Thumapi:

Mi tampi leh naupang tampi te khan khiakna leh tomchik damsung a dinga mi tampite hinkhua kipatna bulpi Thanlon Convention English High School a kipat khiak a pan sawt kuamtak lamzang tak a ma suan in ki ngaknna tak leh zodawn a school omte lak a suanhuai leh kisaktheih pih huai school ahi. Hoihtak leh kingakna taak petmah a apai touh zel lai in 1997(unau ki melhaih hun) lai a pan hong puksia a, tunding nawn himahleh nidanglai Convention English High School bang zou nawn lou hi. Awle, mihing te lungput leh ngaihtuahna hong ki kheng zel in CEHS sukbei ding chih thu hong om mawk hi. Himahleh khaw mipi saptuam school it nu leh pa khenkhat te’ panlakna leh ngetna te ziak in JB tan(Class V) omsak thak in om a, CEHS hi nawn lou in Convention English School(CES) suak ta hi. CEHS a khanglian, pawl 10 pass leh ana kaikha tampiten hiai thu a ki zak chiang in lungsim tawng hon deng petmah a, hih theih om kei mah leh khatvei beek amun phak utna lungsim ah hong piang hi.

Lungsim a hongpiang te khatvei thu a sepkhiak theih ahih louh man in Pa Dalchinkhup, Pa Kaithianmuan, Pa Ginlian, Pa Thuamkhopau leh a dang mi phatuam ngai bangzah hiam ten’ pan hon la ua Meeting hon sam uhi. Hiai meeting ah School dinmun genkhawm hi a, huchi in Thanlon phak ding thupukna ki la pah hi. Meeing nih veina ah Thanlon dinmun enkhia a kuan ding kisepkhia a, Enkhia a kuante report dungzui in pan kila pah hi. Enkhe tute’n poimoh a sak te uh 1.CES te toilet bawl sak ding leh 2. CES  te Duster piak ding chih ahi. Thanlon Vehna neih na ding in meeting thum vei kinei hi. Minbei/min neilou a kholui vehna neih chih lem a ki sak louh ziak in meeting masa penpen ah THANLON VETERAN chi in pawl min ding ki tuaktak in   ki phuak hi. I Identity kepbitna leeng hi ding chi in President/Secretary chi a ki puak theih hi mah leh Inndongta dan in Thallouh, Thusa, Zawl, Tang-Au chih te in makai te hihna ding ki pia hi.Thallouh mang-N. Lalginlian, Punau-K.Thonzakam, Zawl-V.Thianpau, Thusa(Taw-Torawt)- Kaithianmuan, Pupi-L.Khaikhansong, Thusa(lai-aat)-Dalchinkhup Tombing, Tanu- Tunthang leh Chinpu.

Hiai teng a ki zohnung in Thanlon veh niding 12-15th July, 2013 lem kisa a, Pathian in lem hon sak pih ahi ngei ding a, tup bang in buaina bangmah om hetlou in programme a kigel bangbang zatzoh in om ta hi. Thanlon khua a pan khangkhia Rev. Khaikhansong, Field Superintendent, Manipur Mission Field, EBCC  leh Thongkhangin,Local Pastor, EBCC Mata te heutu te kiang ah Veteran Tour a tel ding in ngetna ki pia a, Heutu te’n leeng hon phal sak ziak un kipahtu gen senglouh kiba hi. Hiai kia a bei mailou in, Thanlon EBCC Divisional Superintendent  leh Local Pastor banah Local Upa leh Saptuam mipi ten a hih theih bangbangin hon ki thuahpih ua nuam ki sa petmah hi. Thanlon vehna hunsung leh thil hih tengteng Video Coverage ki bawl a, mipi et theih ding in hong om pah ding hi.

Kipatkhiakna:

Thupi: “Thouniin Lamni” chih thupi a zang in Thanlon khua vehna 12-15th July, 2013 a neih ding chih ahih mah bang in Lamka a kipan 12th July zinglam dak 10:30am lak vel in Pa. Kaithianmuan te inn, Siloam Veng, Bungmual ah Gari 5 zang in mi 25 vel kipatkhiak in om hi. Rev. V.Thangsuan in Thanlon Veteran te a ding in thumna hon neih sak hi. Hiai ni a kipan thei nailou teng gari nih zang in mi 15 vel mah 13th July zing baihtak in Thanlon zuan in ki paikhe nawn hi. Thanlon khua vehna a tel a tamzote a ding in Kum 10 phial pai nung a kholui vehna ahih man in kiphur thei petmah a, veteran member tamzaw te a ding in Thanlon  a tuailai hun hoih teng uh a zatbei keuhkeuh na uh ahih man in  khua muh kal ngak lah tak leh phur tak in khua zuan in ka hong kizui tou ua, Mualhoih,Chianglep leh  Santing khawkhung a Thanlon kigalmuhna mun katun ua ka et uh leh Manipur “Cherapunjee” chihmahtak tuh Mei in anakhuh a kamu thei kei uhi. Maruti Van te bang hatlou kasa thei mahmah ua,ka khua uh tunkal ngaklah tak in ka hon delh hehu uhi. Huchi in ka ngaklah uh Thanlon khua ka hong tung tou ua, huih diik zangtuam mah bang jejen in nakvang bang palh selsel hial hi. Lamzang takin kipai thei a, Thanlon khua 13th July, sun dak 12 lak veel in kitungkim vek ta hi. Thanlon a katun na ding mun uah Rev N.Tuanglang D/S Thanlon in thumna tawh hon na vaidawna a kipah na asang mahmah hi. Hi mah leh lungsim  hon dou mahmah khat ahih leh Thanlon khawnawl tuak lampi hoihtak bawl ahih lai a, mipi omna khua Thanlon khosung lampi ana siat luat ziak in lungsim ah bang chidan ahia? Chih ki dot teitei a ngai hi.

Thanlon khua tungphet:

Programme dantak a pai thei ki hileh 12th July a tunkim ding, huaini tawldam a, 13th July a Toilet bawlzohna leh Thanlon a tuailai om te toh games chituamtuam leh ki polhlim na tuamtuam neih ding chih ahi. Vuahzuk ziak in bangmah hih theih om lou a, Toilet kibawl zou man lel hi. Division Office Pucca building kavel phei ua, asung a lut-a 1993 lai vel a  Nameboard kibawl te khong en a Office sung kilepdan khong Video Coverage bawl di chi a ka nget uh leh Office hour ahih louh man in ka lut thei kei uhi. Saptuam Office hi a, Pastor leh Upa khongin a etnop nak leh Office hour hi sese kei leh leng etsak mai theihlouh adiam maw? Poinamaizen e, ei I ki inntek sak law na a min inntek a hon ngailou dan uh aka chi lel uhi

Nitak programme(13/07/2013):

Pathian vualzawlna Ann leh meh limtak aki zeek zoh in programme geel bangtak in 13th July Nitak programme EBCC Thanlon ah ki zang hi. Pa Thianpau in program hunsungteng hun-uk na-nna’ sem a, Programme nitak dak 6:35pm in kipan hi. Mipi 150 val kikhawm in zan sawt lam leeng phawk lou jen in kikhop nuam petmah hi. Pathian phatna la “ka gam uah nang vaihawm in” & “sa in Jesu itna lamdang” cih la in Thanlon lasiam lui te’n Pathian phatna la hon pi ua, mipi te toh kumsawm val painung la sak khawmna ahih ziak adiam lasak nuam zuazua mah leh ki zahtak tuah kawm sim a la-sa kabang uhi.

Upa te’n “innvai leh gamvai kibanglou” ana chih sek uh tangtun na leeng hi ding in, Lamka a Programme hoihtak a ki bawl sa, Thanlon khua ah hei lamdang zek ding a om man in Pa Kaithianmuan  in hon bawldik a, Local Chairman in hunpatna nei in programme ki zangtou hi. Hiai nitak in Nu Lydia(a lasak: khovel lungkhamna leh buaina te), Nu Ningngaihlian(a lasak: Toupa hon pi dan ka ngaihtuah) leh Pa Khampu(a lasak: Aw kei hongum Toupa) ten pathian phatnala sa uhi.

Kikhopna masapen ahih man in Pa Lalginlian in Vehtute pulakna mipi mai a hon nei a, huai zoh in Thanlon Veteran hong kipat dan leh Thanlon CEHS khangthu tamlou gen hi. A thugen khenkhat te ahih leh:

• Thanlon CEHS hon kipat tung in school chih om lou a, Biakinn sung ahGua (Bamboo) pumnih ki khih khawm in tutna ding in kizang a, huchi in class ki la zel  chi hi.
• Nitak a hong hih chiang in Petromax zang in mipi te kipun khawm zel in school mun ding ki lai/tou jel chi hi.
• School full fledge a hih na ding in thil haksa pi ahih dan leh, Inspection hong bawl mun petmah uh ahihdan gen hi.
• Thil omsa suksiat/sukbei kichi thil nuam lotel ahih dan leh a beisa tunding a haksat dan leeng gen hi. Thil suksiat/sukbei na ding a poimoh pen ahih leh thagem-thatang leh pilna nailou a lungsiamsia ngai ahih dan leeng gen hi.
• Mihing te Degree kibang chiatchiat hi mah leh Missions School a khanglian leh khanglian loute a khanlet (brought-up) dan uh leh a lungput uh tuam mahmah ahi chi hi.

Nitak programme hun ah Upa Thonzakam leh Upa Thangchinkhup ten Sharing hunzang uhi. Upa Thonzakam in a Genna ah Thanlon EBCC biakin a ki lam masak lai in Munphiah Truck dimkhat Imphal ah zuak ding in ki paw suk a, haui sum ta zang a biakinn kilam ahih dan gen a, Thou ni in lam ni chih pansan in thu saulou gen hi. Upa Thangchinkhup in tep leh muam a kikep siang a, kimawlna thanghuai tuamtuam te a kimawl lou a, pathian lam mah en jo ding in sharing hun zang hi. Thugen a zoh in a la deih mahmah “Muvanlai Bang in Gingtu te ...” chih a la gelh mipi te lak ah hon hawm in hon sak pih a, la a kizak zoh in  Local Chairman leh Dorca lam a kipan thupuan saulou in om hi. Toupa hon sinsak thumna “Ka Pa uh Van aom” chih gen in nitak kikhopna ki zou hi.

Nipini(14/07/2013):

Hun kinoh mahmah kal a Thanlon khua zin a ki hih man in, zing kikhopna dak 10:30 am a neih ding chih a hih zawkmah toh zingkal ki thou pah a, mahni utna leh deihna munte veh in sial-ek dendalh mah bang in zingsang baihtak a kipan khosung mun tuamtuam ah ki vakkual hi. Sappau in gen leng sightseeing a chih te uh hi peuhmah ding in gingta ing. Khosung bang leeng zing baihtak himahleh hulum mahmah zou hi. Hiai hun ah Upa Thonzakam makaih in Thanlon khawpi Khosak namun lui a vengluilam, tua kuamah om nawnlouh na, IB Veng, Khopiveng, Hanship veng chihte manawh in kavak khia uhi.Tanky sak a Pa Thongkhokam inn mun leh asak a Rev.Vungminthang, GeneralSecretary te inn munlui khong TYC Hall munlui khong ka va en ua, videocoverage kava bawl ua,Thanlon Higher Secondary munlui leh a konga Ginem kung abul chauh ana omta’ te khong, EBC  kiphuh khiak tung a Sunday skul kaina munlui te  khong kava en ua ka lung uh a leng petmah. High School tang a pan Lawibual taang lamkhong kava dak ua, IB mun lui leh akong a Pa Luaikhanpau inn mun lui leh British ten damdawi inn a lamna mun uh khong  video coverage kavabawl  ua, Khopi venglam ah 1975 vel a puankhui  Pu Hiltunglian leh Mahajon Pu Thangmeng, Pu Kamdou leh NTBC biakinn mun leh Hausapa Th.Chinzapau innmun luite leh akim akiang a inn omte khong ka va en ua, kalung uh a leng petmah a, anuam leh nuamlou aki pum hel khawm vek hi. Utna mun teng tawn suak manlou in ann nek a kikhop ngai ding ahih man in Innpi lam ka zuat chiat uhi.

Zing Kikhopna:

Thanlon khua kum tampitak om nawnlouh nung a Nipini kikhopna hun zang thei ding a Pathian in damna hon piak khotual te hi’n Kuanlam te hi taleh ki lawp vek zo ka hi ding ua Dak(bell) a hong gin phet leh biakinn ka tung kim sim pah ua kikhopna hun nuamtak in ka zang uhi. Kikhopna ahih leh zinglam dak 10:35 am in Pa Lalginlian,conductor, Hunpatna thumna nei  in programme kipan hi. Hunzatna ah Thanlon Veteran song leder te makaih na nuai ah hiai la te in Mipi’n Pathian phatna la sa kisa khawm hi. Laa kisa te ahih leh  “Toupa hoih hi, Toupa lian hi”, Van a pa aw nang kon pahtoi uh hi” leh “Thou aw ka kha kipak a om”  chih te ahi. Special no. Nu Ningngaihlian a pan-Pahtoina kei din khemna, Gensiatna lah I lawm hoih, Pa Khampu a kipan-Lunglel ken, Lydia a kipan-Toupa lemgel dan hih a mak ngei e, chih la te kingai khia a, mit leh bil tai sak in nuam petmah hi. Speical number te ngaih khiakna a ki neih zoh in Thohlom donna ki nei a, Local Pastor in latna nei hi. Hiai Thohlom ahih leh Upa Damzachin Galna ding a zat ahi. Sharing Pa Muangpu in zang a, Thanlon Veteran hong kipat dan leh Political based hilou a, School itna ziak kia a hong kipan ahih dan gen hi. Conductor     Pa Ginlian in Thanlon khua hong kaat(burnt) ni a thil omdan tamlou gen hi. 16th July 1997 Thanlon khua Vut leh Vai a suah ni himahleh hiai ni Thanlon a om nawn lou ding a ka hih man un Thanlon in tuahsiatna a tuah lai a Pasal hangsan hon na paisan sa te Upa Thonzakam makaih in Sunna hun kizang a, Pastor Thongkhangin in thumna toh sunna hun zohna bawl hi. Sunna hun zat zoh in Thugen kipan hi. Hiai ni a thugen ahi leh Rev. Khaikhansong F/S, Manipur Missions Field hi a, Thupi “Thou niin Lamni” chih pansan in thugenna hun zang hi. Thugen zoh in Conductor in Thanlon Vanglai a ARMY om te lak a saap om khat, 2nd Lt.,  a thuak hak dan leh Thanlon khomipi te zingkal khat “na khua ua Underground om ahi” chi in mipi sam khawm a ahon gawt dan gen hi. Thanlon mipi te a hon gawt zoh nung sawtlou in Pa Chinlam in taksa hatloh na ziak in hon sih san a, Vok Kaap Saap in amah gawt ziak a Si hi ding sa in ki suanglah lo petmah a, Neekding chituamtuam te pia in, ARMY Jawan te toh zahna sangtak pia in Pa Chinlam vuiliam a om ahih dan gen hi. Pa Chinlam ahih leh Thanlon khawmipi te lak a Zahna sangpen toh vuiliam a om masapen hi maithei ding hi.  Vok a muh peuh kaap ding chi a thu a piak ziakin  “VOK KAP SAAP” chi’n a min ding phuah sak jejen uhi. Tawpna thumna Upa Khamzapau in hon nei in nipini zingkikhopna ki nei zou hi. Hiai hun ah mipi 150 lak veel kikhawm ding a hisap ahi.

Sun Hun Zatdan:

Kikhawm tawp phet Sunnung hun Programme om ahih man in , kin leh buang a kisa in Thanlon Pioneer Camp lam vehna ki nei hi. A minthang Pioneer Camp a Mandir lak vel ki enkual  hi. Pioneer Camp tun phet in Dialkhai tan phaak utna lungsim a ahong pian ziak in Dialkhai tan ka tai suak uhi. Dialkhai ah Tipaimukh Road-NEC Road-Tuivai Hydro Project Junction ah sawtlou ka om ua, limlak te kila in Thanlon lam juan in ka paikik nawn uhi.

Sunnung Programme:

Dialkhai lam a kipan Thanlon tungphet Sunnung Programme zang ding in biakinn ka zuan uhi. Conductor Pa Dalchinkhup makaih na nuai ah nitaklam dak 2:45 pm a kipan sunnung programme kipan hi. Hiaihuna kikawm mipi 110 lak vel ding a hisap ahi. Ni a kai sim man in Pathian phatkhawmna ki nei lou a, Thanlon Convention School committee Chairman a kipan report tomkin ngaihkhiakna om hi. Report khenkhat te hiai bang ahi.

• December, 2012 in CES school phiat in om hi.
• School committee leh saptuam heutu ten Hq. ah ngetna nei ua, sawtkuamtak genkhawm ahih nung in JB(Class V) tan honthak in om nawn hi.
• Honthak ahih toh kiton in sinsaktu ding staff 6 lak in om hi.
• Tuni tan dong in CES Class V tan buaina om hetlou in pai thei jel hi.
• School Headmaster ding poimoh ahih man in Hq. ah ngetna School a piak bang un , Headmaster ding in Muanlal piak in om nawn a, Aman leeng joining report bawl zou ta . Hiai toh kiton in School Committee a Secretary hihna leeng Headmaster kiangah piak khiak in om ngal hi.
• Class a student om te data hiai bang ahi.

Class	No. of student
V	8
IV	4
III	4
II	6
I	10
B	7
A	8
Nursery ah	24
Total	71

Committee Chairman in report a bawl zoh in Headmaster pa kiang ah thugenna hun angkhak hi. Headmaster pan a genna ah, Thanlon Veteran ten a mun mahmah a  aki hoh ziak a kipak petmah ahih dan gen a, School a ding a hih pan theihtawp a pang ding ahih dan leeng gen hi. Headmaster in Thanlon CES a semte  pulakna leeng nei hi. CES a sem tute min te ahih leh, Ciinsonching, Nianngaihnem, Chingpallian, Ngaihmuang, Manthiannem leh Ginbiakthang te ahi uhi. Class ahih leh dak 9:00-2:00pm tan la zel uhi. Tu in CES in heutu pasal 2 leh numei 5 nei ta uhi.Report zoh ahih in Tangval Lianzamung Tonsing @Mumung Tonsing in a lungsim a avei mahmah thil tamlou genna sharing hun zang hi.

Sharing hun zoh ahih in Thanlon CES te kiang a van piakkhiak ding te simkhiakna leh latna Rev. Khaikhansong nei a, Pa Ginlian in exhortation speech saulou nei in van piakkhiakna leeng hon makaih hi. Laptop, printer, Football, Volleyball, Wallclock, Songbook, Oxford Dictironary, Exercise book, Duplicating paper, Xerox paper, Pencil leh rubber, Correcting pen , Duster leh van chituamtuam ki pia hi.Van piakkhiakna zoh ahih in, Thanlon CES school committee te makaih in mipi paikhawm te toh genkhawm ding in“Veteran-Damsawt hen”chi in slogan hon sam uhi.Veteran te’n Vok lian mahmah khat ki pua a, Thanlon EBCC saptuam toh hiai ni in annkuang umkhawmna kinei  hi.  Upa Khamzapau in ann nek ding dan tangpi hon puang a, huchi in nek khawmna lam kilut hi. Ann nekna hun ah saptuam mipi te’n amau kuang chiat in ne mah le uh Thanlon Veteran te nahtang nah in ann hon umkhawm sak ua, nuam petmah leh lunglen huai petmah in nahtang nah tung ah ann limtak leh vahtak in ki ne hi. Himahleh gillian omkha bangzah hiam ten nahtang nah zang a annnek haksa sa mahmah uhi.

Nitak programme(14/07/2013):

Conductor Pa Thongkhopau makaihna nuai ah nitak dak 6:30 pm in nitak kikhopna kipan hi. Thanlon Veteran te la-makai te makaih in Pathian phatkhawm na ding in Calvari mual Calvari mual, sisanpha sisanpha leh pathian ngaihlano. 375 na kisa khawm zuazua hi. Hunpat na Divisional Accountant in hon nei hi.Special number Pa V.Khampu-Muanna leh bitna,   Lydia-Vangam nuam I tun chiang in & Ka thuak ding Toupan a phal vui thei ka hilou, Tualzasawm-Ka mit aw, Ka mit aw bang na mu chih te ki ngai khia hi.Thohlom latna Upa Thangzalian in nei hi.

Huntawp nitak ahih man in Veteran lam a kipan hun zang nailou teng in sharing tomchik chik genna leeng kinei hi. Pa Jamkham in a genna ah, Hichibang programme hon saikhe tu makai te pahtak huai asak dan leh hichibang a kipolhkhawmna a om theih kipah huai a sak dan gen hi. Chingneihkim in a genna ah, Thanlon a om lai a haksatna atuah dan uh leh, Class 10 admission fee leh exam na ding a examination fee toh kisai a haksatna a tuah dan leh, a haksatna dawn zangkhai tu CEHS a heutu te ahih dan gen hi.  Sonkim in a genna ah, “Every child is precious”,  Teacher te mohpuakna lian petmah a, naupang tengteng a kibang a treat ding ahih dan gen hi. Mihing hihna ah Khatveivei mihing hihna hong suak zel mah leh naupang tengteng equal treatment piak ding ahi chi hi. Hiai ding in naupangte’ nu leh pa dan a I ki ngaihtuah chiang in naupang te I itna lian semsem ahih dan leeng gen hi.Pa Lianbiakmuan in a genna ah heutu te thu hon mang teitei un, tui bawsa ki luak kik thei nawnlou ahi chi hi. Pa Pumthansang in a genna ah heutu hih na ding a quality 3 poimoh te 3D(Difficult group, Different Group leh Disagree Group) gen hi. Aman a gen beh na ah School committee ten School authority te tung a khut sau a zan luat ching un decision lak ding subuai a, a hi thei tan a school authority te vaihawmna a school committee ki golhlou  ding in ngen hi. School Committee te ahih leh Thupukna laak ding leh gou leh gam thu khawng, issue lian deuh te a ki diah a, Chalk leh duster lei ding chih te a kigolh lou a, school authority te decision ding ahi chi in genbeh hi.

Sharing a kipat nawn ma in conductor in compliments hichin bawl hi.  School fee pe zoulou hi mah leng School managing Committee leh heutu te vaihawm siam ziak a, mi bang a siam hi kei mah leh hiai tan tung kahi, Convention school ana om lou hileh hiai tan ka tung khol kei ding chi hi.

Sharing hong kipan nawn leuleu a, Pa Dongkhanlal in a genna ah, nikum a kipan kikhop ka sawm gige tukum a hon tangtung sak tu Thanlon Veteran kichi  hong kipat khiak ziak ahi chi a, kipak petmah hi. Nursery kum 3 ana sim ek! ahih dan agen ban ah nursery kum 3 zil te leeng Teacher a pang thei ahih dan gen hi. Amah mah leeng school pu in pang khin ta hi. Aman a gen beh na ah Heutu ten a hon deihsak uh a hunlaitak in theih siam a haksa a, hon soisak na te uh hon deihsak luat ziak uh ahi chi hi. A sharing tawpna ding in “ a paina ding lampi ah naupang chiil in” chi hi. Tangval Kamchinmung in  1995 tan CEHS a kai ahih dan gen kawm in , heutu ten pathian thu toh a hon chiil ua, hahpantak a ahon chiil nate ziak ua hiai tan tung kahi chi a, I hih na peuh a chitak leh kuhkal tak a I pan leh lohcing ding ihi chi hi. Tangval Kamthianmang in a genna ah Shool leh Biakinn nupa bang ahi chi a, school lam a hatlouh chian saptuam naktak in hon sukha zel chi hi.

Tangval Kamthianmang in Thugenna a neih zoh in Deihsak hunpiak a om Local Pastor Songkhanthang in thu saulou gen hi. A man a genna ah, Convention School kia mi ki sek khiakna hilou ahi chi a, Convention School kia school kai theih na hi tuanlou, Convention School a kaichitchiat louh a le Mi khat suahtheih ahi chi hi. Aman a gen zel na ahsaptuam skul a kailou in leng Pastor ana kai/ching theih ahihdan leh saptuam skul lou a leng heutu/makai apan theih ahihdan gen hi.Thanlon iit a ngainate Lamka a hihdi thei lou a naihmutmut sang un hongpaikik unla teng khawm ni, siklong leh sikkhau khong lamang dingte ahihleh bel nongpai louh di uh ahichiin chialna hon bawl a, order hon suah top mai hi. Hiai thu a kizak in hon chou mahmah a lungsim leeng hon khoih mahmah hi. Himahlehmi I thuhilh a I awlmoh leh ei-leng mi etton theih ding a om masa phot in, Govt. nasem te nangawn I awilouh lai a Saptuam ki vaipuakdan(Mission nasem te a zi te uh toh sepna mun a om ding)  palsat a, belam ching om te khawng awlmoh huai masa zo hilou hiam? Chih hon ngaihtuah sak hi.Local Pastor in thugenna a neih zoh in L.Thongkhangin, Local Pastor EBCC, Mata in thugenna saulou nei hi. Aman a genna ah Nitak chiang in nungek heel pi bawl zo loua, laisim a om ki hi leh Khovel sepna lam ah sangpi tung ding kahi chi hi. Sunday School ana kai hoihlouh poi a sak dan leeng gen hi. Thupi, “Thouniin lamni” chih pansan thu saulou gen a, Lunglutna a saptuam I ki lamtouh uh poimoh ahi chi hi.

Thugenna zoh in Local chairman in mipi lungsim a om mahmah thu khenkhat hilhchetna hon bawl hi.
• Thanlon EBCC biakinn na it law maithei uh, Na pu/na pa te un ana lam khiak sa uh ahih ziak in na it law petmah ding uh chih leeng ka thei uhi. Himahleh 1997 lai a Galhang tampi ten I gam a ding a hinna ana piak na uh ahih ban ah, 16th July 1997 lai a Pulpit nuai leh Biakinn sunga thil omte tuni tan a Saptuam mipi te lungsim leh mitkha a abei louh ziaka ki lamthak mai ahi chi hi.
• Biakinn mahmah leeng a dengdel luat na om man in Hq. kiang ah huhna kingen a, huchi a lamthak ahi chi hi.
• Thanlon CEHS hong ki degrade na ziak leeng hoihtak in hilhchetna hon bawl hi.

Upa Khamzapau in kipahthu genna hun hon zang hi. Saptuam dang ten leeng I ki vehtuah na uh hong uap ziak un kipahtu gen a, Pulpit a Curtain kikhai Veteran Member Chingneihkim khui ahih dan leeng hon gen hi. Tuateng zoh in tawpna ding in La khat kisa a, Upa Thonzakam in Benediction gen in hunkhakna hon bawl hi.  Mipi kikhawm 160 vel ding a hisap ahi.

Gibang khenna kawlni hon suak ta(15/07/2013):

Ut thu leh deih thu hi nawn lou in Gibang khenna ding in kawlnai hong suak ta hi. Zingkal dak 7:30am in Thanlon Veteran in Convention English School a ding Toilet a bawl honna, latna leh  piakkhiakna Student te toh kithuah khawm in ki nei hi. Programme zat zoh in Student te toh sawtlou ki thuah khawmna om hi. Zing ann ne ding in ki pai a, Vante sa khawm in zinglam dak 11 lak vel  in Lamka lam hon ki zuan nawn a Dak 4:30pm lak vel in Lamka ki tung suk a Pa. Kaithianmuan te inn, Siloam Veng, Bungmual ah kipahthu genna  neih zoh in mahni innlam chiat ki zuan ta hi.

Muhkhiak khenkhat te:

• Nidanglai Thanlonhinkhua  bang nawn lou hi, khawmipi te nasep ah ki san mahmah ua, hun awl nei a om nawn kei uhi.
• Lampi bel nidang lai sang in hoih zaw, Himahleh Thanlon khosung teng Pucca road bawl louh in om a, Khaw mipi te gen dan in thu neitu lam ten Gamsunga suang lakna ding Quarry laak aphal louh ziak ua pucca road omlou ahi chi uhi. Amau a gen dan un khosung le Pucca Road in ahon bawl di-uam maw? Ahonchi ua lamdang kasa mahmah uhi.
• Nidang lai bang in  Pioneer te leeng a camp lui uah om nawn uhi.

Follow up mission:

• Naupang class chih a siampen te kiang ah kipahman kilawm huntawk piak ki chiam a, School toh kisai maban ah naktak a panlak touh zel ding ki sawm hi.
• Thanlon CES in football hau mahmah ua himahleh a-pump na ding a neihlouh ziak un, Thanlon Veteran member Unaupa Lianzamung @Mumung Tonsing in Environment Friends tungtawn in football pump na ding pia hi.
• Unaupa Thangchinlam in, Toilet hoihtak nei mah le uh asung a zat ding Bucket leh Toilet Brush poimoh ahi chih ana mu khia a, pau sese lou in pe-geih hi.
• Unaupa Kamchinmung Tunglut, Thanlon Veteran in Thanlon CES naupang teng leh Staff teng a ding in Health Insurance hunlem masapen a bawlsak ding chih leh
• Rev. Khaikhansong, Thanlon Veteran Member  in Toilet nuh ding rong/colour pia hi.

Pathian kiang a kipahthu genna ding leh ngetna ding te:

• Buaina tuamtuam tuah theih himahleh buaina bangmah om hetlou a Programme gel bangtak a zoh ahih man in pathian kiang ah kipahtu genni.
• Thanlon EBC saptuam thumpih ni.
• Thanlon CES a semtu te lunglut, kuhkal leh damtheihna hoihtak toh siamsin naupang te lai a hon hilh theih na ding un thumpih ni
• Sepkhiak ding a ki chiam te sepkhiak a aom theih na ding in thumna ah phawk ni.
• Van chi tuamtuam hon thohkhawm heutu te leh mi kiphal te pathian in tampi in vualzawl hen chih I deih leh I thumna hi hen.

Hiai Report ahih leh thukigente a pan lak sawn ahi a, hih diklouh leeng om kha maithei ding hi. Thuchian kimzo thei ut I om leh Thanlon Veteran, CES leh EBCC thuzak ding in kon ngen hi.

Repot gelh tu:
Lianzamung Tonsing @ Mumung Tonsing
Thanlon Veteran Member