Zi Ka Nei Ek Maisam A! (Ak’ gilpi tung a lungbuaina)
By VzSiam

Mi hiaizah zouzai in a hon nawlkhin nung ua ama’n hon na laikhiin zenzen, ahai man a de aw, a pilman a de aw chi mahmah ke. Nungak heel chih bang leng thil baihlam hi thahahlou, hangsan na teng kaikhawm a heel hang a, i heel masak i heel nanung in hon nawlkhin tel lawmlawm uh. Heel ngai hetlou a hon na deihte lah kideihlou ek sam lai tei. Mahni kitheilou a ahoihhoih bang deih zaw mah. A buaihuai lamdeuh tuh ahi. Mel leh puam a mahni kikimpihte khawng lungkim tak a neih suk mai di, ut hetlou zaw mah. A hoih phapha bang delh, mahni phulouhte khawng deih a sunkhua-zankhua a lunggim pih. Tantawk a lungkim sawm mawngmawng lou. Bangteng hihleh mihing hihna khat himai lou di hia. Tantawk sang a tamzaw, hoihzaw leh thupizaw deihlou kua a om a eita? Lawmte bang in hon awinawn mahmah lou uh. A omom nei suk dia hon sawl thapai uh. Ei lah ki-ut dek neng lou. Laisiam ding leh sepna zong ding a i kisawl chiang in a sang lamlam, a thupi lamlam i kisawl zel ka hia?  Mel leh puam leh pilna siamna, kizena leh thanopna chihte khawng thutuam hileh, mi kua hiam khat, amel leh puam ziak le hi khollou, apil-asiam ziak le hi khollou a i ngaih ngoihngoih theih, i it tuntun theih om hi veh aw. Kua hiam khat le hikei, mi khenkhat. Huchi bang a ka it ngoihngoih theih mi zong nilouh tuh ka hi a. Ka it ngoihngoih theih chih le hikei veh, it ngoihngoih theih tuh tampi muta ing a, hon it ngoihngoih kiik thei ding mi hi veh aw ka zon. Lawmte’n lah hon gingta nawn mahmahlou uh, ei lah kilungke dek nailou. Deuleu lou a i zon taktak leh zaw Pathian in le kuhkal man chi hi’n teh, ka zonzon amah ka mu khong hi.

Deih kisa a i nguipih a, i kahpih a, i delhdelhte bang leng ei a dia bawl ana hikhollou uh, ei a dia i koih ngam hetlouhte bang ei a hong hi veelvual mawk uh! Angakzoute’n zaw thupha ngah takpi uh hita eh chih in a om hi. I zi ahong hi uh tuh a nungaklai ua i itna bangmah ahi dekkei! I zite i hon thei taktak tuh a ngaihhuai in a ithuai semsem ua, banghiam nna hon sem ua, tawlsim a hong naak heekheek bang uh tuh kin a kin a ambulance sap a, damdawi inn naipen a puak a, ICU a oxygen bulh ding in a hoih hial uhi. Huchi khop a duathuai ahi tel uhi. A deihteng uh piak ngeingei ding in a kilawm a, a lunggulh teng uh tangtun sak ngeingei ding in a hoih hi. Nidang a pasal hoih mahmah, nu leh pa’ thumang mahmah hi na pi zi aneih zoh chiang ua a sungte toh bang hong kituaklou in ki-innkhen hiilheel thei uh i chihleh hithei law mahmah dingdan ana hi ve! I zite i itna in i lungtang haisak peetmah a, i sia leh pha theihna natan poihlongsak a bang a, nidang akilawmlou i sakte bang leng kilawmlou in a kithei nawnkei a, nidang a kilawm i chihte bang leng kilawm sakzoh in a omnawnkei thei leuleu hi. Huaiziak in numei gilou nuamte tuh naak giitlouh theihna mahmah unchia chih phet in a om hi.

Ka lawinu’n ak gilpi aduh mahmah a- numeite’ ngeina ahi ka chimai a, numei ak gilpi duhlou tuh vaang mahmah in ka thei – a nungak lai bang in, “I kiten chiah zaw ak gilpi k’on meh pihpih di aw,” chi peuh in ka chiamnuih a, amah lah, “Zozen eive,” chi’n a ki-utloulem neihzel hi. Ka kiten zoh ua Pathianni masa pen a hong tung a, aksa ka hon meh utuh ka lungbuai mahmah na ding ka tuak hi. Huchia ka innkuan ua an ka um khiukheu lai un meh kuang ah ak gilpi ka mu guih a, bang loh ding ka mahmah hiam chih ka ngaihsutna in ka kho-ul bang a pawtzou hial hi.

A himhim thu a gen in ak gilpi, ak ngoi, ahihke’h sasin-salung himhim upate khiat deuh ding chih ngaihdan nei mi ka hi a, ka nu leh pa hiam, ahihkaleh lu a kelsam pou khat toh ka umkhawm ngeingei in tuh amau ka khiat hamtang hi. Tu in ah bel midang tengteng sang in ka lawinu’ a ding in ka enlah zawta hi. Bangchi leh ka lawinu’n a nekha thei de aw chih ngaihsun in ka buai mahmah hi. Kuamah suah ma a suak a ka lawinu pe mai ding ka de aw ka chih chiang in lah kilawm ka sa lah deuh a, suak a ka nu piak di ka chihchiang in lah ka lawinu’ mai ah pasal zoulou ka kisa zel a, ka buai ngial hi. Kua hiam in hon suak in ka lawinu’n tangkhakei lelah huai a a nungaklai khawng a ka gengente tung a zahlaak diildeel ding in ka kingaihsun a, lakloh ka kisa mahmah hi. A ak pen kei’ goh hileh tuh a gilpi pen tumthum-tumli suah ding ding a, huchi hileh tuh  tum khat beek tangkha ding hi a, lah a ak bang leng ka u pa’ goh hi a, mi akgoh lah huchih in khachih in va chih nadan omlou, tengkol pangkhial tuh ka himai ve.

Huchia ka lungbuai guukten laitak in ka naunu’n, “Hi’n, hiah ka duhpen a om vele,” chih toh a gilpi suah a thuah a, ak a kigoh naakpeuh lelah amah a gilpi netu ahi sek a, a suah khitkhit in ka lawinu’ kiang ah, “Kihawm ni aw,” chih toh a kimkhat ding mahmah ding hop a thuah a, ka hihuai zezen a, chihdan siam salua in ka pakta gu mahmah hi. Ka lawinu’n bel, “Ngailou eive,” ana chi a, himahleh a kuang a akoih hial chiang in bel a pekiik samkei hi.

Tuni tuh abang-abang hileh suakta khat ka hi phot a, himahleh ak bang leng kinei thousam a hihchiang a kigou tou zelzel ding a chih khawng ka ngaihsut chiang in buaihuai ka guuksak mahmah hi.  Nungakte khawng i ngaihlai a bangteng hihsak ding a kiman hang a, himahleh a hun hong tun taktak chia thil haksapi ana hilim hitah chih khawng ka lungsim ah ahong suak a, a nungaklai khawng ua thilteng pawng chiamchiam louh ding hitah e ka chisim a, lah kei a ding in tuh a kikheelta hi.
 Bangteng hileh, thil teng a hun bangzel in hong kibulhlem mai na ve chih toh an neek dohkan apan ka dingkhia a, ka khut sil in numeite’ man ma tv en zual ding chi in tv ka suhing a, amai ah ka tusuk hi.

Ka lawinu ka heel masak lai in a honna deih dekkei a, kei lah zumlua leh kisuanlah haat lawlam in kizum theilou sak leh kisuanglah theilou sak in ka tolhkei hi. Lawmte bang in nuam honna sakpihkei ua, tawpsan mai ding bang in a hon thuhilh uhi. “It tak zaw na hi di maw,” ahon chi phet uhi. “Ei mel leh puam leh neih leh lam a suan ding neiloute’n itna kia suan di i neih ahih chia it peetmah a it ngai ahi. Mel leh puam suan ding neite bel amau huchipi in itkei le uh leng a it ding dim ua, ei bel en it peetmah in itkei leng hon it ding omlou uh ahih maimah chia,” chi’n ka chiamnuih dawn zel hi.

Bangchi tuk in hon limsak nuamkei in hon nawlkhin mahleh tolh kiikei lou a ka om maimah chiang in, “Bang achia a na hon ngaih lailai,” ahon chi khong hi. Kei leuleu in, “Ka kisaktheihna sang in ka hon itna alian zaw a ahi,” ka chi nimnim phet hi. Dik mah leng hi in ka thei. Mi khenkhat in hon limsak nopkei uleh, “Nang bang kisa e,” chia tawpsan vengveng theih a om uhi. Huchi bangte tuh it taktak a ki-itlou mah hi’n teh chihsim in a om hi. Mi i ngaih taktak leh tuh kisaktheih ngam ding ahi himhimkei a, kiniamkhiat gige ngam in a om zaw hi. Tua bang a i kisaktheihna sang a i itna a letzawk leh tuh itna taktak achihte uh ahi mai ding ka chisim hi. Hiai kiletsakna leh kisaktheihna tuh itna a dia melma lianpen ahi mai de aw ka chi hi. Nupa hiam nungak-tangval hiam kingai mahmahte khawng a kingaihnawnlouh ziak uh hilou in a kisaktheihna uh aletluat ziak a kikhenkha tam mahmah ding in ka gingta hi. Hihkhelh-bawlkhelh a om hun chiang a ngaidam ding khop a it zoulou, a kisaktheihna uh lianzaw khanaak.  

Ka lawinu’n a hon ngaih nung in, “Itna taktak in n’on it hiam?” chi in a hon dong zel a, ke’n bel, “Ka theikei. Huai ka chetna ding in kum sawmnga a luut ding. Ka damsung teng hon it taktak na ka hi chih chetna in ka zang ding,” chi’n ka dawng zel hi. I itte itna taktak a it hi in i kithei a, himahleh a chet taktak na ding in damsung  a la hi.

Zizon haksa i chih leh amuh nung a kep haksa zawlai leh kilawm hi. Ka chih bel zite a kephak uh chih lampang hilou in, ki-it tak leh kiduat tak a khosak khawm tittit ding thil baih ana hihchi laizangkei. Huaiziak hi ding eive ki-it mahmah a nu leh pa’ phallouh a kitaipih taltalte bang leng sawtlou nung a a kikhen vevut theih uh. I ki-it i kingaih lai a i duhthusam, nupa hinkhua nuamtak zatkhawm ding, ki-it tawntung ding chih suk tangtun ding tuh thil namai a hikei.  Tua bang duhthusam tangtunna ding a bang teng kisam hiam chih theiloupi a kitengte’n bangchidan a a nupa hinkhua uh a duhthusam uh banglou maimah ahia chi’n lamdang a sa uhi. Latkhiat ngaite lankhe ngamlou a, thasen ngaite seng ngamloute a ding in huchi bang nupa hinkho nuam muh theih ahikei.

Zingkal khat ka lawinu ang lum hithit a khanglou in, ka lawinu ihmu hithit lai ka en a, mailam hun ding kithalawp leh lit ka thuah hi. Ki-it mahmah a kitaipih taltalte bang leng kikhen liuleu thei ua, kimu ngei hetlou napi a kuate hiam’ lemgeel ziak a kitengte bang leng teek dong kilen titit theizel uh ahihchiang in bangchi bang in thil a hong kiheek de aw chia saupi ka ngaihsut lai in ka lawinu a hong khanglou a, a biang zuutsak hialhial in, “En zaw i duhthusam i tangtun di aw,” ka chi a, ka thugen theisiamlou in, “Bang duhthusam eita?” chi’n lungbuai meel tak in a hon dong a, dawng nawn tuanselou in ka tawp hi.

[Zi bang nei tak hial le hang hichi bang khawng a chiamnuih hon phal khol thahahlou ding uh ahih chiang un chi a zi neihma gentaaklouh zi ding muh ma a chiamnui masa zezen hi hang]