KUMTHAK KOI A OM AHIA - I by Jimmy Guite

JANUARI TU DISEMBAR : Pindan banga Kalendar kikhai meikhu gim thuaka ung khiukheu en chenchen Disembar ni 14 hita, kum beidek; kumthak na ding ni bangzah omlai himhim hiam chi a khuttal muka ni 15 apan kokphei tuautuau, 31 Disembar zohchet a....hmm..kumthak na ding ni 17 omlai e... achih leh a tapa naupang in, pa koiah eita kumthak.. kenleng ka mut ut, koi e kumthak  chi a tomtou gawnggawnga a kalendar neihsun uh a sawktouh leh a nawla Januari 2014 kigelhna teng lai khekkha chitchiat... Insung papen in mitgau gelgola atapa maitang taka en kawma, ommohpa kumthak munuam in kumthak omna na laise ta vele..ommoh na mahmah cia...k’on kiu de..chi gamgam. Nupen anhuanna thukkhuk apan dingkhe zot, nik kipei duangduanga hong taiphei..a tapa khasia a kidik dupdup hong nem.. papen paulou-phunlou a tapsak naih nulnula thuk tunga sihzoupok phulliam ding venga daidide a tu kawma buhtei len tinten. Kumbeima a Kumthak buaina  kipan hingal mai.
UNAU MELHAIH : Papen laizial keital veuvau kawma vengkhung lamte singpi san dawndia nitak annekhin unau melhaih huna khawkhunglam zuana kipankhia. Lampi a naupang nih kapkawm suihsuih lampi a ki tuahpih. Numei naupang zawpen in pau seselou a pisalpa khut len dia a kisak leh a khuttal leh khutlai kikala a zeh laizial am bengkhe kha, kuamel-kuapuam ahi ua chih theilou ahihchia pisalpa laizial khamlou, tep ding om nawnlou( a mei-am teng kebei ahihchia) thangpai kisa a, “naupang ommoh” chi a numei naupang bilhek dia akisak leh naupang nanungzaw pasal naupang in awling pupulh kawma, “pa kaw hoh dek “ hon chikhe nuap. A hoih etthak leh amah tate gel inlam zuana kapsa a hong pai hi phing uh. Lungsan-thangpai kisa, atapa pomkangtou a liang-ko-lou khak geih,  a tanu khut lenkawma inlama kilehkik nuangnuang nawn. Vengsak nungak gougam helkhalou hiphot. “Kumthak ma in khatveibek kipotman lai himhim na ve” chih  lungsima ngaihtuah kawmkawma, inka mong  asik pat kiangkiang leh lui kisa inka-tehna henna nanghek kitan, inka mong kilip in a liang tunga tu a tapa tal khenkha naupang kap chih taka kap. Insung tawnga Vok-an ding vainel kha khin phet inteknu khut buan niuniau a hong tai pawt, “hih aw na tate kem aw. Lawmte khutthak thuak din potsak nawn ken kichi gige, hilhlouh mah bang ..” chi a zohthoh bawl taka inteknu sonhang duai a insunga lut; sangkil kan toh kituaka a liangzanga a tapa hong tomkhe theuh. Inkuan kima vok-an huan khawm nitak hi zezen vanglak.
NU,  KUMTHAK KOI A OM AHIA : Thukkhuk a sing-lu-kham domkanga singkhuah son zotzot kawma nupen, “in bawite kua’n hon na vaw get ahia, potpot kei un kichi a; na thumang kei ua eive..” a chih pat diahdiah leh papen in “kuadang ahi dia khawkhung lama a nite, a gangte tate mah a kei dua. Kidotdot ngailou a theihsa ei vele. Na nuta hon ua kisun in khawlak kia na delh ua na maikha uhia...” na chi gamgam. Ta upazaw numei pen in “ Nu koia Kumthak om ahia ? Ka nite Ina ka potna ua Krismas leh Kumthak lop ding chih khong ka gang in gengen a, ka nau in kou kumthak nei nonlou, tusuna ken laise kha a hon chih zenzen leh a Inkuan ua hon nuihsan noinoi unchin.. ka ni bang houh eng nuih pha diak..zumlua ung a kou ka unau ua kapsa a hong pai...” hon chi nengnawn hi. Nupen leng a nuihzagu lua, papen mitmei a venna kawm toh a nuihza selna dia kikhuhsak kawm thauhthauh a, bawite kumthak maw Januali ni khat a om eivoi. Mawltuala voksapok ne a khawzang in lawm ding ihi. Huaimah a kei dia na gang un a gengen.. a hon chihpat diahdiah leh papen in azi mawl salua hi ngei ding vut khuphul zena a tutna meipam apan hong dingdok, vok-an huan sou kisa a phul bibilh lai bel domkhe dia hong kisa gelgol mok. Insung mite apau-aphun ngam omlou, lampi ding awn diamdiam uh. Papen in kawng koi zena vok-an bel domkhe kokoih pangkhang geia tuithei bula vangakhe dom. Inkuan zan lup hun hita.
IHMU THEILOU NA MAW : Kumbul tunga “tukum in zaw zi/pasal kineita mahmah inteh” chi a lam-en mahmah khawsung lengkul nungak leh tangval te’n ni asimsim chiang ua kumbul toh kilamdanna om hetloua kumtawp tung zel ding kihi  e, chih ngaihtuaha ihmu theilou in lupna tunga kihei-kihei mai uh. Papi leh nupi lam-etna sangtak nei, kithalawp taka kum bulpan  te’n leng,  ‘ bangchi hi mahmah ding ahia, kumbul leh kumtawp in leng sungkuan khosa ah kilamdanna a nei kei..kumthak chiangin zaw pang taktak ta ding ’ chih a ngaihtuaha ihmu theilou, paulou-phunlou in akilep- akilep mai uhi. Inkuan khat sunga naupang melmol kumthak omna nangawn theilou mihai banga a sehte uh bel Pathian vualzawlna ihmut nuam tang in phalbi khovot nuai ah ihmut limtakin a ihmu hithit uhi. A tawptawp in papen in, nupen khetul sui gaih in, “ihmu theilou na maw.. na tang na tanga hon ihmu sak theilou na ka “ hon chikhe khong hi. Hun lemtang mu kisa in nupen in leng zanpuana ki-lukhuh ngeungaua lehngat kawm in, “nang ihmut theihlouh hon ngoh vial ko, ei bang zaw inkuan khosa ngaihtuaha ihmu moh ihi e” a chi zauzau hi. Kinak-kisel mah leng chimhuai chiin thupi dang ah nupen hong pakai a, “ I maw pa, tunitaka i tanu hon dot kumthak koi a om ahia chih dotna ka ngaihtuahtuah chianga ihmu thei mahmah lou kei ve. Nang papen in naute hilhchetdan na theih kei leh zaw kei tuh a beidong ka hi mai ” hon chikhe khialkhial thahah a, papen in leng a dawnna ding dang thei mailou a ahi ngei ding e, “ kumthak-kumlui omna lamlam kua’n a thei khelkhel mah dia. Disembar 31 a kumbei - Kumlui kichi, Januari ni 1 a kum kipan- Kumthak kichi..Disembar 31 jan dak 12 a Kumlui leh Kumthak kikhen....aban  theike’ng “ chi lanlan in  huai naupang neu dotna KUMTHAK KOI A OM AHIA chih tuh kumpi sul kiheiliam kuana Inkuan dotna poimoh pen ahong hita.
14122013.