KHANGTOU ZEL: ANGELS’ PLACE
~ Dr. R. Sanga
April 03, 2014 ni in Delhi International Airport akipan Tulihal International Airport, Imphal vanleeng-phual daak 03:15 pm in Jet-Airways a hong tuang in, Pittsburg, USA Lawyer minthang mahmah, Jan C. Swensen, Managing Director of James Connection Trust, azi Leslie Swensen, alawmte mi nih, Hedi Devine leh Sarah Burnell, Expert Music Teacher, Angels’ Place veh di’n Imphal hong tung petmah uhi. Amaute tuak diing in Imphal Airport – vaitunna buuksung ah lut paisuak in, Manipur Police personnel mai ah Foreign Passport etdikna leh min khumna neihzoh in Imphal School of Preaching huangsung a ka omna Inn uah Brunch neikhawm in, Angels’ Place zuan in Lamka khawpi manoh in ka taitou ua; nitak daak 07:30 pm in naupang hawmthohhuai taktak, Angels’ Place a omte’n lampi nawl a kivual diudeu in hon na muak ua, chibai kibuktuah a nuamsatak in “Home” damtak in ka tungta uhi. 
April 05, 2014 ni in Angels’ Place huangsung ah Conclave, 2014 Program Guardians tuamtuam leh lawm-le-pai tamtakte hong paikhawm in kithuahkhawmna hun nuamtak nei in, Program a hong kihelte tengteng, Ankuang luina neihpih in, Ann kinekhawm zuazua hi.
April 09, 2014 nitaklam daak 01:05 pm a Imphal Airport akipan USA zuan a paikiik diing ahi ua, ni nga sung vengveng naupangte toh kithuah a, Music Teacher – Sarah Burnell in Angels’ Place a om naupangte Lapawl leh Lasakdan sinsakna nei in hun manphatak kimangkhawm zaizai hi. April 08, 2014 ni in Lemongrass Farm mun nih: Tangpijawl leh Singngat Farms vehna nei in Lamka apan kileh in ka vahoh uhi.
April 08, 2014 nitak 06:30 – 08:00 pm dakkal khat leh akim Angels’ Concert-cum-Farewell Program nei in hun nuamtak kineikhawm a, kipahluat ziak a biang a khitui luang pawl lah bei lou, naupangte akipan lapawl ngaihnophuai taktak leh Sarah in siamtak a la asakkhit in Senior Boys & Girls akipan Lapawl ngaihkhiakna mipi paikhawmte’n kinei a, khelah mahmah kawm in hun zatkhit ahita hi.
Angels’ Place (A Home for Orphans and Destitute Children) bel February 05, 2005 in tagah genthei naupang 60 toh pat ahi a, tulel in naupang 170 val (Home-based toh sim in) om hi. Class XII passed-out leh tua a sim lellel baan ah, Class XI sim lel; Class X Result ngak lel hunkhop om hi. Hihtheihna (talent) hoih taktak chituam tuam nei naupangte lak ah hunkhop om uhi. Games & Sports lam ah asiam thei mahmah ua; NCC a lut/zom naupangte lak akipan tukum Republic Day Parade a tel diing in mikhat in selection angah toh kiton in New Delhi ah ‘parade’ ah va kihel hi.
Siamsinna lam ah Class-toppers mi thum in 2013 Final Exam Result dungzui in siamna saangtak ngah bok uhi. Kong tuamtuam ah masawnna nasatak Angels’ Place ah muhtheih a om ahi chi in, America akipan hong vehtute’n Angels’ Place kipahpih petmah uhi. Nahoih sep sunzom zel a khangtou zel diing leh nasatak a masawn zel ahihtheihna diing in deihsakna thu muam in leh kipak petmah in USA lam zuan in April 09, 2014 ni in paikiikta uhi.
