HON GUI KEN AW
Written by Dr Jam Thianlal
Ka tuntheih luat nadi jen dinmun
Tua ka dinmun in en ngamlou hi
(What I am, sadly salutes
What I could have been)
Economy niamchik a khosa. Family value tumta le neilou. Annkham masasa inn-kaa a kamkhuahna phihkhia a pawtsuak ngal mai. Innkuan bitna diadai-khuam kuaa nasan i khuakma un, 1980 vel in I gam ah khamtheih hong vaklut a. Inn chih phial ah tuailai khatbek hong gawlmat hi.
Salmat tuailaite’KHA dawite kulhpi a selmang a. Kha dang a sung ua a guansak khitchia khahkhiak bangmai in khamtheih hih te’ hindan hong kikheng vilvel hi. Sungkuante awlmohna khutchin-vom chia le nei nawnlou in, angsung-theihna tawpkhawk toh ak pul dek bangmai in lusu duauduau ua. Xeroxed-mihing omthei mah a tazen diai de!
Puan hoih deuh te koihna almirah leh anntang koihna phailel/singlem te kalh in, innsung nu ten niik-kawng ah chabi kuah ging noinoi maimah ua.”Na neulai ngai nang e, bawi” chichi kawm a mi’ lak a nuih selsal lemchang chiahlou di mah zaw ana hi de.
Khrismas hong nai a. Khamtheih tuh Lamka phaijang a herod ahi mai! Mi tamtak aa dia Mang’ pian ni lenmual khumsa, Bethlehem ngaihna tulsa lunglai a hong thak nawn hun kipah-huai petmah ahih lai in, nu-le-pa tamtak aa din mai-molh hun ahi maimah a. Bethlehem a Herod s’a Lamka herod thuak-hak zaw ahikha mah na!
Lamka herod lel(sikhop) a duangvul, tate’ khamtheih guih ziak a mipi lak a tel theilou nu-le-pa, kumteng a Khrismas hut deuh gige te aa dia hiai laa 1988 kum a gelh ahi:
Bawi aw, tukum Khrismas zaw hon gwi ken aw (2 vei)
Bawi aw tukum Khrismas in zaw
Na khamtheih te hon chiing ken aw, bawi aw
Na tun-le-zua, na chiin-le-tuai ten
Maitai in ka mangh nuam uhi, bawi aw.
Kumchin a vual mai ka zah uh
A phu bang a Tanpa ka biaklouh uh
Laikhun tung a luankhi ka nul uh
Tukum zaw nuihmai hon pu sak in aw.
Nuihmai-pu in Khrismas lawm le
Bangza’n a nuam diam gel dih ve, bawi aw
Miza’n Lunmang phat Khrismas lawm ua
Ei aw, sungkuan luankhi nulna ngen aw
Chiahsa hun sa’n n’ong lian zaw a
Na zaitha na pilna hongza deuh a
Lungpil in Khrismas lawm le maw bawi
Gui lou in Khrismas lawm le sungkim in.