Hun Mualliamsa Lah Laak-kik Theihlouh A Maw.....

Written by Vunghoih Guite

 

Chikeu gimgem, vun kiluai lipliaap, a nasepna puan siangthou hetlou toh tawlmelpu tak in niliapna lam zuan in a paiphei nelnel a, a mel a et in zo kum 70 di bang tuat ahi. Huchiin singkung kiang a niliapna zawn a, tutna dia kizentak a kidoh suangpek tung ah tawldam ding in a tu suk a, a khabe a kidou kawm in a mazawn a muhnop thil kitung omkei mahleh mitphe lou hial in a mit te a kikang ton niitneet hi. Huai mi pu'n zo lungsim puakgik tak nei hi'n alang a, a lungsim a thu kituun hon genkhe leh leng a zaak nuam liai di'n ka gingta kei hi. Ka kawlzal ka et chiang in dawnding theitui tamlou chihlouh nekdiing bangmah a omkei a himahleh huai putek ka et chiang in a dangtak bek a phattuam khakleh chih lamen in a kiang kava naihphei hi.

 

 

 

"Pu, bang nasem na hia? Na upat taktak toh na hatzou lai na e hiaibang suun nisat nuai ah" ka va chihleh, bangmah ngaihtuah hetlou in "ka zi iittak a damkei a, ka lung a kham" chi in a hon dawng gaih hi. Kenle ka theitui kuah ka piak kawm in "i iite'n hon damlouhsan chiang ua zo lunggim huailua eive mo, a hon sihsan khak di uh ka ngaihtuah khak chiang bang a ngaingamlou ka hi" ka chithuk hi. A hon entou a, a mit ah khitui a hong paak liliai a, "Ka kisuanglah lua, Pu, bang achia khasia na hia, hon omlouhsan di ka chihna hithahah lou in, a iithuai luat uh ka hon genna ai' zovoi" ka chi a, Ama'n, bawi, hucidan le hikei, na hon thugen in thil tampi hon ngaihtuahsak a, hun paisa a thil kana tuahkhak tampite ka phawkkhia a ahi" ahon chi hi.

 

"Pu aw, thil kikhel om theimah ahi, tu a na zi na iit leh a hun himai lou hiam, ahon dampih lai a na etkol man le manpha lua hilou hiam" chi in a thugen di kitheisiam sak lodan in ka dawng hi. Ama'n, a hong nui a, "bawi, ka zi zo ana iit den veng aw, amah zo ka iitna ka hilh tuantuan ngailou a le ka iitpen hi gige, ka taisan ngeilouh ahi" a hon chia, "Achihleh Pu, bang khasiat pih na hia oi?" chia ka dot nawnleh, "ngaikhe nuam di na hi hiam, dak bngzah a gingta a? Ka hon gen man lai na di mo, ka lungsim puakgik zo kuahiam khat kiang ah sungkhe ut lomah veng aw" a hon chi a, kenle "na gen nak leh bildoh dia man sa ka hi, gelhkhe leng poi kenteh mo? Hon gen in" chih toh a kiang ah tutsuk ka thuah hi.

 

"Kum 64 pailiam ding bang a hita. Mite' neihbang a neizou hikei mah le ung ka innkuan sung ua ka thupi ngaih pen uh tuh iitna ahi gige hi. Unau tam ka hihman un a chaang in khosak a haksat tuntun hun a om a, himahleh ka nu leh pa'n a theihtawp suah a a neih leh lamte uh iit lou hial a kou a dia hon pekhia uh ahihdan ka muh chiang in ka lungsim a nuam mahmah hi. Unau a tapa tang neihsun ka hihman in ka poimawh peuhleh ka deihdeih saitheih saimoh a sai in ka nu leh pa'n a hon vuk uhi. Huchiin amuanpen uh leh a suanpen uh hiding, khatvei tei amau dontu a pang ding ka hihdan khong ka Nu'n a lamet mahmah ziak in, Bible thu te zang in ka hoih ding deihluat na in ahon thuhilh sek hi. Huchimah bang in naupang hoihtak ka hong hi a, Pathian panpihna in ka omna lamlam ah mite' pahtaak ka loh hi."

"Mi lak a neizou veekvuuk kihi kei mahleh, neih leh tantawk a lungkim di dan, mi englou a hinkhua zat di dan khong ki thuhilhna taangpi ahihman in, ka innsung ua ka neihte uh tawmsa hiam, aih'keh mite a toh teh dia hoihlou salua inle ka om ngeikei a, huai gen taklouh in mi hausate, a hausa di mawng in ka koih hilhel hi. Skul kai di a ngaih poimoh tenten man un ka unau un neih le lam phawklou in a hon kaisak teitei ua, a chaang in skul fee a hun a pezouloute lak ah min a tuan hun bang a om a, kumtawp exam di kuan chiang in houh admit card la dia ka Nu toh Principal pa va muh a ngai veu hi.

"Ka hong let dungzui in tupna bang ka hon neisam a, laisim utna ziak in gamthuuk lam ka lunggulh a, himahleh ka neih leh lam uh ka et chiang in suankham di bangmah a omkei. Ken lehkha sim na in sum zangbei leng, ka sanggamte' bang suak di? Ka innkuante'n bang ana ne ding uh? chih te'n a hon su lungkham mahmah a, huaiziak in maban di khual thulim zoulou in nitha a kiloh in jugali dan in nna ka hon sem a, huchiin ka nu leh pa ka panpih theih dandan in ka hon panpih hi. Tangval khat kihisam ahihman in, khanvual bang ka hon pawl a, lawmte omdan a om teisam chi in laizial leh zu te ah ka hong kibual a, 'hihcheuh' ka ki chih sung in theihlouhkal in a zei gop lam ka hong hita hi.

Huchiin ka lawmte phazoulou kisakni bang ahong tam mahmah a, englou di chi mah lengle, keile amau dinmun a om thei, amau laisim bang in simleng, a sang ua sangzo tungthei ding, panla peuhmah leng, a lampi hong om di ahihdan khong ka ngaihtuah a, kei leh kei bang ka ki hehsan a, akhenciang in ka innkuante bang ka mawhsa hi. Ki suuk diing chi in a chaang in biakinn bang ka manoh sam a himahleh mite miitsiik a et gaugau, bangtan hon sunzom zou hiam hon chi uh hileh kilawm khop in tuailai pihte lak a vaal kisakna lungsim khong a lian deuhdeuh hi. Ka kipan thak dia thathak ka la di ka chih chiang in hon hanthawntu ding omlou ahihman in, ka thohkhiak dek pat chiang in ka dintheih ma in ka pukkiik zel hi.

 

"Nikhat tuh, inn paibaih ngeilou kei di banglou tak in ka paibaih hi. Inn ana mial khipkhep a, 'kuamah omlou umaw' chi a ka kikou phei dek leh mi thum hithit ging ka za a, kua hiding ahiam aw chikawm a kava naihphei leh, ka Nu, kiginni zan kikhawm gige tuh, kikhawmlou a a lupna tung ah kinga a lei a khukdin kawm a thum ka mu hi. Huchiin kap kawm a tawl tak a ka Nu, a tapa tang neihsun adia thum huthut in, a tapa hoihlouhnate ziak a amah kimawhsa a, Pathian kiang ah ngaihdam ngen a kap zoihzoih in, nikhat ni chiang a a hon lamet tapa suak ngei ding ka hihdante lamen a Pathian kiang a thum ka muh chiang in, amah diklouhna omhetlou himahleh kimawhsa a, ka khelhnate ziak a, a vualte lak ah ki hel ngam nawnlou, kiginna zan a kikhop gige bang a le ana kikhawm zou nawnlou, Pathian mai a din ding zumhuai sa a, kei a tapa kholak a ut leh dah a om a, zu leh sa kham a zumlou a vialdian tuh a hon kiphawk khesak a, ka kisuanglah a, ka nu leh pa neihlouh ziak a, ka tupna tan ka tung zohlouh amau mohsa a ka hinkhua kana zat tuh ka kisiik mahmah a, kideek zou nawnlou in ka Nu' thum lai tuh kava ang kawi a, amai ah leh Pathian mai ah ngaihdam ngen in ka kap huphup hi."

 

"Khomial tak zoh nung a nii vaak etlawm tak a hong suah zel bang in, pan la thak ding in ka hong kisa ua, ka omdan lui te paikhia in ka hong ki hahsiangthou a, neih leh lam haksa pipi in, nu leh pate'n niteng nektawm zong in ka nu bang mehzuak a kipei in alang alang a diang in ka hong kisa khia uhi. Huchiin mitampite' tungzohlouhna mun ah laisim ding in ka hong tungsuk khong hi. Huchia keile haksa tak a chawm ka hihlam ka haih louh ziak in laisim mengmeng a kaam muhpah ding ka lunggulh tinten hi. Laisimlouh sung hunte' ana kivei zek ahihman in kipat thak bang a haksa sim mahmah hi. Himahleh ka Nu'n a thumna ah hon phawk gige a, Ka Pa a theihtawp suah a guhtui kang zen a pang ahi chih ka theihziak in, 'khapet zeen in hong pang in aw bawi,' ahon chih uh tuh ka bilkha ah ka kem gige a, ka lungkiakni in Bible te sim in ka ki suhatsak thak zel hi."

 

"Lungkia leh kingaihsiat a om ni a tam mahmah. Achang in, kei maiteh khuak neu pi in a koi a bang kaam gelhkhe ding ka hitel a? Lungke lou in pang peuhmah le lohchin ahi kua chih ahia, vuak in om na ve! A khenciang in ka lung a tom mahmah a, a khenchiang in lah ka mittuite bang a pawt zel a, kei leh kei bang le ka ki haih dekdek hun a tam mahmah hi. Himahleh, tunglam a Pa'n hun hoihtak ana seh khinkhian zaw ahi ngei di, solkar nna lianlou chik kum 5 nung in ka hon maikhe khong a, mite a sang in thupi zo kei mahleh ka kipahna amau a sang in a lian zo tham ding ka chi ngam hi. Ka nu leh pa leng a kipak petmah ua, tawplou a Pathian kiang ah kipahthute gen in, thilpiak in kipahthute ka gen ua. Huchiin Pathian deihsakna tang in hun hong paizel ah vualzawlna ka hon dong uhi."

"Ka sepna ziak a gamdang a khosak ahong ngai ta a, innkuante ngai mahmah hina zenpi, khopi a inn suang a, a tuam a ka khosak ahong ngai ta hi. Huchiin kum a hong paihat mahmah a, naupang chik ka kisak lai in pichinlam manoh lo ta ka na hi a, ka khe a ki dinthei a, keimah' poimohte bang kikaihkhop theih a ka hong om tak chiang in, kei maban di khual a buai vingveng in ka hun ka hon zangtou ta hi. Iit leh ngaih bang ka hon neisam a, ka Nu ka Pa'n, mou bang ana deih lota in, tuu' mel damsung a muhman di kilamen in ahon philphil uhi. Huchiin kenle ka iitpen kiang a gawm ding simthu ka lelpih ta a, ka innkuante ka iit bang a hon iitpih ding lametna in ka maban hinkhua a khut a piakkhiak tuh ka lunggulh mahmah ta hi. Ka nu leh pa kiang ah ka gen a, nu leh pa neilou khat zi a neih sawm ka hihman in, a ngaihdan uh ka dong masa hi. Ka Nu'n, 'kou vangsiat thu in omlouhna hon tuak mawk le ung, Pi leh pu bei hi di neive ua mo' a hon chia, himahleh Ka Pa'n 'genthei tagah te pa Pathian om hinaven' chi in a hon khamuan hi. Huchiin kei' deihtelna bangbang amau' deihtelna ahi chi in ahon kipahpih mahmah ua, ka thupukna lak peuhmah a hon soisel kei ua, ahon nungthuap gige uhi. Hun hong pai a, kiten vaai' te ka hon sai ua, kithalawp tak in hinkhua ah kalbi thak pan ka hong hinawn hi."

 

"Zi ka hon neih takchiang in, ka ngaihtuahna ana bang hetkei a, Pa dinmun let ahaksat dan ka hon thei ta a, Pa dinmun a ding te bang ka zahtat tuntun hun a om sek hi. Nidanglai a ka Pa kana chih zialzial a, vaihawm siam sa zoulou a kana mawhsak laikhong ka ngaihtuah kiik chiang in ka kisiik mahmah. Huchiin ka maban ding uh khual in koumau buai in ka hong buai vengvung ta uhi. Huai kawmkal ah ka nu leh pa'n le upat lam ana manoh in, taksa hat di bang a hat zou nawnlou a, tu leh ta mel muhkal ngaklah a lungleng ngoihngoih a hun ana paltou uh ahihlam ka manghilh hi. Khovel thilte ziak a suk lungkham a om in, zingchiang niisuak mel muh ding lel le ka khut ah akingak louh lai in, a piang nailou ka tate maban ding khual in a hon suang tu ka nu leh pa iit ding dan manghilh kha ka na hi maimah. Kou mau buai a buai in, nu leh pa innsung nuam ngaihnat ding dan awlawl in ka manghilh hi. Kumteng a khatvei bek va veh ding bang le hun pammaih, sum heksak sa in chiltheih chiilmawh in ka chiil khata. Huai kawmkal ah ka nu leh pa'n le ka sepna ah ka buai na toh, ka gim di khual na ziak in a hon houpih ngam nawn takei ua, theihlouh kal in innlam ah thiltung tampi te bang ka maih kha ta uhi.
Sanggam numeite lah khakkhiak ngen hita uh, don tu ding neilou in damlouh hitaan, taksa hatlouh na te ziak in theihloukaal in sihna hanmual a hon zotsan maimah uhi."

"Hun in hon manghilh sak ding kasak chiang in ka nung ka ma ka hei na peuh ah nu leh pa ngaihna hong thak mahmah a. Kei a tapa uh bangmah ka hihlouh lai in, khitui kai zen a hon thumsak in a hon iit den ua, 'hun' ana pe khazek hileng ka chih ni a tam mahmah hi. Ka tate mel en in ka kipahsak sawm zel a himahleh, Pi leh Pu bei ahihdan uh, kei hamphatna bang a Pi leh Pu vualzawlnate mulou ding uh, pi leh pu iitna tangkha nawnlou ding uh ahihdante ka ngaihtuah chiang in ka pawna a, thuakhaksa kasa hi.

 

Khovel zaw ana kipeipei mah eive. Tu in ka tate kipaktak a a khosak uh ka muh kei a dia kipahna omsun ahi. Himahleh ka thiltuahte ka tate'n a hon tuah touh ua, kei kisiik bangbang a ahong kisiik khak ding uh ka lau mahmah. Ka kisiik a lah bawltheih ka nei nawnkei"
chi in a mittui a taak khia a, a dai diidee hi.

Kei thuduh in "Pu, achihleh na gen dan tak a," chi a gen dia ka kisak leh "Bawi, ngle pai inla, khovel ah na hinkhua a kikhel ma in na iitte mel in haih ken chih ka hon thukhak!"