Neulai skul kai tung (1960 vel) a suanglai kizang, gelhkhelh khak chia nulmang; abula panthak zel. A nunga pencil a gelh nawn. Huai leng suanglai a gelh bangdeuh a nulmang theih.Khedapkaih(slipper) gui khong nangawn in nulmang thei. Pawl khat ( Class I ) apan Kolom a lai gelh ta. Laituibawm ( Inkpot) honsa dohkan tunga koih, kolom a sunga diahlut zel; khatveia tam kigelhmanlou, diah zihzeh loh theihloh. A khen chia laituibawm kipuk, laitui neihsun teng bawgai vek. Kolom hiam deuha lai I gelh leh laipek kaikek kha thepthup. Hun hongpai zeka ‘Champion’ chih fountain pen kizangta. A hoihlo i neihkhak leh a tui buabua se,kizen taktak theihloh. Lamka leh singtang khopi ofis khonga laisukhawl (type writer) a laisu/laigelh va mukha, thupi sa lua; singtang khawneu a hahip zena genkhop pha. Hiai bang teng khantohna a zong gelhkhelh khak om leh alai khek, gelhthak teitei ki phamoh. Hun bei, sum hek, thathawn; thil teng khawlo vek.
Khovel khangtou zel, ‘computer age’ a chih ua kilut, laigelh na dia computer/laptop kizangta. Gelh khelh/diklou om leh laipek heklo, amun leng kiamtuanlo a kikhek/kibawl lem theita. I zatkhak tung banga I khoih khak na pen ki theitumlo a na mang duam hiam meltheihloh hong kilang dudup ding khop na om uh. Nungak maingal loh hel mah kibang. I khoih khakna peuh a ‘sa-huat’ ahi kha diam chih lau a kiveng khop. I nel deuh nunga bel zi/pasala neih theih ding khop a maingal huai na hi phing.
Zosuan mitaima khopi tuamtuama nasep nei leh siamsin a om mahni insung hiam sepna muna computer nei ten hun-awl zat kawm, tamnem nektheih nek sung; sun singpi nou domsa a mimal lungsim in a ngaihtuah, mimal muhdan mipi-vantang adia pawmtak hiin hikei taleh hon sunkhia ua,huihkhua tawna hon khahkhia uh. A gelh peihlo ichi diam a ngaihtuah ngaplo amau sanga thadah zaw ten zalbawl taka thutak nek a na ne teitei. A khente thugelh ngial kingakna taka na pom tinten. Zing singpi dawnna hotel leh mipi punkhawmna muna mahni khuak a omsa thukkhiak a na ki thukkhe zaw mah. Mi taima kuahiam in a hun-awl zat kawma mimal ngaihdan hon sutkhiak pen mipi ngaihdan bangzena thudik a na pomkha vanglak ten sih ngama kigum ngam thepthup.
Thugelhtu in a thugelh in koilam ngim, kuate ngaihtuahna ah bangchi in na asem dia chih limtaka ngaihtuah detdetlo a amah om muna a ngaihtuahna a piangkhia awlsam taka a hon sutkhiak pen khenkhat adia thautang lauhuai mahmah suak thei mokmok ahihdan bang zong sut/gel tham ching. Thautang in a kapkhakna mun zila a hoih leh hoihlohna mi dang in genkhop-thuakkhop sa uh. Tuapen lung-gel detdet a sui tuak mahmah. Lehlam et chianga bel mimal dikna siksan mite adia hoihlo omlo chih hi nawn. Huai pen nidanglai pau a ‘thiangzau’ kichi. Ki sahkhawmi sak tampi ten ‘thiangzau’ kichi a lauhluat hun uh om ngei. ‘Freedom is not free’ chih bang kuamah in ki uksak nuam non phalo soplai.
Hun kiching nei,khuak kidaih, taima taka gelh mite’n na ‘game’ uh hon khahkhe zelzel un, a thadah te’n lunglut takin ka ‘play’ zom zel d’u, mataw. Tualah khantohna lampi zuihna chikhat ahi zen a…..