ZOGAM MASALA - VI
Written By : K.Lianthansang @ K Thansang Zomi

ZOMITE i ki-et vengveng leh Nek-le-Dawn a kidek theiloute i hi uh chih i muthei hi. A hun phet i theihlouh ziak un mi bangzah in, Sihna hanmual lam hon na zotsanta ua chih suitham ching hilou hiam? Nam lian leh Nam changkang zawte I et leh Zu-le-sa Zingkal a dawn a om kei uh. Bangziak in? Amau leh amau a ki control ua, a hun phet a thei ua, Sisan paituah veldante thei hoih mahmah ahi uh. Nek leh Dawn ziak a i sihloh hial sek ziak uh tamlou in i kikum ding uh.

Doctor te Doctor, Sawltak Peter, Paula i chihte'n, sisan paidan teng a thei hoih mahmah mai ua, Sawltak Peter ngial in a gamsung pumpi (Judia leh Jerusalem) ah poimoh satak in, Zingzu dawnlouh di ahihdan Indirect tak in ana tangkoupih hi. Bible i sim ding, ''Ihmute tuh zan ah ahi a ihmut uh; Zukhamte leng zan in ahi a kham uh'' chih thu, (I Thessolonika 5:7 ah) i mu thei hi. Zukhamte'n zan a kham ahih ua leh zingzu a dawn kei uh chihna ahi mai hi. I pu-pate un leng Nitak ngen in ana dawn ua, Zangtalam pawl toh, a na limsang thei mahmah dan uh ahi.

Doctor te'n a genchiang un, I sisante I ihmut apan in khawl ua, Sunlai tanpha in leng khawl uhi. Huai tuh i taksa hiangte a, galdou dia kizalh nailou chihna ahi mai hi. Sappau in, 'Clotting Blood' hiam chi uh abang. Sunnung nitaklam chiah i taksa ka hiangte ah hong kizalh pan uh ahi, a chi uhi.

I sisante, nitaklam a galdou dia kuankhe pan uh ahi chih i thei ua, huai a kuankhete'n sisan guizam teng tawnsuak uh ahi chih i theih ding uh ahi. A Headquarter uh Lungtang ahi a, sisan natna hik dou dia kuankhete a bahgawp chiang un, Lungtang ah hong kihihhat zel uh hihtuak hi. Huchi ahihleh Zingkal lam a natna hik dou di omlouh lai tak a Zu dawn chu lauhuai mahmah chihna suak hi. Hiai thu na gintak lah deuh leh na khut hiam zinglam in sukeh inlan, a sipawt zah chiamteh in, tua mah bang in leng nitaklam in sukeh nawn di le? Nitaklam in, na chikehna a sisan pawt pen a tam zaw teitei ding(?).
Zu dawndawn khat kiang ah, a zu dawn ziak va dong le ; Zudawn khelhna hia?  Bible in, Na damtehihna di'n dawn cheuhcheuh in a chi vele hon chi ding uhi. Bible pansan a kisiamtan kawmkawm a gawtmun a tawmlut baihlam mahmah ahi. Bangteng hileh, Zu dawn khelhna hilou mah ahi, chiphot ni. Hilele, Zomi te'n a zatdan i hamhaih kha pahpah ua chihman thu..! Zu a zatna di diktak ah zang lehang, a phatuam mahmah ding chih i gingta chiat uhi. Bible gen bang in, Zingzu dawn kei le haksa law dia hia? Zu' sia i chikei a, himahleh Zu ziak a siatna leh Buaina i bawlpen ahi Siatna leh khelhna i chih. A Zatdan siam zaw ni, Zu khaamte'n lah gate (permit) hong (pe/pia) teitei ua...!!.

Nek-le-Dawn i genna uah, a dawnthoh lam i zohbawl di ua, tu'n a nekthoh lam ah lut le i chi nawn hi.Thil himhim i kham (Phallouh) te aman atam chih thudik ahi. Khamtheih khawng le sihtheihna ahi a, khaamna thusuah bawl ahihchiah aman hong pung mai dan ahi. Tua mah bang in pateh leng a kikhaamna a sawt mahmah mai, huaiziak a aman tam hi di ahi.

Pateh nesual a si chih khawng i za zeuhzeuh ua, Poison ahi hial a hia? Chih vungvung hun om hi. Bible i sim masa ding, i gintak thu i mawk gen sang in, "Huan, Pathian mah in, ngai un, leitung tengteng a anteh chinei( Having seed) om chiteng leh sing chiteng, sing chinei gah omnate, ka hon pia hi; na ann ding uh ahi ding:" (Genesis 1:29). Hiai mun a 'chinei' kichi pen,'Tang (seed)' nei chihna ahi.Huchi ahihleh,Pateh in 'tang' anei hia leh?

Pateh in chi (seed) a neikei a, anteh louhing chih theih didan in a om kei. Pathian in lah nek phallou ahi chih i theita ngal ua, tua bang chita di.? Abang-abang hileh, genbeh zek lai ni; Pateh in Mihingte bangbang in, Huihsiang (oxygen)­ a diik lut a, huihsia (Carbon-dio­xide) a pekhia hi. Sing leh lou dangte toh a kichituam pah hilou maw?' Pathian kam a thupawt kia a hing di i hi' chih i thei ua, Pathian thu i ngeingaih louh ziak ua sih-loh tampi omta i hi uh.

Pathian in, 'Khelhna man tuh sihna ahi' ana chih mah bang in, Huai pateh nek dia taaklou, Pathian in nek theih a gente lak a tellou i nek teitei uh tuh, Pathian thu zuihlouhna ahi. Pathian thu zuilou tuh, mikhial ahi a, khelhna man tuh sihna ana hinawn hi.

Pathian thu mang nuamlou a pateh neksawm teitei i om leh i kivenna di'n thuchah tamlou i gen ding. Pateh theih chian ngellouh pawng nek dahmai in. Na nek ma in, Ak pele chin, aak in a nek kei a, nap leng a va napkei leh nek hetlouh ding ahi. Huaiziak in, Pateh nek ah pilvang ni. Huchia na nek teitei a, buaise dia na kisak leh Misiamte gendan in,Vaimim leh Ngathu nek a hoih ding hi. Pathian phallouhpi chu kuan a ne teitei nuam nawn dia ? Na chih leh a hoih seem ahi.
Sa lak ah leng, Pathian in, nektheih leh nektheih louh ana khen tuam chiitchiat nawn hi. Huaite bel gensawm i hi kei a, Christian i hihna uah, a thu zuihsawm photphot le i Dam kumkhua uh sawt mailou di hia? chi nuam i hi. Zo Rock laphuah khat ah, ''Sa leh athau netawm in Damsawtna ut leh'' a chih pen bang leng, ngaihsut tham mahmah hi. Sathau khawng ei taksapum adia ahoihpen ahi kei a, anteh-louhingte kaan omlou ahi hi. Huaiziak in, Pathian ngei in leng, a hing (green) lam ne di'n hon na hasuan hoih mahmah hi. Zomite aw, ''Pathian thu zui di maw? Mahni hoihsak bang a om di?''
KHANGTOU LOU i kisak mahmah lai un, awl-awl a ana khangtou sam i hi uh chih i theihna di un, 2010 vel apan, i Zogam' Mitnauta chih zozen a om, Lamka khopi ah, 'Paupu Auto' te hong tam mahmah mai a, Line tuamtuam zui in taituah zungzung uhi. Khantouhna khat ahi chiphot himhim ni..!  

Mihingte ann lou a hing theilou i hi uhi. Huaiziak mah in tuailai leh papi, Jugali hiam a kuan zoulou (Kuanna di mulou le hithei) te leh Khuak leh khutsiam silbawl a siamna ana niam deuhte a di'n hiai Paupu Auto i chih uh hong phatuam mahmah hi. Innkuan vakna dia zang tampi om di'n i ngaihtuah a, huai Service ut zawk ziak a school leh College kai tawpsan pawl bang leng om hi. I gennop masak pen bel, Zomite haksatna hon dawng tu ahi chih ahi.  

Auto Service te'n Line tuamtuam aneih mahbang un, Auto mai ah ataina Line min uh taak uhi. A houpen a gen in leng huai a thil taakte un, khomin i theih leh zakngeilouh khawng theihna hon pia a,phatuam sawnsawn hi. Mahni mimal Gari zangselou a paituah tuah theih ahi ta a, utna gamgam phaktheih phial hi. Lamka khopi sung ah Auto Za bangzah omtel dia aw ! chih theihnuam huai zozen hi. Tedim Rd. Ngial ah kiphamat zelzul ua, a utna munmun ua khawltheihna Power (Rights hilou) neimawk uhi.  

Mipite adia aphattuam mahmah ziak in Paupu Auto te Lamka khopi sung ah pumdimta ahihman in, Town Bus Service te bang a khawl hithet uh ngai hial hi. Huchibang kawmkal ah, Auto Service te a dia, 'Peak Hour' chihtheih hun: Zinglam leh Nitaklam (Vaikuan hun leh Paihun) te in Auto tam bang mah leh i pai utna lam a Service te a vang law chiitchiat ut uhi. Huchibang ahihman in Auto Service Line tuamtuam a Association te'n hiai 'Peak Hour' hunte a kimat deuh a tai theih di'n pan hon la le uh. Aziak ahihleh, Lampi kiang a Auto ngak a, sawt pipi ding chih bangleng, thil haksapi ahihziak in..!.  

I Zogam uah khantouhna neu nounou khenkhat om sek mah leh, en kizang siamlou abang sek hi. Tulai a Nungaknou khenkhat in bang 'Style-Style' hiam khawng hon pawsuah ua, puan-ak leh khekol khenkhat ngail mi 2 leh 3 khawng in silhtheih phial leh kilawm khawng a lian om hi. Alehlam tak ah ah Khekol leh puan-ak kigak taktak khawng a i kizep hial chiang un zaw..! Khekol tom taktak, pheibul tantan dawk di zen a tom khawng a i kichei kei ua leh i om uh nuamlou ahi diam a..!.  

Khekol Sing taktak toh Lampi dung khawng a nungaknou hong pai i muh khak ciah et dia lah etngam huailou, etlouh dia lah mak kisa, chih khawng ahi. Numeite bawlsiatna le hiaite khawng ziak ahi ding hi. Numei huchibang a kichei ngamte chu, 'a kichaisa' ahi ua, Pasal pildeuhte'n bangmah dia hon enlou uh ahi uh aw (Numeite'). Huchi bang a kichei i pumdimna kawmkal uah, YPA(Young Paite Association) te'n Numeite kicheina di toh kisai in zuih dia thupuan ana bawl un, bangtan hiam bengdai zou abang hi. School leh College te tanpha ah Niik singlua tenglouh di chih ahi zomah a, a thilhoih hih uah i kipahpih mahmah ua, Mipite'n leng kithuahpih siausiau leng ei Society sung hoihna di mah ahi hi.  

Hichibang a kichei Nungaknoute hong kipatna, innsung ahihman in, YPA te kia i set mawk leh zatna bei suakthei ahi a, huaiziak in Nu-le-pate'n i kithuahpih mahmah ua, i ta leh naute kicheina i etkaipih uh hoih mahmah ding hi. Nungaknou huchibang a kicheite lohnei ahikei ua, huaiziak in vanleina lam ah Nu leh pate sumbawm kikoppih ahi uh chih achiang hi. Nu leh pate'n ta leh naute van leina lam i etkaipih kei ua, amau deih kia i leisak ua leh YPA te thupuan palsat thei uh ahi chih thei chiat le chidan i hi.
Pasal te kicheina lam ah lutzual le. Pasal khenkhat samsau niapnuap in, a sam te'n sim leh mal khawng kawktuah zengzung bang om hi (Samsih zatna bei suakta). Bible in Pasal sam atom di ahi chih ana genkhak na om hi. Bible kalh a gamtang chu akhialsa khelhbeh ahi mai hi. Khelhna man sihna ahih ziak in, khelhbeh chu sibaihdeuh se uh abang (Huchi bang a om nepnuap te Khamtheih hih ahi nuam ua). Khankhat in lah, pasal ahihna uh taisan in, Bilbah khawng bat leklak uhi. Khenkhat ngial lah taw thep dikdek in lampi dung zui niapniap ua, khekol le kawng a taang theilou khop di'n a taksa uh ana kiamgawp hi. Nu leh Pa thu i mang louhziak uh ahi di..!  

Numeite kicheina lam ah tawmlut kik le, i taksa pumte a dawkthei zahzah phoulak i ut kawmkawm un khutchin, khechin, mit-vun, mai-vun te khawng a Colour i kheng ziahziah mai uhi. Pathian in mihingte asiam a, amah batpih a asiam hi a, miteng kibanglou dia hon na bawl hi zomah a, Designer ahi i chithei hi. Huchibang a Pathian hon bawldan, Practical a soisel leh complain i hi mai ua, Pathian in bang a chingaih phet diam a..! Sam khawng a vom dia ana bawl mawng hi a maw, asan khawng suah teitei.....!  

Nidanglai leh tulai tehtheih vual ahikei, himahleh nidanglai a mite leh tulai a mite leng a bawltu kibangmah in a bawl ahi chih i theihciat uh ahi. Nidanglai a te'n Vun, chin leh a dangdang te ana khenglou ua, sawt le ana hoihdeuh uhi. Tulai a te'n bel Maivun khawng kheng ziahziah, eilak ah enzual le: Khutchin khawng Colour tuamtuam nuh se, Mitvun khawng nuhvom (Akhente'n nuh dum) in i hak liakluak uhi. Pathian Muhsitna ahi chih theichiat ta ni maw??

0607== kakipak ==2013