Thupatna:

Hun sawtkuam tak pai ta mah leh a ki gen minthang mahmah, thuchian theih haksa KAIHLAM TANG A LENNA KIA toh kisai theih dandan leh muhkhiak khenkhat te mipi leh siamsin naupang te a ding in hon taklang leng ut ing.

Kaihlam Tang a Lenna mu masa pen te hi dia Gintak:

Lena a kiak nung sawtkuamtak pai nung in Sinzang khawmi pawlkhat in lenna kia mu uhi. A muh phet un Thanlon a CID Officer Late Awnphung Samte kiang ah gen uhi. CID Officer in leeng Pu Pumkhogin Tonsing toh lenna kiakna mun va pha ua Pistol, Thautang, Guh, Parachut leh van chi tuamtuam la in Government(India Govt) ah submit uhi.

Hiai thu hong kipat dan:

Koi a hong kipan kha hiam? Chih ka thei kei a Lenna kia a tuangte lak a mi khat Francis P Yuskaitis kichi khat khutbuh/bracelet leh Lenna kia number(bomber number) sikthem lianlou 2004 kum in khatvei mi khat in hon lak hi. Ken leeng ka en a huchi in ka kem sak nawn hi.

Francis Innkuan  te zon patna:

Mi khenkhat kiang ah hiai toh kisai ka kum kha zel a hi mah leh a hon kum khol kei uhi. Khawvel vanzat Internet kuamah huh ngailou in ka hon khoih thei pan ta a  Kum 2011 in internet ah US Airforce te toh ka ki thuzak uhi. Francis P Yuskaitis kichi, 1940-1970 kikal vel a Manipur, India gam a lenna kia a si record na neih uh leh a details, family te omna hon zon khiak pih un chi in ka ngen hi. Amau leng huai hun lai in record hoihtak neilou ahi ding ua, Record ka neikei uh hon chi uhi. Ken leeng a phattuam khak leh chi in  Bomber Number hi di aka gintak Sikthem a kigelh ka khak leh, amau record khenkhat , lenna kiak hun, mi si zah, a ki vuina uh hanmual chih khong a hon khak thei ua Family te toh kisai bel a thei kei uhi. A gintak thu uh a hon  gen ua Massachusetts lak te a hi maithei chi in a hon gen uhi. Ken leeng a tawp na ding in a ki vuina bang Hanmual enkai or record kemtu contact di dan LUHLUL deuh in ka dong teitei lai zomah hi? Koi lak a aom na? chi in ka dong hi, a ziak tuh hanmual enkai tu a om leh hanmual enkaitu’n hon huh thei dia ka lamet man.

A innkuan te toh kimuh na:

Huchi in US Airforce ten a min khenkhat hon gen uh om ahih man in, huai min toh kibang chet FACEBOOK a ka zon leh a om a, huai pa kiang a hiai thu toh kisai ka gen leh, Na migen ka UNCLE hi ding ahi hon chi mawk hi. Ken leeng mi CHALAK pi khat khawng le hithei ahi chi in ka muang lo pah kei a, awlawl in ka ki hou tou jel uhi. Skype bang in leeng a chang in ka kihou jel uhi. Thu khenkhat amau leeng hon khak jel ua, lemlak khenkhat a hon khak uhi. Francis limlak leeng a hon khak ua, family history hon khak ban uah Introduction hoihtak a hon nei uhi. Ken leeng amau te ka muang ngam ta hi. Tu in Francis U pa dam lai a kum 85 a val ta hi. (Facebook a ka mi houpih ahih leh Francis Upa tapa ahi).

Bracelet leh Bomber number khakna:

A hon ngetna bang un bracelet leh bomber number plate ka khak hi. Fedex Express ah prepaid shipping a hon bawl ua Delhi a kipan ka khak leh Ni 3 (Thum) sung in Massachusetts a tung hi. A muh phet un a kipak lua ua nui khokkhok jejen in ahon phone pah uhi. Tuni tan in Francis upa’n a khut ngawng ah ka thil khak a bunbun a, ka suah khe ngam mahmah kei, ka nau mel mu in ka kingai a hon chi uhi. Francis Upa zi in Card a hon khak ban ah kipahthu genna Laithon pek 8(eight) dimzen in hon khak hi.

  Francis U pa te nupa ahi

Amau a pan reward:

Kipah thu genna dan in thil hon khak kik bang a nei ua, huaite lak a Francis in a sih tan pha a abuh Bracelet toh kibangchet, a tung lam a MUMUNG TONSING chih kigelh, a sung lam a YUSKAITIS FAMILY kigelh hon khak uhi. Ka min gelh didan a hon dong kei ua, a hon van khak ding uhleng a hon hilh kei uhi. Na Postal address hon hilh dih hon chimawk uhi. Mumung Tonsing ahih leh ka facebook a pan a lak khiak uh hi peuhmah ding in muangmoh tinten ing. Huaiziak in facebook a profile min bang leeng kingakna taak mah gelh hoih ahi chih ka mu suah hi. Khenkhat  te gelh dan a PRONOUNCE haksa taktak te gelhkha hi maijen leng ka damsung Goumanpha a ka min diklou pi ki gelh ding a suak hi. A hon vankhak uh a kipah huai lo mah leh sum neihlouh toh Custom Duty piak a ngaih ziak in sum bangzah hiamtak ka na seng veve a, anuam khol kei.

FRANCIS P YUSKAITIS TOH KISAI THU TAMLOU:

1. Francis P Yuskaitis naupang chik ahi a, kum 21 ahih a Pilot zou ahi.
2. Pilot a zoh toh kiton in hiai Galpi nihna a om man in Flying Tiger ah alut hi.
3. Flying Tiger I chihchiang in Government nasemhilou, Pilot a zohziak a Galdouna lenna hekthei, Volunteer a Government Galdouna huhte ahi uh, amau hon gendan in.
4. Lenna kiakni: 7th August, 1945.
5. Francis Serial number (En Army number I chihte ahi maithei hi): Flt/off T-l36492
6. Francis piankum: 5th Decembebr 1924
7. Pilot hekzouphet, Galdou a kuankhia a Sihna tuakpah ahih man in Mivangse taka hi peuhmah hi.
8. A kivuina: Arlington Cemetry ah Huailenna sung a tuang mi 5 te hankuang khat sung ah vui in omuhi. A thudana vuina hi ding in gintak uhi.

Kaihlam tanga Lenna kia, tua Museum a om, Francis U pa te nupa lemlak ahi

Francis P Yuskaitis in Pilot a zil zoha a Batch pihte

LENNA KIA TOH KISAI (REMARK/EYEWITNESS STATEMENT):
Plane No. #44-41293 dak 0920Z(amau dak sim dan ahi ding) in Lushien, China  ah Date 7 August 1945 in Rupsi, Assam, India zuan in, Gas Haul lampi tawn in a kipan khia hi. Radio Contact Nanung pen ahih leh fort hertz 17,000, Feet 1202Z ahi. Huainung bangmah thuzak theih ahi nawn kei uh.

LENNA KIA TOH KISAI RECORD KHENKHAT TE:
7th August, 1945 in lenna number B-24 #1923 Lushien, China a kipan Rupsi, Assam zuan in Gas Haul tawn in  kipan khia hi. Radio Contact nanung pen ahih leh Fort Hertz 17,000, Feet 1202Z ahi a, huainung bangmah a ki thuzak thei nawn kei uh. Gal veng mah mah leh hiai lenna in US a zuankik kei a mangthang ahi peuhmah ve. Kum 1973 kum in Assam Valley a mite’n gammang thukpi lak ah hiai lenna a mu uhi. Phai(Imphal) khawpi a kipan MILES 50 ding mun ahi. Hai in B-24 them tem uh ahih chiang Accident ahi chih theihchet ahi ta hi. Huai muh ahih in dog tags (khi a min kigelh, tau a min kigelh etc) leh Guh(bones) khenkhat muh ahi a, Hiai Guh leh dog tags te America puaktung ahih zoh in, Arlington Cemetry ah hankuang Silver a kibawl ah guang in, hankuang khat ah hiai misi 5 te t thu in vuiliam in aom uhi. (Eyewitness/Remark toh Lenna kia toh kisai a Lenna number a ki bat louh ziak in theih siamhuai lou sim pi khat a om a, Sikthem a kigelh toh leeg a kibang chet kei hi). http://arlingtoncemetery.net/aircrew-08071945.htm

 

KAIHLAM TANG A LENNA KIA A TUANG TE DETAILS HIAI BANG AHI

 

Pilot	F/O	Richard H Franken	T-64772
C/P	1st Lt.	James W Cantrell	0-833485
Nav	F/O	Francis P Yuskaitis	T-136492
A/E	Sgt	William J Cannedy	36878303
R/O	S/Sgt	Harvey E Brockmiller	34584913

EN THANGCHING TANG A LENNA KIA I CHIH PEN AHI DIAM?
Tarikh 6th August, 1945  in Lenna no. B-24 #8451, A min “Poco Moco”  Hsinching, China  a kipan Rupsi , India zuan in  ahong kipan hi. Hiai lenna pen ahih leh mangthang ahi chi a record  in om hi. Radio a ki contact na nanung pen ahih leh Position 204 (Shingbwiyang, Burma) ahi a, a san dan ahih leh  1714Z ahi. Hiai lennah toh kisai 15th December 1945 tan in leeng tan in leeng Missing(Manthang) chia record ahi lai hi.

HIAI LENNA A TUANGTE DETAILS HIAI BANG AHI

Pilot	1st Lt.	James B Shirley	0-925309
C/P	F/O	Rollard J Luce	T-65722
A/E	T/Sgt	Charles E Whitman	18000275
Nav	F/O	Ray A Ringler	T-138768
R/O	Sgt	Franklin D Sturtevant	11029241
Asst. A/E	Cpl	David R Ferguson	31416038

(Note: Hiai thu kei muh dan lel ahi a, simtu kuapeuh in hun hongpai ding a bang hiam a dia pansan a zat phal ahi kei, Huaiteng baak ah laigelhtu phalna lou a suahkhiak himhim phal ahi kei).