KA NU KOI A OM NA HIA
By Jimmy Guite.
( Dinmun chituam nei kuahiam in Mothers Day/Nute Ni 2014 pansana atanchin mawlchika a gelh banga ngaihsuna sim dinga hong ki khah ahi. )
HOPE LODGE : Ka khawtheih tunga NU chi a ka sap masak pen tuh ‘Hope Lodge’ kichi tagahkhoina mun a nasemtu pitek leh putek te tanu neihsun kum 25 vel, tapa khat a neih nunga a pasal in a sihsan ziaka nawkik, khebai leihleih hiin ka thei. Tua tagah khoina muna naupang dangte tuh ka unaunu leh unaupate ahi vek mai ua ka khovel in haksatna thupi lua hon tunlou in kum 10 mi ka hihtan tuamun ah lungnuam leh kipaktak in hun ka zang hi. Bawngnawitui lum pilhpelh, khum nilnel ka dawnkhak tuh nawitui ka nekkhak omsun ahi chih tu khawnung in ka thei a, a sunga bawngnawi ziaka lum hithit a koihna thol tuh nu anglum tuk a ka ngaihnat ana hi nilouh ahi chih ka chiangta. Zing leh nitaka an minphang deuh leh havai tui gilgel ka nek hun chiangin bel naupang khawthei deuh ka hong hita a, skul hoih lua hikei mahleh ka omna uh “Hope Lodge’ apan mel 1 vela gamla a om skul ah niteng in laisin in ka kuan nainai zel uhi. Laimalte khenkak thei a ka hon lepkhawm nawn theih (laigelh) theih chiangin bel lawmte toh kinak/kisual, ki muhsiamlouh ka hon sin touh banah khovel nop leh noplou, lungkham leh kipahna kikop leitung hinkhua ahi chih ka hon theikha sam ta. Pi leh pu a kana neih tawntung putek in a hon sihsan ni a ka khasiat dan leh ka puaknat dan a thupi hi. Misivuitu Pastor in Vangam tangthu a genlai in, tuamun tuh mun thupitak hi dingin ka suangtuah thei milmial hi.
MOTHERS DAY : May ni khat ni tuh ‘ International Labour Day ‘ ahi a, leitunga nasemtu khenkhat adia nasep khawlni ahi chih leh tuani chiangin skul khawl ahi dia naupangten khopi sunga mun tuamtuam vehna hun skulpute makaihin neih ahi ding chih ka heutute un a hon hilh uhi. Skul khawl ngaklah chiat ka hihman un kipak in khut ka beng damdam ua, khopi vehna a tel dingin khat leh khat ka kichial tuah khiukheu uhi. Zing-an ne khin heutute makaihna nuai ah khopi veh dingin ka kuankhia ua, lampi ah lawmte toh nuamsa in ka chiak zelzul mai uhi. Khopi a bangtan hiam ka vak nung un heutu khat in vanzuakna mun khat ah a hon pilut a, “ May nipini nihveina pen ‘Mothers Day’ ding ahi a naupang te’n na nute uh pahtawina dia lei-ut na neih uleh hiai mun ah a lei theih ding, abiktakin kipahpihna laigelh kilawm taktak omna mun ahi” chiin a hon hilh hi. ‘ Mothers Day’ kichji bang ahia, a omzia tak bang hi hiam ahihkeileh a poimohna bang hi ding chih ka ngaihsutna in a banpha het kei. Ka lawm lkenkhat te’n ‘nute ading’ bika kibawl laigelh tuamtuam a lei ua, ken bel a leina ding ka neihlouh ziak leng hisam in a poimohna theilou ka hihman in a ningkhat ah kana mihai din helhawl hi.
NUTE NIPINI : Hope Lodge enkawltu pisal kizen mahmah in zingkal in “tuni ni poimoh ahi, na vek un khopi a Biakin ah ka hon hohpih ding. Paina ding motor leng mansa ahi” chiin a hon hilh a. Munkhat apan mundanga vakkhiak lunglut mi ngen ka hihman un ka kilawp chiat uhi. Zinglam dak 9 in ka omna mun apan ka kipankhia ua, khopi laizang a om Biakin lianpi kongtual ah dak 10 a kikhopna hun kipan ding ngak in ka tu neinai uhi. Dak 10 agin toh kituak in Biakin tungzuma dak kikhai giahguah tuh a hong ging vongvong a, Pathian biakna a tel ding mite tuh kilawm taka kizem in Biakin huangsung ah a hong lut zungzung uhi. Biakin sunga pilut a ka om lai un thupisa in ka ha-huai hial ua, muhnop a tam ngial hi. Dohdan tunga puanzak lianpi kikhai ah NUTE NIPINI chih kigelh, pak kilawm takin a um kimvel in mundang teng sang in ka mit ala pen hi. Lunglut taka tua laigelh ka et gige lai in, Pastor a hong dingtou a mipite leng a kilual in a dingtou sam ua, ging kilawm toh thuah in mipite’n “ NU, Nu manpha... Nu na itna awnem ziakin ka kipak, Nu hoihna, thupina leh manphatna Pathian in vualzawl zel hen…” chih la asa dupdup uhi.
Mipi lasate a tusuk duamduam ua, lamdangsa a ka om gekgok lai in, nungak kizen mahmah khat in aw siang sitset in, “ tuni nute nipini ahia, ni thupi leh manpha ahi. Na vek un Toupa min in Nute Nipini Chibai..” chiin mipite lamah a khut a hon vai leplep hi. Chibai bukna a mipi ten leng khut taklam ka liktouh utoh kiton in “ Nute kianga kipahna thilpiak pe ut te’n noumau nute chiat kiang ah na thilpiak ding uh a piaktheih ta. Toupa’n hon vualzawl hen..” achih toh kiton in mipite laka naupang leh tuailai lamte a tutna ua pan ding khe suausuau in amau nute kiangah nute nipini thilpiak pak kilawmtaktak leh vantun lianpipi a pe souhsouh ua kipaka kikoi tonton in peuh a kitop uhi. Kipahna ziaka kap uh ahi achi ua, tuate’n ka hinna ah omzia a nei thei taktak kei lailai hi. Kou ‘Hope Lodge’ naupangte bel kuamah dingkhe lou in mite hihdan kana en liam maimai ua, “ken piak ding nei hileng kua pe ding, kua ahia ka nu.. ka nu koi a om na hia ” chih dotna tuh ka lungtang sungah nakpi in a lian hi. Ka khotheih tung apan ‘NU’ chi a kasap putekpa tanu in lah zanzek mahmah in, “ na neu apan hon khoiliantu ka hihziak in leh na nu ding dang om tuanlou ahihmanin NU chi a na hon sap tuh kana nial ngeikei a, tun bel na kum hong tamta, piching dinmun na hihtak ziakin nang leh nang kitoudelh na tup ding ahi. Tuni a kipan in na NU hi nawn lou in na U ka hizaw ta ding..” chiin a honna hilh khinta hi. Mihing nubei a piangthei mah ahi diam, ? chih tuh ka lungtang sunga dotna lianpen ahi nawn ta.
NUTE NIPINI MANGPHA : Biakin a thunei lianpen ahi ngei ding e, Pastor tuh thilpiak tuamtuam buaipih in a phe tengtunga; thilpiak hun zohna ah tuailai te’n ‘NU ITNA’ chih lapawl in siamtak in a honsa uhi. Kei ading in nu itna chih tuh kana kibulh a, zan chianga ka kiang giak ngeilou, zankala zun ka teh louhna dia zanzun hon nawnsak, zingkal chianga ka mai hon phiatsak, ka puanninte hon sawpsak, bawngnawi tep ding hon bawlsak, zing leh nitaka annek ding hon pe zel numeinu tuh NU chiin na sam nilouh mahleng tuailaite lasak in agen ‘Nu Itna’ leh kei mimal in ataktak a ka tan itna kana chihsam tuh kibanglou hiin ka ngaihsun mokmok hi. Lungbuai taka ka omlai in Pastor tuh dohsang tungah a kaltou a, Laisiangthouthu simkhia in kamzol takin NU MANPHA chih thupi zang in thu a gen zutzut hi. A thugen ka laktom theih dan in bel, nu nawitui ne a, nu anglum bela, nu kaihhuaina nuaia khangkhia, nu leh pa pangkhawm in a etkolna nuai ua khanglian mihing khat piching dinmuna ding thei tuh mi hampha Pathian vualzawlna dawng tungtuan ahi. Tuabangmite Nu tuh NU MANPHA ahi chi a gen hiin ka thei pen mai. Kei leh ka lawm midang lungkim taka Hope Lodge a khawsa nilouhte – Ka Nu kua ahia, Nu nawitui bangchi tuk a lim, Nu anglum bangchi taka nuam; Nu leh Pa kaihhuaina bangchi lela phatuam – chih himhim chiamkhalou, nu leh pa chi a sap ding theilou, ka nu neihsun uh numei lah ka U uh hita, piching dinmun ah ding mah le ung leitunga mi hampha hitheilou himhim ka hi uh; chih tuh ka thutawp a hong hinawnta. Ngaina taka NU chi a ka sap ding, midangte hihdan enkawma kipaktak ka naih ding ka Nu koi a om na hia ???
LAM-ETNA OMSUN : Nakpitaka ki ngaihtuah buai a ka omlai in Pastor in a thugenna ah “ Pathian/Toupa tuh tagah-meithaite khotuahpa, nubei-pabei tagahte adia PA ahi. Amah kia tuh tagah-meitheite adia lam-et omsun ahi.. “ chih khong genkha hiin ka thei. Himahleh, NU / PA chih himhim mukhalou phet hiloua theikhalou kei bang naupang/valnou te’n ka muh ngeilouh uh mi kuahiam khat KA NU/ KA PA NA HI chiin kiptakin ka pomthei ding uam…pomtheilou hita zen le ung mi hehpihhuai hina maizen nu’ng e …chi a ka lunggel laitak in tawpna dak a hong ginga Biakna hun tawp ahi ta….. Ka nu koi a om na hia ??? chih dotna toh ka leitung damsung nite uh zang dingin Hope Lodge ah ka paikik nawnta uhi.
