Zonamkhandal
By Ginza Vualzong

Nidang in talpak te i gam khan dal ahi uh i na chi ua, tu in le zaw i gam khanna di bang tan hiam in dal lai mah un teh. Ei sung mah ah Zonamkhandal om i hih khak ding uh lauh huai sak in om hi. Ei sung mah ah Zonamkhandal om khin sakna tulai in lian mahmah hi.

I gam puah phat na dia development fund contract nasep di tampi hong lut te, a sem khe dingin ei lak mah iki tuh uhi. Hiai development nasep te sem ut in Minister te maipha bang zong pawl toh, Singtang lam a mi muh va nei pawl toh, a lang a lang ah i diang sosouh uhi. I gam puahna di development nasep di teng i hong ki hawm bei ua, himahleh i gam ah khantouhna muhbeh ding om tam hetlou hi. Tam hetlou chih phet, omlou chi leng ki khial lawmlawm ken teh. Huchi kawm kal in building nalh taktak, gari nalh taktak i gam a pun beh a, individual level a khantouhna nasatak in hong om hi.

Mipi te le i mawl thei lo lai uh. Hiai i gam development fund su thelthang te lawi Chief Guest dingin i chei mawi zawmah lai uh. Chief Guest te in sum tampi pi a hon piak ua leh gam ngaina, gam it peuh i sa uhi. Gam a ngaihnat uh leh i gam puahna di sum a muh te un i gam hon puah le uh gam it hi thei pan ding uh hi. I gam ah electric vak gina lou, tui nek gina lou, lampi gi na lou, public ground gina tak ki nei lou. Hiai te mitsin san a ka gam ka it chi in gengen in, sa sa leng le, i gam i puah tuan kei leh i gam khan dal tu ki hi maimah ding hi. Tua ziakin i gam khan na dia semlou a mahni gil a lut sak te bel ZONAMKHANDAL hi uh hi.

Chik chiang in Zonamkhandal si aw, Zonamkhandal mang aw i chi ngam ding ua?