ATSUM Bandh Bawlte!!... Chih kihimawk dan e..
-MUAN TOMBING

District dangteng a singtangmite rights toh kisai Manipur Government in hon sikden dan leh nelhsiahdan (Reservation, recruitment, land rights, constitutional Rights, development plans, cultural, linguistical, social leh adang dang) Seminar neizou inlam kongpai a SDO office kavahoh leh meltheih leh zahhuai mahmah lawmte leh heutu khenkhat apan in ‘ office hongkhaksak dek umaw? Nou bandh bawlte I honmuh chiang a zaw kiliing sim maimah eive’ chih kampau toh honna vaidawn uleh chiamnuih thutak ahina a lungsim ah ngaihtuah tampi mahmah hon guan a, a issue pen mipi singtangmite hetkha constitutional rights ineih te nelhsiah ahih a kiphinna I neih chiang a phokpha hanga lohchinna te mipi theihvek dia kitaklang kha lou sekmah hita e, chih in a om hi. A lang khat lam ah, tribal te Right nelhsiah a omte Government in MEMORANDUM, REPRESENTATION, leh agelhthoh leh genthoh ngetna tamveitak te zathei ngeilou ahihman a bandh leh blockade leh kiphinna tuamtuam te zat ahihziaka ngeingaih pan phet a I deihpen hihetkei mahleh a tawpkhok a zat ngaisek ahijaw hi.

Tu ATSUM (2012-2015) term pailel ah haksatna tuamtuam omtou jel mahleh kiphinna pangkhawm a ineihte (Reckoning of the others, ROTO 1ST Phase January 2013, ROTO 2nd Phase November 2013 leh ROTO 3rd Phase October 2014) uah muhtheih ding hamphatna itan te government phonhalh thakna ineih I palai te panpihna jiakin leh I pankhawmna uh jiakin omjek samhi.( Deihthu samtan jaw ahi nai kei)

1). TET exam centre 2012 kum a kingen dungzui in imphal centre kia hilou in district HQ teng ah neih in omta hi.

2). Manipur CS ding, singtang mi paihkhiak teitei a tup uh tulel a pen, I pankhawm nate uh jiakin amun luah lel hi.

3). Additional Director (edn- Hills) Singtangmite mah kilenkik sak zou in power khenzak in omta,( Power Bifurcation toh kisai Govt.in gazette a suah ding process lel)

4). Kum 2012 Nov. apan kiphu leh kingen Hill areas a college teng a heutu (Assistant professor) kitaksapna liantak ompen tu in lak ding in MPSC in process ta.

5). Hill district teng a B.Ed study centre koihna dinga pan I lakna lohchingin, RUSA nuai a omding in Higher edn. Commissioner makaihna in process hita.

6). Higher Secondary Schools a Heutu kitaksapna uanglua pen venna ding in heutu 933 lakna ding process hita. ( 933 laka 705 te contract a semsa regularize dingin process ta a, adang 217 te MPSC in open competitive exam alak ding in process ta.

7). Hill Districts a sub- Division Hq teng a kum 2 sunga Higher Secondary schools koihvek ding in kithukim a Govt.in zong semsuah ngei ding in panlata.

8). SMDC peuhmah in RTE Act (2009), leh centre guideline dungjui a school naupang te hamphatpih dia nasep ding, Manipur in Adhoc SMDC a bawltawm jual pen phiat ta ahihdan edn minister puangta.

9). Recruitment reservation policy toh kisai 200 point roster a post 10 a ST 2 tel kha lel pen 3 telsak zoh hita.( Govt. in bawllem thak a om reservation policy pen suahpah ding). Post tawm chikchik lak ding suah a nelhsiahna i tan gige pen omlouta ding hi.

10). ST backlog omtam na mahmah Assembly secretariat, GAD,JNIMS, Home leh Health dept. abaihlam a lak ding leh tulel a Manipur Government in Deparment tuamtuam a recruitment toh kisai advertisement a hon bawlte I pankhawm naziak ua selguk theih nawn vuallouh te ahi.

11). Manipur state commission for ST zoh hita, nasem dia Chairman leh member government in a guanzoh phetphet a zat pat hita ding (2015). Hiai in constitutional rights I neihte naktak in I state ah hon humbit sak dia ngim leh lam et ahi.

12). Recuitment himhim a ST Quota candidate omlouhjiak a hukdimlouh te leng a om masiah a hibang bang a paiding, chitna nei ST candidate omchiang a lak ding.

13). Manipur University Admission a 7.5% ST Reservation hisek pen Central Educational Institution (Admission) Amendment Act 2012 M.U.in kum 3 phial bang a selmang uh kipholh suah in tu in 31% admission reservation ki nei nawnta.( Population basis a paiding mah ahi) Hiai reservation in Manipur a Siamsinna tengteng huam hi.

14). Officer khenkhat a retire nung ua Service extension omgige pen in junior officer te promotion ding dal ahihman in beisak ding in pan kila zou hi, ( tua extend a omsate chihlouh a dang government in a bawlbeh nawnlouh ding in ).

15). Hon hetkhak dan leh policy in I lungsim hon kam mahmah overlapping police jurisdiction toh kisai etthak a home department toh ATSUM in etkhawma subei ding in pan kila zou hi.

16). Singtang gam deihna a I gam land record tamtak phaijang a na omkhate lakkik ding. Order No.3/1/Misc/2008-Com(Rev)Pt dated 15/6/2013 pen kintak asepsuah a singtang gam land record phaijang a omkhateng a piak khiak ding in kinoh jou. ( sepsuahna lam a bang achi dia??? Singtang mite mah khutzat theih a hon neihjel ua leh zekai lai ding in um ing).

17). Department teng a Tribal sub-plan ompen ahiding bangtak a sepsuah a omlou chi a centre Government a hekna I piakun gahsuang in 2014 june in centre in TAH nodal agency dia a puan ban ah guidelines hoihtak toh semsuah ding in nohna state government kiangah peta.

18). Singtang mi officer te Politician khenkhat in simmoh leh nelhsiahtak a a bawlsekte Ministry of Tribal affairs, Party leh ST Commision a hekna I piakte un gahsuang in centre in thuhilhna hoihtak state politician khenkhat kiang ah thuhilhna leh gakna peta.

19). Centre Government in flagship programme a neihte khenglamdang lou in guidelines dungzui a State in a sepsuah ngeingei ding in ki phu jou hi.

20). Kum 2012 a Manipur Assembly Business Manual a Hill areas Committee nasep ding dan leh Article 371C a V.V. Giri,President of India in 20th June 1972 a suaia kaihna thu tampitak a heikoi (Manipulate) complain kikhia pen, tua edition thak ah a dik in paisak zouta hang.

21). Manipur University campus a separate ST Boys and Girls hostel lamna dia Director, Development of Tribals and SC in Cheque No.860124 a Rs. 3,74,39,984/- ,M.U. Registrar kiang a apiak tu in kizong san lel, Boys hostel kilamlel pen kimusuah jouta, Girls hostel pen in samlai.

22). Pre matric Scholarship kumtamtak hawmkhiak louh a om Rs. 8,29,70,200/- pen a omna kizongkhia in kum 2015 apan in kihawmkheta ding hi.

23). Kum 20 val bang hoihtak a nasep omlou leh mipi phattuam pih dia om ngeilou District teng a ‘Public Library’ te Govt.nohna ineih uh loching in staff kiching leh public library te mipi hamphat pih dia nasep ding in Assembly ah passed in omta.

24 ). Adang tamtak hun leh hun kal a ei a ding hisa heikoi teitei tupna om a govt. nasepte ki nangtou ngitnget in bangzah hiamte ahiding bang in hongpai jodeuhta hi.

Adang tamtak aneuhneuh mimal leh unit te vai leh I union pih dang te toh kal bang ah leng masawn na I nei uh, himahleh ideihpen bel kumtam kuam tak I omlam uh phoklou hial a community tamzawte nelhsiahna I thuak uh tuin om ihi chih itaklang thei in iphong halhta ua kipah huai lua hi. Hiai teng omtheihna nang leh kei I pankhawm na jiak uh ahi.

A deih huai : Manipur a singtangmite’n I taksap pen uh ‘Pankhawmna’ nei hi le hang kivaihawmna hong tuam ding a, Nelhsiah na I thuakte uh ei leh ei kivaihawmna in hihbei vek mai ding hi. Nou , kou chi a kikhenna in atamzaw mite munlian tak pia hanga, tua mah I khanloh theihlouh na uh higige lai hi. Ei a ding a omsa te mahmah bangle ngetnget petmah a ngaih gige bangjiak hiding in I ngaihsun ??? MP ineih dan leh Manipur Khangthu apan sut veng veng lehang Manipur polam I hi. Ahih leh maban bang ??? Ei singtang mite kideidan na leh ei leh ei kal a kituam etna beisak in PANGKHAWM peuhmah lehang a hong piang ding pen ngaklah huai hilou hiam ?? sanggam. Khangsawn ten hon mohsak louhna ding in tu in panla ni, tua hileh singtang mite lalgam ipupa vaihawmna mangsa tungding ding hihang. Kiphinna neih ngailou ding khop in Govt.in hon awlmoh hileh BANDH, BLOCKADE, ETC. zatngai lou ding hi a, nelhsiah leh sikden a I omna te leh hun paisa singtang mite kivaihawmna a thupina I neihsa te muhkik lunggulh huai mahmah hi. Hiaibang teng kal ah khat le khat kigense tuah kawmkawm mah lehang I pankhawm nate uh ziak in lohchinna tamsem lam en hang. Thei gegu napi a I gam leitang hon laksak tupna nei kawma tribal Rights nelhsiahna leh neksiatna mitam zaw te’n a hon neihkhum laisiah uh kiphinna poimoh gige ding bang hi, aziak bel ihmulou phon hak mah ahi. Manipur gam leitang ah za a sawmkua pen tribal te luahna gam hi a,huaisung akhantouhna sum le pai centre apan hongpai dan et in za a sawmguk leh nga phaijang ah kizang in za a sawmthum leh nga lel singtang gam honglutzel hi. A gam mi taktak hihna nei a khat bang a kingaihna leh kinaihna nei le hang institution lian leh infrastructure thupi deuh te phaijang kia a kisekhawm chih omlou in singtanggam a le omthei lua ana hi leltak aka hia. Eimiteng kipumkhat photphot le hang adang jaw adandan om ding ahi.

Suggestion and comment:This email address is being protected from spambots. You need JavaScript enabled to view it.