Ngaihtuah Utlouh: Ngaihtuah Khaak Naak…!! ~By K. Lianthansang @ K Thansang Zomi
Mihing-te’ kum Sawm-le-Giat(18) I vaal chiang a PICHING a kisim a, VOTE khawng bang neithei ki himah lou hia maw? Kei sang a ‘ Vok-eek ana nam masa zaw ‘ leh ‘ tal-taak zaw ‘ tampi om ahi chih haihlou hial kahi. Himahleh, Pathian in Ngaihtuah theihna honpiak pansan in, ngaihtuah maimai dia le uthuailou bangzah hiam ngaihtuah khaak naak om ahihman in, huaite gen sawm kahi zaw. Tal-nip leh Tal-taak in thu a pawkei, huaiziakin “ Hiai naupang thugelh maimai simtaak kei, thulaak huaikei “ chimailou a, “ Naupang in huchibang thu hon gen(gelh) theih hial leh a diklou deuh om ahi dia aw…? “ chi a, khuak sa zeen a ana kingaihtuah vengveng ding in I kingen masa hi.
Mipi-te I Pil taak ua, huihnunna lamlam a I leng dongdong ding uh hi nawnlou hi. Vaite kiang a, “ Suang tawi inlaan keelpi zol in ( non kheemzou ngeikei duh)’ I chih uh hun lawta ahi. ‘ Tuike zon bang ‘ hial a, Vai Mahajon te seelmang CHI (van dang le) I zon ua, I muh sunsun uh ‘ Nupi loutul veh bang ‘ mai a ihuai somsom nawnlouh ding uh ahi. ‘Chi sohlouh bang ( Thuhilh ngeilouh bang)’ hial a Vai Mahajon te’n ‘ Vot sidawn toh kibang ( a hunphet theilou)’ a, sahang in agial a zahtaak bang a agam mite hihna hon zahtaksak kei ua leh ‘ Sazu maingal a thaang awk ‘ chihbang dandeuh a, a thaang awk ua, a sum-naak uh a kang(khawl) liuleu khak di uh, alauh mahmah di un deihhuai hi.
Upate’n, ‘ Puanse thuap leh teekse thoih ‘ a chih bang deuh un, bangteng gengen in, CHI-CHI le hang leng, I DAN bawlte I etzui kei ualeh bangmah tan adaih tuankei ding. Hiai a igenkhiat te bel, ‘ Leikha in, Phulun pawtna di a keivang ‘ chibang dandeuh maimai ahi. A lehlamtak a I hamphatna sawnsawn uh ahihleh, LATSEA, Consumers Club chih te I nei ua, amau ahihleh Laisiam leh mipil pipi ngen ahi uhi. Amau ziak mah le ahi, tuma a I CHI buai nainai lai ua, I Buaina uapan a hon honkhetu te. Huaiziak in I makaite uh Zahna salaam ka pia hi.
Thil himhim, I hihdek chiang a ngaihtuahna seeng zek teitei ngai hi. I theihlouh ahih leh leng, athei te dot masak di’n deihhuai hi. Mihai kichi lelah, ‘ tangtel siiktan ‘ ibang kha di ua, thil I sui zek khaklouh uh ahih leh; “India gamsung a CHI kitasam taktak mah hia?” chih ahi. Thuzuau maimai hilou in, Thudik hi henlan, Bihar State a CHI bawlna teng sia bang hi mawk leh leng, India gamsung ah CHI taksap di patauhhuai mawngmawng lou hi. Bangziak in eita ???
India I chih, Khovel a CHI bawlkhiatna lam ah 3na bang ana hisam eive. Misiamte’n agen dan un, India gamsung a CHI kibawlkhia’ teng lak ah 75% te Gujarat State apan ahi chi uhi. Huaikia le ahikei lai, CHI bawlkhiatna munpi, Bihar State tellou in 10,000 val tham om a, Gamdang a thotkhiat di mawngmawng bawlna, Salt Company 20 bang om hi. Chi kitasam a, bei di dinmun in omhial leh leng, a koihkholhsa te uh Vaidangka 100 val khawng a lei na di thu omlou hi. Dan ( Ref. Essential Commodities Act, Section 7 ) dungzui in vanman, Maximum Retail Price (MRP) tung a zuak-te mat leh a licence tanpha uh phiatsak theih ahi hi.
Neektheih dandan a, I Zogam uh hong neeksiat sawm; Vaite (Bihari, Bengali, Malwari) leh amun mahmah a, ana negu sam; Tualsuak mi-te lak a, ‘ Bil Vuhlouh (thuhilh louh)’ omkhak zenzen leh makai te’n hon zonkhiat ua, thuhilhna hoihtak piak tuak mahmah uhi. Mipi-te pei lung-am thei dite, pawlpi tuamtuam te’n hon betdaih zelzel uh deihhuai mahmah hi. Huai banah, ‘ Thudik paithoh a, thuzuau leeng thoh ahi ‘ chih I mangilh louh ding uh ahi.
Ahi hi in gensuk maimai le, ‘Vaite’n hon maingal lua uh’ I chi ua, a dik mah le ahi. I market uh hon Control tute le amau mah ahi uhi. A chihleh, vaite’n hon maingal kawmkawm un, en avanzuak-te uh I bangchi maingal ua le? Christian kahi I kichivek ua, Khamtheih chi tuamtuam’ Vaite hong puaklut-te I maingal mahmah zel uhi. Ngai dih – Vaite’n khamtheih banglou teng hong pawlut mahle uh, ei agam mite’n ana leikei mawk le hong pawlut nawnlou mai ding uh ahi. Huai banah, maingaltak a Khamtheih hongzuak te khauhdeuh in enkol mai le bang a chi dia?
Mi khenkhat in, ” Vaite’n, I numeite uh hon sawkgawp sak uh “ a chisek ua, a dik mah ahi. Huai adik kawmkawm in michih’ sunglam, khamtheih pansan in bangchituk in hon sawkgawp sak ua le? I Market uh bang chituk in hon sawkgawp sak ua le ? Khamtheih doudalna ah; A khamtheih dou di maw? A hihtute maw? A zuaktute ? Kei Ngaihtuah khaak naak dan in bel, Khamtheih leh ahihtu-te sang a, azuaktu-te tawmzaw lai ahihman un, azuak te bengdai tawmtawm le I Zogam uh hong Pallun nawn ding hi. Gingloumite’n zuak ua, Christian kichite’n lei sauhsauh nawnkei ni..!!
Huaibanah,”Politics leh Biakna a kiton a pai di hia? Atuam vilvel a pai di ? “ chih ngaihtuah khaak naak in omsek hi. Mi tampi-te houlimna leh kiseelna khop le ahi hi. Ei kiseel mailou in, I Laisiangthou uh dawngsak pah le bel, veng maiding hi. Mi khenkhat in, Biakna(sahkhua) sang a Politics’ tungnung zaw a koih mawk..!! I koih taak leh leng, Biakna( Sahkhua leh Saptuam) pen Politics toh helmatlou a, Vote Bank dan a Saptuam mite’ zatnuam ziak a, Saptuam bang tuan thethu tawpsan tani. Angkawmna chikhat ahi. Tuate banah; Kilakna 3:16, Romte 12:2 banah Matthai 6:24 te ana sim behlap mah dih..!!
Thutuam daih genzual nawn le, leitung pumpi ah 11th July pen, World Population Day in ina zang sek uhi. Hiaini te in, “ A small family is a happy Family “ chih thu’ tangkoupih mun mahmah in om hi. United Nations ngial in, kum tamtak paisa in ‘Zawnna’ kichi hihbei na dia poimohpen, ‘ Family Planning ahi ‘ ana chi hial uhi. India ah Mihing atam mahmah chih I theihsa uh ahi a, himahleh eilak hial ah Family Planning poimoh nailou ahi. Lamka milip leh Kolkata a Howrah Train Station a mihing omzah kikim ding in, mi khenkhat in gen uhi. Huaiziakin, ei lak ah World Population Day hun chiang in, taa tampipi nei te, AWARD bang piak sek hileh chihhuai mahmah hi.
Tuabanah, UN phasakna bang in, 1992 apan 3rd December pen, ‘ World Disability Day ‘ a zat in ana omtou ngiitngeet hi. Piansualna leh Vual phaklouhna kikheel lou ahi a, huchibang a omte leng, amau ut thu a om hilou uh ahi chih thudik ahi. Tua ahihman in, Vualphaloute simmoh mawklou in panpih zawle chihhuai mahmah hi. Huchibang te le Pathian siam vek ahi ua, I simmoh leh a siamtu(Pathian) simmoh kisuak ding hi. I nelsiah louh ua,Luka 14:13 na a “ Ankuang na lui chiangin, tagahte, piangsualte, khebaite, mittawte, na sam zo ding;” chi a I Laisiangthou un honna hilh bang a I om ding uh ahi.
Tuabang kawmkal a kana ngaihtuah khaak naak nawn ahihleh; Mibang leh banglou, vualpha leh phalou te le asiamtu kibang ahihman in, amaute kankuah dan kisin poimoh sak na ahi. Sun leh Zan a khawlak a Vualphalou muh di tam mahmah ta a, I et chiang in hehpih leh lainathuai vungvung uhi. Vualphalou, khe a le paitheilou, naupangte’ cycle a van bangzahhiam khawng pua a, lampi dungteng a kitawtawn te khawng bang I vawngam tel uhi. Ei le tuabang a omthei hihang, PIANSUAL KIKHELLOU EIVE….!!
Mangilh ka sawm hang in, DC/CCPur Bungalow sak a, Guest House mun a, Mipil leh Laisiampipi, Gam leh nam siat di deihlou ngen; District Level Officer leh MLAs/MDCs te thawmging in ka laidip teipi bang in hon sun lailai hi. DC/CCPur in pasal aneih di kuapeuh in ikipahpih mahmah a, ahihziak in zannung a bouruak sangtak in azuihpe’n tuni dong mipi diipkuatna suaklai hi. Midang zaw chi zozen khang, a gei a Damdawi Inn a Damlou’ zunteh zen a omte mahmah eive ka hehpih..!!.
Joint Philantrophic Organisation(JPO) te’n, Cracker chihphetlouh, apuakging theilou ‘Toy Pistol’ te nasan a khaam lai ua, mi khenkhat ngial Phalbi mangsiat di lau kawm a ihmut a sawm laitak ua, PHALBI MAUPUAH bangmai a, District Administration leh mipil tuamtuam te’ kipahna in Mipite su kipak hetlou hi. District khat enkol dia Government in muang mahmah a aguan te’n hiaibang a, ‘ lu leh taw phawklou zen a ‘ hong gamtat na un, Government in amuanlouhte(mipi narante) a maimai kei ding uh chih hon hilh chiang mahmah hi.
A bawlte mah bawhsiat theih (DAN) bawlbawl in omzia neilou suak hi. Ahihkeileh, Dan kichi Mipil leh Laisiam te’n ahun leh amun zil a bawhsiat theih chihdandeuh om hiale? I Rights uh itheih kawmkawm un, I Duty uh thei ni. Nang Rights neih bangbang a midang in le Rights ana nei sam uh eive, nang neihbang in Sum neikei le uh le..! Mi naran khat in thilsia bawlkhaleh, ‘ Guh dawkzen ‘ a Mawhpaih sauhsauh in, mizahtakhuai’ khat in DAN bawhse leh taise kawmkawm a, a khawnung a mohpaih nimnem chidan khawng in I hihna uh taklang khin hi. Mahni leh mahni ki gensiat leh ki mawhpaih zaw haksa di eimah ve!! Kathei khethak guih..!!. Hilele maw, tuban zaw khattung ah NISA sak a, khat-te tung ah VUAHZU sak nawn mahmah kei ni uh aw…????
Kicheina lam le ka Ngaihtuah ut hetlouh hina pi in, ka ngaihtuah kha naak a kongen zek di. Pasal khen khat in, Gari hat pipi a tai fanfan chih khawng thupina leh kicheimawina dan in ina ngaikha uh abang hi. Nungak khenkhat in lah Bike hektu a awm a phu lehloh, a tawbou lam bang kangsak vengvang khawng imuh chiang in mitsiphuai mahmah chih ding ahi.
Mihingte a ding in kicheina ana poimoh mahmah a, I niteng hinkhua ua I tuah touhtouh uh ahi hi. Kicheina in mihingte etlawmsak ahi chih miteng in itheih chiat uh ahi. Tulai a ilak ua KICHEINA’ kithang mahmah; Mobile Phone leh Two Wheeler gari chihte ahi tangpi hi. Mite’ laisiam a aki dem uleh ei Mobile leh Two wheeler Fashion ah I koltang den lai uhi. I Economy uh I etchiang in aniam mahmah a, himahleh I kicheina uh I etchiang in a sang mahmah zel hi. Huaiziak tak le ahi dia, Namdang te’n honmuh chiang un, “ hausa lah hingal a, genthei tak a khawsa “ honchi uhi. Huai omdan tak bel, I kicheina te uh gam hausa leh mi hausa te kicheina te ahi a, himahleh I khawsakna uh leivui(nipi lamchiah) leh buannawi(tuuktui luan lamchiah) lak ahih tel ziak ahi.
Tuni chiang in, Biakinn a le kikhop ngam huailou khop in kicheina sangta hi. Kicheina asang dungzui in, Numeite niik mong le hong kisang tan deuhdeuh mai a, siatna leng hong uang hiaihiai hi. Mi lak a trop tak a vatel di le zumhuai tuntun bangta hi. Naupang piangtung chihtheih phial te khawng in, Coat honsilh hial chiang un zaw, I fashion(kicheina) un Mumbai Fashion a phaklouhna omtuan a hia chih sim in om hi. Kicheina kichi mihing a din poimoh a, himahleh akaan-avaal a kicheina pen, MAWLNA ahihman in, tuabang a I paitouh zel ualeh I maban uh lungzinhuai mahmah ding hi.
Mihingte’n I hinkhua uah SUM I poimoh tou ngiitngeet uhi. I thilhih leh bawl teng uh SUM deihziak chile sau kikhial lawlou ding hi. School kaite bang leng, kaam nei a Sum muhna di ngaihtuah ziak mah a School kai ina hi uhi. Neektaak zong ten le Sum mah kipoimoh veve a, himahleh analh mahmah khat bel, sum muhna dia kaam zonna ah Sum ana poimoh diak se hi(Manipur ah). Sum ziak in khelhna atam a, kipahna, hauhsakna, minthanna, zahtaak-huaina leh thuneihna tanpha SUM ziak in ana omthei maimah hi. Ei Christian kichi te’n SUM sang a PATHIAN ideih zawk ua, ‘ MONEY can do Everything’ kichi pen, ‘ God can do Everything ‘ I chihtheih giugeu uh deihhuai mahmah ta hi. Huchi hileh, Corruption kichi le adan hong om deuh di’n kana ngaihtuah kha naak hi.
Mi atam zaw te’n, niteng a kilawh a neektawm a zonlai uh, khenkhat te’n a Building bawl uh sunzom ziahziah ua, khenkhat in lah ‘ gari thak bang a om a ‘ chi uh hileh kilawm in a mitte uh a vaksak dundun uhi. Khawpi tuamtuam a gari omte, eilak a omkim phial a, Foreign Car tanpha in I lampi uh se taktak te tung hong tawn khata hi. Mi lompai noinoi te ihih mahbang un, khalam a halhthakna ngah chiang a halhthak noinoi in, I puk vanglak chiang ua pukkhawm nainai te ihi uhi.
School hoih hi a kigen peuh bohkhawm nainai, sepna hoih ahi achih peuh uh bohkhawm nainai te ihi nawn uhi. I innvengte’n gari aneih ualeh, enle sum leitawi zen a neihsawm teitei mawk..!! District Transport Office/CCPur a gari kibehlapdan et in, khakhat sung in Gari 100 val bang kibehlap zou hi. Tedim Road dung a Cycle a tai di bang zumhuai bangsim maimah ve aw.!. School naupang khenkhat, “ gari lou a School kai nuamkei “ chipawl bang ki omzeih dan ahi.
Nikhat a mi taangpi in a sum zatkhiat dan en mawk le hang, tam bei mahmah ding in uphuai hi. Thuntheih nateng a ithun uh ; Top-up(Mobile a di), thautui(gari a di), Paras, Kuva, Khaini, Raja, Tuibuk,, Singpi, Zu(Sung a di) leh a dangdang te a I sum senkhiat te uh hisap ngam huailou phial hi. I Muhna sang ua I zatkhiatna uh atam zawk chiang in, khutdoh a vaakna di nai mahmah ta ahi chihna himai ahi. Huaiziak in, Sum neilou pi in ‘Che Saang’ law pahpah kei ni in, adiak a summuhna neilou sinlai naupang te nuamtaalsak lawkei ni. I Innkuan, Minam leh Gamsung negamtu hongsuak khading uh ahi. Pilvang ni…!!
Thil khat peuhpeuh a, athuaktu zaw MIZAWNG-te mah ana hitou ngitngeet hi. Ziinliing ziak a sihnatuak, tuichiim ziak a sihna tuak, khovot leh lum ziak a sihna tuakte bang leng MIZAWNG-te mah ana hi ua, DAN bawhsiat chiang a Mawhpaih na sangpen a Mawhpaih a omte leng Mihau te ana hihetlou uhi. Suangmeihol khuuk chim a site le neektawm zong, MIZAWNG-te mah hazel ua, Bandh leh Blockade chiang a athuak pipen te leng Mizawng-te mah hi lailai uhi. Sepna zongna a, sepna mute’ Mihaute mah ana hi ua, BPL Card leh Jobcard neite leng atamzaw mihausa te mah himaimah uhi.
Huaiziakin, a kisaipih mite aw, tuni’n Pathian in nakiang uah,I Johan 3:18 tungtawn in thu hongen hi. Ngai dih, nakiang ah, “ Naute aw, thu kiain it kei ni, lei kiain leng it sam kei ni, thilhih leh chihtak takin hi jaw hen” honchih nung a, nang Pathian THUTAK kitheihmoh bawl lailai di MAW..????