Ki enchian thak ni! By: Naulak Pauthiansiam
Saptuam leh Khotang a heutu khenkhat:
1. Mi khenkhat-te heutu di mawngmawng a piang.
2. Adang-te lah heutu di a omlouh ziak a mun awng luah tu dia telching a om guih (huchi bang dinmun pua/len thei taktak di mah ahi hiam chih te ngaihsun/sin (study) nei masak na omlou pi a).
3. Mi khenkhat ta get lah mahni a (status deih ziak hiam a) heutu ki bawl tawm.
Tulai in i khotang sung uah gen leh tangkoupih mun mahmah hi a ka theih tuh heutu-te hoihlouhna leh chitlouhna hi tang pi. Huchi ahihleh mipi te lam en masa zual leng, i gam ua diktatna toh vai hon hawm sak thei di leh a mite iit-tak a hon kem tu di te tel khiak dan ki siam nai lou mah ahi diam? Ahihka leh chitna leh hatna bangmah nei het lou pi status deih luat ziak a heutu dia chin(qualify) het lou heutu hih ut ki tam lota? Huaipan jaw hah nekguk lua chi a ngoh a ngoh thoh mawk lah i gam sung a kam(job) awng ahon ki taklat zek chiang a gense pawl-te mah sum tahtu a va diang masa te ihi uh hia? Tulai in i gam uah a kuakua in politics paidan leh nekgukna i vei petmah ua ngaihdan hoih pipi tampi tak facebook group/page te ah i khikhe tomtom uhi. Thupi lua chini maw? Hiai in ilak uah laisiam leh mipil tam pi petmah ki neih ta ahi chih ahon musak. I invengte muh in singtang mite chih in ina om ua, i om lai ua, i om tou den ding uhi, huai bek tham lou in khotang sung ah mipha zou loute(tribals) ina hi uhi. Ahihang in, Toupan lam chi tuamtuam ah eite pen hon DOMSANG tou in tuchiang in mite neih zoh bang in i gam in hauna nei vekvuk nai kei mah leh lam chi tuamtuam a khangtou petmah hi hang. Tun heutu lam en zual le hang, azahtak huai heutu ten khah i HEUTU hih na te uh suang in iki sak theih pih tham mawk ua huai khah ei gingtu(?) kichi-te ki makaih/vaipuak didan ana hikhin khol het lou ahi. Mipi lam ten a ngaihdan te uh ahon kup chiang ua ei pen ana ki pe lopah sek hang a(or ki jephok ihi uh hiam ah) vauna bang bawl suk pahpah mawk, heutu dinmun khat len ihih ngal lehbel zahngai zou deuh a tua te khong nasep na a tha hon pe tu di leh i chit zohlouh na te a hon sinsaktu(teacher) a koih ding hijo lou hiam aw? Mahni lalgam lamkhe ding leh bawl ding a tel(elected) a om ihih ngal kei lehbel imi isa te kap na aw ging zak hun lota hilou hiam? Tu chiangchiang bang a nidang dan a kuamah a jong a hau laisim jou lou chih ki om nawn lou(hundang dan a ki mawk khem hai thei di te kihi nawn lou, michih in pilna leh siamna bantan hiam bek kineih vekta). I gam ading a nasem iki sak luat chiang a a lehlam tak a bangmah sem khe lou pi khat ki leh hih khak theih ding ahih man in, sem lua kisa pah kei ni! Pathian leh i nu-leh-pa te tungtawn in Toupa’n michih TALENT tuam chiat toh hon vualzawl ahih na ah, tha neih tengteng toh tua sang ale thupi jaw sem, sem khe tou di’n khat leh khat ki kou tuah mai lou in i pang theih na lam chiat ah i mite i iitna ziak liauliau leh amau te adia tuni a banghiam khat sem khe ut kahi chih lungput a nei kom in sem khe jaw din kahon chou(challenge) ahi. Ei-leh-ei iki iit ka iki poimoh ngaih kei leh kuan hon poimoh tuan di? Vaihawm hih utna leh thuneihna kituh zo mai lou in, i pilna leh siamna te i zat siam ua huai in ilak ua lemna, lainatna, kipumkhatna leh ki iit tuah jawk semna te a piansak hun ta ahi! Mahni ang masial hun hi nawn lou. Huchin panla thei leng i gam leng hong khang tou dia hong chidam tuan mahmah ding hi.
Huchimah bang in, Saptuam lam ah le hithou, tulai in i khotang siatdan uh a kuakua in i thei ua i tangkou mun mahmah te uh lak a khat leh ahon hoih a hong chidam theih nawn na dia Saptuam leh pawlpi chi tuamtuam in pan ahah lak mahmah lai tak uh le ahi hi. Kum bul a ding petmah iki chih lai hang in tukha sung maimai inle sual gam tatna tampi tak iza khin ta uhi. Khotang siatdan hon ki gen ging nak leh tuh Saptuam lam le bang tan hiam a bahna khat nei ahi chih tuh chiangtak in imu thei ahi. Huai ahihleh Saptuam kivai puakna ah le upa/pastor lamte’n gingtu te iittu leh theisiam tak a kemtu di, abuaina uh leh a haksatna te ua pan pi khe tu ding, amau te innsung/innkuan buaina hiam om chia vehtu leh sinsakna pe thei tu di Laisiangthou in agen chitna-te ki poimoh ngaih zou nawn lou mah ahi kha diam?? Thuhun in siatna tuailai leh khangnou te lak ah uat chih tak in a uang a melma pa Setan intuh nakpi tak in gingtute ahon sual ahi, huchi bang a taangkha mi khenkhat a haksatna hon gente kiang a dotna ka bawl khat kahon gen di, “Bang ziak a na buaina upa leh pastor te kiang a tun ngam lou nahi hiam ka chih leh amau sang un nou kahon muang zo uh chi mawk ve uh.” Huai ahih leh tuhun a thugen mite bangziak a mi te muan tak a ki om lou? Mite haksatna thuguk ki kup pih ngam dia maingal a om lou ihi ua? Pulpit a i ding chiang a mi vaihawm khum tu ihi kha nak hiam ki et thak poimoh mahmah ta. Kris nungzui muanhuai kahi iki chih hang a mite adia haksatna tun beh tu leh puakgik guan beh tu ihih khak ding pilvang petmah ni, ahuchih ka leh jaw Pathian nasem kahi a mite hotdamna tanchinhoih hilh ka nasep pipen ahi chi in iki saktheih pih tham maithei. Ahihhangin, alehlam tak ah Pathian thu thei utna nei a lunggulh leh dangtak te Kris apan koih gam la tu a pang khak thei gige ahi.
Thil ahon kihah gen ging luat chiang a jaw “kou ka dik ua, nou ngaihdan pen diklou mah hi” chih toh thuah a va nolh khiak bawl gige theih mai ahi kei. Huaiziakin, saptuam sung hita leh khotang sung a mohpuakna nei khempeuh in ei-leh-ei ki enchian thak in tuni in nang leh kei koi mun ah i ding ua? Ihat louh na leh bahna te uh ki muh suah sawm in, bangziak a i mite muan tak ding a om lou ihi hiam chih ki dong tuah thak ni, huchi hileh mailam hun a banghiam khat gah hoih tak sepkhiak theih ding hon om ding ahi.