The Story of Valentine's Day~Naulak Pauthiansiam

Kum teng a iit le ngaih neite leh a zong lellel ten I ngak lah mahmah ‘Valentine’s Day’ ichih tukal in khovel munchih ah lop in om ding hi. Hiaini ahihleh “iitna” lopna ni ahi hi. Hiai Valentine’s Day bel khovel pumpi a khawlni thupi tak leh mi tengteng theih phak ana hi a, St.Valentine min tam a zat ahi. Bangziak a hiai khawlni thupi pen St.Valentine min a kizang hiam chih itheih ut chiat ka gingta. Amah ahihleh Romte Physician, early church hun lai vel a Kristian ten siampu a aneih uh ahi. Huai hun lai intuh Romte Kumpipan thukhun ana bawl in Romte pathian biak ding leh pathian dang himhim neih louh ding chih ahi. Huai dan palsiat sak a pathian dang biak a ana nei khempeuh suangkulh a koih in ana om ua…ahihhangin, St.Valentine intuh Jesu Kris a iit luat ziak in Tanchinhoih gen tuh ana tawpsan tuan lou in puangzakna nasep paipih tou zel hi.

Kum hong paitou zel in nikhat tuh Kumpi Claudius II in a thuneihna hat zo sem ding lametna ziak in in zi leh ta neisa te sang in tangval inkuan nei nailou te galkap ding a hoih zaw leh zat theih zaw uh ahi chih ngaihsutna hon nei in vaihawmna (daan) thak hon bawl in pasal te tuh zi nei theilou ding in daan toh ahon bulh khum hi. Ahuchih tak in St.Valentine in hichi bang dan ki bawlkhum na pen hoih lou leh kikhen tuamna ahi chih pulak kawm in Claudius thukhun tuh hon palsiat sak in gingtu pasal te ading in kitenna tuh ahon sun zom thouthou hi. St.Valentine gamtatdan theih khiak a a om tak in Kumpi Claudius in mat ngeingei ding in thu ahon suah ta a, Kumpipa deih na bang in mat in om ngei a, thukhenna innpi a heutu te mai ah din sak in a om ta hi. Huchi in hiai dotna “Romte pathian Jupiter leh Mercury bang ngaihdan na nei, pathian diktak mah hilou hiam?” chih dong uhi, aman tuh hangtak in huaite pathian alem (false god) ahi chi in dawng tan in, Toupa Jesu’n ‘Ka Pa’ chia asap pen Pathian hing leh Amah kia Pathian omsun ahi chi in dawna pia hi. Hichibang dawnna Rom sepaih ten ahon zak tak un suangkulh sung ah khum uhi. Suangkulh sunga a om sung inle St.Valentine in a nasep (tanchinhoih gen) tawpsan tuan lou in mite lak ah Jesu thu toh kisai kisinsakna a pe tou zel hi. Nikhat suangkulh vengtu pan St.Valentine nasep leh Pathian in a ompihdan thupi sa in a kiang ah va pai a hichi in dotna va bawl hi, “Tanu mitmial khat ka nei a, na Toupan a panpih thei diam?” Valentine in ahih leh a thumsak pah a tua naupang mitmial intuh khua ahon mu thei hi. Suangkulh vengbit tupa leh a inkuanten Pathian nasep thupitak ahon muh tak un Jesu Kris gingta in a iinkuan un gingtu ahong hi uhi. Amau ten Jesu hondampa dia ahon pomtak un St.Valentine in suangkulh sunga a omna mun ah Toupa phat hi.

St.Valentine in bel a nasepte ziaka mat a omding ahi chih thei mahleh kisu thawmhau tuan lou in Pathian ompihna muang kawm in Jesu leh a mite a iitna ziak liauliau in a nasep hoih tuh ahon sun zawm toutou hi. Jesu tanchinhoih puangzakna ah a hinkhua adia lauhhuai na dinmun te natawm ah le risk la ngam a, huaite ziak in amah phawk gige nadia tuni a khawlni minthang mahmah a itheih ‘Valentine’s Day’ tuh amah min tam a zat a om ahi. Tuni in St.Valentine hon iit bang leh amah sang mah ale hon iit zaw kua a om a? Ngaihtuah zual mah dih le unau! Migilou te bawlsiat a om a, bawl gentheih na haksa tawpkhawk thuak a, panpih tu diing neilou a nang leh kei adia ana ding…Na muan mahmah na chih ten hon ki theikhem bawl in hon taisan lai un nang hon kitheih khem mawh bawllou leh hon nusia mai lou khat om ahi, amah kua ahi dia? Tuni in nang amah na nei hiam?? Amah ahi leh I Toupa Jesu Kris ahi! Gingtu lampai lai liam leh bai a ipuk hun chiang leh I phawk khak louh hun na tawm ale hong nuse ngei lou pa Jesu ahi. Huaiziak in, tukal a ahon tung pah ding Valentine’s Day khovel a na iit penpen toh zang dia naki sak kholh lai in, eite hon iit tawntung leh hon taisan a nusia ngei lou pa JESU kiang ah le amah na iitdan gelh/gen tei din iki ngen ahi. Simtute Valentine's Day zatnuam!!