NAM PHUNCHIAKTE
By : Hauzel Gou

Ka minpu ka mite ki ngaineua a thum ua, honzon ua, a omdan giloute uh a lehngat san uh leh van a kipanin ka nangaikhe ding a, a khelhna uh ka ngaidam ding a, AGAM UH KADAMSAK DING HI. 2Kronikil 7:14

HunsawtkuamtakAigupta gama suak-leh-sal a koltang Israelte adia Pathian in a gamchiamsa mun tunpih ding in Mosi in a vapikhia chih i Laisiangthou ah i muhi. Mipi huaizahta’n mikhat lel thu ana mang ua, ana zuih noi-noi uh chih i ngaihtuah leh mipite leh pitu (heutu) kal ah kithumantuahna lian hina maizen e chih hon musak  hi. Huaiziakin gam-leh-nam i-it a, suahtak taktak i-ut aleh kithumantuahna leh pankhawmna akalbi masa’n neile hang i gam hong paal ngeiding ahi kachi ngam hi.

TutungZomiNam Ni 2015 leh Zomi Idol India 2015, i zatna uh ka etchiah hichi-khachi chia' phunchiakna tampi kamu mawk hi.  I program zatdante uh Social networking sites /Facebook apat ka nasim chiang in mipite leh heutute' kal ah (keimah mimal muhdan in) banghiam khat asam (gap) om hi'n kamu hi. Heutute' thugente leh mipi aw (voice) suakkhete ka muh chiang in, khat-leh-khat diklou kisatuah in, kigensia leh kiphunsantuah souhsouh khat houh i hidi-uam aw… chih in om hi. A hoihlam a tangkoupih sang in, ase zawng a ana phunchiak dikhop bang i om thouthou uh hi. Namdangte'n bang ngaihdan hon neidi uam aw.......chihbang hon ngaihtuah sak khemkhem in 'NAM PHUNCHIAKTE' honchi di un kigingta mawk ing. A dikmahle himailou ding hia tapkaw-tawng leh hotel munte' khawng a, i heutute khawng uh i phunsan ua, i buai cherchur geuh sek uh. A tuailai deuh leh pil kisadeuhte'n lah Facebook leh sepna mun khawnga, kipahtawi tuah sanga, i ki gensiat-tuahna uh muhdi tamzaw sek hi. Ahim-him a ei-NAM in zaw, thil banghiam khat i sai chiang ua, kipahpih naksang a, lungkimlou a i phun-na uh muhding tamzaw sek in a phun himhim dia ana tangpang pawlle ki om abangmawk kasa hi. Iphun-chiak dan uh ka ngaihtuah chiah 'NAM PHUNCHIAKTE' kichi le hang dik mailou ding i hi-hiam chih hon ngaihtuahsak in, tutung a i thupi din kon telkhia hi. Mihing in phunna ding i zonchiang in, kong tuamtuam ah phunna ding tampi i mu ding a, huaite lak ah anuai ah chi nih chauh i taklang ding.

PATHIAN TOH KAL AH:
Mihingte i gitlouh dan uh maw honsiamtu’ Pathian tung na-ngawn ah leeng phunna ding ngen zong in i phe-sup sup geuh uh hi. Pathian toh i kal ahoih semna di'n thumna bang i nei gige sek a, huchi'a i khalam bang hat i kisak lai in melma setan nasepna in leeng humpi neelkai bangmai in hatseem in hon maituah gige in khelhna khukpi ah i kezel hi. Huchia khemnate bang douzoulou in, i nungtolh hunbang omkha sek a, huaihun chi’ah phun-utna lungsim kineithei mawk hi. Pathian gam nna bang i sepna ah, kha mangthang tamsem matna ding in i thumzel a, kha mangthang matbeh naksang in,i matsa sunsunte na-ngawn bangle khasuah dekdek houh i hizaw di-ua aw chih a om in, lungkia in a nna i sep Pathian tung ah phun utna lungsim omtham ding in um ing. I inkuan sung leh i-nupa kal khawng bang, kihoutheihna di’n thumkawmzel in Pathian hon gawmsa chia' kituaktak a khosa gige ding bang i kisak lai in, huchilou daih in kinak-kiselna in itunga vai hon hawmkhum zawk chiang in hon siamtu’ Pathian tung ah phun utna lungsim kinei thei mawk hi. Itaksa damtheihna dibang in i thumzel a, damlouhna, natna-satnate'n hon behlap zawbawn uh abat hun omzel hi. Huaihun chiang bang in, ka thumnate' dawn a omlou hinteh chi'a phun kawmkawm in, achang in i nungzuihna ah lungkiat vungvung hun omthei sek hi. I leitung hinkhua ah khamuanna leh lungmuanna i deih gige ziak in, zingsang devotion bang hohzel in i va kilaan in i thumzel hi. Lungkham hun leh thawmhau kisa a belh dingdang neilou chi'a, Toupa' kiang mahmah a i lungkhamna leh ithawmhaunate bang tunzel mahle hang, lungkhamna ding kibehlap in thawmhauna’n kipumdim sek abat hun omtham hi.

Hichibang a i omchiah phunna ding khop kimuzel abang a, Pathian bang mohsa sukzel in i phunkhum nuamzel hi. Ihinkhua ah lunggimna khat palsuahta chi'a lungnuamta di bang kisa mahle hang, khat-khit-khat in lungkhamna in hontuamzel hi. Hiaibang hinkhua i zat chiang in hon siamtu’ kiang phunna ding ngaihtuah in Amah mohsa in i omzel mah uh hilou hiam? Mihing ngaihtuahna lel in zaw, Pathian vualzawlna i na donte khawng bang uh le i kam in zaw, kipak chi mahle-hang, a vualzawlna huntawk i sa naikei lai ua deihbeh in kipahdan theilou a, phunna ding mah i zong lailai tel uh hi. I innsak-innkhangte bang gilou sa’n leh gamgi khawng bang hon sotsot chiang un, heh-huaibang sa’n, alehlam ah Pathian bang i mohsa khasek uh hi.  Ei-leh-ei bang hoih kisa a kisiamtan in, midangte hihkhelh leh hoihlouhnate bang i na musiam mahmah sek zomah ua, huchin Pathian inle bangziak hicibangmi tel-khawng a vualzawlna ana vukvuk laitel ahi dia aw… chi’n Pathian tung ah phunna ding i zong sek uh hi. Huaite’ khawng bang; a ut dandan ua om ua, tua phetlou a-ut dandan ua che zomah lai ua Pathian inle a it laitel adia aw chih khawng bang ngaihsun kawm in Pathian bang mohsa’n i phunsan nuamsek uh hi.Huchi bang  gilou leh hoihlou isakte’ khawng bang vualzawlna ana dong ut viausek uh abat ton om hi. Jesu’n lah mi diktat-te samdia hongpai kahi kei a mikhialte samdia hongpai kahizaw achih bang i mang-ngilh khanak sek ua i phun khasek uh hi. Akal laklak in lungkiatna kawkhuk ah i kezel a, i thilhihna peuh a i lohsap chia’ng bang in hon siamtu’ bang mohsa in i phun nuamzel uh abang hi.

Mihingte i pianchiil apat honsiamtu’ Pathian in Amah lemgeelna’ mah a honpi touzel ana hi a, anuam-ahaksa tuakdia honphal leengi hi uh hi. Huaiziak in i hinkhua a i tuah haksatnate bang Toupa' lemgeelna ahi chih mang-ngilh louh ding leh ei adia hoihzaw a vai hon hawmsak ahi chihte theih gige a phunlouh hamham sawmding ana hizaw hi. I phunchiaknate’ bang phunna taakmah ahidiam aw… chihte geel vengveng kawm a, mahni mimal ki ngaihtuah uthuai i sa hi. Ihinkhua a haksatna i tuahte tengteng zaw Toupa'n  amah kianglam i naihsem theihna dia hontuahsak leh hon lemgeelsak ana hizaw zel hi. Haksatna i tuah hunchiang in belhdi dang omlou ahi chih mang-ngilh hetlou a, Amah lam i naih semsem deihhuaizaw hi. Huaiziakin Toupa'n NAM PHUNCHIAKTE ihihsung zaw hon vualzawl hetkei ding ahi chih theih a hoih a, khat-leh-khat i ki phunsan tuahpen uh tawpsantani in NAM PHUNCHIAKTE chihzaw utnawn dah maini uh !! Tua ding in Toupa kiang ah i hihkhelhte thupha tawi in, kituaktak a pangkhawm in mailam nawtsawm zawta ni uh.

I KHOTANG LEH NAM VAI AH:
I gam-leh-nam banah i khotaang i et chia’ng; lungzinhuai sa'n i awlmoh chiat ua, lah bangmah i hihtheituan kei uh hi. I khotang kisetakmai damna di’n Pathian kiang i thumzel a lah lohchin naksa’ng siatlam manoh deuhdeuh i bang mawk uh hi. Akhenchiah mi’n agamte uh puah in, kilawm leh changkangtak a akoihte khawng uhi muh chiang in, amaute bang i-eng in, bangziak a hichituk a hiai Nam-te’n Pathian vualzawlna dong uh adia aw i chih hun a om tham ding hi. Huchibang nam changkangte zaw kiphunsan tuahlou a, pangkhawm leh kipahtawituah NAMTE ahi uh hi. Pathian vualzawlna deih in, i gam-leh-nam adia i-thumnate’ uh bang, lohching ngeilou kisa a ning-gawp in i kimohsa tuah vengvung uh abat hun om hi. Huaichauhle hilou in hon siamtu’ Pathian hilhial leeng mohsa kawm a phunkhum ngam NAM te hilou ihi uh hiam kachi nuam hi. I khotaang kisetakmai bang pawna lua hi-awmtak a, gaal etkawm in, i-ut danteng un, i kimawhsa tuah kheukhou ua, i heutute’ honpidan bang diksa hetlou in i phun khumzel uh hi. Heutute'nle mipi mawhsa in mipi'nle heutute'; kimohsatuah in iki phunkhum tuahchiat ua, lah bangmah i lohtak tuankei uh hi. Bangziaktak a NAM PHUNCHIAKTEi hi di uam aw chih ngaihtuahna lianpi honpetheimawk hi.

Thumapi a  i genkhak zek mahbang in,  Zomi Nam Ni leh Zomi Idol India 2015 kon kupbehnuam laizek hi. Khalui in khovel pumpi ah Zomi Nam Ni 2015 i zangchiat ua,mundang a programte’ bang i etchia’ng; a phundi omlou in lohching bang sa’n i kipak chiat uh abang hi. Himahleh NAM PHUNCHIAKTE tenna khopi chih mahtak LAMKA khopi ah zaw ...a lohching mahmah chia report sang in phunna dikhop bang muhtheih in om a, a hoihloulam a report i tamzaw thouthou lai uh hi. I makaite’ uh honpi dante bang hoihsa hetlou in, gensiat theihtawp a gensia in i phunkhum ua,a mipite mahmah le diklou deuh khat houh i hidi-uam aw...hichituk a iphunchiak tel lawmlawm uh chih in om hi. Eisa’ng a i heutute’ bang ana bengvak zawdeuh uh ahi chihte thei kawmpi'n lah a vaihawmna bang uh hoihsa hetlouin phunna dikhop zaw i ngahzou himhim ve ua maw…NAM PHUNCHIAK te’n !! I Nam Ni bang atung gige le hilou, kum khat a dakkal 6 sunghiam dawr khakdi chihbang sih-tuk a, ana-ngai pawl om in, nektawm zongte bang kho-ngaihlua hi-awmtak in heutute’ thupuan bang i phunkhum zomahlai uh hi. Hun paisa ah kha khat/nih bang bandh i bawl ua, kuamah nekdi neilou a puuksi om lam akizakha nai tadih kei hi. Huai dakkal 6 hiam dawr i vakhak penzaw asiatluatna omlou in, i gam itna/ ngaihnai suklat theihna omsun huaile kum khat sung a ni khat chauh hilai hi. Pathian nei Namte’ i hi uh chih theih kawm a Aman amite’ it in leh dakkal 6 hiam dawr i khakziak lel in i khosakna hon buaisak tuan hetkei ding kachi ngam hi. Kimawlna bang lunglut chiat in i sai ua, i guplam te’n hon zohlouh chia’ng un i heh ua, a vaisaite bang mohsa in i phun khum ek-ek sek uhi. Hiaikhawng neuhneuh ziak himailou di hia NAM PHUNCHIAKTE chia minlawh a i om uh.

Tualou in program tuamtuam i saizel ua tunaizek inle Zogam Artiste Association huaihotna  nuai ah ka behpa Mr. Thanglalmuan Hauzel, Chairman OrganizingCommittee Zomi Idol India 2015, panlakna ziakin Zomi Idol India 2015 chih minvuah in i lasiamte’ pahtawi theihna omsun i sai ua, huaile kipahpih naksa’ng; aphundi hunkhop bang muhtheih in i om zel uh hi. A Judge dia  muan mahmah a i zatte uh bang siamlousa i hidi-uam ah facebook khawng bang ah mawhsakna kampau zangkawm a phunkhum kibeilou hi. Ahimhim a, ei NAM zaw banghiam program neuchik i sai chiang ua, a phunchiak di mawngmawng bangle om khinsa hive hang aw…chih in om hi.Alehlam ah lah i phunchiaknate uh ziak a, ana kibawl hoihthei kuahiam khat bang ana om thei di’n gingta mawk thepthup zel-ing. Hichi vingveng khawng khovel bukimnna khatleeng ana hizel mailou ding hiam chih in om zel a Social networking te azatdan siamlou deuhmah i hi di uam aw chih a om in NAM PHUNCHIAKTE chih adikna khat himailou hia ?

I Laisiangthou Number 14:27-28 i sim leh 'Hiai nam gilou bangtan katunga phun ding ahi ua? Hiai Isreal phunhatte' phunnate kazata ... chihte i muthei hi. Hiai Isreal namte' bang a nam gilou leh phunhat Nam i hi di un ki-gingta ing. Mipi'n lah heutute thuman sang a phunkhum leh gensiat utzawta, heutute'n lah Pathian leh mipi deihna bang hihiam chih zong suahlou a mahni deihdan a vaihawmzel i hi di'uam ah a phundi khop bei ngeilou hi. Hichibang i hih khak zenzen un zaw, bangtan mah i tung kei ding ua, i maban ding uh bing deuhdeuh zaw khading hi. Huaiziakin, makai heutute'n le Pathian dongkawm a vaihawm in leh mipite'nle  heutute' phunkhum leh gen sia-sia nawn lou in pahtawidan siam in nungthuap in, kipumkhat zaw leeng i gam- i nam suahtakna hongtung zaw ding hi.

LST Number 32:13 i simsuk nawn aleh ' Isrealte tung ah Tangtawn Toupa' hehna a kuang a, a mitmuh a thil gilou hih tua khang buppi a bei mateng amaute tua gamdai-gamkeu ah kum 40 sung a vakthapsak hi. Hiai a imuh mahbang in eilawi leng nam gilou leh phunhat namte i hihkhak zenzen un zaw Isrealte tung a Pathian thangpaihna atung bang in ei tung ah leng hongtung dia gamchiam gam (zogam) luahzou lou a vakvai mai i hih khak ding uh lauh huai petmah hi. Tuni'n unau khati hi ua, i tup goal uh lah kibangvek, himahleh khat-leh-khat kitauhtuah kawm zel in mahni nambing chiat suahtak utnate enzaw in i om chiat uh hi. Akhenchiah football kimawl tawh i kibatna chiang uh om kasa leltak hi. Nam chih in goal khum ut chiat in, i kituh souh-souh gige ua lah kuaman lah goal i khumzou tuankei zel uh hi. Huaiziakin i goal khumna di-mun uh kibang ahihleh pangkhawm a, lungkhat a luangkhawm in nuamtak in goal shoot le hang, haksa hetlou in goal ki khumpah theihding hilou hiam?? Huai ding in a player-te kiman phot-phot le hang, a entute' zaw bangchituk in phunhatle uh le hon zui thouthou nadi ahi uh chih theihsa ahi. Huaiteng ban ah igam-inam damna din kingaineu a thum in i omdan giloute uh leh-ngatsan le hang, Toupa’n hon gamchiam gam i luah ngeiding hi. Huaiding in NAM PHUNCHIAKTE chih paikhe masa photphot le hang a lampidi hong om ding hive aw.!!