VDF Himah Leng…!!
Written By : K.Lianthansang @ K Thansang Zomi

*[Hiai tangthu phuahtawm maimai ahikei. Aneulai ua pan a piching tan uh ana kem(khoilian), a pi leh pu uh a IIT dan uh leh KEP dan uh THUPI kasak luat ziak leh ETTON taak kasak ziak a, phalna (amau kiang a) la zen a kongelh mai ahi]*.
Damtheilou chih mahtak, solkal in Damdawi Inn (Lamka Damdawi Inn), kei inn dia hon bawlsak abang hial..!!. Tarik ni 11, May 2014 ni’n ut leh utlouh kamkhat lel leng kidot chih omlou in, Lamka Damdawi Inn a puaklut in ka omnawn hi. Nurse teng bang meltheih top kahi phial mai a, atamzaw tham amin un ka samthei vek zomah hi.
 Ka lupna gei ah puteek khat ana lum dildel a, a chipum teng bawk gawp in, houpih theih ahi nawnkei..!!. Agei ah numei naupang nih (kum 16 leh 20 mi di) in tutpih ngiit-ngeet mai ua, amel uh etmai in leng, daikilkal a mi ahi uh chih haih di vual ahi kei. Hiai-te unau kamuh in, hehpihna leh lainatna in kapumdim ngal mai a, ahihhang in hihtheih kanei tuankei. A tanchin beek uh chu theih teitei katum ta hi.
Lamka Damdawi Inn, zinglam dak 10:00 a luut kahi. Kalut ni Mother’s Day ahih banah, Pathianni leng ahi bok hi. ‘Malaria pv’ kavei ziak a Damdawi Inn ana lutkha kahi a, a gimselua bel kahikei (akipan tuung kahih man in). Kei khomkhom in lupna tung ah kana pau zouzou vanglak a, ka lungsim leng apil vilvel veve hi (damlou himah leng).
Huchia ka om laitak in, pasal kum 22 vel ding mikhat honglut a, kakiang a puteek damloute’ kiang lam hong zuanpah vengveng hi. Huaihun laitak in, Nurse te’n puteek pa’ Glucose ana khengsak laitak uh ahikha chet zomah hi. Nurse te khat in, “Nang koilam a va mang vengveng e, damlou enkol dia naupang vuak na nawtsiat gige…?”  chi’n ana dong gega a, pasal pa’n leng a etna di theilou in leilak a ensuk a, zummel deuh in, “Kei kilawh a vakuan zel kahi, zan kiginni pen kou adia ‘Pay Day’ dan ahi a, Pathianni chouh khawl zel kahi uh,..non theihsiam ngei ka gingta..” chi’n dawng hi.
Hiai thute ka zaak in, ka lungtang teipi a sut banghial in hong om a,  athuakhak tel mai..!!. Ka lungsim in, “Bangziak a hiai-te unau kia in a pu uh enkol ahi di uam aw..? Bangziak a…bangziak….??” Chi’n kei leh kei kana ki ‘kuaisonmark (?)’ nilouh hi. Hunlem om liai leh, ka tuailai’ pih (pasal pen) houpih teitei di’n ka lupna mun ah thupuukna kana lata hi.
Nitaaklam dak 02:00 vel hong gintak in, “Lawm, kon houpih thei diam, nabuai lua hia…?” kachih leh, “Houpih thei tham e, hun kaneih ni pen ahi, kon panpih theih na di om hia..?” chi’n maitaimel deuh in hon dawng thuk pah hi. Kakiang naineh in hongpai a, kalupna tung ah hong tusuk a, kamit tang hon en kilkel hi.
Ka gawl khawng kakhuah siang masa a, awl chik leh chiangtak in, “Kon bangchi sap dial eh...na nu-le-pa banah lawm  te’n bang honchi sap ua..?” kachih leh, “Kamin ahihleh ‘Khupreng Kom’ ahi a, ka nu-leh-pa’n honsap chiang un, ‘Khup’ chi’n honsam ua, ka lawmte’n bel ‘KeAr’ chi’n honsam letlat uh, hehe..nang bang kon chisap dia, kei sang in chu na upa zaw ngei dia..? chi’n hon dawng hi. Ken leng, “Eh, Paite pau siam nachia…kei min ‘Thansang’ ahi a, na ut dandan in non samthei di” chi’n nuikawm in kadawng hi.
Interview bawl chih dan leng hituanlou in, ka theihnop teng kaban  dot zungzung a, aman leng kidaamlou hial in hon dawng zungzung mai hi. Atawp in, “Na nu leh pa te mundang a om uh hia Khup? Bang chidan e, nou naupang vuak in damlou na etkol mawk uh..?” kachih leh, “Ka hinkhua uh saulou kon gen dia, hoihtak in honna ngaihkhiat sak lechin, huai apan in thilteng natheisiam mai ding..” chi’n hon dawng hi.
Amai a khaw-ul om te nuul kawm in, “Kou unau 3 kapha ua, kei alianpen kahi a, keinuai ah numei nih om (a pupu kiang a om tegel enphei cheuh kawm). Kom Tribe apan kahi ua, eimite minthangsak a, mangkangte mai a azaitha phelbang khauhsak Mary Kom te tawh khawkhat kahi uh. Ka nu’n, kanau aneupen a paai lai in, ka pa’n honna omlouh san a, haksatak a khawsatou in, kanau aneu pen hong pian tak in, ka nu’n honna beisan nawn hi (a mittui khawng hong vul kilkel zawzen).
Kou naupang vuak a khawsa zoulou di kahih man un, Lamka a Hmar Veng a om ka pu’n (ka nu’ pa banah I kiang a lum pen in) hongpi khevek a, ka neu uapan ka pute inn a khawsa a tuni tan dong ka pute inn a om kahi uhi. Ka pu’n sepna kichiantak neilou himahleh Cement lam a Mistry ahihman in, atha ahaat sung teng kou unau School khawng honna kaisak zou hamham hi.
Hunte hongpai zel in, ka pu’n damlouhna neuhneuh gen di hon hau mahmah mai a, neih dandan a ken sum khawng kazon ngai ahihman in, Class 10 ka zawh apan School kai kakhawl ta hi. Kei nuai a kanau te bel ka kaisak lai hamham ua, himahleh achang a fee piak zawhlouh man in kousiatna tuamtuam te ka zasek uhi. Ka pipi ahihleh nikum apan in, akhut te zoi (zeng) in tangtheilou a, ahihhang in akhe bel a ut dandan in zangthei thou a, adandan om.
Ka pu’n, TB leh Hepatitis ‘C’ natna te neikop ahihdan atheih apan, kingaihtuah den ahi ngei dia, hoihlam sang in siatlam hon man-oh deuhdeuh hi. Huchibang kawmkal ah, VDF ah kana lutkha zenzen a, lawh tamlou himahleh ‘Duty’ a kakuanlouh hun in ‘Jugali’ in kakuan a, huai a ka sum lawh te saving bawl in Rickshaw khat kalei hi (Jugali a kuanna di muhlouh chiang a Rickshaw hawl zel).
Hun bangtan hiam kong ki etkol tak un, kasum neihsa teng uh ka zangbei pah ua, ka Rickshaw bang iit pipi a zuak in, kaneu uapan honna khoilian, ka pupu etkolna di’n kazang hi. Ka naute leng School kaisak nawnlou in, sum zontheih dandan in kazong souhsouh uhi. Tuni chiang in ahihleh, lam-etna kanei nawnkei uh..!!. Kanau tegel, ka pu enkol di’n ka nusia a, a lianzaw pen in achang in, inn a kapi ava enkol kawm zel hi.
Kei ahihleh, ka Veng uah Cement tok a kilawh in, Pathianni chiang in, ka sumlawh sunsun ka naute kiang ah ka pezel hi. Nurse te’n ka khawsakna uh hon theisiam hi maizen le uh zaw, kong lut a ‘dotna’ honna bawl  gega uh ngailou dia, kisuanglah lou hial a om di hiveng…!!. ‘VDF Himah Leng’ lawh lah gina a ki mulou a hih chiang a, kilawh tawm a sumzon louh ngal a didan dang omlou” Chi’n, mitui paak niuniau kawm in hon gen hi.
Huai hon genkhit nung, minute 20 leng paimanlou in a pu’ kha (spirit) in a sapum ana pawtsanta…!!. Huchi’n buai vengvung in ka-om ua, houlim theih di vual ahi nawnkei. Aneu uapan a ana khoilian, a pi leh pute a iit dan uh thupi kasa mahmah a, etton taak sa in alehlam tak ah hehpihhuai uh kasak ziak in ka mittui bang ana luang den mawk hi.

3105 – Kakipak - 2014