NUMEITE MOHPUAK
By Nu Huai Khan Ching,Ghaziabad
Awlmohna toh numeite mohpuak gelh ding lungsim a omom ahihman in ka hong gelh hi.
Christ pen pasal te lu (head) , Pasal te pen Numei te lu cih bang na ki gengen ngeita hi. A hihhang in I pi uh Evi a kipan numeite khat veivei a lu a kipang kha dekdek in a hoihna pawlkhat a om hang in a lu lou ding kimlai lu a I pan ciang kihihkhial kha nak hi. Pasal te panpih ding a Pasian in hong bawl ahih lam kimangngilh kha pahpah in hoih lou in dah huai mahmah hi. Khat veivei lah Pate Pawl khat leuleu lah Lu hih na leh naa khempeuh Nute khut a nga cih zong om lua hi. Hithei liai leh Pate Innsung ah a Lu pen in hong pang uh henla nute a panpih hi leng hoih mahmah ding hi ven maw!Numeite mohpuakna khenkhat en suk ni:-
INNSUNG AH:- Mou hihna ah:- I Mou ten I nu-le-pa a treat ding uh I deih bang a en I teekpi leh teekpu I treat louh pen lamdang mahmah khat ahi hi. Teekpi/teekpu genhak leh mai et zoh louh zong om thamtham lua ahi cih I thei hi. Amau zong theisiam hi le uh tua bang in omlou ding uh hiven maw? Etsakna: Mihing I hih ciang lungkim loh hun omlua but I hehsan hiam han san ut zenzen leh zong ka nulepate ka mou in hibang in bawl leh ka lungkim diam cih ngaih sun masa thei leng ki hehsan hiam hansan ngamlou ding hi. Nulepa ten ka tapa in zi hong nei dia ka teek nung in hong kem ding cih lam en uh hi. A mau lam et I tung zokei zong in a hih theihliai leh teekpi leh teekpu te khase sak kei ni!
Khatvei ciang ei amau dinmun a I tun ciang a hih hoihlouhte uh zanglou ding in tu a pan kisa ni. I nunglam leh malamte kal a palai I hih man in pilvan mah kul sa ing. Mi pawlkhat kihouthei mahmah na pi, mipawl khat kingeu et (ki ho thei lo) se cih zong om a tua pen a mounu pilvan louh man hi. Haksatna a tuaklou omkei, na tuahte khempeuh na nunglam na va gen tazen leh na nung lam ten na malamte a ngeu et ding mah ahi. Hong it lua uh ahihman in haksa na saknate na malamte ngoh pahding ua, tua hang ahi na nung lam ten na ma lamte a ngeu et na hang uh.
Pasal nei a kuankhe sa nunglam sailuate zong dik tuan kei. Na pasal sanggamten na Innsung ong sai ding deihloupi in nang bang hang na Sanggam pa Innsung va sai mawk na hiam? Ei a te kia ci lua zezen a I malamte phawk khaklouh baih lam mahmah ahi pilvang ni uh. (Na malam khual na ki cih mahmah lai in nung lam bekbek khual hong ci ding khop zong na om lai veve ding hi)
TEEKPI I hihna ah: I mou pen a gilou ding a koih pah zezen ding zong sa keng e. ( Eimite chiin hoih ka sak hetloh khat mi`n mou nei leh na mou bang a cih tuak a ci dong sese, bang ci ta leh nang tawh bang ki sai?) Haksa sim leh zong I ta bang a I pom theih kei leh zong I tanu a lutna ah a teekpi in a bawl ding a I deih bang in I mounu na bawl pah leng maw! Mou na hihlai a na teekpi in hong bawldan na deih louhte nang na zang kei pah lecin teekpi hoih suak pah mai ding dan na hi. Nang tuah bang na khak sawn leh bel a vangsianu suak ding hi teh. Bang hun a nui man ding?
ZI I HIH NA AH:- Hih dinmun mawk pen thu baih lou ka sak khat hi. Ahihhang zi pen pasal nungthuap ding a siam I hihman in a hithei zahzah a thuap ding I mohpuak ahi hi. Bang zahta in na lian (Officer) in na loh (pay) a tam zong in na pasal pen a lu a hihding ahi hi. Na pasal a hehsimna theih peuhmahleh kamnei lou batna pen in kisel, kitotna tawm tuan mahmah ding hi. A dikzaw ding kituhna in buaisiatna tunthei hi cih mangngilh kei ni. Pasal a gilou himhim om mahleh a tamzawte ei numeite kamtheih luatman a ki tawngtawng kihideuh tangpi a theih a hi. Gen ding leh gen louh ding cih bang khen siam lehang ut huai mahmah.
NU HIHNA AH:- I taten I hihna hong copy pah uh ahi lam mangngilh kei ni. Nu moh puak zong a thu baih hetlou khat hi in, a siamte bang in laibu in hong bawl le uh simsim mai ut huai hi. Nute pen I mohpuak lian lua I Teekte/pasal leh a sanggam te leh tate / nunglam leh malam tekal a palai I hih mawk ciang in Pasian toh pang a pilvang tak a pan taktak ngai ka sa hi. Kei bang a mipil loute a dingin haksa mahmah hi.
I tate mi hoih a hong om ding deih ngen I hih man in phatna kampau I zat siam kei leh zong gilou lua / om mohlua / thumang lou cih kampau amau zak hi in zak louh hileh zong zat louh teitei sawm ding dan ahi. Kam neem na zat leh hong zang pah ding ua, kamsia na zat leh eipau sa in hong zang pah ding uh ahi. A diak a Khopi lam naupang te bang I mirror taktak ahih lam ki ciang lua. Kuamah toh (Kol le Vai) te cih loh a tamzaw Innsung a zang a hih man un. (Naute neu lai in khatvei innlam pai Delhi ka tun un a unau ua ong ki seel un na zang hong ki ci uh. Bawi na zang bang cih na hiam ka cih leh theilou uh, koi pan na theih hiam ka cih leh innlam a lawm ten ci uh) cih zah dong a kikul khum I hih man in pilvan tuak mahmah hi. A meaning ka hilh a kampau hoih lou ahi zat non loh ding a hih lam ka hilh hi. I tate uh hoih na ding deih ciat I hih man in ei tate hi ta se kei leh a hoih louhna uh I muhleh itna tawh kithuhilh sakthei ciat leng la I ki thuhilh sak leh zadah kei leng naupang om dan hoih lou cih bang tawm tuan mahmah ding a lamet ahi. Mi tate om dan hoih lou mu gegu lah thu hilhlou, a nulepa lah hilh louh pen a nulepa ten a theih tan ua saupi tung man dan uh ahi. I tate hoih loh na ong ki hilh leh zong heh mawklou in Pasian toh pang in pan la pah ni.Tuailai / Khangno tam bei lua mahmah ta hang. Piteek / Puteek I neih loh khak ding lau huai mahmah hi.
Tate thunun na Pathian ban ah nulepa te kithu tuah poimawh mahmah. Pa in thu nun sawm in a leh lam a nu in Pa cih loh dan tak a na gum cih bang om thei tham hi. Eg. Pa in sum piak louh ding a cih leh nu'n na pe gu teitei cih bang te taten advantage la in hoih malak sezaw sop ding uh hi.