat hangin, biakna pua lamah I lungsim gawmkhwm thei hihang. America ah Zogam tual lungsim gamgi pua nawnlo-in biakna pen kigawm theihlohna suaksak nawn kei ni.
2.    America thubullet (Constitution) ngaihsun khiapa Thomas Jefferson in Declaration of Independence sungah mihing khat I hih nak leh ei tawh a kikhen theilo a cih Right to Life, Liberty and the Pursuit of Happiness a koihna hang pen, Europe gamah kumpi leh biakna sungah suahtakna a om lohna pan suakta nuama America leitang thak ah a peem ahih man uh ahi hi. Tua ahih manin mihing nuntakna, suahtakna, leh nopsakna/lungdamna ding tawh kisai peuhmah ah suahtak ngiat ding a deihna uh ahi hi. Tua mah bangin a suaktalo gam Burma panin a America gam a tung Zomite in tua suahtaknate I zat siam ding hoih hi. America ah Zomite adingin a thupi masa pen in Education (lai pilna) hi. Hauhna sangin khanto zaw leh a meet tamzaw pen lai pilna hi. Khantohna a manlang na ding leh a kizop paisuak theihna dingin lai pilna kisam hi. Lai pilna lamah kidem ni.
3.    Nidangin gamgi bek in hong khen’ Zomite ihi-a, tuhun in gamgi bek hilo, tuipite nangawnin hong khenta in leitung continent tampi ah I om ta hi. Tua ahih manin minam leh gam itna pen transborder nationalism panin transcontinental nationalism dong ah I neihzawh kisamta hi.
4.    Zomite adingin unity in diversity thupi hi. Tua bang lungsim lian tawh I kalsuan theih ciangin minam picing ihihna kilang dinga, I khangto ding hi. I kibatlohnate kikhenna (diversity without fragmentation) suak lo-in, a kibangkim lopi mah kigawm (unity without uniformity) thei leng tua pen thahatna hi. Ei bek kicih nop tiltelna pen midang tawh kipawl theihlohna hi-a, tua in ei leh ei kipuaseh/tang dinna (self-isolation) hong suah ding lauhuai hi. Zomi Nam Ni spirit in Unity in Diversity hi.
    
 ZBCM Pawlpi ah Hunzatna

Tulsa ah nipini dong tam suak ka hih manin Zomi Baptist Church of Myanmar (ZBCM) pawlpi in nipini hun amau biakinn ah hong piak manin ka lungdam mahmah hi. February 22 in ZBCM senior pastor Rev. Kapmang in a seppih sia dang li tawh Panera restaurant ah kiallap (breakfast) hong nekpih a, holimna hun nuam ka ngah uh hi. Nai 1:00PM in biakinn ah kikhopna kinei hi. From Refugee to Ruler thulu zangin thugenna ka nei hi. Pawlpi picing mahmah uh a, sia zong 5 tak om hi. A biakinn uh zong nasia mahmah hi. Siate lak pan khat Sia Hau Mung in khangno leh media lam sai-in biakpiakna bang zong online in khah pah hi. Kiva mahmah hi. Sia Kapmang zong ka zi adingin a pute ahih manin amau inn ngiat ka sik khak ka lungdam hi. Tulsa ka tun in airport ah amah zong a dawnin hong pai ahih manin thupi hi. Sia Kapmang ka theihna pen Taangko khui bawl uh pan hi. A lasakte uh hoih sa-in ka uk mahmah hi. 1990 (?) kum hiam khat in Lamka hong pai-in Sia Tua Mung tawh New Lamka CBA biakinn ah a lasak uh ka thei lai hi.  

Deihsakna leh Hamphatnate

February 18 zingsangin Pu Langno leh ZIUSA lutangpi Pu Go Sawm Khup tawh Kala ann sai ah zing ann ka nekhawm uh hi. Pu Khup tawh ka kimuh patna hi-a, ka angtang hi. Thunuam in thu thei mahmah khat hi-a, Zomi tawh kisai nidangin Lamka gam ah ZNC a kipat cil lam pek panin zong a kihel ngei mi khat ahih manin minam a it leh a vei ngiat khat ahi hi. Amah zong Nashville leh Atlanta ah Zomi Nam Ni zinmang dingin kisam ahih manin ka ciah ding nitak khat a inn vuah ka kimuh kik uh sim loh ka kithuah man nawn kei uh hi. Tua zingsang in Pu Langno tawh Oral Roberts Unievrsity (ORU) ka vel uh hi. ORU pen Zomite Tulsa ah hih zaha tam a tunna dinga Pasian vanzat khat ahi hi. 1991 in Sia Do Kham (Rev Dr Chin Do Kham) in hih university ah D.Min sin kipan hi. A nung ciangin amah zong sangsia khat in pang kik a, tua hangin Zomi USA a tung masate pawl in hih mun mah na zuan hihtuak hi. Hih university panin degree a ngah Zomi tampitak om ta hi. Tu-in university administration ah a sem zong tamkhop om hi.      
     
February 18 in Pa T. Sawm Lian leh a zi Nu Zamnu in Golden Carral ah nitak ann hong nekpih hi. ZIOK makaipipa ahih mah bangin a minam itna leh kipiakna thupi hi. Zomite tuhun leh maban ding lunggulhna tampi ka kikum thei uh hi. Tuani-in Full Gospel Assembly (FGA) biakinn mun pha-in a pua lamah maan ka kizaih uh hi.
     
February 19 nitak lamin ZIOK Vice President Pa Khai in Golden Carrel mah ah nitak ann hong nekpih a, limtakin ka holim uh hi. Pa Khai pen ZIOK makaite lak pan a khangham pen pawl hi dinga, a thumuhna zong thupi kasa hi. Tua nitakin Pa Khai mah tawh FGA assistant pastor Sia Pau Mung inn ah hawh in hun nuam khat ka ngah uh hi.
     
February 20 in Pa Lianbawi (ZIOK Secretary) te inn ah nitak ann ka ne hi. Tua nitak Zomi Nam Ni kizang ding ahih manin hun ngah zolo-in ann ne bekmah ka suak uh a, kiholimna cih bang om manlo hi.
      
February 21 zingsang ann pen Pa Daniel Vum Lian Mang Tangpua (Sia Paul Thuam Thang tapa) in Golden Carrol ah ann hong taih hi. Pa Disciple Kap Sian Thang (Sia Do Kham paneu tapa) leh Sia Hau Mung (Siapi Tuanno tapa) tawh ka li-un hun nuam ngah in minam vai mah ka holim tangtang uh hi. Hong tutpih lawmte pen leitung pilna laitan zong a nei vive ahih maun thu thei-in muanhuai mahmah uh hi. A veina uh leh a nasepna uh thupi ngiat hi.
      
Tulsa ah ka lawmnu a adingin a pute ahi Sia Khamno, Sia Kap Mang cih bang hawhloh theihloha ka ngaihsut pawlkhat inn ah ka hawh thei hi.  Rev Dr Cin Khaw Kham @ Sia Khamno, pen Far East Mission Church (FEMC) ah Senior Pastor ahi hi. February 21 nitaklamin ama inn ka hawh thei hi. Sia Khamno holim siam mahmah a, a thugen ngaingai leng pilna zong tampi om in nuam kasa hi. Pasian in a tate zong thupha tampi pia-in praise and worship lamah kizang mahmah uh hi.
     
February 21 in ZIOK makai lutangte in Sen annsai ah nitak ann hong nekpih hi. Tua hunah thupi kasak mahmah khat pen, makaipi Pa Sawm Lian in tutung Zomi Nam Ni lawhcinna hang pen makaite in tavuan tek a zawh man hi, ci hi. Tua mah bangin makai dangte in zong makaipipa mahmah kipiakzawhna leh thusiamna hang hi, ci-in thusiamna a kipaih uh pen thupi-in etteh huai kasa hi. Amau tavuan tek zo uh hi.
     
February 22 nitakin Mualnuam khuasuak Tulsa khuasunga omte kipawlna panin tutpihna hong nei uh hi. Nasepna gam ahih manin hun awng ngah kibanglo kawmkal ah a hunkhop mah tawh ka tukhawm, holim khawm thei uh hi. Mualnuam pen ka pu leh pate pianna hi-a, ka pu ka pate 1943 dong na teng uh hi. Ka pai ngeiloh hangin pu leh pa’pianna ahihna tawh itna leh kizopna lianpi kinei hi. Tulsa ka tun ciangin Mualnuam khuasuak mi 40 bang om cih ka theih ciangin ka angtang mahmah hi. Ken amau adingin bangmah ka puak zawhloh hangin amau itna ngaihna tampi hong lak in sagawh zah in hong thupi bawl manun ka lungdam mahmah hi.
    
A diakin a bullam a ka gen bangin ka zintunna Pu Langno (Zuasiam) pen nidangin Thawn Kham’ lakhui masa a sponsor-pa hi-a, amau zong Mualnuam khuasuak na hi ahih manin ama inn ah tawldamtakin hong zindo ngiat pen thupi kasa hi. Pi Cingtawng thusiamna leh hong zindo siamna, nek leh dawn akipan vai khempeuh hong saipihnate thupi lua hi. I pu leh pate khualui nangawn in ki-itna leh kinaina khangsak ahihna ka phawk hi.  

Thukhupna

Tulsa ka khualzinna hang taktak pen Zomi Nam Ni zinmang dinga hong cialna bangun a pai ka hi hi. Ka tun cil a hong vaidawnte akipan, hong zindo, ann hong nekpih, hong khawlpih, huhna hong pia, leh nisima hong kithuahpih banah ka tangthu adinga ciamteh tham hong bawlsak ZIOK leh Tulsa Zomi khempeuh tungah ka lungdamna hih lai tawh ka ciamteh hi. A tunga ka gen sung pan ka mangngilh omlo dinga ka ngaihsut ahih hangin a om khak zenzen leh ka tup hilo hi ci-in hong sansak un.
     
A tawpna ah February 23 ni-in United Airlines tawh Houston (TX) tawnin Phoenix (AZ) ciah dinga ka pai ciang Tulsa Airport ah hong kha Pu Langno leh Nu Mandawng tungah ka lungdam hi. Nu Mandawng pen nidang Singngat a om lai pek panun ka thei hi. Biakna pawlpi khat ah om khawm banah, 1996 in Singngat Hill Model High School ah sangsia tawmvei ka sep sungin amau inn pen ka kiphualna khat hi. Zomi tul li val omna Tulsa ah ka paima-in tua khua ka meltheih ngeisa khat bek om hi ci-a ka ngaihsut pen, ka ciah ciangin Pasian in meltheih, lawm leh gual tampi tawh hong ciahsak ahih manin Topa min ka phat hi. To God be the Glory.