Eimi Dawr Kaite Mah Ahi Vaite' Dawr A Hon Sawllut Te

- S Ginmuanlal

Lamka economy Vaite hon control ahihdan tulai in igen mun mahmah ua khanlohna khat neichuh ihipeuhmah uhi.

Vaiten Lamka economy tulai a hon control pan uh hilou in eilawi pianma apan a hon control hita uhi. Bang chituk in Vaite haw lele tua idinmun geih a i omlaiteng Vaite  kipoimoh gige suak hi.

Vaite (lamka mah a) kiang a van lasawn a zuakte ihilai uhi. Vaite hon supply dan a van tuamtuam supply theiding i om ma uh Vaite ihawthei kei uh chihna toh kibang hi.

Khopi khat ading in niteng in aneupen phimzang apan alianpen JCB tan supply khezou gige ding eimi a omkeileh tuh hon supply gige Vaite a om uh aloutheilou hongsuak hi.

Ahihleh hiaite apan bang chia kiveng theiding ihia chih enzual lehang inu ipa mawlte hihding hilou in ei khangthakte hihding hita hi. Nidang in inu ipa ten Phai chianglel khawng pha lel in i Lamka hiaitan hon natun ua, eilawi in India khopi teng tuansuak ihita ua amau hon tutna tan a om den a SAVE LAMKA ichihchih in omzia neilou hi.

Economy i control theihna ding in economy lam a ilut kei leh apua apan a genthoh mai a bangchik mahchia control ngeingei louding ihi. Kithuhilh thohlel a control theihchi hilou hi. Vaite dawr zuan nawn keile chih baihlam mahleh practical a thil hitheilou ahi. Mihing in ideihdan om gegu a ideihlouh deuh valei thil haksapi ahi.  Huaiziak in ikiang a ideih om a ineihsun sun a ideihlouh valei mihinna toh kituak bilbel lou hi.

Huai ahihman in i district sung a mipi tengteng lungtunna van en izuak hong poimoh a huaitan hihtheiding a i om keileh Vaiten baihlam tak a zou uh ahihman un Vaite lou a khosa theilou kihizel hi.

Tuailaite hihding ichihchiang in capital ding omlou chih ipaulam ding hipah hi. A poimoh pen capital mah leng ahingut mah hi. Ahihziak in huai paulam a nei a bangmah hihlou leh hih sawmtuan lou a i om laiteng itup tunna ding gamla deuhdeuh hizel hi.

Tupna a omleh lampi om chih pansan in ilungsim taktoh pangle capital in hon daal hetlou thei hi. Katheih mahmah Vai naupang khat in teng 20 nei in business pan a kum 10 sung in building sung ah van tampi zuak zou hi. Teng 20 aneih in kuva tang leh ateh lei a Sunu vai dukan a tamlou ngen in lampi kiang ah tutpih hi. Nikhat azuak in teng 10 meet a azing in 30 man Kuva tang leh ateh lei nawn in zuak nawn hi. Huchin ani ni in a kuva tam deuhdeuh a Biri, Sada te toh hon zuak beh a sumpi ding zakhat aneih nung in niteng in teng 20 saving gige a kum 10 in a dawr ding building lianlou bawlzou in nikhat in teng 200 saving gige hi. Tuchiang in Mahajon chih in omta hi. Ka mit mahmah a kamuh huai vai naupang  capital teng 20 ahi. Huai Vai naupang dan in kuhkal in tup guh leng tunung kum 20 in Lamka economy ut in ut keile ukhutsung ah omding hi.

Capital sang in hiai Vai naupang dan in kuakuan isem ngap dia chihpen ahi apoimoh pen. Kuapeuh in capital ding nei ngeingei leng...chih ilungsim uh ahi. Capital ding zonglou a hong om mawkding hilou a capital ding izon suah ngai ahi. Capital ding nei venvon a business ipatziak a mizawng taktak hong dawrte thupi a ngailou a dawr kaite mah ahi customer te Vaite dawr a sawl khiakhiate. Capital ding nei a dawr ibawlziak ua ilungsim a kiletsakna toh dawr ingakziak ahi eimi dawr kaite sang a Vaite ki dawrh zawk ziak. Muh khamkham nekding leina a zang eimi mehzuak nupite meh ivadawp leh kipaisan theilou khop in na kamsiam uhi.

Zogam ka it.. Lamka economy dinmun kapawna ichihleh asung akihel theih nading lampi zui in tunung kum 20 ading kisak kholhna in tu in kipan ni. Thagum thatang in Vaite kinoh khetheilou ding a noh khezou lengle Phai a bazar ivakai ngaiding hi.

Ikam a Lamka dinmun awlmoh a igenpen mite ading a gensak kihilel a i it a i awlmohleh aneulua chih omlou in ei mahmah in pan la ni. Kuhkalna toh kum ngasung lampi nawl a van tawmchik zuak a na omzoh ngeingei leh na capital ding hon invest ut mihaute hong ki line zezen ding ahi.

Phai tan lel mu inu ipaten hiaitan hon tut uleh ei India khopi tual teng theisuak dimdem ten khopi apan Lamka a investment kaihlut dan itheih hun lawta hi.

Apoimoh pen zaw tup guhna ahi a thakhat a Lamka economy khek guih theih vual hilou ahihman in tua kipan kum 20 nung a Lamka economy khek dia tuhun a kipat ahi. 

Mihihding dan gen a Vaite dawr zuan nawn kei ni chih in Lamka economy eikhut ah lut ngeilou ding hi. Vaite dawr ah teelding tamzaw a, tehkak pihding tamzaw ahihman in customer te mit hiip zaw hi. Vaiten a dawr kong uah dawr van kilang ding in tampi hon koih khia ua huai in mizol a min va entam hi. A en atam leh dawr luun kisa a kuapeuh in kizuan ut hi. Vaiten a van uh ut zahzah hon ensak ua eimiten "leilouh ding et louh ding" chih kipaipih hi. Enlou leh vellou in kuan blind in van aleidia? Vaiten tampi hon etsak a leilouh ding kisuanglah a ileisak kinem ua eimiten tampi en a ileilouh khakding lau ua van khawnglou uhi. Vaiten customerte ziak a vankhawng uh ahihlam mangngilh lou in customerte lungkimtak in khakhia ua eimiten customerte mizawng bangmah neihlouh ziak a avanzuak uh valeidan in ngaihtuah uhi. Vaiten hon iplah uleh ipainung in iplah huai ihihdan gen ua eimiten hon iplah lam uh itheihlouh khakding lau in kikou zezen ua anung in va ki dawr ngam nawnlou hi. Vaite kum tawn a dawr kaidin kingaihtuah in tuni a aleikeileh hong hoh nawnchia hon zot teitei ding chih paipih ua eimiten nikhat sung kiading ngaihtuah in customerte kidawr hi. Vaiten customerte vualzawlna petu pathian bang in treat ua eimiten customerte idawr van a ivualzawl dan a koih in customerte vualzawltu pathian dan in ikikoih hi.

Hiai ipaidan kigente khek kheding a khangthakte ikipat keileh chikmah chiang in Lamka economy ikhek zou keiding uhi.