Naute mi innluah a khateng a innluahman piak ngai adawnzang khai deuhkhakleh chi in 'ka innmun ah innlam unla nateengding ua ahihziak a zukhawng dawndawn a innsung nangaihsak keileh bel hon nohkhe kikpah dinhkahi' chi in azudawn a kidektheih deuhkhakleh chi in kanau kahih gemgam hi. A khonung in azi in akihouna uh hon hilh a "I U in zaw ka innmun ah innlam un hon chi hi a hilele zu nadawndawn leh hon nohkhepah ding kahi a chi a SAWT KITENGMAN KENTEH" chi in a nui heuhau chi in hon gen hi. Ka khonung ngaihtuah chiang in hehhuai velvul napi in kanuih lamlam aza a kei vualzou lawdan a kaki koihlai in kanau in awlchik in honzou hiau a innlam zoupah louding uh hiven chi in lamthaklouh ateentheih nimnem nading beekzonsak in kakhonung buaithak hi.

Kaneu chiklai in Kangpuakpi (huaihunlai a katheihdan) tua Kanggui kichimun ah kanu gilpeng aat in sawt kuamtak ava om hi. Ka neuluatlai ziak adiam ka nungai a lunglengtak a ka omlam katheikei a hongtun kiklam leeng katheikei hi. Ahihziak in katheih gige khattuh ki aat/operated ahihman in Malta/zasan/thaksik nengamlou in a om a adamnung inle malta himhim nelou in tuni (kum 80 vel ahihtan) inleeng ane nawnkei himhim hi. Ka nun malta aneeklouhziak in kaneu uapan Mehlak a malta kha ngeilou in malta duh ka ute ading atuam in ka gawithoh ua kou aneulaiten malta thak himhim kane ngamhet kei uhi.

Huaihunlai in kakhua uh Chiangpi (Singngat lam apen) leh Kapute teenna Lungthul Daizang kigam lalou ah Moulawm ding hiam Innkuan vai a neekbawlna chituamtuam leh Khrismas leh Kumthak lopna hun khenkhatte ah ka nun hon hohpihzel hi. Kineulai ahihman in a nopleh noplouh leeng katheinawn kei a himahleh katheih mahmah khattuh Lungthul Daizangte 'Mehthaklou' nengamlou kiale hilou in thaksa in ka unau un kakap zel uhi. Amau khua a om naungek ann netheipanten leeng nengam ua kou ka khe ua Lungthul (mel/mile nga agamla) kitunzohten ka nengam kei uhi. Mikhualte mehthaksa a nengamlou akap kahihziak un innteekte kisuanglah tak a vakoih gige tuh kahi peuhmah uhi.

Kum sawm valzek zaw kahita maidiam ah tangvalte ball pekna a mi atawmziak un alangkhat a goal ngakding in hon napangsak uhi. Kalanglamte tangval khat in ka kiangzek apan in kavatphak milmial ding asang in a deihtheih in goal hon shot a laupipi a mat kana sawm leh a force ahatluatziak a mantaang zoulou in kakhutban kalenuai apat lengkhe dingbang hial in nat in anahi. Na kasakluat ziak in kakap a khenkhat ten a pekpa kiang ah "naupang in goal ngak a huchituk a hat a napek.." chi in amohsak ua ahihziak in apekpan "huchi nat mahmah kenteh gaol a khahziak a kisuanglah akap hilel" chi in hehpihna tellou hial in hon chi a nasa loupi naasa a kibawldan a hon gen ka pawna mahmah hi.

Ka ngeklai a ka bokvak theih apat a Laizialsum lau a kapzel kahi chih kanun honhilh zel hi. Huaiziak mah ahiding a kalet nungtan inleeng Laizial (kouchihdan a zanah) kihpetmah in kakih a khoihkhak ding ka utlouh kialeng hilou in Ann nekna kiang a Asum kamuh lel inleeng ka annduhna teng beikhop in ka kih hi. Huaihunlai intuh khat teitei khoih ngaiding bang hitaleh zanahsum khoihsang in mihing ek kakhoih zawding hi. Naupang selua bel kahinawn kei a nitaklam khat mi Innkatau a kana tut uleh tangval khenkhat hongpai ua khat in zanah/laizial panding in honsawl hi. Zanah kihlua kahihman in mei am lading a kakuanleh honsawlpan "naupang min honsawldan in pailechin eivele.." chi in a zanah hontawisak teitei a kakhaselua in ka mittui apawt a thumanglou a kapdan a hon ngaihtuah in hon vuakbeh zawmah hi.

Kitangvalsak lambel kihitading chihlai in ka Usonlian te nau a upazawpen hong si hi. Kalkhat khawngpaipan ding chih in a inn uah a naungek uh pautheipan toh anu ana om ua kithusiamsak utsam kihi ahihman in anu pomlai anau uh vanou kawm in "U U la.." chi in katup leng hihetlou in a U sihlam theilou bang in kava kampaukha a anun lamdang satak a hon en in anui niilneel a kakisuanlah ziak in ka san tuaituai zezen hi.

Kitangvalsak sim mahmah chuh kihita hilele ute maikhawng atuh kizum petmahlai chih hun in koukhua in Tournament kasai uhi. Khokim khokiangte tamkuam honghoh ua nitak Hall Meeting ka innmaite uh compound ah kinei hi. Kitangvalsak laitak ahihchia zawlla khawng kilunglut mahmah hiven zawlla kulmut deuhkhat sading in mikhat request nading laithem a teng 10 toh thuah in conductorpa kava pesak hi. Huchihlai in ka U Assam a om hongzantun a kumtampi kimulou kahihman ua hon muhkal ngaklah in hon samsak hi. Ute himahleh kimuhlouhna asawt toh kazahtaak mahmah a honhoupihna tengkia dawng ngam liailiai a om in hall meetingna a conductor in Mic in kalaithem piak honsimkhia a kamin agenkia leng hunsalou in a request tu hongding leh chi in hon sam nilouh a ka u inleeng hoihzaaklua ahihman in kazum dan gentheih vual ahikei hi. Ka un "na latel sadek uh na utleh vahoh nawn in.." hon chizawmah a vataikhiak dinglah hilou om dinglah zum petmah in ka om leiluai hi.

Lamka a skul kai suty inlam pailai in ka khua ua volley ball court (mipi lamlian in atotkhak) ah nitaklam khat volley kimawl in ka om uhi. Tua Guite Road om nailou ahihman in Singngat lam apan koukhua kheng a hohding peuhmah in kakhua uh hontot lai uh ahi a Tangnuamte ka skul ua kai khattel in mikhual hongpai uhi. Ka kimawlpihte khat un ana chiamnuih ahidinh a agen ubel katheikei hi. Amauleng bangmah genhetlou in a paisuak uhi. Skul lut hun a skul kava kainawnni masapen in Tangnuamte kachihpen in "nakhua ua kongpailai a non chiamnuih uh ." chi in keivuak hongsawm a kenlah a mik amak theilou in athawn in vuak in ka omdek mahmah hi.

Pawlguk kasimlai uh hi in kathei a kalawmpa mikhat in asimmoh petmah a kanih ua ka omchiang unlah bangmah agen ngeikei a amahkia a a omchiang in ana chou gige hi. Nikhat tuh kalawmpa kidek zoulou in ana kisualpih ahiding a achoupan zoulou in kalawmpa avualzou hi. Avuallel pan a u tangvalta kiang a gen hiding hiven skul tawp in anatang a ana vaw ek a "nang bang kisa.. naluangman bangzah a .? Hon that lengle naluangman pelah louding kahi..." chi in ana hansan zialzial hi. Akhonung a katheihthak uleh a Lottary matna uh sawt nailou anahi a huaihunlai adia kimuan natham mah na mankha mah hidingdan uh ahi. Bangtan a hauding uam chihbel theikhang... Auto le nei uh ahihchia nitaklam khat new bazar tan katuansuk leh nitumpan hinapi in "khuamial dekta a night charge nonpiak ngaiding..." chi in bahara 30 alakna zel uah melyheihna hi a chizawmah in 150 hon ngen a mikhat luangman pezou mahmah dia kigenpa duh am kasalua hi.

Awl leen hun a innsia kipuahzel mah ahihman in kouleng inntung khuh ut kahihziak un skul khawllai a inntung khuhte (vathaloh chih hihiallou napi in amauleng kou khuh hun a honghuhsam ding uh deihna in) kava khuhpih zel hi. Kou khuhhun inleeng kavahuh khakten honghuh thukvek uh ahihman un mi kitam a sun annmeh beek bawllouh dia kisuanlah huaikhop a mihongkuan chi in ka aak uh bangzah hiam ka gou uhi. Inntungkhuh a inntung a ki om tiltel lai in kakhokhung lam ua teeng ka Ni hongpaisuk in amau kachial zezenlouh uh akhasiatluat ziak in hong haan khum ek ek hi. Amah ngaihdan atuh asanggampa,kapa'n thachial a amau chiallou leh innsung dongta aleeng katanu uh ahihchia thachial a kachial louh uh naasa ana pawnalua dan ahi hi. Koulah thachial hilou a mihong huh atamziak a sun ann mehding bawlpih leldan a kingai in vahilh khalou mah kana hi ua... Ka ninlah midangte tanaubawl zaw a amah nawlkhin dan a ngai... anuam hetkei hi. Thachial hilou kahihdan uh gending alah mehding Aak kigou a kipokhuan demdam hizaw mah... Atawp in "Ni thachial hilou ung a, mi kavahuhten honghuh thuk ua sun ann mehding khonung bawl kahi uh." chi in kagen a hongkuante lak a upadeuh khenkhat ten leeng kachial uh hilou a honghuh ahihdan uh ahon gentak un ka Ni in hontheisiam thak pan hi. Ahihziak in felzou kakisakei lua a kangaihtuah khak hun tunitan inleeng nuam kasa hetkei laihi.

Ka khote uh zukham kiphasak ten mibang chiahlou khat ana vawkha uh hiding hiven kei Lamka a skul kai intuh katheikha kei hi. Skul suty paidek Singngat a ka paneute inn ah kagiak tou hi. Nitum kuan a kava pawtleh Singngatte tangval khat in honvuak theihna ding zon in azong laizang hi. Keilah mitoh kisual ngei himhimlou huaikialou a mikisualpih dingdan leeng theilou kahihchia kisualpih ut mahmah lou in kapaisan hi. Nitak ann ne a ka ki umkual timtem lai un huaipa hon hihdan kagenleh ka paneu in "Nou Chiangpite mawngmawng mibanglou vawte hon na vawgawp le uh hive..." chi in hon hansan motmot a ka annkuang umpih ka ute nuih in anui ua kei a mik amak theikhalou pen katuike nuih viivei mai hi....hahaha Ka paneubel mi nopsaklouh ding khual khollou a amah lungsim genkhiak khawksalou a frank khat ahihziak in athugen kou atate ading a kipolh limna suak in nitak hun nuamtak in kazang uhi.

Zudawn ngeilou chihmahtak tuh khambaih kahiding a kazinna khat ah ka zinpan azi in zuhuandia a um lai atui hon dik a kanih uh glass khattuak kadawn gu uhi. Azu bel akhum mahmah alim kasa hi. Ahihziak in nitak kalup un kalung hong am saan a lumtheilou in kavathou hi. Zan khomial taklak a bangmah kimutheilou ah a Ringwell uh vanaih in utlou pipi in kava law ek ek hi. Zintunna a valuak chih zumhuai sa in kimutheilou himahleh tuikhai khia in kaluak namun dia kagintaakna tuika buak nilouh hi. Siangta mahmah inteh chi a pai in kava lumnawn a zingthou hakpen in kapang zawmah hi. Kathoh a maiphiat ding a ringwell kava naihleh kaluak omlouhna mun buak kha hiding hiven katuibuah nakiang lak ah ka luak ana om a ka tunna nun kih tuaktak in ana buak luailuai a vabuahpih dinglah hilou kimuhlouh khembawl dinglah hisamlou in ka om alem hetkei hi.

Buailai pek apat a ei ate muan huaidan kigen na kiza gige a kilunglut mahmah leh kimuang mahmah ahihman in Lamka hohkhak hun in amun mah a thutheih reliable hiven chi in lawm muanhuai khenkhatte toh tangvalte thubang kahoulim khanak uhi. Huchia ka houlimna uh honzakha naute khat in nitak in "Kholak khawng a ei ate thu nagengen louhding ahi" hon chi a bang achia eite chin kaleh dot hi. Gending luat theikei mahleh kuaman ei ate thu kholak a kigen ngamlou ahi hon chihthoh mai a kalungsim ah "ei ate hingal a bangziak a gen ngamlou ding... a siatna uh a omleh igen a ahoihna uh a omleh igen ding mah hilou ding hiam... ei ate chihang a igen ngamkei leh bang chidan a ei ate hitheiding uh ahia...igal uh hilou a ei gal leeng hisamlou ua hoihdeihziak a athu uh mitoh kikup ngamlouh ding chih in omzia om in katheikei hi. Kikup chih leng atuamtuam om a deihsakna leh hawmthohna toh kikup ei atenle hua a zadah ding in kagingta kei hi. Ahihziak in aman "Nang ngaihdan mingaihdan ahikhol ding hia.." chi in hai ahon sa sim mahmah a kenleng amah pandan pil huailua satuanlou in ka om uhi. Asungthu tak a iva ki involve hial keile zaw bangteng igen thuaktheilou ding a zen a lungsim neu pawlpi nei ihih kagingta kei hi.. mi thugen zatheilou heutu nei inleeng ka kikoih kei.. Ngaihdan kaikhawmthei pawlpi tuamtuam nei a kipawlpi ihihman ua eimi kipawlpit na lohsam omlou ahi ka chi teitei laiding hi.

Apa uh (kei) kapute khua a mehthaklou mehngamlou a kappan tate kahon nei a apa mah honsun un malta thak a nengam hetkei uhi. Mitaten bel lim asakziak uleh aduhziak un anethei zawdeuh lai uhi. Mipi neekbawlna a naupang kilawp thei mahmah ahih mahbang un huchidan neekkhawmna Saptuam leh Khotang nipoimoh leh Khrismas leh Kumthak lophun a neekkhawmna a omchiang in naute kilawp thei mahmah uhi. Adiak in sa neekding chihbang kilawpdiak uhi. Huaihun in sa limsakna ding a a maru marang/masala tuamtuam kikhate leh mehthak bel a thak siikseek a kihuan leh a thaklou bel tohna Buhtei kikopsak ziak khawng a thak siseih itaten nengamlou a hong kahchiang un anuam hetkei hi. Itaten duh mahmah napi a nengamlou a mittui toh a om hial uleh ei anengam in lungnuamtak a neek theihna vual ahi kei a iduhna masa bei in ineek zahzah igil vah mahleh isunglam hawm mah abang hi. Va neeklouh hialding lah a nuak ibat khakding lauhhuai zel....!!! Eiziak a kuahiam lungnuam hetlou a a na om ua annkam limloutak a na omding uh lauh huaizel ahihman in huchih hun a om dingdan theih ahak mahmah hi.

Atawppen in, mipilak a thil kihih peuhmah a nuamlou zawdeuhte ei hon huadeuh leh eihon ngaihtuah khaklouh ziak a huchi ahi chihdan ngaihdan ineih keileh thangpaihna ding a omkei a himahleh thil ahoih bukim zoulou deuhte ei leh ei siat kitut a eideihdan kalh a thilh hih a ikoih lebel mipi thilhih eitoh na kituak zou gigelou ding ahihman in khasiatna ding itasam keiding hi.