EI LEH EI KAR AH: “IMAGINE” - Na Ngaihtuah Ngei Hia?
Hiai laa kazak apat in nalh kasa mahmah mai hi. Naupang lai pek in kana za kha tham ta a, inn ah homework hih kawm khawng in Radio ah Western music ka ngai kawm sek a, hiai laa a hong pai khak chiang bang in zuihtheih zuihmoh in kana zui ek-ek sek hi.
Ahia, hiai khovel ah zaw thil bukim a om kei chih I thei chiat uh. Thil a hoihna le a om a, a siatna le a om tham. Thilkhat peuh a hong piang khiak chiang in a hoihna leh siatna a nei tuaktuak sek hi. Huchi bang bok in hiai laa “IMAGINE” bang le a gensia ut ten a gensiat na di uh a bei kei a, internet khawng ah I et leh a gensia te gen dan bang dik mahmah zel, a Bible chang teng toh hon gen khawm chiang ua dik sak luat in a om sek hi. Himahleh a thu hoih sa a phat leh pahtawi ut te a ding in le gen di a bei tuan sam kei. Ken zaw a thuhoih lam in ahi ka hon gen pih daih sin.
Tulai khovel huihnung dan ichi hiam, a bouruak a dik nawn kei chih le kua teng in I haih het kei uh. I kiim I kiang ah thil tung te bang, pawlpi leh pawlpi kitheihsiam louhna te bang, nam leh nam kidou na te, gam leh gam kidou na te, neih leh lam ah kikhiat luat na te, a zawng leh hau kikar thu te ichi hiam I ngaihtuah chiang in lungtang a na thei mahmah mai a, himahleh eikhawng va gen a le phatuam di le om lou in ka thei. I va gen ziak a phatuam di hikei mah leh I lungtang a I puaknat mahmah I gen khak chiang hiam in a puak bang le a zang tuan deuh se hi.
Awle, IMAGINE laa in bang gen nei hiam chih en suk le maw…
Imagine there's no heaven
It's easy if you try
No hell below us
Above us only sky
Imagine all the people living for today
Na ngaihtuah ngei hia..? A laa thu ngaihtuah himhim sin di le, vangam hiam gawtmun hiam om lou bang hi ta leh, sahkhua min a kipuak chih om lou hiam aihkeh bangchi bang sahkhua ngaihdan a dik pen chi tuan sam lou in, gawtmun I chih om lou in, I tunglam thangvan kia om top bang hi ta maizen leh. I khalam hinkhua a di lungkham ngai lou in, I niteng poimoh mu thei zel in om top bang hi ta zenzen le.. hichi bang hinkhua na ngaihtuah ngei himhim hia…???
Imagine there's no countries
It isn't hard to do
Nothing to kill or die for
And no religion too
Imagine all the people living life in peace
Ngaihtuah beh lai di le, hiai khovel ah “kou gam, nou gam..” chih om tuam lou in leitung mihing te hing khawm in, nungta khawm bang hi ta zenzen le.. Gam leh gam kituh na te, gamgi kantan a kidou na te, gam kilaksak I chih te, sisan kisuah a kithah na te om lou hi ta zenzen leh.. Sahkhua I chih te om tuan lou in, kou sahkhua a dikpen ahi chia kuamah kisel buaina om lou bang hi maizen leh. Khovel mihing tengteng lungsim khat nei a omkhawm dialdial bang hi maizen le.. Hichi bang khovel na ngaihtuah ngei hia..???
Imagine no possessions
I wonder if you can
No need for greed or hunger
A brotherhood of man
Imagine all the people sharing all the world.
Ngaihtuah lai mah..Hiai khovel ah, “Hiai nou a, hiai kou a…” chih tuam om lou in kikop bang hi zenzen ta le. Hausa tuam, a zawng tuam om sese lou in I thil neih tengteng uh kihawmrual in hingkhawm dialdial bang hi le.. duh-amna te, huaiham na te, angmasialna te’n mun nei lou bang hi maizen leh. Khenkhat te hausa a nui riahriah, khenkhat te gilkial dangtak, niteng phial a meikuang paisuak gige a mau gige te om lou hi ta zenzen leh. Mihing teng unau bang a ki en in, bangkim kihawm rual in, bangkim lungtual tak in I neknek uh ne khawm in I dawndawn uh dawn khawm dialdial bang hi le.. hiai khovel ah, “kou a, nou a..” chih bei bang hi hen la..hichi bang khovel hinkhua na ngaihtuah ngei himhim hia..???
You, you may say
I'm a dreamer, but I'm not the only one
I hope some day you'll join us
And the world will live as one
Ken maw hichi bang in kana ngaihtuah sek a, nou zaw suangtuahna khovel, lamet phak louh khovel hiam, ngaihtuahna lohching ni om ngei louh na mun ah om bang in na hon ngaihtuah maithei di uh. Himahleh hichi bang suangtuahna khovel ah teng om sun ka hih tuam ka gingta kei. Hiai ka suangtuahna khovel bangchik ni hiam in a hong tangtung ngei di. Hiai khovel ah zaw sisan suahna, sa leh gal a kimat na te, gam leh gam, nam leh nam kidou na te, sahkhua leh sahkhua ki tuah louh na te. A zawng leh hau kikhiat luat na te bei thei a’ a om a, michih lungtuak tak a I tengkhawm dialdial hun uh a hong tung ngei ka lamen ahi.
Kum 1971, zingkhat chu English Musician, John Lennon in a tenna inn England, Ascot, Berkshire a Tittenhurst park estate ah, (a bedroom ah), “Steinway” piano tum kawm in laa a phuak/gelh hi. Huchih lai in a Zi’ Yoko Ono in a laa phuah/gelh lai tak ana en gige hi. Hiai hun laitak in a laa phuah chu a laa thu teng leh a kaih teng a zou pah ngal. Huchi in khovel ah laa minthang te lak a khat “IMAGINE” chih a hong piang khia ta.
Imagine laa ahih leh John Lennon laa phuah te lak ah a zuak khiat tam pen ahi chi leng a dik hial di 
e. A laa thu in ahihleh khovel mihing te kituak tak a a omkhawm a deihthusam leh gam leh gam kibuai te, sahkhua leh sahkhua kar ah buaina om te, a zawng leh hau chih om tuan sam lou a, mihing tengteng kituak tak leh tan kibang a hinkhawm a deih thu a gen hi. John Lennon a hihleh Communism lam deih/awn lam hilua kei mah leh a laa in Communism Menifesto chiangtak in a puangkhia thepthup hi.
John Lennon leh a Zi’ (Japanese te) Yoko Ono in Imagine chih Album amau inn, Tittenhurst Park, England ah, amau Studio mah ah May-June 1971 in ana record ngal uhi. Hiai laa a release zoh phet un (chi zozen le) Billboard Hot 100 ah No.3 na a luah tou ngal hi. Huchi in UK ah a hon release nawn ua, a kum mah November kha in No.1 ah a om tou ngal hi. 1.6million val a zuak khia uh chi tel uh eiveh, lawmlawm mai maw…ei lawi Album zuak khiak zah toh chu tehkak vual hilou chio. Hiai laa a ki release apat sim tel in laasiam tuamtuam mi 140 val in ana khumthak hiam aihkeh ana cover ta uhi. Joan Baez chih te, Madonna, Niel Young, Elton John, Queen chih te vel in le ana record in ana sa kha tham uh chih dan eiveh. Award a ngah tengteng I gen seng kei dia, himahleh Grammy Hall Of Fame ah laklut a hia, Rock and Roll Hall Of Fame ah 500 Songs that Shapped Rock and Roll ah tel sak ahi bok hi. Guiness World Records British Hit Singles Book in a hihleh Second best single of all time in ana puang top a, huchi bang bok in Music lam I gen khak chiang a gen kai a om teitei sek Rolling Stone magazine in 500 Greatest Songs of All Time ah No.3 na ah ana koih velvual uhi. Rolling Stone magazine in “IMAGINE” chu John Lenon in Music Khovel ah a thilpiak thupi pen ahi ana chi hial hi. Gold Radio in le “Gold’s Greatest 1000 Hits List” ah No.3 na ah ana koih tei eichu. Hichi mai a bei hilou in, 1st. January’ 2005 in Canadian Broadcasting Corporation in kum 100 sung a khovel ah laa thupi pen in ana puang hial hi. US lam ah le ana duai lou sam, Recording Industry Association of America in 365 Songs Of The Century ah (History ah) laa poimoh mahmah ahi chih ana puang thraps hi. UK a Virgin Radio in December 2005 in ngaikhia tute laa deihpen No.1 in ana koih ta uhi. Hichi bang in gam tuamtuam ah a lar dan I gen seng kei di.
Imagine ahihleh I gensa mah bang in, a hihna neuhneuh te leh a laa ana sa thak te gen le I gen seng kei dia, khovel in “PEACE SONGS” chih dan deuh in khovel pumpi ah mi ngaihnat leh ngaihsang, mi tampi ngaihnop ahi pen mai hi. US President (39na) Jimmy Carter in, “ Khovel gam tuamtuam ka zin kha tham a, gam 125 val ka hoh kha ta, ka zinna lamlam ah “Imagine” chu a gam uh Laapi bang mai in a sa ua, laa lamdang mahmah leh thupi mahmah chu ahi..” ana chi hial hi.
9th. October, 2010 in John Lennon, kum 70 Birthday ah Liverpool Singing Choir ten John Lenon Peace Monument chih a om, (Chavasse Park, Liverpool England ah om), a honna ah “Imagine” a sa ua, hiai chiah chu a thupi takzet e…
Theih ve maimai din aw, New York City a Time Square ah kumthak lai a “New Year’s Eve Ball Drop” a chih mai uh kipolhlimna a neih sek na uah kum 2005 apat in hiai laa “IMAGINE” chu laasiam ten ana sa zel uhi.
You, you may say
I'm a dreamer, but I'm not the only one
I hope some day you'll join us
And the world will live as one...
“ Si khat, sa khat,beh leh phung, pi leh pu, ni leh gang, sung leh mak, veng leh pam hihang, unau khat hihang. Sim leh mal kikhen kei ni, sim leh zou kikhen kei ni. Biakna pawlpi kikhen nawn kei ni…”
- Thawnkham