Piangthak' mikhialte kihdak(Pathian a kipan adiam?)~ Ginmuanlal

Khelhna leh khelhna zangtu kipahpih a phat mi atamkei ding hi. Khelhna chituamtuamte huat ahuai a kipahpihna ding atam kei himhim hi. Tapa/tanu khial gige kipahpih pa/nu a omkei ding a kipahpih naaksang in khiallou dingleh khelhna gamlaat ding a thuhilh gige te ihi uhi. Khial a a nu apa suzahlak tapa/tanu neihsang in taneilou a teksih ut huaizaw laiding hi. Khelhna kuapeuh in i hua ua zudawn a khialten a tate uh zudawnlou ding a hilh in numei leh pasal kaal a thaangtatna a khialten a tate uh huchibang khelhna a khiallou ding in thuhilh uhi. Khelhna hawlou m.ituh milungsim paikhial ahi chileng a uanglaw keiding hi. Khelhna ihuat luatziak in khelhna lam chituamtuam a nakhial kha mitampite ihuat thoh a muhleeng mupeihlou hial in mit siik inle i en nuamkei uhi.

Huchibang mite ana huathuai mahmah uh ahingei hi. Zudawn a ngolvei zawmah a zi-le-ta leeng khuallou a alohkhiat teng zu a dawn gai a ziten tamlou ana muhkhiat nangawn uh a niik kawng uapan sawk khiatsak guigui a zumun a kichapou saktak a pau phanphan zawmah lai ahihchiang ua huatlouh ngaihna omlou hi. Nu-le-pan tapa aneihsun uh huihsia in a muutding leeng phallou a kho ul kaizen a atuam zezen uh tapa/tanu hongkhang lian a a nu-le-pa tha kheek a innsung thovengtak a enkol dia deih a kinepna liantaktoh a ngak uh hongkhang lian a damdawi khamtheih hong hih a innveng inn paam neihlehlam guuk theihteng gu a nu leh pa milak a etna dingleng theilou hial akoih zawmah...huaikia leeng hilou a innsung a neih leh lam amah khualna kia a nu le pan ana kholsateng uh khat khit khat a guukzuak khin a nulepa khutdoh bangphial a koihte huatlouh theihlouh mah ahi uhi. Khovel ah hongpiang keimai le uh chih nop huai zezen hi.

Pawlam apan guta lata a kiven a haksa mahmah na a innsung apan guta a miven ahaksa diak ding hi. Pawlam mi apan kiven theihna tuammuam zang in kongkhak hoihtak akalh, Almaira tabi kalh gige, singkuang hoihtak tabi akalh leh inn mahleeng inntek pilvan ziak a kiven nopdeuh himhim hi. Ahihhang in mahni innsungmi mahmah Tabi kuan keem a koi a kikoih zel, huaisung a huai om... chih thei mahmah leh hunteng a innsung a khosathei a innkuante dailen kal lel a innzung tawng a Lelpi pawkhetheipah innsungmi a kiven haksa peuhmahding hi. Huaiziak in tapa/tanu guta tuh huathuai in sisuk maileh chihnop huai khop in muhdah huaileh iiplah huai uhi.

Khelhna ahuathuai mahmah ziak in khelhna hihte leeng ki hawsuk mai hi. Mihingte huhamna chikhat hipeuhmah hi. Mahni sung a piang ngoihngoih a khelhna ziak ua huat chihtak a huat hihkhelhna ahihlamleng kitheilouzen in akhelhna un hon mudahsak hi. Muhdah huaileeng a hihim uhi. Vuak a zeep a phading hinawnlouh khelhna paai hawlou kua a om dia..? Pawl kibawl peuh in ihua ua idoudal ua a inn alou nasan uh itankhaksak nawnlouh leh zahlaktak a khosung ipawtkhiaksak uh innkuan atamta hi. Huchibang mikhialte na pauhual a khosung apan nohkhiak ding kilawm salou leh gawtna ipiak uh khengval salua a hehpih huai asakdan uh nakamteh khate bang khosung vaihawmna zahtaaklou leh simmoh chi in atung ua action laak leeng i utlai uhi.

Pawlpite kialeeng hilou in saptuamte nasan in khelhna ahaw mahmah uhi. Saptuam sung a khelhna hihte saptuam danbang a atung ua action laak a hizel uhi. Khotang vai a pawlpi in ahuat letuh Saptuam in a hawding chih theihsa toh kibang hi.

Ahihhang in kha a piangthak taktak ading in khelhna huatziak a mikhial/khelhna hihte etdan tuamtak a saptuam leh a makaiten i et ua kithuahpih taak aleeng koihlou a hehpihna nei hetlou a ikih thoh zezen uh ikhalam hinkhua uh kivelthak poimoh adiam chinuam lehlam ihi. Khelhna ihaw keiding chihna hilou in khelhna ziak a koltaangte hua a kih banghial a a inn ua vahohding mullit a mikhialte lak a omding lau khamiitna pen khasiangthou akipan khamiitna ahihding gintaak haksa mahmah hi. Mikhialte iitna neilou khami kichi zaw khami hilou in khahoihlou niin paai ahi chileng khial lawmlawm din kagingta kei hi. Pathian in mikhialte ahi a it. Mihoih zong ding in atapa ahon sawl kei a mihoih leh midiktatte toh kithuah ding in atapa Jesu leitung ah hon sawl kei hi. Jesu mahmah inleng mikhiate zongdia hongpai ahihdan agen a ahoh utna leeng mikhialte lak mah ahi. Tulai Saptuam makai khenkhatte dan a khamilel hileh siahkhonpa Zakai (huaihunlai aleeng khami kisa mahmah lawi in zintunna dia le mindai huai asak uh) inn ah Toupa Jesu ava zintung kei hial ding hi. Tulai dan hiletuh alungsim in Jesun tuh "Zakai inn ah vatung leng huai saptuam makai leh dansiam miten hon gense ding uh" chi in vatun naaksang in "Zakai, negupa/mikhialpa..... " chi in pulpit ah a gen ek ek ding hi. Himahleh khalam hinkhua a khosa ahihman in mite gensiat ding laulou hial in mikhialpa inn mahmah vazuan in ne in adawn a akhalam itna ziak in mikhial khat piangthaksak in dikloutak a aneeksak mitampiten atanding uh mineupa Zakai in aneeksakte muhnawn loh hial uhi. (Zakai in dikloutak a alaaksakte lehtampi a din nawnding chi himahlou hia maw)

Jesun khelhna a hua a khialte a it hi. Mipin numei kizuak a mudah mahmah ua suang a denlup hial ding in hoih asa uhi. I Toupa Jesu inbel khelhna a hua a akhialtu numei kizuak a it a akhelhna ngaidam top hi. Tulai hileh numei kizuak/angkawm laitak mat nitaak in Biak inn ah mohpaihna Sermon kigenpah ziahziah khamohlou ding a angaikhia mipiten thugenpa thugen siamdan ikikum souhsouh ding un ka ngaihtuah hi. Saptuam in mohpaih in akinlam in thununna ipeding ua saptuam makai a inn ua vahoh a va thuhilh leh va chialpiit naaksang in avalenglate bangleng saptuam makaidia telnawn khakding kilau zezen khamohlou ding hi. Kizuaknu/angkawmnu inn a Saptuam upa/pastor vahoh chi in thillamdang gen in mipiten igen ding ua akhalam hinkhua diklou ahihdan ikigensiak hialding uhi. Huchia mipite genkhak dinglau in saptuam Upa/Pastorpa mahleng mikhialnu inn ah ahoh kei himhim ding hi. I Toupa Jesu inleng khalam hinkhua ahing hilou a mipite gensiat dinglau hile Zakai inn ah a valut hetkei ding a mikhialpa Zakai mipilak ah a zong hetkei ding hi. Mipite maipha zong hileh Angkawmnu a kiang a apilai un Toupa Jesun "hichibang mi kakiang a bangdia hongpi na hi ua..kahihna toh leng kituak kei Pathian tapa kahi hichibang mikhialte kih kahi..." chi in luaksuak in a uak lualua hialding hi. Ahihziak in mikhialte it a zong ahihman in mipite ngaihdam zohlouh aman a ngaidam a simmohna kammal khatleeng zasaklou in a inn uah apai kiksak hi.

Jesu pathian ahihziak a huchibang hih hiding a ngaihtuah khak abaihlam mahmah hi. Pathian ahihna ah khialte a itna thupi tungtuan ding a koihleng a baihlam lai hi. Himahleh Amah omdan zui a itna toh kidim ding a sinsak leh hilh a om ihi ua huchibang a omtheihna mihing hinkhua in a zoukei himhim hi. Mihingte bel eisang a hoihzawte it kuapeuh in izoh ahi a eisang a na sia leh khialtungtuante it ahaksa himhim hi. Eisang a khialzawte ittheihna mihing hinkhua in a zohlouh ziak in huchibang mite ittheihna lampi omsun tuh Khasiangthou a Pianthakna kia a hi liuliau hi. Huaiziak in mikhialte musit a hua mikuapeuh ikhalam hinkhua kivelthak kuul hilou hiam... Saptuam makai mikhialte laupa/launu zaw akhalam hinkhua kibulphuhna dikzoulou hizaw khading hi.

Mikhialte lak a om napi a Biak inn a mikhialte ading a thum a mikhialte kisiikna ding thumna kia a Pathian kiang a ngenngente zaw mikhialte itna taktak hilou in Pulpit kisinsakna zui a mikhialte it hikha ding hi. Thumna poimohlou chihna hilou in mikhial lak a om a mikhialte ading a thumna Biak inn a vaneih louh aleeng atak a mikhialte it ihihdan kilatsak theihna mun a i omleh atak a kilatsakpah lohchinhuai zawlouding adiam..? Mihing in ihihtheihna chiang ah Pathian hongpang pahlou ding a mihing in ihihtheihlouh baan/kheel ah Pathian hong kipan (hon panpih)pan himaithei hi. Huchi hilou hileh isepgimna ziak a neekmu hilouding a ithum hahkatna ziak a neek mu a hausa ding kihi ding hi.

Khelhna a huat huai lawna a delh a delhmang thohtheih khelhnate lauhuai sam mahleh delhmang theihlouh khelhnate ikhosung leh i khotaang ading in lauhhuai diak a itna leh deihsakna toh aangvanna a sukmangtheih/bul kalhtheih tampi ilak a omte huatna ziak a hon nuselou hikhading hi. Itna in enkol in itna in enzuileng akhelhna un taimangsan peuhmah ding hi.
Khialte it in khelhna hawni.....