...n’on It Zaw Hia??
Written by Lianzamang Tonsing @ ZM Tonsing

Singtang lou bawl a buh kia chiin pen kingakna taak taktak nawnlou hi. Huaiziakin, sum suah theih deuh diing haichi lam pibawl zawk poimoh ka sa. Haksa sim mahleh lam-etna lianpi toh Chinkhothang’ loutul nawl a vatlouh gamtak, keen sim diaiduai mahleh malta lei di’n ka vat guigui hi. Sing leh gua kihelh ahih banah gamtak ahihziakin a nuai thelhsim mahleh a vat a hak veve. Huan, a lai ah gobul lian simsim 3 leh lian huntawk 2 a kitung ngeingoi a, huaite ngeichu malta chiinna dia ka kinepna leng ahi bok hi.
Sih-le-hin kar ah louvat ka zou khong sam hi. Tem bul leh heipi letletna khutsung teng a thuap mah abang neknokh hial. Ka deihthoh mahmah leh kinepna gobul tuk lah a nuam liai kei. Gova in ka mittung hon pekna mun 5 hiam ngut ah khui netnot ngai a, a ma-pawn le amang naikei. Ka mittang hon pekkhak louh hampha ka hihlam ka phawk thakthak  hi.

Ka gintak leh lam-et bang ngei in malta a hong pouhoih mahmah hi. Haichi dangte leng a lungtun huai mahmah, ahihhangin dum pen deih banga a poulouh ziakin a kiak suanthoh a ngai hi. A vat haksa sim mahleh gamtak nana-na zaw a lei ana hoihdeuh mah ahi ding haichi tuamtuam in a ngeih petmah hi. Sainou toh teh in baih leng a baih. Haichi hoih leh lungtun huai taktakte i et chiangin gimlam leng kiphawklou phetlou in nikhat lelleng lou mulou a om di haksa kisa ngoihngoih hi. Tuabang ngen a haichi a hong hoihzom touhzel leh kumtawp lam chia ta-le-naute’ van di lei dia zintheih diing.... Ngaihtuahna a pailam zang in a nuam a, tha hon guan.

Hunte hongpai zel a gah nekdi hunkuan in haichi a hong gina hetkei maimah hi. Malta nasa tak in a dulh a, a gah nuam hetkei. A gah sunsun leng a pulhpulh mai hi. Dum ngei leng a teh a kauluat banah zawngin huaiham takin a kung nasan hon khiahsak hi. Tua kia mai hilou in haichi tuamtuam te leng gamsa leh ganhing te’n “kou gam a n’ong bawl uh, kou a ahi” chi hile uh kilawm in kisuanlahna himhim neilou in hong ki-angtang sak mahmah uhi. Vuahzu-daikai, thousi-thouvai leh azu-aham thuak a, mittang ke leleng tawm manlou di hialkhop a i buaipih nung a hichi bang gah honsuang maimah pen khasiat huai bang hial hi. Kingaihsiat huai vungvung hi.

Dum hi’n malta hileh i tankhak sunsun te inn ompih zen a kibuaipih manlou, a uukna di sing lah kipaw manlou ahihmanin kisu muat zo-mah hi. Tuabanah, dumtau tung a phou in lou i kuansan a, tunkiik hun in dumtau tung ah i thilphoute muh ding a om kei. Akte’n dumtau playground dia ana zang hive un chin, a kiim teng ah thang chihtak in thang nengnung hi. Vaitung, vanpuak te leng ngakhe manlou in malta, dum, pat leh thil tuamtuam i phou pak lehlah samte i hon luak somsom nawn a.... Heiha! Khosak louh theih himai leh hoih di hia.... khosak ka tawp!

Khetul hongkhi bembom a, tangsam hong paak in hilhse ngailou in Christmas naita ahi chih a theihtheih. Christmas thohlawm di kia hilou, naute’ Christmas van di koi a ngaihtuah di a maizen a… I kinepna pen haichite lah bangmah lou suak a. School fee piakkhit zohlouh ziakin naute’ result a hongsuak kei zomah hi.

Himah-mah kei chi’n dum leh malta keu bangzah hiam toh Lamka lam i zuansuk ngei a... Lel konkon a puak di om leleng i hawmthoh di nakkal in puakthamlouh, a lou theilou ahihziak in i hon po-nawpnawp hi. Loutul kuan, loulai a vakna hiitang leng pha nailou in gari i tuang a, meikhu bangmai a leivui khu ngoingoi te’n hitang a dawn zangkhai hetkei. Bahara di kia toh zin a kihihman in lamkal ah gilkial sim leleng nekna di kineilou hi. Sam kia hilou mitmul nasan leivui dim, kising leh ak a bual a bualzouphet kising mah kibang lunglung mai hi.

Zodawn a kipan pa a di’n chu Lamka a thupi khopmai. Khopi a om ngeilou chih mahtak khopi paizia himhim kithei lou, inn teng leng kibang kisa mai. Ahi thei tan a ei khomkhom a ki-adjust kichi mahle min zaw i kipatna hon haih tuan hetkei uh. Singtang a kipan hon chi hingei ve un chin hon simmoh bawltuam biik un hon muniam viau uhi, aneu-alian, atek-akhang, ahai-amawl in!
Ngaihtuahna’n – I kipatna’n zaw chinlou deuhmah hi. Himahleh, midang hilou, pau kitheituah kuaukuau lak a gamdang mi bangmai a et a om pen lam-etna hihetlou hi. Pilna-siamna ah zaw honlel mah ing himahleh i kipatna banah ngeina leh tawndan ah zaw k’on laukei. Huan, Zomi chile, na sang in houh ka Zomi zo maimah di e! Ka poimohlam bel theikei mah n’uh teh. Nam khat ihihna honsuahkhia leh laktu – pu-pa khang a i ngeina leh tawndan te uh nuaisiah lou a zuun leh kembittu-te ka hi uh, Zodawn a te. Khangtou kichi mahle, pupa’ khang a ina zat uh sing-le-gua a kibawl niteng poimoh tuamtuam te a poimohna beituanlou hi, huaite bangzah in i bawlthei ua? Nam khat ihihna uh laakkhe tu, i ngeina leh tawndan uh kepbit leh puahphatna di’n nang western culture in bangtan hon panpih dia aw??

I gim le loutul gim khawng nam thengthung houh hikha ding hi! Bazar i vak a, i om dan himhim ale min hon theitum lua hive un khemtheihna lam chiteng ah a uanglua om hetlou in hon kikhemsiak uhi. Ka lam-etna zaw hehpihna ziak liuliau a mite’ a nuai zaw chikhang himahleh a rate kibang in.

Pau i kitheihpih ngoihngoih ten honna angvan deuh di khawng uh i sa mawk alah ahuchi tuan kei. I beidotna lam ah meltheih zekte bang i bulbawl sim alah amau lam a pan in i lam-etna bang puaksuah a om kei. Pau i kitheihpih ngoihngoih, imi-isa hilhial te’n leng angvanna himhim omlou a ahon bawl unchu hiai Vai pil chalak mahmah te’n ahon dawmkei duh chih theihsa ahi. Ahon zahtak theihna ding ua a bul pan khalou ihihman in eimi te sangmah in a hon khemnak zo sin uh. Kei, Zodawn mimawl pa’n lah ka zahkai ziak in bangmah ka gen ngam kei.

Gamdang hilou, ei khopi mah a zin a kihih ziak in lam-etna sang kinei mahmah hi. Himahleh, i kinepna abang hetkei. Ei a khotual (local) mite sang in khotual lou te’n ahon thaneh zo uh. Amaingal un a inntek mahmah mai uhi. Thuneihna sangtak tawi bangmai in a om pheuphau ua, lauh himhim a neikei uh. Kamkhat-kamnih i pau sawih khak ngak hile uh kilawm un abil uh a tungleklak uhi. Ei gam ahihziakin kou Zodawnte nasan leng neuchik bek zahna honnei di khawng un ka ngaihtuah hi. Teuhlou mai!

Neihval hihetlou, tal a kho-ul luang puappuap zen a i sepgimna gah hichi mai a abei maimah pen thuakhak deuh liai hi. Ahi, ei-le-ei kal ah itna, lemna, muanna leh kingaihnatna om keileh bang chi’n namdangte’n hon mai-et in hon zahtak thei di ua? Bangtan tualsuak mite’ tung a namdangte’n thunei nilouh ding uh a dia aw.... Bangtan namdang te’n tualsuak mite’ hon simmoh leh ngapthoh theih lailai dia om di ihi ua? Ei-le-ei bangtan kitaw-lem leh kizep nilouh diing ihia ua?

Anese thei ganhing tuamtuam lak a tamlou i tankhak sunsun leng bubit in kitang zoulou lai hi. Buhkia chiin alah kingakna taak lou, haichi alah atawptan dong a a thaseng tampen, a ne-tawm pen a pangzel a..... Ka lou gamtak chi a ka kipahpah maizen toh, ka vatna thagim leh ka mittung a gova honpekna pawn le mangnailou hi.

10/11/14