Cyclone nung di chih agen ni un, khua bang hong pha thepthup a, “A Cyclone Mahasen gen un ka samzang le mutling zoukei e”, tangval Thanglianmang in achi hial hi. Ama ni tan a vuah kalnih bang zuden sim himahleh huaini in nisa bang a hong hoih nawn zawzen a, a lau a dawr khak hial a inn omte bang chawhkha daihdiu aka le, chihsim in om hi. A nitakin ka lawmlui auto pute khat in hon phone a, “Thang, tuni kalauhdan aw, kholak le vakkhe ngamlou, inn a ka kikhumdet hiven, auto le service lou top, tua bangchi genta uh a?” hon chi a, kenle “DC pa’n (DC in-charge) lauhthong huai nawnlou, eilam hon peelta, achi a, Burma leh Bangladesh a nawkzek chihlouh Mizoram le baankei,” ka chihleh , “E! Huchi ahihleh ahoih vele, Thangchin taang in ana dal hinteh maw, lungmuan huai e”, hon chivanglak hi.

Katheihna tan in, Pathian vangletna leh hehpihna zal in tuni tan in ei singtaang gam ah cyclone a nungkha naikei hi. Nidang a huihpi nungte leeng local storm khawng ahi deuh diing uhi. Bay of Bengal tuipi apan cyclone in a hon nuaibatna di’n bel tua Mahasen dan a hong lampai di hileh Burma leh Mizoram a nuaigawp masak ngai diing hi. Tunitan tadih in local storm lauhuai zaw suaklai hi. Vangphat huaitakin huihsia vuahsia ei khang ah chihtham I thuakkha kei ua, Cyclone Mahasen kigenma vuahzuk sawng a huih leh gial in inn bangzah hiam anuai gawp chihdante lauhuai thamthei bangzaw hi. Cyclone in hihmoh neilou ahihna ah, ahong nungbaan hetkei diing chikei mahleng, patauhluat pah gekgawk diing hipahlou hi. Patauhluatna lam a kisukkhelh theih ahi zawmah hi. Burma a Muslim Rohinya refugee bangzah hiamte le ahun tunma ni a cyclone taisan a munbit delhte le tuitung ah a tuanna long uh a kilep a,  mi sawmli vaal asi daih uhi. Ataikhe utlou mi a singa simte a omna munmah ua a om kinken ualeh, cyclone in nawkkhalou a, bitdaih uhi. Nokkha hileh amaute’ dinmun lauhsak huai khiakdan bangtuh puanbuk se nimnem a teng ngenta ahi zawmah uhi. Himahleh amaute’n bangmah ka chikei diing uh chiin akimuang ua, a kimuan bang un a suakta uhi. Eite Pathian thu awi ngen ihi ua, himahleh I kimuang zoukei zawsek. A khenchian I thumna nangawn I ginglel a, Pathian I muang zoukei. Na ginna a letnak leh huai mual kiang ah kikhin in chi lechin a kikhin mai diing, chih Laisiangthou gen hilou amaw?

Mihingte I mawk patauh gamtat lawkluat chian le akhen chian eimah kisubuai thawnlel ihi. Hindu mite sahkhua hun poimoh ah Ganga leh Yamuna lui khawng, Benaras khawng ah a lomlom in ahoh ua, kiphut buaina lakah mi tam pipi a sihloh sek uhi. Mica leh Medina thumna mun a hoh Muslim te le huchibang thou in tam pipi asi uh. Mihing in lampi nih teeldi inei a, koizawk teel di ahia chih theilou in I hamhaih khanaak. Akhenchia I teelkhial kha zawmah a, lammam leh tangdia I gintak lamphok leh tou ana hikha zawmah a, atawpna lamtuh haksapi a phut angai zawmah hi, chiin Sapte’ lavui gelhtu’n ana gelhkhinta. Huaiziakin deihteelna zatsiam I damsung in a poimoh mahmah a, huaituh mihing te’n I hihthei kei a, I biak Pathian hon ngaihtuah sakdi ahizaw hi. Hiaikaal theisiamlou in ikipal buai ua, eimah hihtheih isa uhi. Kipilsaktak in I om ua, kitheisak takin thu igen naak uhi. Kisathei takleh kilalsak takin I gamta ua, I theihlouh kaal in hon siamtu Pathian chou (challenge) gige ina hikha thei uhi.

I khopi (town) neihsun uh Lamka ah gendiing a beimoh kei a, soiselna di a tam deuhdeuh a bang zawsop hi. Tampite tuh I omom in I omom thei a, I mummum in I mummum thei hi. Hoih vanglak! Himahleh ngaihtuahna khuak neizekte aa di’n bel hi mahmah lou, genlouh theihlouh, a kolok dilah omlou, bawlhoih zawktheih dilah om tuanlou in, hun lakloh takah I ding uhi. (A theichian utte’n ka article suahsa ‘I Kisaktheihpih mahmah I Lamka Khopi uh’ chih na simthak him un). Hiai tuh transitional stage akichi hi. Cultural, political, economic leh social transition ahi vek hi (na theihbehna di’n ka article, ‘Feudal Society ah I Dinglel’ chih na sim lechin). Himahleh tuchiang in khotaang bawlhoihna dia pan lathei leh khuaknei taktak, siamsinna sangpi mahtoh kipan ilak uah a hong om zekzek ta a, hiai hun lakloh I paikheng kina di’n huchi bang makai leh tuailai I tasam petmah uhi. Amaute’n nam changkaang leh pil hon suahpah thei uhi. Amaute’ ziakin ei mi’nuai ah kuunlou in, ei a gamnei mite’ nuai ah mi hong kuun zawdiing uhi. Etsakna di’n, tulel dinmun in ei a tualsuak mite vai mahajon te nuai ah I kuun uhi. Amau a vandaak ua, ei anuai uah I hak, amai uah I dakngam mahmah kei. Himahleh nam pil I hong hihchia’n Mizoram bang in I dan (regulation) nuai ah amaute’n sumsinna (business) leh a dangdang a neithei phet diing uhi.

Khalam patauhna thawm ngei bangzah veihiam ina zakhinta a, huaite tuh a dikin tangtung kei mahleu, thil kikheng leh hun kidanglam bel a om chiat hi. 1993 danger point ana kichi a, I Toupa zaw hong paihial thahah kei, himahleh huai kum apan I district tuh district buai ahong hita. Nitengin buaina kisot hulhul. Tuni chiangin mulkimhuai pipi a thah leh luang kimu niteng tanchin bu ahi maimah ta. 1993 ma in bel I district tuh peaceful district ana hi gige. 1992 apan Naga gaal ziaka unau Kuki te a hong lut uleh, milip le kibehlap hingei diing ahihman in, milip I tam dungzui in sualna le pung hithei toutou hi. Akhente’n amau ziak a kibuai chiin amau kia i piakbawl khadek sek naak uh. Himahleh a hitak kuaman I suichia’n kha kholkei. Inn leh lou tan a khitui naptui toh luang tampi kikham a ahong galtai un leeng, ina panpih (material help) kholkei uh, relief camp khatmah leeng ina bawlsak kha kholkei uh abang. Amaute musit in (hehpih zawlou in) ina huatbawl maimah ua, Government lam apan lah bangmah muhguih diing anei kholkei uhi. Kinepna bei toh kibang a a omlai un, gaal (war) a huh malak a Kuki le ina kichih ut louh behlap uhi, Kuki ichih min tak hilou Zomi chih dikzaw, Zomi ikichih diing uh ahi ina chih saan laitak uh ahi zawmah. Zawnkhaalna (poverty), tuambawlna (segregation), innmun det neilou (no permanent home), phuba lak utna nei a omlaitak (feeling om revenge), lungtang khauhgawp chihte a a om hun uh ahihziakin eilam le hon nawk khawmkha uh zaw ahi peuhmah diing. Huchiin awlawl in 1997 buaina tuh hong kaita.

AD 2000 kum leeng khovel bei kum ahong kichi a, computer teng leeng nna semthei nawnlou khop a mitvek diing, computer thilhih theihna in ma sawnthei nawnlou diing chi khop in a hong kigen man hi. Kum sangnih baan tuh I mitkha inle I mubaan takei. Ahi a, kum sangnih baan gaalkai theidia I kikoihlouh lai in, kum 2012 maituah pahta diing I hong bang a, kum 2012 chia leitung banghiam sol (Nibiru) dang in phukha diing a hong kichi nawn leuleu hi. Himahleh hiai leeng a hong beinawn a, kum 2013 ah I lut gaalkaai ta. Bangmah khovel tawp diing toh kisai in achiang zaw omkei, huai hialdi’n le gingtute’n I gingta thei bokkei. Himahleh banghiam a kikhek lamdang bel a huih a diktheih in hong om veve. Kum 2000 apan khovel sezot a, nikum 2012 apan hong uang sem hia theih I om. Hiai hi koilai peuh ah ahita, leitung ningkiu ahle ahuchi teita thou. I singtang khuate le kum 2000 nung khovel theihna leh khanna in a baan vek a, batlatna anei nawnkei. Phone leh TV natawm a tungthei vek, tuailaite khopi ah a kikhinlut vek uh. Khota apan khopi ah I kipemhuan. I khotate denchiang a lawi diing abangta. Khotate le keu in tul gawp. Khovel neih-le-lam (materialism) te’n kilchih baanta. Bangkim atawp a tungdekta. Nungchiang in theini, avek in theini, chihchu a hong himaita diing. Hun nanung petmah zaw ahita ve, ka chichi hi. The terminator stage ah I lutdekta sin ahia? Robotic age chih bang le I mabaan di hileh kilawm, Holy wood in khovel mabaan di thiltung lamdang pipi film tampi mahmah a ginthu uh bawlkhe zawmah uh. Ka chizau, kei lau ing, chimai chiam le! Beita, kichai vawt zel e!