Khangthakte’n Gam Leh Nam Bangchi It Ding?
Written by VzSiam

Pathian i lauhlouh a, a thu i limsak noplouh a, vangam khawng i ngeingaih nopkei leh leng gam leh nam i itna ziak beek in khamtheih ,  zu leh sa leh thilchiin thanghuaite tawpsan ni. Hiaite’ ziak a Pathian toh i  kaal  a lemlouh ding i lauhlouh a, vangam kailouh ding i lauhkei leh leng i gam leh nam zahlaak ding, niamkiat ding leh manthat ding  lauhna beek in tawpsan  ni. Hiai bang thilte’n i gam leh nam a nenniamdan, hichituk a ahon hihsiatgawpdan lah a theilou kuamah i om nawnkei ua. Vangam thu zaw sihnung thu a hi a, i limsak utkei leh ei a ding liuliau ahi. Himahleh gam leh nam thu bel damlai thu ahi a, ei kia a ding ahikei a, i innkiim-innkiang’ a ding, iveng-ipaam a ding, khang sawnsawnte tanpha sukha thil ahihman in limsaklouh theihlouh ahi a, ngeingaihlouh theihlouh thil ahi. I hinkhua in i innkuante, i innsak-innkhang, iveng-ipaam tangtak a sukha ahihman in ei mah utut a hin theihna zalenna i nei hetkei. Zukham khat in ‘ka thu ahi, ka innsung ah ka ut leh ka kitom di,’ a chihleh kitom mahtak hen, himahleh a kitom thawm  a innkuante, aveng-apaam  leh khosung-vengsung adia bil-aphuai ahihleh kongtual a kaihpawt a, kitom zou nawnlou dia singkhuah tumzen a khet hi heh. Huchi bang thawm haihuai a khosung-vengsung thotsak ding  zalenna a neikei himhim hi. Mi khat in ‘ka hinna kei thu ahi, ka ut bangbang in om ning,’ chia a hunphet theilou a a kiphatsakleh, om mahtak hen. Himahleh a omdan in khotang hiam, aveng-apaam a hetkhaak hunhun tuh pum hentom a, hankuang sung a sial a, hingvui ding ahi. Mi khat ziak a khotang a siat sang in mi khat asih a khotang a bitna a om a manphazaw hi.

Bang gen ut i hia? Khamtheih khawng i hih chiang in ikiim-ikiang, iveng-ipaam i sukha teitei a, mi’n honna khenlum le uh leng bangmah genthei a, khase thei i hikei. Puandum a tuamtaak leng i hikei. Khamtheih hih i chih khawng, a neek hi in, a dawn hi in, akaap hi in, a ngaihtuah toh hitaleh, huchi bang khop a hindan niam leh deihhuailou hinapi in a kum sim in khangnou tampite khamtheih khuuk ah a tuakluut gige ua, nungaknou leh tangvalnou pammaih taktak tampite i taan gige uhi. Hiai toh kisai in kuate’n bangteng hih uhiam chih i theikei. Himahleh i panlaakna a deihkhophuai hetkei chih bel a theihhuai hi. Khotang kikhaikhawmna pawl tuamtuamte, saptuam a pawl tuamtuamte’n hiai awlmoh in i nei taktak hiam? I awlmoh ziak in ngaihsutna bangzah seng in i na pangta a? Tha leh zung bang zah i na sengta a? Gensenglouh a ana pang a, ana semgimta i hi kha ding. Himahleh bangchi ahia? Koilai a khial i hia? Bang dia lohching taktak theilou i hia?

Khamtheih in alaak mite’ lak ah, ahihke’h nungaknou leh tangvalnou taangpi lak ah kanchetna (survery) bangzah i bawlta a? Tampi le hikha ding, bawl nailou le hikha ni. Awlmoh taktak i hihleh tuh saptuamte, khosung a kipawlkhawmna pawlpite leh skulte khawng in kanchetna (survey) bawl a, tuate tungtawn leh a pil leh siamte’ apan ngaihsutnate la a i khangnoute’ venbitna ding kulhpi i khoh uh hun lawta hi. Hiai nasem ding in NGOte i piakbawl uh ahikha mai ding. Hilou, vengsung ah, saptuam ah, skul ah, phiat a i phiat souhsouh mai ding uh ahi. I naupangte uh i theihsiamsak ua, khamtheih bang hi mahmah hiam chih a theih ut laitak uh, a kiphatsak hun laitak uh, huai laitak a i theihsiamsak theih a, a chet utna uh i betdaihsak theih leh i lohching ding hi. Hiai ding in skul leh sundes skulte bang in Foundation Course chih khamtheih bang hihiam, alauhhuaidan, huai apan  kidangkoih dingdan chihte laibuta in tawi mai le uh leng ahoih mai ding hi. Huchi bang a khangthakte i hotdamzoh leh tuh nam leh gam a dia puakgik hong hilou in vanzat poimohtak ahong hi ding ua, huai tuh gam leh nam itna kalbi masa ahi.

Gam itna kalbi nihna bang hi ding ahia? Huchia khamtheih-guihtheih puumpelh a i hong khan chiang in ei a om i hihtheih bang hiam chih i hon zongkhe ding hi. Huchi in huai thil i hon theihkhiat chiang in huai mah tuh i hon zuun ding a, neekmuhna hiam, ahihkaleh i hun awl zatna ding in i zang ding hi. Huchi in huai tungtawn in i nam tawisang in a om ding hi. Khente lemgelh ah, khente kimawllam ah, khente tumginglam ah, khente ennop thil toh kisai lamte ah, khente laigelh ah, khente laisimlam ah, khente sinsaktu bang,  tua bang a eimah a om hihtheihnate chiat kuhkaltak a i hon sintouh a, i hon sepkhiat chiang in gam itna kalbi nihna i tungtou ding hi.

I gam nese tute kuate hi ding uh ahia? Sum kia delh a thulimlou chik a nna sem contractor-te? Politician-te? Neekguuk haatte? Nam makaite? Hiaite tengteng sang a gam nese zaw hi a theihhuaite tuh khopi a laisim a om khangnoute i hi uh. Bible a kigen khaukhup hon a bohna munmun ua siit himhim neilou a nekang bang in i gam i nekang hulhul uhi. Ei ziak in i gam apan hauhsakna bangzahta khateng in vaigam-kawlgam ah a kithonkhia dia? Sum leh pai i chih ei khut a om himahleh ei a himawklou ahi. I siamsinna sum tuh i nu hiam i pa hiam sum hilou in i gam’ hauhsakna sum ahi a, mawkzat a, mawk omsan maimai theih ahikei. Huaiziak in siamsinte’n i siamsinna sumte uh a bat bang a ngai a, ditkiik teitei i sawm ding uh ahi. Huchih naak sang in khenkhatte ngial sum tuizat a zang in, i laisim i zoh chiang in innlam ah i pai a, mantaak himhim lou in hinkhua i zangthei hi. Huchi bang mi i om leh tuh i sih chia i kivuina ding in Zogam leitang laamkhat leltak leng i phuukei hi.

Khaile, gam itna kalbi thumna bangchi kaltouh ding i hia le? Tua bang a i siamna tungtawn in i gam leh nam a ding in i sem ding a, kawlgam-vaigam a sum leh pai loh a om i hita zong in, i gam in leng i siamnate a hon phattuampih a, a hon hamphatpih theihdan ding i ngaihsun ding a, i sem ding hi. Lailam, tumginglam, etnop lam, kimawlnalam, siamsinna lam, neekzonna lam, leh lam tuamtuam a i gam dopkang ngailua ahihman in siamna nei a muntuam gamtuam a i om chiang in leng i gam a dia i hun neih bangbang a i pan ding uh ahi. Tua i siamnate khangsawnte i sinsak ding a, i sum leh pai lohsate apan tasamzawte panpih in i kikhotuah dialdial ding hi. Huai chiang in gam leh nam itna kalbi thumna i tungtou ding hi.

Thautawi a gamnuailut kia gam itna ana hikhinlou ahi. Huai kia gam itna hilou ahih theihlai a i kipah a, hun lemtang i laak a, tua lou dang gam it theihna dante a naakpi a i gam leh nam i it ding ahi. Thautawi chihlouh a gam leh nam it theihdan dang i neihlai a i gam leh nam i it a, i zuun a, i kepkei leh denchiah thautawi kia a gam leh nam ittheih hun hong tung taktak leh a haksatdan i thei ding hi. Theih leng i na theita hi. Zanzek a i lak a thiltung peel in kum sawtpi paita a khovel pumpi a thiltung genta leng- kidoupi nihna hunlai a Britishte’n ut leh utlou a i pasal thahatlaite uh ahong khopkhiat khawng uh i mangngilh khaak ding uh a lauhhuai. Ei lak a ahong khop lel uh bangmah ahikei. Huailai khawng in Hitler in galdou ding, nam leh gam hum ding in valnou bangzah mawngmawng ut leh utlouh thu genlou in ana la dia? Laisiam pipi, siamna tuamtuam nei khawng leng ahikha ding uh. Himahleh huaite tungtawn a gam it theih hun ahinawnkei. Ut leh utlou a thau tawi a gam it angaih hun in apha a, haksa a sa ngial ding uh.

Gam leh nam it chinapi a lam tuamtuam a akhan ding awlmoh a i neihkei leh Paul chihdan leh dakkhutbet ging lel i hi ding hi. Gam leh nam it taktakte’n a gam leh nam uh lam tuamtuam a a khan ding awlmoh in a nei ua, amau hihtheihlam chiat ah kuhkaltak in a pang uhi.

Nang khangnou in bangchi’n na gam leh nam na it dia? A khanna di’n bang lam ah na pang dia? Laigelh in maw? Kimawl lampang ah maw? Khutsiamna tuamtuamte ah maw? Laisiamna ah maw?Ahihkaleh adang khan theihna lam tuamtuam ah? Ahihkaleh khamtheih leh zu leh sa a bual a gam leh nam nesetu, a lungvei saktu a pang ding maw?