Khovel khangthu ah abik in Second World War II zoh in tumlam gamte makaihna leh pangpi na deuh in North- South divide concept a hong piang a. I theihsa mah bang un, hiai North leh South divide in a taklat ut bel atang pi in khovel a gam te khendi hileng, North gam leh South gam in khentheih ahi chih taklat na ahi. Hiai ki khen na pen ahih leh lam chiteng a khandan/changkangdan leh khanlouh/changkanglouh dan te, teh tuah ahih nung a bawl hi in muhthei hi. North-South divide a chihna ziak uh ahih leh, geographically a et in gam/nam khang leh changkang te continent te north leh equator north lam ngen a om in muhtheih hi. Huan ah, gam/nam niam te a tang pi continent te south lam leh eqautor south lam ngen a om hi in muhtheih non leu leu hi. USA, Canada, UK leh Germany leh adang-adang te North gam te ahi uh hi. Huailou in South lamte ahih leh Brazil, India, South-africa, South-east asia leh Africa sung a gam tuam-tuam te huam kha hi.
Hichi bang ideology leh concept a hong piang toh kiton in khovel ah North gam(developed) te i chi hia western gam te mai et na leh maivil na lian pi hong ki pan hi. South(developing) gam te lak ah, panpihngai gige ka hi chihna mentality, zong hong lian deuh- deuh in. Western gam te a kinepna leh kingakna lian pi nei in om tang pi uh hi. Western te hihdan leh omdan (society and ways of life), ahoih pen di leh adik pen di sakna ki nei hi. Banah, khandan/changkangdan (development) pen amau din mun toh mekmat in developing gamten amau nungzui in ma a ki sawn hi. Hiai bang trend south asia leh south-east asian gam te lak ah nak pi tak in muh thei hi.
Tunin ei te developing gam , khovel a population tam na pen te lak a anihna ah, i om uh a. I gam sung a deih bang a, leh ahi di bang a ngaihsak louh a om ikisak hang in. Khovel changkang na te leh khandan te chiam kha ta ihi chih mutheih in om ta hi. Technology tungtawn in Internet te,Telivison te , Music videos te, Movies ( Hollywood, Korean, Japanese, etc2) leh site tuam-tuam te a imuhte uh om dan a. Changkang lou kisa a, amau om dan changkang na sa a, amau lamte om dan a om sawm a i ki sak-sak lai un. A sia leh pha, dik leh diklou, kilawm leh kilawm lou poisak na nei lou di khop in ki om sim ta hi. I life style uh hon sukha in hon makaih mah-mah ta in muhthei hi. A awlmoh lah kitam, a patau lam le kihi sim ta. Forum tuam-tuam ah bang gen in om mah-mah ta. Gendi mah leh hi in, awlmoh a patauh di mah le hi in ka mu.
Himahleh, alehlam daih in hampha kisa mawk kahi. Nam niam leh changkang lou ka kisa kei a. Huai sang mah in, opportunity hoih tak nei in ka kimu mawk hi. Bangziak a huai chi thei??. Hichidan ngaihdan a hong piang theihna ahih leh khovel khangthu ah eilawi adiak a, india gamsung a siing-nga leh siing-giat kikal milip ten ihihna (identity), phuhsuah dek pan ihi ua. Kipan pan-pan, pilna, siamna leh technology te hamphat pih pan-pan ihi ua. Society leh culture development lam ah leng infancy stage a om ihi chileng le dik sim maithei ahi. Huchi ahihna ah, i kalsuan na ding uah, deihtel theihna hoihtak nei ihi uh chih phawk le ut huai sa ka hi.
Society paidan atangpi in nih muhthei hi. Khatna ahih leh liberal leh open society, atunglam a i gen western developed society leh gam te ah muhthei hi. Anihna ahih leh a khatna toh ki lehbulh, gam leh society kulmut tak te hi uh hi. Middle east gam te leh muslim sahkhua om na te ahi tang pi uh hi. Hiai te ah tawndan leh kithu nunna khauhtak, a society uah muh theih in om hi. I theihsa mah bang un, a hoihna leng a om in. Himahleh, a tamzo ten tu lai khovel toh kituak lou ki chi in ki pakta lou hi. Huai kia hilou in huchibang society te changkang lou in ki mu in, ki koih top hi. Gen sau leng a ngai kei a, tunin atam zo, ei bang-bang ten western or liberalised society lamte om dan nawt ki himai hi. Ahi di mah (natural process) sa hileng kilawm hi. Himah leh tu in, ima ua society paidan tang pi nih te apat ei a dia hoih lampi khat gel thei leng ut huai sa i hi.
Nam leh gam changkang te tuahsa leh phutsuah sa te apat zil nei ni. Amau tot teng tot tei-tei ding, amau society leh khosak dan pen changkang na leh ahi di mah ahi chih na di om lou in ka mu hi. Aziak bel amau eite dan a, a sia leh a hoih dan chetna di ana neilou uh hi. Tunin eiten bel, amau tungtawn in i mu ua, i thei ua hampha ka kisa hi. Technology te zang a niteng khosak dan leh niteng nek leh tak zon na hoih zokna di leh, detzok na di ah zo mitsuan di mah in ka mu. Himahleh, society tawndan lam ah et ton di leh amau society pen ultimate society / most desirable ahi chih na di om lou in muh theih hi. A hoih na lam hi in, siatna lam hitaleh tua a din mun sang ua hoihzo leh sia zo thei non lou ding uh hi. A tawp tungta ahih man un. Eiten bel, amau kum 100-150 ma a ana tuah ua ana phut touh te uh, tua buaipih pan kihi hi. Maban sau pi leh limchitak nei ihihna uah, amau om dan a om a, a tawp tung ding ut ding in ka ki koih kei hi. Ut ding leng hilou mah ahi.
Half reality, nop isak di tan kia en in, huai lunggulh in ki om hi in mutheih hi. A reality pen full in accept ngam le a hoihsa di khat leng i om kei hi. A non- western leh orthodox society lam te chihtak na leh a hoih na tamlou te bang ei context ah zuih sawm in michih in pan la le hang, middle path eilawi in ki sat khe thei din gingtakna nei mawk ing. Aziak bel, forum tuam-tuam leh dicussion tuam-tuam te ah, ngaihdan hoih pi-pi te, thu hoih pi-pi kikup na te ah thil hoih i deih dan uh ki mu thei hi. Huchi bang a pan i lak theih na ding un michih in, development in niteng khosakna nop zok/hoihzok na di tan a hon influence in, society a morality, integrity leh way of life (non-materialistic) pen sukha lou ahi chih chet ngai masa in ka koih hi. Mis-interpretation ziak in khanna/changkang na (development) toh western culture ki mekmat gige kha hi.
Huchi ahih na ah, tu in, ei mimal chiat in, i gelsiam na, theihkaktheih na, pilna leh theihna i neih te uh, thildang tam pi te a, i zat kawm-kawm un, western lam te hih dan i et-ton lai un, et-ton dan siam ni. Thildang tam pi te ah, self-centered leh self-interest mah pi bawl in, ei mah pun na ding, hoih na ding leh nopsak zok na ding in, i gam ta ua. Huchi vanglak ahihleh bel morality leh integrity te bangle mahni a dia hoih a hi chi i theih uh toh kiton in, kep bit sawmle hang ut huailua sa ihi. Angmasial ihih leh hiai lam aleh huchi thethup le hang deih huailua hi. Kristian community leh innkuan a khangkhia ngen ihi ua.Huaiziak mah in leng, haksa mahleh zohlouh ding in koih theih mawklouh hi. Tua i om dan uh, i tate leh tute (khang sawn di te) i deihsak ding un, ka ki koih kei hi. Tu hun a, ei mah ( ei damsung) a di kia a, hing i hi kei uh chih phok gige lehang houh a dik zo deuh di aw chihna nei ing.