AFRICA KHOKHEENG LEH ZOGAM TUI HAKSATNA.
Pastor T Thangzasiam. Guwahati
“We are the world, We are the children;We are the one,To make a brighters day.. SO LET’S START GIVING........”
THUMAPI: Sinzawl khua a ka omlai in, ka khaw dorca pawlte uh makaih in, tuni ” An ngawl thumna neih ding”,chia ka puankhiak hun uh ka ngaihtuah kha hi. Huchiin kum tamlou pailiam ta a Africa khomualpi a tengte haksatna ka phawk khethak nawn a, amauten anngawl kichite hinkhua ngeina banga ana zatzat sek uh hileh kilawm hi, vuahtui kiaklouh ziak in khua a kheeng a, damtheihna dingin tusiangthou kia dawnding chihte tuh vana gah bangmai ahita hi. Alehlam ah tui niin kia dawnding chih thupuan bawlbel ahisam kei uh, himahleh, khokheeng ziakin mi Africa khomualpi ah mivom naupang bar taktak leh samkir bepbup ten sih leh hin kikal ah hinkhua haksatak zang in, a nakguh uh ki hettuah lou lellel a hinkhua genthei azatdan uh ka ngaihtuah laiin,
Zinglam 1:30am ahong gingta a, huai tuh Sinzawl a ka omlai ahi, ka lupna apan thoukhia in bucket nih toh luikhuk lamah( hausate inn kong) kava zuan hi, tuibel leh tinhawm kigawm-40 val kama ah ana omlai uh, zanhak a tuingak ten meiphual anasem ua, tuilawng mawng a tuikai liakliak ngakin ana om uhi, ka zing buhtui ding omlou chilah beilou, tui kai hoihchiang a kon ditkik nawn ding chia tui ki thunglak theibang om zel uh, kichian mahmah. A zingchiang dak 11:00am a ka kuan nawn leh kama ah belhawm 80 valtak ana om zel a loh ngaihna omlou ahih manin “ tuihaksa lua a munphiah khawng a maiphiat suk maidia hoih hiveh aw”, kava chihchih leh hondoh sak ua kipak lua himai. Pastor inle kei a pastor zawdeuh achih theihkei a, khosung heutu inle kei a heutu zawdeuh achi thei tuankei, tuiduh chiatchiat ki hi ahihman in, Pastor pa tui nana ngawlkha ding uh chia belkhat hongpuak nu bang tuh tutan a ki theiden lai hi’n maw. I zogam khopite a tulta ua, a gam leitang mahmah leng a keu deuhdeuh, tui haksat dan gensiam ahaksa hi, ! 
1. TAAMSAWL NA THUAK UH:
Africa khomualpi ah khokheeng leh taam ziaka lungkham mang bang a a om lai un, America lasiam minthang taktak ten”We are the world; we are the children’ chihla toh khovel maiah khutdoh sak uhi, nekding leh damdawi, silh leh ten ding a kaihkhawm sak uhi. Abiiktakin, kum bangzah hiam paisa in Kenya, Ethopia, Somalia leh adangdangten a nakthuak diak uhi. En luaksuak zen a singpi Hotel a idawn lai in, amauten tuikhuk kangsa abuaipih laihlaih uhi. Africa khomualpi a teng miten kua kisil na nung hita leh, bang ganhing peuh kibualna nung hihial mahleh leng, tui ahih nakleh a neih tengteng ua lei ngam ding khopin khokheeng leh taampi a thuakta uhi. A gamsung ua hunsawt tak vuahtui omlouh ziakin mihing, ganhing, sing leh louten hinna ding nei nawnlou in,”Ka gam uh keu Elija thum nawn in” chihla saksak na ding khovel a zang liam khinta uhi.
Tu’n I zogam a khua tamlou a Inn tawm chikchik om peuhpeuh ten khokheeng a thuak ua, mautam kialpi zoh kum tamlou paita in, tui kialna in hon tuam nawn in, Lamka khopi tanpha ah tuihaksatna a uang deuhdeuh hi. I gamah koi khua mah tui nopna a om ngelkei a, tuinek ding ki ningchinna khua koi ah ahia a om chih theihding khop dinmun a hi. Lamka khopi hial ah leng I tuibuai zelsam uh. Tuuktui hong luan inleng panlak tawptuan kei ni. Hiai bang tui haksat hun taktak ah zaw MLA kitel deklai a,..imm…imm..huai mineral water bawlkhe ding chipen kha lung gulh huaisim !
2. LUIKHUK & ELECTION HUNAH KHAMIT ZOH HAKSA !.
Kuamah ka demna ahikei, election chiang leh tuihaksatna taktak mun ah, kuaman kei zaw saptuam makai ka hi, kei zaw dorcas heutu hiam, tuailai makai hiam ka hi akichi nuam kei, zanhal pek akipan ka ngak hita akichi chiat hi. Ahia, Thanlon bial in 10vei vote kikheta, kitel ding kuan chiangin it tu leh deihsaktu aki hau thei mahmah sek a, Lamka zang a kei ka hi chi theitan chiang te kum-5 dan a mit tukna bial leng a hi. Hiai laitak ah mipi’n I hih khial uh a om hi. Isarelte kiangah” Na va luahding uh gam zaw Pathian zonkhiak gam ahi a, van vuahtui leh nisa a hunhun a dong gam ahi dinga, Pathian mit kum bul apan kum tawp tan a tukna gam ahi” chih ahih lai in, Ei gamzaw Pathian mittuk nagam ahi nawnta kei a, MLA leh MDC utte mit tukna gam kia ana hizaw ahi.
Ahitakin genleng maw; Huchih hunin driver-te manpha zaw uh chih nop simsim tawn atam hi. Tui haksat hun in tui hon puaksak ua, sing khul ding honpuak sak theih zel uh hiven. Mipite theih ding a om hi, I luikhuk munte kinak kiselna mun a zanglou in, “Thanghou leh Liandoute unau bangin, mimtang taangtang khat tungah dialdial in diamdiam” leng achih huai hi. Luikhuk leh election hun ah khamiit zoh a haksa hi, tuikang I ngak inleng, bazaar nupi a I pan inleng Toupa nitak ankuang um nizan mah bangin, I lungsim kalvary tanglam ngasak zel theileng, ki sam buchiing laih nouhnouh chihte gending omlou ding hi. Bial mipite houlimna kazak guk a om hi, a malam heutu ten nna tamtak a sepsa te uh mang ngilh tuanlou in, tutung a pa’n bangmah a honsep keilai leh zaw; khovel ah mihing kuamah gintak dinga om nawnkei ding” a chih uh kaza a..mipi’n lamen uh himai, kilam en-full chihna ahi !.
3. ‘ WE’RE THE WORLD,..’ I CHI THEI DIAM ?
Hiai bang haksat hunah, zum leh zah khuallou in heutute kiangah tun zel ni, I biak tung Pathian in zah ahon ngai ding a, a omlou hong om mai ding ahi, I gam haksatna leh kiak niamnate I doukhawm ding uh, I gam genthei a awlmoh huai takzet ahi, kial a hongtung a, haksatna tuamtuam in hon tuamchiang in, saptuam ten zong sum val hawm ding aneikei uh, ei thoh khawmte mah a mission nna kisem zel ahihziak in. Tasam sapsap dingin koi khua a tasam diak ua ? Koi khua in a poimoh diak ua? kuate inkuan a haksa diak ua ?chih tanpha theihkhiak a poimoh hi. Africa khokheeng panpih na dinga lapii kisa khia. “We are the world; We are the children,we are the one;to make a brighters day..So let’s start giving...” bangin, I semkhawm ding uh, khovel gam thupite itna thilpiak i tankhak batkei lehleng, i mi leh sate haksatna thei in, A gen siamten gen in, a sa siamten sa in, agelh siam ten hon gelhzel le uh, a semdingten hon semkhe mai ding uh ahi, sing leh gua tamtak omna gam luah a, khokheeng ziak a tuihaksatna I thuak lailai leh bel, I gam leilung I kembit kei chihna hi lelding hi. I singtang louneih koihkhiakna ding I neih louh tawp inleng, gam halsiat, sing leh gua suk chimitna te tawpsan thei hileng, vuahzu nisa I gamin a hunhun in a muding a, I gam keugawsa hong hingthak nawn ding hi. I zogam khopi keugawpsate bang na loh dia ?.