66th ZOMI NAM NI
Champhai:Mizoram. February 20, 2014 | -By Revd. Suan Khan Thang, Mizoram 
Zomi Nam Ni February 20, 1948 pen British-te ukna nuaiah Zomi khatpeuh in hausate tungah siahtung siahphei a piakna pan a suahtak ni, kuli aana tawh na kisepsakna pan suahtakna ni ahih banah, Chin Hills a Zomi om teng in khut khat tawi khe khat khai bangin kituak takin economic lama saltanna panin suahtak nadingin ma a bunkhop ni uh ahih manin hih ni pen Zomi khempeuh adingin ni manpha leh ni thupi diak hi a, koi mun koi gamah i teeng zongin hih ni pen phawkden ding ahi hi..
Zomi Nam Ni in Zomi khempeuh in i omna tekah i biak Pasian in ei minam aadingin a hong piak tuam i Zo ngeina tuamtuamte lakin Zopuan silhin, Zopau tawh kihoin, i Zola ngaih nonote sa khawm diamdiamin Pasian in Zomi in hong bawl manin Ama tungah lungdam i kohkhop ding a kilawm ahi hi. Pasian in hong bawl banga i om pen Pasian i pahtawina nam khat hi a, mipilte gamtatdan zong ahi hi..
Ei India gam sunga om Zomite ii suahtak nadingin India Constitution Part 3(Fundamental Rights),Article 15,Clause (1) ah hih bangin kigelh hi: Biakna vai, minam vai, numei or pasal hihna hang leh pianna mun huhauin kisimmawh phal hi lo hi(Mizo pauin: Ram leilung fa mi tupawh, sakhua avang emaw, hnam emaw, chibing nihna emaw, mipa/hmeichhia anihna vang emaw, apian leh murna hmun avang ngawtin emaw, a khawi emaw ber avang emaw hian thil tihluihtirna emaw khapsak bikna ang siamsak tur a ni lo). India gam sunga minam khatpeuh in ama ngeina (culture) leh ama pianpih pau(mother tongue) a kepbit ding India Constitution Art.No. 29(1) in a phal hi. Mualtungmite lakah i sanggam Mizote in hih right(thuneihna) na theitel mahmah uh ahih manin kei hawh khakna khua tuamtuam-Kolkata, New Delhi, Bangalore, Guwahati, Shillong, Chennai, Mumbai, Kohima, Dimapur, Tedim, Tahan, Kaleymyo,Washington D.C. ah tua gam pau tawh Pasian bia loin, amau Mizo pau ngiat tawh mi’ gamah Pasian a bia teekteek uh hi. Hih pen minam pilte gamtatdan hi a, Pasian thu leh Bible societies te paidan tawh zong kituak hi.
British (Mikang) gamkeekte in 1896 kumin amau khutnuaiah hong koihin-in Chin Hills Regulation Acts kici bawl uh a, tua tawh Zomite uk uh hi. Chin Hills Regulation Acts tawh a uk gam in Chin Hills, Manipur mualtung gam teng, Naga Hills, Lushai Hills, leh Arakan hills khenkhat huam hi. Tua ki-ukna (feudalism) nuaiah khua hausate in a khuamite tung panin siahtung siahphei, saliang saap, tuuk-tha, khaal-tha kaai ngeekngeek uh hi. Khua hausate pen a khuamite in amau tungah vaihawm dingin a teel uh hi loin, Mikang Kumpi in hoih a sakte a koih uh ahi hi. Pu Suang Khaw Kam in hih bang ki-ukna deihloh thu Zogama uk governor tungah va puak ngei hi.
Mikang gamkeekte hong ukcipna panin suahtakna dingin kipawlna Chin Hills Union Organisation (CHUO) kici Zomi nam buppi kipawlkhopna February 20, 1938 in Mindat gam Nawchaung uk sunga Matungnung khua ah kiphuan hi. Zomi kipawlkhopna (CHUO) sunga panmun lente in Mikang Kumpi tungah hih anuaia a deihnate uh va tun uh hi:
1. Zogam in Zanggam tawh a kibanga ki-ukna lamah phattuamna a ngah nading.
2. Zogam kiukna pen Zomite deihna tawh kizuia thukhunpi bawl nading.
3. Pilna, Cidamna lam leh Summetbawlna (Trade & Commerce) a khan nadinga puahphat ding.
4. Zogam ah pilna sang (school) a manlangin puahphat nading.
5. Suakta takin biakna zuih theih nading.
6. Zogam lampi kizopna a manlanga bawlsak nading.
7. Zogam leh Zanggam suakta taka kikawm/kizopna ding.
8. Zomite in minamdangte tawh liangko kikim a kizop theih nading.
9. Kawlgamin suahtakna a ngah ciangin Zogam in zong a kibang a ngah pah nading.
Hih atunga a nget uh nam 9 te Mikang Kumpi in February 28, 1938 in a thu ngaihsun uh a, tua munah CHUO member 300 va kihel thei uh hi. A ngetna uh pialo bek tham loin, Zomite kipawlna (CHUO) nangawn a beina ding hanciam uh a; tua makaite in gam vaihawmna (politics) sem nawn lo dingin thupiak behlap lai uh hi. Tua Mikangte vaihawmna Zomite in deihlo lua uh a hih manin Kanpalet ah a om Mikangte khenkhat zong Zomite lauin Kanpalet panin taikhia liang uh hi.
February 19–22, 1948 in Zomi Nambup Khawmpi(Chin National Conference) Falam khua ah om a, Capt. Mang Tung Nung in makaih hi.Tua khawmpi-ah Tedim gam panin Pu Thang Za Kai (Rev.Dr. Kam Khaw Thang’ pano) in hih anuaia agendate sung hi: “Ukpite leh Khua-ukte hong ukcipna ahi tangpi tangta tungah siahdonna, thaman pialoa Kuli kisepsakna, Zomi khatpeuh ii a nasepna gahte a man pia loa mawk laksakna, leh tangpi tangta tungah a khengvala gamtatna beisaka Zomite in amau le amau Democracy ngeina tawh kiukna ding” cih ahi hi. Hih thusun pen khawmpi a Zomi palai(delegates) 5,000 sung panin 4,993 in hoihsa uh ahih manin ukpite’ ngeina beisaka democracy tawh Zomite ki- uk ding kipsak uh hi. Tua ni panin ukpite hong ukcipna nuaia siah piakna panin Zomi bup suakta hi. Khua hausate, hausa ahihna uh beita ding ahih manin tua hausate siatvatna (compensation) dingin kumpi in sum peek 5, 00,000 pia a, tua pen hausa tengin kilawm a sak zah un kihawm uh hi.
Hih Mikangte hong ukcipna panin Zomite a suahtak ni ahi February 20, 1948 ciaptehna leh phawkna Zomi Nam bup in zat tohtoh dingin thukimna Chin affairs Council in October 9,1950 in kipsak uh a, Zomi Nam Ni pawi a masapen Mindat khua ah February 20, 1951 in thupi takin kibawl a; tua hun laia Kawlgam kumpipa U Nu zong tua pawiah va kihel hi.
1953 kumin Chin Hills gama Khuasak kici khua-ah Chin Hills sunga Protestant Pawlpi lianpen ahi American Baptist Mission (ABM) in a kipawlna min ding uh phuak uh a, Tedim, Falam, Khalkha, Kanpalet, Paletwa gam ah ‘Zo’ cih kammal pen om kawikawi a; ‘Yaw’ leh ‘Asho’ cihte zong ‘Zo’ cihna mah ahih manin kipawlna min dingin ZOMI BAPTIST CONVENTION na phuak uh hi. Tua hun laia Chin Hills gama Baptistte makaipipa Rev. S.T. Hau Go M.A., M.R.E. hi a, amah in tua hun laiin Madras Christian College panin M.A.na zo khin hi.
“Chin’ (Chhin ci a kilo hi) kici pen ei leh ei i kilawhna hi loin, ei theihlohkalin, ei hong dong loin, i minam min dinga hong kipiatawm ahi hi” Zomi Congress For Democracy makaipipa pu Chin Sian Thang in ci hi. Taanglai hun pek panin ei pau lakah ‘Chin’ cih kammal om ngei lo hi. Chin buh, Chin damtui, Chin lengthe, Chin huihkhi,Chin gam, kici ngeiloin, Zo buh, Zo damtui, Zo lengthe, Zo huihkhi,Zogam kici den hi. Tulaiin zong ei minam tawh kisaite ah ‘Chin’ kammal kizang tuanloin Zo zial, Zo vok, Zo bawng, Zo ak, Zo niik, Zo puan, Zo la, kici lai hi.
December 21, 1908 – June 11,1938 sunga Tedim leh Tonzang gama Zomite lakah missionary hong sem Rev. Dr. Joseph Herbert Cope(USA) in Tedim leh Tonzang kuala Zomi tengin a zatkhop ding Mang Zolai (Roman script) hong bawlsak a, tua gamah tua hun laia pau kizang - Sihzang, Teizang, Saizang, Losau, Thado, Dim, Zou, Paite, Khuano, Vaiphei leh adangte in a zatkhop dingin pautaang (common language) na bawlsak a, tua pen ‘Tedim Kam’ kici hi. Kei neu lai(1960 pawlin) Lushai hills sunga Zomite in zong akiho uh ciangin amau pau tek a zat uh hangin lai a gelh uh ciangin Tedim kamin gelh tangtang lai uh a, tua hun laiin Manipur gama Zomi khenkhat in Tedim Lai Siangtho zang uh hi.
Moses leh sawltak Paul in Pasian tawh a kituah khit uh ciangin amau minam it-in awlmawh masa pen uh hi(Heb.11:24,25;Rom 9:1-3).Topa Jesu in zong ama minamJudahte awlmawh masain tua khit ciangin minam dang ahi Gentailte kiangah nasem hi(Johan 1:11,12).Pasian in Zomi in hong bawl napi, ei innkuan sung lawmlawmah minam dangte ’ pau tawh i kiho pen Va-ak Utong akineih tawh kibang dekdek hi. Ama’ minam a simmawh mi in mi hai ahi hi” M.K.Gandhi in ci hi. Ei sangin minam khangto zaw- Khasite, Mizote, Gorkhalite, Chinesete, Meiteite, amau inn sung uhah amau pau in kiho tangtang uh hi. Mahatma Gandhi in ama innkuan sungah ama pianpih pau bek zat phal hi. Kolkata a Chinese (Sen) te in English, Hindi leh Bengali siam mahmah napi, a innkuan sung uhah Sen pau bek zang uh hi.
February 10, 2013 in Serampore University degree piakna pawi Mizoram Baptist-te’ Bible College (AICS) campus ah om hi. Tua pawi’ pandal(maandaat)pen Mizo nam puan tawh zeemin, ceremony a hong dingpa Mizo ngeina laam leh Mizo kizepna tawh thupi takin muak uh hi. Kum 2000 kumin Mizoram bup a Presbyterian Pawlpi in kum 2000 melmuh lungdamna pawi Aizawl A.R. lammual ah thupi takin zang uh a, tua lammual a pandal pen Mizo nam puan tawh zem suak uh a, tua minam puan lakah ei’ minam puan khat zong kihel kikeuh lo hi. Tua ka muh ciangin minam khangtote in amau ngeina(culture) ngiat tawh Pasian biain pahtawi uh hi, cih hong phawksak velval hi.
Kuat’en Bang Gen?
“Innkuan sung pen pualam mi kuamah in hong sai batlohna mun, i pianpih pau i zat nading mun hoih pen hi. Mizoram ah piangin, ka khankhiat hangin ka nu leh pa(Upa JK Thang, Aizawl) in Zopau ngiat tawh hong hopih den uh ahih manin ka pianpih pau in a pau thei ka hi hi. Na innkuan sungah na pianpih pau zang tangtang in. .Yangon, Aizawl,Delhi, Tulsa pan a khangkhia Zomi naupangte in a omna khua pau uh sin kulloin siam pah lel ding uh ahih manin innkuan sungah na sinsak ding pen amau’ nu leh pa’ pau ahi hi” JK Mungpi ,Tulsa,USA in ci hi. Koi mun koi gamah i teng zongin Zomi Hihna Kipaikhia theilo: “Kei pen America ah a teeng, America gammi hihna a nei Zomi mah ka hi tawntung ding hi. Bangzahtakin English ka siam zongin, Mikang’ ann nein, Mikangte’ lamsa inn ah teengin, Mikang’ puan ka silh zongin Zomi ka hihna bei ngeilo ding hi. Ka pianpih Zomi mel ka paai thei kei ding hi. Zomi ka hihna selbawla ka nuntak leh, kei le kei a kineih, a kikhem, ahehpihhuai ka hi ding hi. Zomi ka hihna pen kei deihteltawm hi loin, Pasian in Zomi in hong piansak hi a, ka zumpih ding hi lo hi. Zomi ka hihna ka kisaktheihpih kei a, ka angtanpih hi. Ka neu laiin Zomi ka hihna ka maizumpih ngei a, ka upat ciangin Zomi in hong bawl manin Pasian tungah lungdam ka ko zaw hi.” (Late) Rev. Dr. Chin Do Kham, Tulsa,USA in ci hi. “Sanggamte pumkhat suakin a tutkhawm uh ciangin bangzahin hoih-in nuam ahi hiam! …tua munah Topa in thupha a pia hi” (Late 133:1). Kumpi David in ci hi. “A muhtheih a sanggam a itlo mi in a muhtheihloh Pasian bangci it thei ding ahi hiam?” (1 Johan 4:20) Johan in ci hi.
Topa Pasian in Zomite thupha hong pia hen.
[Admin Note: Laigelhtu Revd. Suan Khan Thang ahihleh B.A., B.D. zou ahihban ah, MTS (Master of Theology Studies), Virginia Theological Seminary, Alexandria, VA ah 1992 kum in zoukhia hi. Tulel in Champhai, Mizoram ah azi leh tate toh khawsa hi. 1980 kum khawng apat Pasian nasep pan a, CBA, New Lamka ah Executive Secretary kum 10 val ana letnung in 1998 in khawlta a, ZBC Champhai, Mizoram ah Executive Secretary hihna 2009 apan 2013 tan ana len hi].