Pianna Vangkhua ‘MUALNUAM‘ Vehkik Na ~ By: K.Thansang @Sang Quptong
Khopi sung a om a, inn nuam leh hoih sung a, alim-lim leh a al-al neek a, omdan-kholhdan te chimtaak kahi zenzen kei. Himahleh, kilbang ka khanna leh ka Pianna Vangkhua banah, ka Tuun leh Zua mubang ka ngaihman hizaw hi. Kum bangzah hiam paisa in, Siamna leh Pilna zonna lam a, nopzaw di gelna in khopi sung ah kana nungta a, ka nu leh pa bel Zoudawn (Guite Road in a totkhak; MUALNUAM KHOPI) ah Siamna leh Pilna zong (search) hilou in, neek leh taak zon ziak in – Mualmeet High School (MHS), Private Institution a, thousi-thouvai lak ah Leilak khuat in om lai uhi.
Pianna Vangkhua lam manoh di’n, Tarik Ni Sawm leh Nih, Kha Sawm leh Nih, Sang Nih leh Sawm leh Nih ( 12-12-12 ) Ni’n, PKT Street, Central Lamka a om, GUITE ROAD TRANSPORT CO-OPERATIVE SOCIETY Ltd. Office lam khe in ka manoh vengveng a, Christmas Season ahih ziak in Ticket tangkhak na di vual ana hi kei, a kalnawn (next week) a pai di-te le Ticket full sa hizawmah lai hi. A tamzaw School naupang, Khawlam chiat a Christmas, nu leh pa toh zangkhawm dia paidek ahi uhi. Manipur Timing hoihtak a zui dik chetchet (paikhiat hun di a paikhelou) in, gari sung leh pua a mi dim metmot kawm in Tedim Road ah kong ki sawitou pah mai ua, Hebron Veng a, United Motors kiang ah thautui sawtsimtak thuntou in, Singngat lam zuan in kong tai vengveng ta uhi.
I theihsa uh mahbang in, Lamka leh Singngat kekal lampi adan ana om deuh (ahoih hituan lou) a, Singngat apan a minthang, “ G “ bangmai a lampi kawi ngiungeu ; Guite Road chu ut leh utlouh gen omlou in kon tawn ua, sakol tung tuang mah kibang leuhleuh zozen hi. Uanggen deuh le, Sakol tungtuan anuam zawtham ding, aziak ahih leh leivui khulou di hiven…!!. Tua bel, mailam ah gari tai om nak leh pau leh nuih ngam dile hilou, nui zek le haa (teeth) teng ngiat (niin) gai ngal di ahih man in. Leivui khuut dan chu, maimai lou ahi, gari light zatngai hial khop a taina di kimulou zen a khu ahi a, huai phet le hilou in, guam lak tawn a tai mah kibang hial ahi. Gei a tuangte khat in, laizial a teep dek leh ka kamsung bang ah hon guangsak kha thepthup ve o ( a teep dek toh kiton a,gari in lamkuakna gawikha hiven).
Gari sung a tuang kha te’n lah, “ mitphiat na di le awnglou ‘‘ chihial uh, a zuau uh zaw hingal ken te, a khawdak khiatna di teng uh van tuamtuam in hubing hial hiven. A tung a koulawi le ka maimai tuankei uh, a nunglam a te bang puang thiuthiau diak ua, sam puang (brown) lou ki omlou hi( leivui khu teng in hon buak hiven). A khen te lah gari a awn chiang a kikou nainai in, khenkhat taget lah mahni khe (leg) mah zong a buai, midang khe peuh bang amau khe sa in buai vengvung uhi. Ken bel mual leh tang, keugaw sengsung te, liamtheih-baaitheih na kal (lampi sak leh tung a sing hiang leh khaugui hon kuikeh thei di tamlua hiven) a en in, nidang a Zogam hing dipdip a omlai a laa kiphuak te khawng ka baan ngaihtuah doudou hi.
Lampi hoihkei mahleh, khawllou a malam suanzel kahih man un, Suangdoh khopi chu katung khongkhong ta uhi. Ka lunggulh gige SUANGDOH SEKKHUM leh LUNGCHIN APPLE chu tamlou ana kizuak ningneng ngei a, huaite lei in kon ne bang zaw, mi khenkhat gendan a, ‘ taw kihum nuam phial ‘ ahi. Suangdoh apan awl a kisawisuk in, Pumlawng ka manoh ua, mual leh tang te khawng en a, ka khaw dakdak sung in, Pumlawng Khawpi ka lutta uhi. Huaimun ah ka khawl zual sung un, Silhpuan piandang duang a baat a, Foreign khutsuak kawlchiang aang pom, I Zogam tangval-te uh, bangzah hiam hongpai ua, Khamtheih pawkha zenzen om di lauhman in, gari sung hong check uhi. Local made ( Made in Zogam by Talpak) te’ hunkhop tak a mu ua, a paw tu’ kiang a,” kua a dia napuak hiam ?” chi a adot ua leh ‘ Sir ‘ chih banah MIN khat gen in,’ hon thukhah ahi ‘ chi a adawng leh leng buaksak in om veve hi. Ka ngaihtuahna in, “ khamtheih doudal in pang leng, ka seppih ka lawm-te adi, kabuaksak ngam dia aw? ”kachi vungvung hi. I Zogam tangval-te uh heutupa ka ngaisang mahmah mai a, huchibang heutu I neihkhak uh hamphathuai kasa hi.
Pumlawng a ann neek na di HOTEL om mahleh nelou in, maban ka sawn nawn uhi. Lungthul gam ah lampi kuakna thuukdeuh khat gari pei (liim) saklam (khou bang lam) pang pen in a gawikha a, atung a tuangte a tamzaw, ka pulhkhe zungzung uh aka, vangphathuai tak in, si leh liam ka omkei zenzen ua hiven…!!. Mualmeet High School, khaw teng a om ahih man in, a Lesson te uh a la thazoh khopmai uh, Syllabus teng’ Cover’ banghial in, MUAL teng MEET giau vilvel uhi. Electric Post ( din lah-lah a ding awn ngiilngeel ) leh agui ( luai gihgiah ) khawng chu, Guite Road ah bangtan hiam melmuh diin omta a, a Current pen in Imphal khopi hong kheng nailou ahih mel kuan athei a (?).Imphal hong kheng banah, table bangzah hiam le hong kheng nazen pi a kuate hiam innsung a lut a, vaak phingpheng le hithei hi. Mawlluat ziak a, theihlouh ziak ahi zaw diam a………..?
Maban awl a sawn zel in, nitaklam honghih hial tak in chu, Tuima Khawpi katung hamham ta uhi. Tuima a, “ ZOGAM HOTEL “ kichih na a ann ne di’n ka lut hi. Lamka le Singtang khua himahleh ( Zoudawn lam a teeng-te ‘ ST’ lam te chi in nuihchiam lel khum le-le, MGNR(Rural)EGS om hiven singtang himai lou di ), Lamka a teeng te’n ‘ Singtang aak ‘ a chihte uh, ( ken ‘ Zoudawn aak ‘ ka chi chiitchiat a hiven ) taw humlou phet in kane a, gilmul bang kivang (ki kaak ) phingpheng hial uhi. Tuima khua anuam mahmah mai a, TUI in MA lou ahi dia, a khawsung uh tawn a TUIMA Lui luang ahih man in, tui nuam mahmah hi. Tui a nawpna na-na chu khawnuam kichi mai dan ahi. Dakkal 1 ( khat ) hiam kakhawl zoh un, mailam suanzom zel in, bangtanhiam katai nung un, Thuangtam khua katung uhi.
Khawl lou a taisuak in, Thuangtam leh Mualnuam ki gamgi lak khawng katun chiang un bel, ka aak sa neek te kitat det gawp ua, gil bang kialnuam phial hi. Mualnuam khawkhung a, MUALMAI KAWL khawng I galmuh bang zaw, hunpaisa a kholhpih lawmleh vual te toh sabang tatkhawm lai hunte kingaihtuah vungvung sam hi. Lung hon su leeng mahmah mai a, alehlam tak ah khasiathuai abang hial hi. Sen lehkik theih hi leh zaw, sen lehkik nuam lua hi ve’ng, sen lehkik chih lah atak adia, ‘ Mission Impossible ‘ himaimah zel a…..!!
Ka Pianna Vangkhua lut di’n kong kisa ua, theibang senlai a sabang tatna te I mu bang zaw, lawm leh vual toh tanbang kim lai ngaihtuahlouh theih ahi kei hi. Kaihlam tang khawng ka et kawmkawm in, kawlnuai ah katai ua, gari agin hongtuam ka chih leh Mualnuam Vangkhua lutna dia, totkhak teitei lampi tou a tai kana hi maimah uhi. Ka veilam pang a ka daak khiat leh SIGN BOARD liansim khat ah, “ WELCOME TO MUALNUAM “ ana ki chi a, anuai ah “ ZYA MUALNUAM UNIT “ chih kigelh behlap hi. Ka veilampang mah a ka daaktouh zek leh kaneu apan kana School kaina, Grace English Junior High School kamu pah a, ka chimul bang hong tou sungsung zozen hi. Huaikia leng ahi kei lai, ka taklampang a ka daaktouh vengvang nawn leh MUALNUAM KAWL VUUM kamu velvol a, lawm leh vual te toh Pathianni, Sunday School kai tawp chiang a ka hohsek lai uh, mitkha ah hong kilang dundun maimah hi.
Pianna Vangkhua, zaalmang a ka mangmat gige pen, a tak a mu chu kahi peuhmah a, kahi heuhau zozen hi. Kotpi Veng khengphei in, Vengpi a akum di omziak in minute 5 hiam kakhawl ua, gari tung a mi tampi tu puang thilthel te kekal vang a, ka malam tangtak a ka et leh EBC Biakinn kamu phei pah velval a, aki bawl tuung kum (1999 ) khawng a zaw, hichi tan tung dia le kana gintak louh hiven. Ka taiphei zek ua, Vengnuam a om,EBC Biakinn khang a, Government School ka etsuk leh, Government School ngeina dan toh kituak in ana om a, Oxygen ki tasam hileh kilawm hial hi. A khang sawn a I daak suak suk leh MUALNUAM PUBLIC GROUND kimu thei mialmial hi. Huai phet le hilou in, huai sang a sangzaw deuh a I daak suk leh Singpuk Vuum ( mual min ) tung zawn ah, Thanlon Khawpi kimu suk phengphung hi.
Vengnuam khetsuk na di ah, lamsuk ana om a, asak ah ZYA Hall lianpi khat om velvol hi. Ka mailam gamla deuh ka et leh PCI® Biakinn, atung zum dawk ziuhzeuh kagalmuh ngal hi. Lampi suk khen hunhun chu, Hausa Veng kipan hingal mai dan ahi. Kou Inn Hausa Veng a, lampi kiang a om ahih man in, ka inn kong uah kakum a, Innsung a kalut dek leh kongkhak ana kikalh zomah hi. Verandah a om in, ka nu leh pa loukuan hongtung di ka ngak a, khawmial zuul in ka nu leh pa gimmel deuh mai in, hongtung ua, neulai a dan bang hileh, TAWLNOU tam honpuak mahmah didan uh ahi. Kanu’n SEENG DIM a singkhuah a puak te nung a, a heipi leh meh di annteh tamlou a siat te kava lakhia a, ka pa’n bel a SAKHAUPI DIM in , vokann di kuah hi. Kichibai in innsung ah kalut ua, khawmial toh kituak chet hi.
Ka nu’n mei hon toh pah ngal a, kei ahihleh kaki silsiang ngal hi. Kanu’n mei atoh kal in ka pa’n, Vok
ann vapia a, ka nute gim leh tawl didan kangaihtuah chiang in, kamit apan tuisiangthou hong pawt khanaak hi. Kou a tate honkhual ziak ua, guhtui kangzen a, paihun-paiphat ale pailou a, mialnung ngen a inn tung hi ua chih ka khawng ngaihtuah a, keileh kei kaki sukhase pahpah sek hi. Amau gim bangbang a gim a, lei khuat dia honphal lou ua, neih val le hi hetlou a School leh College khawng honna kaisak’ nimnem uh kahi hi. Himahleh ken huaite a chaang in ka hamhaih kha pahpah sek a hiven…..!!
Nitak hong hi a, PHALBI lai ahih man in, meikiang ah kaki uumkual pilpel uhi. Thukkhuk a mei lah kuang pha mahmah mai, khopi a om a, meihol awi di neihlouh ziak a, PHALBI NUPI vang ngaih haksa kasak mahmah lai toh aki khe khopmai…!!. Mei awi kawm in ka pa’n, KHIN TUNG a MALTA san gimgem kihak te hon domkhia a, a san hoihhoih zuak di’n a tengkhia a, huai kal in kanu’n DUMKUNG ana khen a, a khet zohsa te ka CHIL sak hi. Om maimai chih a om ngeikei, nitak dak 11 hong ging dek in kanu’n ka lupna di puan hon phahsak a, ka lupsan hi. Amau luplam ka phawk ban nawn kei ( gari tuanna chi teng golhgai a, gimlua kahih man in ).
Zingkal dak 2:30 lak in, AAK MASA hongkhuang ngeelngeel a, inn chih a om AAK GIL te apan in, a khuangthei chiang te hong kidawngtuah vengvung uhi. Thoh bel ahun naikei deuh, himahleh TUIKANG ngaak khenkhat bel luikhuk a, khovotnuai ah omden uhi. Kanu le AAK MASA khuan in a thou a, mei toh in, thuk tung ah KETLI vomsim bimbem in tuilum dawndi suang a, tuitawi dia a pawtkhiat lamtak kathei hi. Ihmu thak chu kahi peuhmah dia, ka khanloh nawn in Kanu’n, MEI PANG ah Buhbel ana HEI ta hi. Kathoukhia a, meikiang lam kanaih pah hi ( votlua hiven ). Tuilum khawng dawn a ka omsung in, Inn baang vang-te kekal ah nizung hong lut singsengta hi. Kanu’n lah tui ngahta ahih man in ann nektheih ngal di’n kagingta a, himahleh Inn nuai a, haamkawm lawlaw a, a kuang uh phuging bokbok; VOKPI te ann piak ngai masa ahih man in, Vok ann kava pia hi.
Ka nu’n ann hon thuuk a, a thuuk kawm in NAHTANG NAH in ANN TUUN; loulam a suun chiang a neek di a tuun kawm hi. Dak 7:00 bang ana gingman ahih man in, ka pa’n “ Kuan hungawp, kivai nanung gawp di ahi, tuni a malta san teng lohkhiat a, loutaw lam a hol haalsa-te le luah hun di hi a…….” hon chi hi. Kei bel, tawldam kawm a Inn ngak a pang a,’ Annhuan leh Vok ann piak ‘ Portfolio hon pia ua, kanu leh pa’n lou hon kuansan uhi. Nasemthei liai siah loulam tung vek uh chihtheih a, khawsung ah naupang leh piteek leh puteek teng om uhi. Suun hong hi a, ka chim khopmai, himahleh School teng in Final Exam zouta uh ahihman un, khosung chu a hulum zou mahmah mai hi. Tumalam in bel naupang teng School kai ahihman un, AAK BUBAH a, aak pi op lai, ann zongdia hong lengkhia a, a haamging khawng a ngaihngaih maizen toh, tuun bel naupang kholak a kimawl-te aw kia kiza vengvung a, neulai bang hon phawksak dundun hi. Naupang khenkhat lah KANGTALAI a tai in, akhente SINGKHE in pai ua, pawlkhat taget lah SINGPEI LAAM leh MARBLE khawng kimawl uhi. Huchibang kawmkal ah akhente ngial, GAWPHEL toh vasa beng di leh SUAKLU lou kawm di’n TEMPAWNG tawikawm in gamlak lam zuan uhi. Khawlak a ANN KHING beu(tangh) tawi pheuphuau a naupang om muh di a omkei hi.
Ka PIANNA Mualnuam Vangkhua ahih leh LOusau Khopi ahi a, Inn 230 lak omna ahi hi. GUITE ROAD in a totkhak khua-te lak a piching leh Inn tamna pen leng ahi hi. Naupang le aki daih mahmah mai a, tulel in Lamka Khopi a om te’n, Club khat phutkhia in, FOOTBALL CLUB OF MUALNUAM ( FCM ) chih minvoh ua, hiai in khota maimai hilou ahihdan genchiang zou mahmah hi.Mualnuam khua tun na di’n; Lamka apan Tedim Road tawn in, Singngat tan kipai a, huai apan Guite Road tawn in kipai nawn hi. A tangpi in, Lamka apan Mualnuam tan 105+ Km hidia tuat ahi a, gamlalua hikei mahleh Lampi siatluat ziak in, Dakkal 8 bang aki tai hun om hi ( lamzang tak a I tai leh hilai…!! ). Simlei vai lam ah Mualnuam, Thanlon Sub-Division ah om kha a, Thanlon Asseembly Constituency in huamkha hi. ADC lam ah bel, TUIVAI BLOCK MDC in huamkha hi.
A gam melpuak dan ahih leh Mual leh taang te a kiimveel ah omsuak uh chih theih hi. Tumlam doh a om ahi a, Thanlon toh kigal doh chet ahi hi. Khawkhung lam, SUAH lam ah mual saupi kikham tou a, TUM lam ah SINGPUUK VUUM mual om hi. SIM lam ah ahih leh SONGTAl toh kekal ah mual kikham suk henhon mai a, MAL lam ah bel REL (Train ) bangmai in, MUALNUAM KAWL kikhamsuk henhon nawn hi. Mualnuam a kichih ma a, Ngawnbung ana kichi ahi hi. Tui neek ahih leh SIALLOH lui apan a kila ahi a, hiai SIALLOH lui ahih leh Songtal toh gamgi din leng kizang ngal hi.
Mualnuam khawsung ahih leh veng tuamtuam chi 4 in kikhen hi. Huaite ahihleh; Mal lam pang ah Kotpi Veng om a, Simlam mahoh in Vengpi, Vengnuam leh Hausa Veng chi’n kizomphei diudeu uhi. Biakinn 3 om a School le 3 mah om hi. Thukalzeh dan in, Mipi-te kivakna pipen ahih leh KUMTENG A LOUNEIHNA MUN SUAN VIALVIAL( Shifting Cultivation ) ahi. Numei sang in pasal tamzaw gige hi.
Kha 1 sung ( 12-12-12 to 12-01-13 ) ka pianna khua ah hun kazang a, Siamsinna toh kisai a Khua taisanlouh theihlouh ahih man in, khelah pipi in ka taisan hun hong tung thouthou hi. School naupang dang te’n leng Khopi lam zuan siausiau in, gari mel le kitheilou hial khop in gari dim gige hi. Mihing chauh le ahi kei, Phalbi lai ahihman in, Hol ( Charcoal ) bag tam pipi toh aki tuang khawm a, leivui khuut toh, ahol khuut toh puangsim leh vomsim kithuah beibuai hi. Leivui khulou hi henlan, vuah bang zu leh chih huai mahmah hi. Alehlam tak ah, vuah hong zu hial leh le, Sial tal hatdeuh kai bangmai a Gari kaihkaih ngaizel dia, buaihuai zaw di bangzel hi. Gari buannoina khawng a atang a, nikhat a 105 km lel tungsuak zohlouh a hong om hial chiang in zaw…..!!
Manipur in hinna lampi ( life line ) aneikei chile hang, adik maithei, adikkei maithei..? Kum paisa te’ in UNC leh ANSAM in kha 2 val bang National Highway-te ah Economic Blockade hon bawl ua, vanman BALLON bangmai a muhtheih in hong khang hulhul hi. Tua nung in, Sadar Hills District Demand Committee ( SHDCC ) te’n kha 3 val bang Blockade honbawl nawn ua, ATSUM in leng hun sawtkuam tak hon bawl kha uhi. Huailou in, NSCN (IM) General Secy. Th Muivah in a Pianna khua pha ding a hong kisaklai in leng Naga Civil Society tuamtuam te’n, Manipur Government gamtatdan mohpaihna in, National Highway te hunsawt kuamtak Economic Blocade hon bawlkhum uhi. Adiktak a gen in zaw, Economic Blocade bawl masa tu’ Government mah ahi khathei hi. I tan di ua kilawm te Bolckade bawl in, Phaizang bial ah Singhon siat in sevum meumou ua, Central apan hongpai khenkhat tung ah le Economic Blockade hon bawl khum uh ahi chile kikhial sau lalou ding hi.
Manipur Government a pil mahmah hunta hi..!!. Jeribam leh Dimapur lampi-te’ a bangtan kingak sawm lailai adiam a.? Guite Road tawn a, Aizawl to Silchar ( Assam ) lam apan van laklut theih dia bawl ahihkei ngeingei leh tunung in hong buaihuai mahmah khathei hi ( Naga leh Meitei kal theihsa ahih man in ). Blockade banghiam omzek chiang in, Thauti leh Kuva nah pua, Guite Road tawn in omzou den hi. Lampi hichituk a asiat a bawn gari kuan leh pai kizahzen ( Khuai vaitung bang ) ahih leh lampi hoih hileh bangzahta in a luun phet dia chih vungvung in om hi. Tata Sumo ngial nikhat in 4 leh 6 kikal lut gige zou hi. Jeribam leh Dimapur line a Tax piak di atam banah, Blockade bawlthei pawlpi pumdim hi. Huaiziak in, Manipur Government a khanloh a, Guite Road a puahkin kei ngeingei leh maban ah thil huaise tak a maituah khak ding lauhuai mahmah hi.
British-te hun apat chi zozen phial le, adik mah le ahi a, I gamsung ua kikawmtuahna lampi-te hon bawlsak ua, tutan in munhtheih di omlai hi. Himahleh, a gam mite’n I zuun zom louh ziak un, zattheih di tawm mahmah ta hi. A himhim thu in, national Highway 150 kichi, Kohima apan hongpai in, Manipur to Nagaland Boarder ( Jessami ) hon tawn a, huai apan Ukhrul lut in, IMPHAL – LAMKA – SINGNGAT – GUITE ROAD – AIZAWL tan ah paisuak in, Central Government in, National Highway 150 (B) chi’n chiamteh a, gelhlutta hi. A chih leh bangziak a tuni dong puah hilou lailai hiam ? Mahni lutung a mei-aam kikoih a, sa sakluat tak a mahni leh mahni mah in MEI-AAM, tuisa a buahmit sawm toh kibang ding hi. Huai teng, tuah leh zaak ma in, gam leh nam it makai te’n pan hon la ve ua..?????
2610~KAKIPAK~2013