PAI MASA I SUNGKUANTE TOH VANGAM AH  I KIMELTHEIH TUAHLAI DI UAM?

“Pi leh pu suihlung amawlziak, Phamna leh lungkham dahnate; Namchih tung ah aleng ua, Ka tung ah khuaibang atu, Lungkham huibang in ka mau!” chi’a la bang a sasa napi in leh, sihna kichi leh atuakte i muh mun leh i zakna khua asawt tak tak toh, i tuah chiangin neel gawpin thuaksiam leng kilawm napi in ahuchi het kei hi. Atuak tam ten le athuak siamgawpta uh chih sang mahin, vangtah tuam kisakna omzaw bang hi.  Hichi bang vangtahna vanpi in hon chipkhum a, lungkham mangbatna meilompi in hontuam hunte in, i lungsim van a khai mah bangin, hamhaih tak in ki om hi. Melma hatpen ahihziak mah ahi di e, zahtatna leh vuallel kisakna toh kidim a i om hangin, i zum/i zah sellvuallouh, i loh theih lah bangmah omlo. Kahtamte lou in, Aw a awging leh lungdam mel, Kei hon lungdam sak pen; Kapkap in samzong samzou keng, Sihna in paipihta” chih maimah louh gen ding omlou hi. Hiai bang kikhenna hun haksa i tuah chiangin, i u-le-nau te’n Pathian thu leh la te a hong khamuan in, “Banghang i khasiat ding hiam? A pa kiang tung dinga, Sihna van khawpi kongkhak hi, Pa’ mel a muh nang hi” chihte leh, Jesu Krist hotdamna muang leh gingtate, van gam a ki mukik nawn ding ihih dan khawng uh hon gen zel uhi.  

 

Bangteng hong kigen in zata mahle hangle hunte hong kivei a, kikhenni champha te hong tun chiangin, lungzuan khongaihna ihmu dia kisa laite hongthou nawn in, mahni ut thu a kham leh dan vuallouh, ha pi na bang mai in, khattang lungzuan sialna tuihualpi in hontuam pah hi. La phuaktu khat in, “Atuaklou te din theihsiam ahak ding, Mihing misi ngai a kavul mai zaw. Adeihtelna uh dotding donlou in, Ka ittak ten maw hon mualliamsan mai; Aw lung a kim thei mahmah kei“ a chih bangin, atuak khalouten a hai mahle honsa khamohlou ding uhi. Achangin lungsim suangtuahna ah thiltuamtuam te hong lut in, “Van-gam a kituak nawn ding i hihleh bang chi bang dinmun in i kituak di ua aw?”, Kituah nawn hunin  paimasa, i sungkuan lainate toh i kimeltheih tuah lai na ding uam? La phuaktu khenkhat te’n honngailou in van khawpi/pialgal tualnuam ah nunnuam ngabang leng uh achih bang ua, hon ngainawnlou a om taktak mah adi uam? Ahihkeileh, laphuaktu ten leigimhuai pen ngailou nawnlou uh achihna uh a hizaw hia? chih leh, thiltuamtuam ngaihtuah khak theih hi.  

 

Tulai Kristian te lak ah ngaihdan mak taktak om hi. Thohnawn na kichi ataktak (physical) hilou a lungsim ngaihtuahna (state of mind) lel dia gingta pawl bang om hi. Eilak ah leng hiai bang ngaih dan nei i om khak ding patauh gukna ka nei hi. Mihing a piangkhe peuhmah si a thounawn chiat ding chihpen genlouh a mang in koih leng. Kristian piangthak te bel a thohkik chiang ua tangtawn hinna nei a, Pathian kiang a om ding ua, gingloumi/Hotdam louhte bel gawtmun a pai ding chih Kristiante gindan ahi. Thounawn hinkhua zatna ding van-gam ah, Penticost ni a michih pau a kitheihtuah bangun, pau le-ham kitheihtuah na om dingin ka gingta hi. Thamlouin, misiangthou thounawn te lak ah leng, leitung a sungkuante leh ikhosak khawmpihte khat-le-khat kimeltheih tuahna bel om mahmah ding ahi chih laisiangthou apat ka muh leh gintak dan ahi. Thounawn hin khua ding leh i tun sawmna, i lamet van Kanan gam, tu in i leitung khuak toh teltak in theisiang vek kei mahlehang, akilat dan (glimpse of heaven) Bible a ki gelh chiang beek theih poimoh mahmah hi. Hiai khawng theihlouh na in i ginna leh i niteng hinkhua hon sukha in, hon bahsak leh hon suhat tuan thei di’n gintakna ka nei hi. Huaiziakin, “PAIMASA I SUNGKUANTE TOH VAN GAM AH IKI MELTHEIH TUAH LAI DI UAM?” chihthu tamlou kikum leng uthuai i sa hi.  Bangteng hileh, ka gintakdan leh muhdan ahi a, hiai lam ngaihtuah a nei kha lou te adia Thought provoking leh Laisiangthou suut ding hon lunglutsaktu khat bang ahih lele thaman ding chi in hiai thu, khedap sunga suangnou om bang a ka vei ka hon share khia hi.

 

Mi khenkhat ten van-gam a sungkuante toh kimuhtuah ding ngaihtuah leh lunggulhna neih hi khamit huailou asa bang le a om tham ding. Ahihhangin, mi khat in hichin a chi a, sungkuante toh kimuhtuah/kitheituah nawn ding lunggulhna tuh ahi ding mah ahi a, khovel vaai bang mah leh laisiangthou toh kituak mahmah ahi, achi hi.  Hiai i dotna dawnna ding in Laisiangthou i en di:

•    Math 17 a mellamdanna ahi. Jesu mahmah tel in, Peter, Jacob leh Johante ma ah Mosi leh Elija ahong kilang uhi. Huai ah Peter, Jacob leh Johan ten Mosi leh Elija te, amau pianma kum za tampi a mite nasan thei tum uhi.
•    Luke 16 a mihausa pa leh Lazar thu ahi. Anihtuak un ahong si ua, mihausa pa’n leitunga a omlai a, Lazar, mi genthei, a dohkannuai a khatehnen nek ding lunggulh mahmah pa leh Abraham, gamlapi apat nasan in le a mel theitum hi.
•    Jesu a thohnawn nungin anungzuite leh akilakna miten Jesu mahmah hina ahi chih thei tel uhi.
•    Johan 20  ah Jesu han apat athoh kik nungin Mary Magdalini in Jesu, a aw leh amel in thei lai hi.
•    Jesu athohnawn nung a mi 500 sang a tam kiang a khatvei a akilak lai in, a kilakna ten Jesu theitum lai uhi.
•    Luke 24 na a Emmau khua zuan a pai ten Jesu athohnawn nung nasan in Jesu mah ahi chih atheithei lai uhi.
•    Kha (soul) in misi dinmun ahihlai inle (personalities in the death state) akim le kiang (surrounding) phawk hi. Bangziaka huaimun a thah a om, amau thatte tunga phuba Pathian in la nailou ahihdan te thei uhi (Kil 6:9-10)

Hiai atunga te apat in, van pumpi/khalam pumpi toh omding himahle hangle khat le khat kitheihtuahna bel om lai mahmah ding ahi chih ahon musak hi. Thamlou in, a mel chikmah a i muh khak le hilou, Jesu mahmah le meltheih tum ding ihi. Hiaite dikna ahi uh chih i theihchet semna dingin Sawltak Paul i zang di. 1 Thes. 2:19. Paul in amah tungtawn a piangthak/Kristian suakte, van-gam ah Jesu mai a akipahnate leh a lallukhu ding ahih dan uh agen hi (amaute, vangam a theitum lai ding ahi chihna).

    1 Thes 4:13 Thesolonika saptuam sunga gingtu khenkhatte patauhna, a it angaihte uh, ana sisate tungtangthu ahi.  Paul in, “Midang lametna neiloute bangin om kei un, na ittak uh ana sisate’n, natna, satna, gilkial dangtak te thuak nawn lou a vangam a nuamsatak a Jesu toh, thupina gam a om uh ahi” a chi kei a, “Lungkham leh mangbangin omkei un, kikhenden lou ding na hi uh, Jesu hong painawn chiangin amaute toh huihkhua a kituak nawn ding na hi uh”achi hi. Ahi, huai kituahkhawm nawnna hun a i kitheih tuah tum kei maimah ding le bel, kituah khawmnawn hun ding bangpi a ngaklah huai na om tuan dia? Tulai pau leh, ahun in hon paw khe lel mai lou ding hia chih theih ding hi.

La phuaktu khat in huai kituahnawn hun a a it leh ngaih na paimasa te meltheih lai ding ahi chih thei in, hamse dong khovel a thawmhau leh lunglengtak a lei hinkhua azat na apat, kah leh mauna khen gam a,  a it-le-ngaih ana pai masate,  Kumpi David chih banga hong kik nawn lou ding uh ahihlam thei in, amah huaimun, a it angaih pai masate kiang piitung mai dingin Pathian ngen in hi chin achi a:

Phamna chiaugal honpi kai in,
Kahleh mauna khen gamnuam ah;
Lungdeih gibang khensa tetoh,
Nuamin tualleng za ding.

Kua phawk phak phatlouhna mun koi kilkoi hiam khat a teeng le bang ahi kha mahna. Sihna lou ngal in adan zoh louh a hat, laphuaktu suangtuahna vakvelin, zatam vualgen, a khentak a lungdeihte laituallenna, pialgal vangkhua bangle vatung kha zel ahi ngei di. Tua ah amauten nuamsataka a Honpa uh Topa phat a om uh chih thei hi. Alak ua vatel utmahleh, simlei gimhuaina te’n palbang nang (mihing hilai) ahihman in telthei nai tadihlou hi. Ni khatni chianga amaute toh tua mun, samgibang khenna simthu kileel nawnlouhna mun a dawnbang kituak nawn a, tangtawn Toupa phatkhawm ding uh ahi chih thei in, tua hun ding angaihtuah chiang a ngaklah in hichia la a hon sakhia hiding hi:

Suihlung len’n ka ngaih a zual sek,
Lungdeihte laitual lenna
Hon ngailou lou’n tuamun ah,
Honpa thupi phatin nuam in zai awi uh.
Chikchiang’ tuamun ka tung tei dia?
Lungdeihte laitual lenna’h;
Aw tuamun tung ding’n
Simlei hinkhua’n palbang honnang.
Aw tuamun ka tun tei hun innuamin
Lungdeihte toh tua ah ka leng dia;
Nunnop zaila ka lemta ding a,
Nuaisimlei mubang ngailou’n,
Chikchia'ng tuamun ka tung tei dia?
Lungdeihte lenna tua gam etlawm ah.
Pialgal etlawm ka tun tei hun chia’n,
Nunnuam’n lungdeihte toh,
Tawplou in ka phat ta ding,
Ka ngaklah ngei khenlouhna gametlawm
(Free translation)

Pathian in amah itte toh tangtawn a a omkhawp na ding uh khovel thak bawl hi. Huai mun tuh VAN-GAM i chih ahi. La phaktu te’n min tuamtuam apu sak ua, akhen te’n Eden thak/Van Jesrusalem/Van Kanan/Van Pialgal/ Thianmang saunuam/Laukha vangkhua/ Chiaugal vangkhua etlawm,  chihte leh adangdang. Huaimun ah leitung banga sihna, natna, gilkial dangtak, lungkham mangbat kichi te om ngei nawnlou ding kia hilou in, “KUMSAWT A DIN MANGPHA AW” chi a gibangkhenna simthu himhim kigen ngeinawnlou ding hi. La phuaktu in tua Eden thak inn nunnuam ah, dah leh kap a gibang akhentak toh Pathian in pikhawm le zaw a kipahna tengteng bukim ding hi a chih angaihtuah chianga ngaklah a hiai bang la hon phuakkhia hi dingin hon ngaihtuahsak hi (kimeltheih lai di chih gingta) :

“Aw Eden thak in nunnuam ah hon tun in,
Dah le kap a gibing kikhente lengkhawm leng,
Nunnop teng kim dia, Lambang honpak zel nung,
Hiai leitung mubang ngai kei ning na gam ah zaw”

It leh ngaih taan chiatchiat leh thiltuam deuh, a tuak chiatchiat lak ah leng tampi te’n,  i lungsim a om leh i muh leh ngaihtuah na te genkhia leh gelh khethei hetloua  i omlai in, tungtuan zawkna nei te’n ahon gelhkhiak uleh la ahonphuahte uh an limtak bang mai ahih bangin, tuni a khitui kai hial leh, i khalam hinkhua hon chawm a Pathian leh a van-gam honnaihsak tuan  i sak mahmah, mitsi daudau zen a i sak la tampite, zatam vualgen van  Kanan gam, a it angaih te uh omna, huai phamsa laukha vangkhua a omte toh kimuhtuah kal angaklahna la uh ahitangpi chi leng i khial tam lawmlawm ding in igingta kei hi. La phuaktu tampite ngaihtuah na di i zeldim thubawl khelh kei leh, a it –angaih paisate u toh kimukik a kithei tuah nawn lou ding uh hileh hiai bang la ngaih tampite hong ki phuak khollou kha ding in i gingta hi.

 

Ahi a, la phuaktu khat in, “Ngaklahthu a tuntheih hilou” achih bangin, ei ngaklah thu a tuntheih na hikei mahleh, i gentak banga mihing a piangkhia peuhmah sihni melmulou ding omlou i hih man in,  i it le ngaihte leh Pathian kiang tun theihna dinga i khalam leh i niteng hinkhua kivel thak gige a, bawlthak tuakte kibawl theih lai dinmun a om i hihman in, leilam thilsang a vanlam thilte ngaihtuah gige thilpoimoh leh hoih mahmah hi. Pathian thugen minthang G. Campbell kiang ah kuahiam khat in, “Leitunga i sungkuante toh vangam ah ikithei tuah lai di uam?chi a a dot leh, aman, “ Leitung a ka omlai sangin, van-gam a ka hai zawk ding ka gingta kei” achi achi uhi.

Ahi, kituak hilengle iki theihtup kei maimah ding le bel, kituah kik i chih amanphatna kiam tuan mahmah ding in gintak huai hi. Himahleh, kithei tum ding i hih kia uh hilou in, Pathian mahmah inle, na sungkuante koi ah? chi a na dong dia gingta in, sungkuan kima huai pialgal gamnuam, gibang khenna simthu kileel nawnlouhna gam tun chiat ding a lunggulh dan laphuaktu khat in hichi’n ana phuak hi.
Hiai khawvel a bei hun in,
Toupa nangtoh kimaituah a i kimuh hun chiang’n;
Vualzawlna ka lak a na goutante koi ah?
Chi a na hon dot hun a om ngei ding.
Tua hun chiang’n Toupa,
En in, kei leh ka sungkuante, na ma ah ka hong pai e;
Kei ding a na sisan luangkhiate ziakin kipahthu kon hilh hi
Chi in na dawng thei ngei na ding maw
(free translation)

Pathian in a tate, thilthupi tak i muh ding uh leh kipahna gensenglouh i neih ding uh hon chiam hi. Kitanau zaat (relational), khat le khat ki- it tuah dinga hon bawlin, huai kituahnawn ding lametna a thu honpia in, hon chiam hi. Mi khat, Graham Scroggie in tuh, “Ka ittak kum 39 val leitunga ka kazat khoppih, vangam a theitum nawnlou ding ka hi chih kitheileng tuh vangam tunkal ka ngaklah akiam tuan mahmah ding” achi achi uhi.  Hiai sungkuan lainate toh kituah nawn ding thilthupi leh kipahhuai, angaklah khat inle la in hichin la in ana sa hi.
“Kumsawt in lungdeihte toh,
Tua mun nuam ah zai awi in;
Hon siampa tung Thianmang bel in,
Sau nunnuam ah i awi ding;
Galdon in a ngai in ka kap.
Lungdeih teng ngabang lenna;
Haibang ngak uh ngaihteng kim ding,
Hinna sing Na lim nuam ahchi in.

Bangchibang zawngin ikithei tuah ding ua?
I dotna masa zaw dingin leitung a i theih uh nu+pa kitenna tungtawn a kizopna bang achi dia? chih ahi. Mathai 22:23 a i muh Saduducees ten le hiai ana buaipih in Jesu a dong uhi. Jesun a donna tuh, van-gam ah zi leh pasal dia kineihna om nawn kei dia, angelte bang hizaw ta ding chih ahi. Angelte suak ding hilou in, Angelte bang ding.  Angelte bel nu+pa a kinei a, suan le pak nei a omlou uhi.  

Pathian in inkuan kizom/kitanau na ahon bawlkhiak sakna tungtang ah, tunung chiang a van-gam a kizopna ding etsakna (symbol) ahi (Ephesa 5: 32). Etsakna peuhmah ataktak aomna mun ah etsakna zat kulnawnlou hi. Huaiziakin, leitunga nu+pa kinei a kizopna, denchinga van-gam a Jesu Krist leh atatkhiak mite kizopna ding genna ahihman in, van-gam ah nu+pa chih om kul nawnlou ding hi. Khenkhatte tua i chih ziak in, a  zi hiam a pasal hiam toh ki gamla lawta ding dan a ngaihtuah a patau gu bang om khak theih hi. Huchilou ding hi. Sam 17:15 na ah kumpi David in hichin achi a, “Nangmah batna nei a ka khanloh hun chiangin ka lungkim ta ding” achi hi. Lungkim mahmah ding ihi. Tangtawn a kikhen nawnlou in kitanau na nai zaw leh thuk zaw nei a omden ta ding ihi.

Ahihleh zi + pasal kal huchi ding ahihleh, i sungkuante la bang chita ding? na chi mai thei. Ephesa 3: 14 na ah Paul in Kristian tengteng innkuan khat in agen hi. Pathian a PA uh hi a, amaute sanggamnu leh sanggampa hivek uhi. Huaiziakmah in i thum chiang un, Ka Pa uh van a om i chi sek uhi. Leitung a innkuante vangam ah i kimeltheih tuah lai ding ua, Pathian inkuante hi in, kikhenni chih om nawnlou ding hi. Huaimun ah “Hon-gumpa koilai ah na om chi in kon zongzong a” chihla te sak ngai nawnlou ding a. Lungngaih kahleh mau om nawnlouhna,gibang khen louhna gam a, Honpa kiang a om denta ding ua, kipahthu leh pahtawina late sata ding chihte angaihtuah chiangin, huai hunding haibang angakna sunkhua sawt in zankhua sawt lua sa in hichin la in hon sa khia hi:
Gibang khenna nuaisimlei ka pelh hun chiang’
Lungdeih teng dawnbang ka tuak dia;
Mu banga lengin pialgal,
Angelte lenna gam vaak etlalwm ah.
Aw nuam a tua gam ka tun chia’ng,
Leilungngaihna te ka paisan dia;
Nunnop na sakhituihup bang a zamna gam ah,
Lungdeih te toh nuamin ka lengta ding.
Simlei khimzing pan tua gam,
Ka galdot sek aw chikchiang tua gam ka tung dia,
Lungngaih kah gibang khenlouhna gam?
Haibang ka ngak sung sawtlua sang’
(free translation)

Van/thounawn pumpi bangchibang hiding hiam chih leitung ngaihtuahna toh tu’n theikim kei mahleng, u-leh- nau leh, khosak khawmpih te toh zaw kithei tuah ding ihi chih bel i thei hi. Leitung a iki tanauna te mansuah nak sangin, bukim zaw sem ding hi. I mansak ding omsun chu Jesu Krist a hotdamna gingtalou/tanglou te hi ding hi.

 

Ahi, sanggam it, i na damlai leh ni khat chiangin Jesu, i-it- ingaihte toh huih khua ah, tangtawn tangtawn a kikhen ngei nawnloua, a kiang ua om omden dingin hongla ding uhi. Sungkuan lainate toh ikizopna hon gakkhawmtu, Krist itna gui atat naikei, kituah khawm nawnchiangin kizomlai ding i hi. Huai hun thupi in nuampetmah ding hi.
“Tungnungpen a kikhopna nuam,
Nop kiamtheilou gam a kikhopna,
Hehpihna gam tungnungpen' kikhopna,
Tatsate tenna khopi nuam, Tungnungpen a kikhopna!”
chi a la ana phuak toh,

“ Aw, nopna inn, tangtawn hamphatna mun,
Tangtawn luankhi nul omlouhna gam;
Innkuan ki-itte leh Hondampa toh,
Baang lou a kikhopna a om ding”

chiin ngaklah tak in tua mun tun hun ding ana galdot  uhi.Khitui tampi toh haan a i na sialtakte, kipahna gensenglouh toh kimu kik nawn ding ihi. Mihing kam a genkhiak zoh vuallouh lungnopna leh kipahna in i maban ua hon ngak ahi.  Hiai thu kipahhuai a kikhamuan dingin Pathian in hon deih hi.  I nu, I pa, ita le nau, ana pai masa te toh mit mahmah a kimu in, a aw mahmah uh bil a za nawn di ihi. Hiai kimuhtuah khawm nawn na ding tuh bangzahta a nuam ding hiam? Ka hon tuak ding zing khovak chiang, Damsung lampi bei chiang; Tua mun sana khopi tualnuam ah, Tua mun ah omdenta ni hang; Lungdam in nuamsa ni, Hun leh kumte bei chih omlou in.

Ka ginna'n phamsa laukha vangkhua gal in don veng,
Lailung a dah leh sakmel ngui om nawnlou;
Tatsa vontawite nunkhawnuam in leng uh,
Kei zong tua mun a leng ding in haibang hon ngak uhi.
Mubang ngai veng aw gam thupi,
Lungdeihte laitual lenna mun;
Tuangtun hun ding haibang ngakla'ng,
Phamsate vangkhua nunnuam.

Leitung dan banga nangle na tangtawn inn ding na zot hun nikhat tei hong tung ding hi. Zatam vualgen tua tangtawn innpi nuam, samgibang khenna simthu kileel nawnlouhna, nat-le-sat, gim-gentheihna, lungkham mangbat chihte omnawn louhna, it-leh-ngaih ana paimasate’n ngaklah tak a honna ngakna mun, Tangtawn Pathian kiang tung thei ding in Pathian in honpi in hon makaih tawntung ta hen.