ZIINMANG ANG SUNG AH…!! By~ K.Thansang @Sang Quptong

Khovel siatna chiteng mu di leh paltou din,leitung ah miimbang kana piang hi. A hau tawp in le haksatna tuak a, mipilpen in le haksatna tuak thou ahi chih thudik ahi. Kei leng, innkuan nuam huntawk, neih leh lam a mi englou innsung ah kana piang a, ka duhduh ne in ka dawn a,niang leh tai tak in ka na khawsa tou hi. Zawn na kichi khawng kou innsung ah theihphak ahi kei hi. Nasem-tu bang kahau zozen ua, naa haksa himhim kana semkha ngeikei a, kei sepkhak ngei di’n le kakoih kei bok hi.

Hun leh kum-te hong pailiam zel in keileng khovel pilna siamna zonna lam ah Class-VII khawng kasim tak in lawm ahunkhop tak kanei ta hi. Nidang a ka Nu leh Pa’n, School kai kuan leh pai a hon kha a,pi zel hi ua, tu’n  sum leh pai zong in kei hon ngaihsak man nawn kei uhi. Kou unau kahih ualeh keikia pasal kahi a, kei tung ah numei khat Class-X simlel om hi.

Khovel pumpi kipei in khawl sawm tuanlou a , ni hong suakzel a tumzel ahih man in; sadan in kong piching ta hi. Kha lam ah bel a mangthang kahi mai..!!. Sap-te thupil in “ A small family is a happy family” ana chih bang un, ka innkuan sung uh chu anuam khopmai. Ka nu lah saptuam lam et in Dorca makai ahi a, Khotang vai lam a et in Mother’s Association makai ahi a, Simlei vai ah leng ana tuitum mahmah in, ki awi deuh leh MLA ana ki candidate ta ding hi.

Ka pa leng mi maimai ahi kei, mi-te thudot pen leng ahi a, simlei vai ah leng ana thuuk lut mahmah pawl ahi a, Election hun chiang ngial in inn ah a taw in a  tukip mankei, a hun tamzaw mundang ah  (ZOUDAWN LAM AH)  zinkhia a, hun kazang khawm ngeikei uhi. Kou bel sum tampi hon nawtsiat ahihman in, nuamtak in ka om veve uhi. Saptuam lam et in Department teng ah panna neisuak hi. Khotang vai a I etnawn chiang in, kanu mahbang in panmun ahau khopmai, President leh Secretary chihte ama a di mawng a kibawl mah abang hial hi.

Ka nu leh Pa mite’n amuan bang un, kou unau in leng kamuang mahmah mai uhi. Nitak atam zaw Meeting leh thil tuamtuam a buaina aneih ziak un hon pawtsan zel uhi. Kou ka unu toh inn ah ka wm ua, naupang chih mahtak laisim sang in Message sim lam kana hahbawl zaw sek ua, kanu leh pa hongpai hun di un bel laisim bangbang in kana ki limbawl sam uhi. Laisim lou a Message leh facebook khawng ka lawmbawl luat ziak un, exam result suah chiang in  kou min a tazou ngeikei. Progress Report Card te lah chu sansuk phingpheng zel hi. School leh College hoih penpen a kai himah le ung kou chitlouh ziak in  bangmah a phatuam tuankei. Ka Pa’n bel Tuition fee kumkhat sung a di a pe siang pahpah a,ka result uh hon dong ngeikei a, aguk in kaki pak thei mahmah uhi.
Ka innsung uh Bill Gates te innsung toh aki lamdang tuan dia hia ka chinuam phial hi. Ka inn u lah sawng 4 tak a sang ahi a, bang sum a kibawl a hichi sang tel hiam chihbel kangaihtuah ngeikei. Gam leh Nam puahphat leh zuun na di te ka pa’n kou inn puahphat leh zuun nadia zang leng ahi maithei hi. Ka common Room ua tutna, TV leh thil tuamtuam omte lah chu, Mumbai khawpi a omte toh kibang vek sim hi. Inn baang ah lah “MEMENTO’’ leh pahtawina card tuamtuam kitaak dim metmot maimah hi. Inn kong ah lah gari Buuk liantak om a,huai ah; gari pei 2 nei apan pei 6 nei tan om dendon maimah hi.
 
Ka pa innmun a aom sunsun chiang in, Nitak hon pawtsan den a, sun hun te lah hotel ahihkei leh Minister  te inn khawng ah hon omsan zel hi. Kanu lah khotang hoih di deihziak In, makai ahihna toh niteng in, khamtheih doudal chih pANSan in chiangpum toh kholak ah hon omsan zel hi. Kou bel ka uu toh nuam kasalou tuankei uhi.Aziak ahih leh, ka ut dandan ua omthei kahih ziak un. Ka nu leh pa pawtkal chiang in ka uu hong hel, tangval taw thep dikdek leh khekol kawng a chain kaisak nelhnalh banah, underwear mantamlua teng le hilou dawksak teitei sawm a hunkhop hong omzel uhi.

Ka nu leh pa khotang hoihna di deihziak in kholak ah ahunte uh subei ua, akhenchiang in zu khawng man in,buaksak sek uhi. Ka unu hong helte’n zu khawng hongtawi ua, hon dawnpih sek uhi. Amau bel sawt a omngam kei uh, aziak ahih leh ka nu leh pa zahtak ahih man un, hongpAI di hun chiang un kihem khe gaihgaih sek uhi. Ka nu-te zu buak te kei sung ana tungzel toh kibang hial hi. Ka pa te’n lah Guta khawng deih theih in soisa ekek sek ua, huai ziak in ka pa ka zahtak kei a, lauh in kalauh thoh hi.

College khawng kahong kai ta a, sum kahauh ziak in lawm leng kahau thei khopmai. Ka lawmte mihoih himhim a omkei uhi. Khamtheih tuamtuam,a tang hiin a tui hitaleh a hihna uh sawt mahmah ngen ahi ua, a hih ua leh Normal a om’ a hihkei ualeh mibanglou zou hial in om uhi. Kei bel akipan tuung kahihman in khamtheih laakna di kathei kei. Kei  a ATM uh kahi mai hi. Class ROOm  sung ah teacher te thugen ngai hi awmtak in ka tu ua,himah leh kou bel a fuh( a kick pai) kana hi sek uhi. Khamtheih hih di mawngmawng a college kai mah kabang hial uhi. College kai bang ka thanuam mahmah mai ua, himah leh ka teacher te uh thugen sang in ROSE(RP) ,achih te khwng uh ka sung uah a lut tam zawsek hi.Suun chia College ah a TANG(tablet), nitak chiah ka unu lawmte apan a TUI chih te ka paidan tangpi hong hita hi.

Nikhat lel leng ka ngawlzou mahmah kei, ka hihlouh zek chiang in om leng ka omthei kei hi. Tapa tang neihsun kahih lam zaw kithei mah veng aw, himahleh hiai ZIINMANG ANG SUNG AH  kana koltang den a hiven….!!. Ka nu leh pan kei leh ka unu kikal a piang di 2(nih) ABORTION  tungtawn in ana suse(su kia) sese ua, tun lah ta neithei nawnlou din kanu ana kibawl zouta a..!!. huchilou hileh zaw Unau bangzah hiam phasam di hi ung ua, mihoih di le om khathei hi a chih khawng kangaihtuah vungvung sek hi. Tua ka koltanna apan ka suahtaak kei leh zaw, ka inn uh leng ka taan loh khong ding un ka gingta hi.

Ka taksa lah kiam deuhdeuh mai, ka khamtheih hih lah tam( dose sang) deuhdeuh mai,ka inn sung van uh lah zuaktheih liai teng kazuak ziak a kiam deuhdeuh, ka maban uh chu ZERO himai dan ahi. Ka nu leh pa’n le a loh ngaihna hon thei nawnkei uh. Nitaak teng a zukham a kitom chih khawng kei paidan hong hi maimah ta hi. Hun paisa te sapkik theih hileh samkik nuam hina tel ing e..!!. Ka khamtheih hih lah tawpthei mawklou kahih man in, ka sungte toh kaki sukheh nikhua un kei a di’n New Bazar khawng vanaih louh ngal a didang om tuianlou hi. New Bazar a zuak theih tuamtuam zuakna mun khawng chu kei a din ka inn bang mai ahi ta hi. Hausa kiteel di chile uh le ki Candidate leng ching diin kaki koih hial hi. Sum hauhau Chin nagam ahih man in.

Ka omdan leh khosakdan in a zil nawnkei a, Inn a paipai di bang leng ka ut nawnkei hi. Ka nu leh pa’n lah “ SUM DEIHTAAK ZAW GILOU CHITENG BUL AHI “ chih thei hoih ta mahmah di un ka gingta hi. Ka unu’n lah Pasal taw sa neilou khat a zuita a, ka inn uh lianpi, hawm heuhou sung ah ka nu leh pa dip hawm heuhou sa in om liikliak ta uhi. Kei lah ka giahzel sek namun ka ngai deuhdeuh a, sun chiang in lampi nawl a siik neng peuh,khekol langkhat lam kia liptou letlat kawm a, sai-ip sia a luak khawm in ka hahpan mahmah mai hi. Nitaak hong hi a lah, kuate vok ann beel aman atam dia chih khawng ngaihtuah in ka ihmu thei tuankei hi. Ka omna mun a ana omsa,Numei ten lah Free Gift in HIV natna hik honna pawsak keihkuih tamai uhi.

Keimah suangkulh ki bawl ah ka taang a, ka taikhiat sawm hang in, suangkulh veng pa' ZIINMANG in a ANG SUNG AH honna kailut tuntun sek hi. A haksa tel mai, sun leh zaan in ka suahtaak theih na di ka ngaihtuah nilouh ta hi. KHOVEL ah hon it tu khat leng om nawnlou di’n kaki koih hi. Mangbang tak a ka khamtheih hih kham a, aak puul dek bangmai a ka hah diaudiau laitak in, New Bazar BUS PARKING Mun ah thawmging lamdang tak khat ka za a kava naihphei dengdeng hi.

Bangthu om ata mai a le? Bus Parking mun ah mi ana tamsim mahmah mai ua, a laizang lak ah Nungak hoih pipi,puanngou silh in a ding uhi. Kamit te hakzoulou sasa in kahak a, tua nungak melhoih taktak te ettheih dandan in ka en teitei hi. Music kilawmtak mai a play ua, kaneu apan Music ka zaak te lak a zaak noppen hiin kathei zozen hi. Nidang in bel Music ap-huai pipi ngai in,kana dur mahmah sek hi. Himahleh tua nitak a music kazak in ka lungtang tawng a zelsuak pah hi. Nungak leh tangval melhoih taktak ten Lapawl honsa ua, ken bel a lathu ka ngaihtuah kei, nungak te melhoihna kana en nilouh kha hi. Huchia mite melhoihna kia en kaki sak lai in, a lasak uh a thu hoihna le kon theikhia a, khovel a hon ittu omlou hi a katheih lai in JESU in hon iit ahi chih ka muchian ta a, kaki paak mahmah hi.

Lasak te hong khawl ua, Puanngou ngen a kizem pasal khat hong dingkhia in, Bible tang ( Matthai 9:36-37 ) hon sim hi.Tua zoh in a Bible tang sim pansan in thu tamlou hon gen a,  THU I chih LA ahih mahbang in, thu kigen te leh la kisakhe ten ka lungsim ah mun lian a uap mahmah mai uhi. Suahtakna ni bangchik chiah ka tung ah h0ngtung dia aw ka chih lai in,tu niin Pathian mizat tuailai te tungtawn in kakiang hongtung ta hi.

Huai nitak a Thugen tu’n a thugen tamlou, katheih dandan in kon gen lai ding; A masapen in, a Bible tang pansan enzual le , “ Huchi in, mipite amuh in ching ding neilou belamte bang a gimthuak leh dalha, a om ziak un a hehpihta mahmah a, huchi’n a nungzuite kiang ah buh lak ding lah tam mahmah a, himahleh a sem mite a tawm uh ( Matthai 9: 36-37 ) “ chih hon sim masa hi. A gennuam tak bel GIMTHUAK LEH DALHZAK-TE LAK A NASEP POIMOHNA ahi pen hi.

New Bazar BUS PARKING a, Pathian thilhih theihna  tungtawn a ka hinkhua honkhek tu ( Pastor H. Jamkhanpau hi’n kathei, Pastor dang tampi om mahle uh) in a tung a Bible tang saulou pansan a thu agen na ah; “ Tuhun in hun kikhek, huntawp a om, siatna uang semsem hun ah I omta chih I thei ua, Saptuam leh Khristian te om didan a lamdang taktak a om hun ah I ding tamai uhi. Huaiziak in SaptuAM sung a nasepna leh sepdan tuamtuam neih ngaita hilou hia chih in omta hi.  Saptuam a piangthak peuhmah leng  I nasepna leh Bazar kaina leh vakna peuh ah tanchinhoih theihpihna piak ngaita hi. Tuabang in tualsung program tuamtuam a kikhop nate banah, pawlam( Biakinn sung kia hilou in ) missionary nasem di Pawlpi’n I sehkhiat uh poimoh hilou hiam? I Lamka khopi sung uah saptuam a tam mahmah a,himahleh hong kikhom ngam loute lak a kuan tang thupha gen ta di? I tangteel bang un, Ching ding neilou belamte bang a gimthuak leh dalhzak ki pumdim gawpta hi. Tuate samtu ding I nget kul hi, huchilou in zaw melma gal lian pente hong suak touzel ding uhi ” chi hi.

Aban a gen zomzel na ah, “ Saptuam kepna ah Biakinn kai hilou in, saptuam sung et kiimvel a, a dalhzak te leh gimthuak te et kiimveel ding ahi. Jesu’n Belam mang leh makhai mang a gentehna te khawng hoihtak a ngaihtuah vengveng din deihhuai mahmah hi. Tua bang khop lungput lainatna a dalhzak te tung a neih kul mahmah hi. I tenna puan inn te kaipalh in I awlmoh leh vei te lak ah telsak tum chiat ni. Huchi bang hileh nungzuite bang a Khovel khek lumlettute chia theih a om ding I hi ( Naseptr 17:6 )” chi in a thugen hon sunzom lai hi.

“ Buh lak ding a tam mahmah a, himahleh a sem mite a tawm uh ( Matthai 9: 37 ). I seplouh ziak un tampi mawk man gawpta uhi.Hoihtak a I ngaihtuaH chiang un, I khelhna te ziak ua I thuaknate uh( Natna) leh a tuamtuam te, Pathian in vanzat a nei in, Tuate pansan in mi tampi te khelhna kisik a, Pathian lam zong in, hong piangthak uhi ( kei leng huchi bang mite lak a khat kahi ). Mi khenkhat te’n HIV/AIDS vei kei leng ka piangthak kei ding chi hial uhi. Khenkhat taget lah sihsual a hong om nate uh pansan in hong piangthak mawk uhi. Huaiziakin Pathian in zaw, mihing te kisiik dia ngak taktak in hehpihna kong honsak a, thiltuahte pansan a vehveh lai PATHIAN ahi ( Eklij 3:10 & 11 ). Huaiziak in ahi, mi buaihuai leh chimtaak huai mahmah te nangawn Toupa’n a hinna uh a hawi lailai ” hon chi a, kei ngei leng ka omdan hoihlou leh ka natna vei te Pathian in hon sapna ahi chih kathei ta hi. Ka lungsim in, “ Semtu di omlouh ziak a Toupa vehna sanglou, kei bangbang midang bangzah om dia aw…?” chih khawng ka ngaihtuah vungvung hi. I Inn mun mahmah uah, kua sem ding I om ua ?

Missionary tamtak gamdang ah I sawlkhe zungzung ua, lohchinna thupi tak bang in I ngai kha sek uh abang hi. Inn gua hahlou a gamgua hah kisuak hileh kilawm hi. Kha mangthang mat di, I gam ah kei bangbang tam lawlai ahi. I gam zuun phot in, I innsung u leh I saptuam sung uh zuun phot peuhmah lehang, tuasang a tamzaw, gamdang a sawlkhit di hong piang law mahmah din Ka gingta hi.

Ahitak in zaw, bangteng gen a sa in, kicheina lam enkai in leh chiangpum toh sualgal dousawm mah le I ki bulphuhna uh INNKUAN SUNG I etkol hoih kei ua leh a gah a lungvei thouthou ding hi. Nahke awn in nahke maam hiai hun ah hong sung khollou di ahi. Innkuan sung neuchik enkol zoulou in bang chiin khotang I enkol zou di ua? Kei hinkhua apan in, Innkuan poimohna a thupi dan kathei chian semsem hi. A bul I patdik naak leh zaw a kimkhat zohsa ana hi taktak ahi. Singkung thulimlou chik a nasuan, a kiim leh kiang a loupa a deepthei dite na hah kei leh zaw, singkung hoih leh gahhoih suang ding in lamen dah mai in aw.? Nu leh Pa te’n khuak sa zen a I ta leh nau te uh kepna ah bang chileh Lampi dik ka tawnsak thei dia chih tal sawn zen a ngaihtuah hun lawta hilou hiam ???

WRITER’S NOTE:
“CHRIST A UNAU TE AW, INNKUAN AH KIKTTHAK IN, INNKUAN SUNG AH KIBULPHUH THAK IN THATHAK LA NI, HUCHILOU IN ZAW I GAM LEH CHRISTIAN HIHNA UH MANGTHANG VEK DING A, I KHANG UH LE HONG KI BANSAM MAIMAH THEI AHI. HUAIZIAK IN KHAMTHEIH HIH TEN TAWPSAN IN, AHIHLOU TEN LE AHIH LAI TE’ TAWPSAN DIDAN NGAIHTUAH PIH IN, I GAM MAH PUAH IN GAMDANG VA PUAH NAIKEI PHOT NI. I GAM UH HONG HOIH NAKLEH TUASANG IN GAMDANG AH MI TAM KIKUAN KHE THEI (sawl khethei ) ZAW DING HI ”
1710- KAKIPAK -2013