AKPI KHUANG ZOU NAWN LOU HIA OI- II
(NAUNGEK HEHPIH HUAI KAHTAM LOH) by McMuan S. Ngaihte

“….Mihing dai kuaman kai zou lou hi, nihgel kal siam sinthu hi…”

Nikum lam deuh in hichi bang thu ka hon gelh kha ngei, “AKPI KHUANG ZOU NAWN LOU HIA OI” chih. Khenkhat te’n zaw, “Mahni hihna phawk lou a ut-ut gelh” na hon chih ngei uh le ka haih het kei. Himahleh awlmohna ziak liauliau leh puaknatna neih ziak a gelh zom zel ka hi zaw daih hi. Hichi bang gelh ding in chitna leh siamna le ka nei het kei a, ka hihna in le a zir tuan sam kei. Laigelh siam deuh i chi hiam, phuahtawm siam deuh i chi hiam te’n a hon gelh khiat di uh ka na ngakngak leh ka ngak zou nawn kei a ka hon gelh nawn mai veh.

Eive maw, i gam dinmun uh i et chiang in hoihna lam sang in siatna lam thu zak di a tam zaw. Lung ngaih huai lua, beidot huai lua. Changkang na khat a nei i hih ua leh bel gen di ka thei kei di. Huchi bang a ngaihtuahna nei a ka om lai in ken zaw “A Nu leh Pa kiang ah naungek hehpih huai kahtam loh” ka ngai ngam kei. Sih ding ngak a’ a nu gilsung ah a omlai in naungek beidong leh hehpih huai in hichi’n a nu leh pa a hon houpihta hi.

Ka itpen ka Nu,
Hiai ka laithon na muh hun chiang in kei zaw misi sa ka hita ding hi. Nu aw, na hon deih ngei louh di, na lungsim gim saktu di, deih louh a na hon paih mai di, zan tamtak ihmu theilou a ka hon koih ziak in hehpihtak in hon ngaidam in aw…
Ka Nu it tak, na gilsung ah ka om chih na hon theih ma in maw, ka lungtang ana phu detdet ta eive. Ka Papa toh na chetkhelh nung in, na gai lam na theih ma tham in, lauthawng tak mai in ka lungphu a phu detdet mai a. Ka na lauhthawng bang ngei in kei na hon suk kiat mai di ka Papa na hilh lai in ka na ngaikhia gige hi. Nunu, ka lau lua, ka om a rem thei nawn kei.
Nu aw, ka mel leh puam bek mu ut sam lou na hiam? Kipak tak a nou toh omkhawm di utlua sam keive. I maw, “Nunu..Nunu…” chia ka hon sap di kar ka ngaklah maizen toh maw. Tu’n zaw kei na hon deihlouh ziak a damdawi na nek ziak in ka hatna a bei a, ka chau lawta, himahleh thu tam lou dot nop ka hon nei a hehpihtak in hon dawng ve maw Nunu..
1)    Pathian in na thil hihte mu ngei ding in na gingta hia Nu aw..?
2)     Khotang leh lawm leh vual lak ah na mualphou di na lauh ziak a ka hinna na lak mai naasa lou na hiam Nu aw..?
3)     Kei tel lou a khovel nuamtak a na zat na kigingta a hiam, Nu..?
4)     Bangchidan hiam a kimuh khak hun om nawn thei di bang hileh na hon mu ngam diam Nunu..?

Nu aw, hiai ka laithon na mu apat in nang le na hinkhua na hon bawlhoih sawm dia maw, tua na chetkhelh bang a chekhial nawn lou ding in na hong pilvang sawm ta di aw. Na mel mu ut in, na angsuang ah lungmuangtak a, lauh nei het lou a ihmu hithit nuam himah leng a rem nawn ta kei. Pathian in nang a ding a hoih zaw ding a hon gel sak ngei ka lamen. Gen ut ka hau lua na a himahleh ka hanta in a zou nawn ta kei, ka chau gawp..
Damtak in mangpha aw Nunu….

Ka it tak, ka Papa,
Ka Nunu kiang ah ka laithon khak nana sim kha hia..? Ka Nunu a pawna lua di maw, ka lung a gim lua mahmah. Papa, ka Nunu lunggim tak a ka omsak khak ziak in ngaihdam hon na ngetsak hamham lai in aw..
Pa aw, na laithon di gelh haksa ka sa law mahmah, ka lungsim a gimlua a, himahleh ka Pa na hihna ziak in ka hon hehsan ngam thei tuan kei. I maw, “Ka Papa in a hon ngaihtuah fel vek mai di, leitung khovak mu ding in ka piang ngei di.” chi in lungsim muangtak in ka na om man eive Pa.
Pa aw, ka Nunu kiang ah na hong lai in, na thawm ging leh na awte ka zak mai in le ka lung a na muang lua eive. Ka Nunu kiang ah, “ I ta zaw suke dah mai ni. I enkol khawm di.” Na chih ka na lamen law petmah. Himahleh ka vangtah ziak hiam, Pathian remgel ahi zaw hiam, zinmang doh-ai hiam, “ I nau kha i sukia mai di, huai zoh i kikhen ngal di. Ka hon deih non kei..” chi’a na gen ka zak in ka lungsim a nalaw mahmah. Lauhthawngna ngen in ka dim. Pa aw bangziak hiam.. “Papa..papa..” chia hon sap tei ka ut-ut maizen toh! Pa aw, tha hatna le ka nei zou nawn kei. Vangphat huaitak a hong piang a, noute a dia kipahna hon tuntu hih ka na ut-ut theih maizen toh maw! Pa aw, thu tamlou na kiang ah dot nop ka hon nei tei a hehpihtak in na hon dawng thei diam..
1) Na ta, na sisan ngei a bawl hih lum ngap di khop a dawilok na tel hiam…?
2) Papa, na zi dia na deihlouh, ka Nunu’ kei na hon paai sak a, “…sukia oh…!!” na chi zel a, pa aw Pathian bek zahlou na tel hiam..?
3) Papa sihna di khop hial thil hihkhial ka hi hiam, Hehpihtak in hon dawng ve maw..?
4) Vangphat huai tak a kimu nawn thei di bang hita zenzen le ka mel na mu ngam diam Pa..?
 
Pa aw, pialgal gam ah dawnbang kituak ni maw. A tawpna pen ding in Papa, hichi bang in kuamah tung ah hih nonlou ding in ka hon ngen. Ka laithon na muh apat in na hinkhua na hon bawl hoih a Pathian lam ah na kik ngei ka gingta. Ken zaw pialgal gam ah noute ngak in ka na leng ta di.
Kimuh nawn ma teng damtak in mangpha aw Papa..
Na ta deih louh uh.

AUTHOR’S NOTE: A Topic a khauh sim a, himahleh hiai thu ka gelh in kuamah kawk tuam a nei kei. “Amah gelh di’n a kilawm kei..” chi I om ua leh ka kipak semsem di. Gelh le ka gelh peih nawn kei a hiai zah in ka hun sak ta di. Hiai tan ka gelh in le a pil ut te a ding in pilna tham a ching lua din ka gingta.

•    I feel the greatest destroyer of peace today is 'Abortion', because it is a war against the child... A direct killing of the innocent child, 'Murder' by the mother herself... And if we can accept that a mother can kill even her own child, how can we tell other people not to kill one another? How do we persuade a woman not to have an abortion? As always, we must persuade her with love... And we remind ourselves that love means to be willing to give until it hurts...”
― Mother Teresa

•    ABORTION DOESN’T MAKE YOU “UN”PREGNANT; IT MAKES YOU THE MOTHER OF A DEAD BABY..!!