Amasapen in, mihingte fangkimlou leh bukimlouhna gam a khosa i himan un huchi zaw deuh leh,khachizaw deuh leh,chih omlou theilou ahihman in ken huchi zaw deuhleh ka chihte kon tak lang hi.Ahihleh, insungte, i khotang leh i saptuamte achidam na hiam,chin ki dongle hang, ”hoih lua e!” achi kitam ding in agintak huai kei. Huchi hinapi a, hoih mah e,gensiat leh demna ding omkei i chih teitei leh bel zuau gen ki hi lel ding hi.Pathian thu hong lut kum 100 bang ching sam ta,khami lua kisa in Biak inn khoh laam ta durdur hang! Lah gah hoih muh ding insung,khotang leh saptuam ah omlou Pathian nei nam lah kichi bok si!

I saptuam sunga biaknate  enzual ta le hang, kha leh thutaka Pathian biakna mun abat zawh louh hun tam mahmah hi. Milian milalte maivilna mun bang zaw ta hi.Ahihkeh, social gathering maimai abat hun tam mahmah. Huan Biakna bang ahihzuazua leh nuam sa lel mipi,thutak lunggulhlou, ki tam mah mah hi. Thugen bang nuihtheih nang atam leh nuamsa,huchilou a thutak lungulhna himhim omlou chi leng,i gen khial khol kei maithei,gen khelh leh lah, Ka zuau! Pastor / Upa/ Decons/ Elders tam zaw tenlah Pathian thutak ahi bang bang a gen ngam nonlou,mi kua hiamte lauhna ziak iin. Pathian thuhing  bawlhoihna ding,tailhilhna dinga zat ding hinapi mi kua hiam in dikloutaka thilhih aneih chiangin,kuaman diklou ahihdan gen khe ngamlou. Azawng deuh,apaulah deuhte ahihchiangin bel,i dawm het kei a hiven!

Ahitaka gen in, adiakin Pathian nasemte bang in, khentuam neilou in Pathian thutak mah gum tinten in hangsantak in ding  trentran maile uh,mite zahna angah ding ban uah,ki ngaisang in Pathian bang khop hial in kitawisang ut ding hi.Mi upa lam deuhte thugen khenkhat izaksek tuh hiai ahi:Nidanga Pathian nnasemte Pastorte  or Pathian thugente, khosunga  ahong lut chiangun kingaithupi pet mah thiltengteng thei din ki koiha,atheihlouh kal in bang hiam avante khat, va khoih(lawng)le hangle hon theikhe thouthou dia kigingta, chih hitel dan hi.Lei leh van siamtu Pathin nnasem chih bang zaw, ngaihthupi huai in,uang gen le hang,biaktheih hi le uh,biaktak zet ahi uh.Annasep uh aneitupa thupilua ahihmaimah chia!

Huchi bang khopa,miten pastorte or evangelistte ana ngaihsang  mahmah ana hi uhi.Himahleh tulai in bel ahuchi nawnkhol kei a  hiven.Himahleh,semtu muanhuai Pathian zat,zahtak huai pipi bangle om thou sam hi.Ahihleh,bang ziaka miten Pathian nasemte muniam gawp uh ahi ding, i chihleh,aziak diktak chu Pathian nnasem kichi mah le uh,amauten Pathian maivil sanga minhing mai avil zawk ziak uh ahi. Asawl Pa nna semkha nonlou a, minhing  nna asep zawk khak ziak uh ahi.

Bang hiam salam a hamphatna ding en kawmkawma Pathianna i hon sep chiangin bel mihing mai villouh theihlouh khat hong suak hi.Huchi banga khutdawh kawmkawm a Pathian nnasemte i muh chiang in,hiai pa hiai nu zaw Pathian apan ahi kei,chih achiang mahmah a,i ngaithupi law vak kei hi(1john 4:5).Laisiangthou in,muhsitna tutphah a tu,achihte himailou di hia!? Huchibang Pathian nasem or gingtute amuhsit huai chih phet hilou in,khutdawh toh kibanglel hi.

Kum bangzah hiam paita in,yahoo messenger a christian chat room kichi ah ka na lut kha zela,huai room ah gingtu mitampiten Pathian thu kikumkhawm zel in hunte kizang liam zel hi.Huai room sung a i lut chianga aniinhuai mahmah khat tuh” Kei india gam a pastor or evangelist ka hi a,sum leh pai ka kitasam a,hehpihtak in non panpihthei diam”chih private message ahi.Hichi bang private message ka mu mun mahmah a,anei hile zaw panpih ut huai thou mah e! Midang  tenle mu mun sim ahihtuak ua,i lawm(mangkangte)te toh i kitheihtunga ,”kei India apan christian ka hi”i chih chiangin sum deih maw? Ahon chi uhi.Christian i hih hon kipahpih mahle uh,sum deih ziaka christian maimai hinteh,chia ahon gim neih ding uh agintak huai veve hi.

Huai ziakin, Pathian nasem kichi ngal,mihing maivila buai den, i chih khong zaw sum leh pai ahihkeh bang hiam hamphatna deihziak ahi lel hi.Huchi bang mite ziakin,Pathian nasem dia,gilkial dangtak khoksaloua,pang mihangsante nasep nakpitaka adal khak agintak huai.Mihing maipha zonluatna in siatna apiangsak zaw tham!Maivil a omten dikloutaka athilhihte,sualnate angal deuh deuh ua,i khotang, i saptuam leh i insung in athuaklawh naknak.Hiai, huai hih leng saptuam leh khotang in bang gen ngam ken teh,chia phaze sa a ut dandan ham,chih bang tuh thil om thei tham ahi.Thohlawm leh thilpiakte a thoh un ape zou ua,huchih dungzui in amaule kisial in om phenphan sek uhi.Athohlawm thohte uh lah koi apan side income hiding chih lah suilou,anekguk tampeuha ,tam athohtamsem leh kipahpih in amai vil chihtakpia vil,chi ou! Mihing maivilna milim biakna ahihlam lah phoklou or I maivilte krist mel liahtu ahihlam phok lehle kitheihmoh bawl teitei,guigui tel!Himahleh,huchi kawmkal lak ah, akipahhuai khat tuh bang hi hiam i chihleh,mihangsan pastor/evangelist/upa/elders/decons bang zah hiam,thutak hangsantaka gum a,laisiangthouthute a mite sal leh taingam ki om sam a hi.Atamkei chih manthu.

Hiai article gelh laklawhlai, kisuhalh zual ding chia konglama pawt khia inn ka lut nawn leh inn nunglam ah ka lawinu(my lovely wife) toh pasal khat ana kisel ek ek ua,ka lawinu bang meitei pau siam lawlou in ahang bualbuala,kenle bang thu bang laa hitazen ding hiam chia ka va paiphei leh ka bathroom uh bula sintex(tui kholna)tunga  huai pasalpa anakahtou a,electric bulb(CFL)ana tolkhia  a ana kuah mang hiau ahihdan ka lawinun ahon hilh hi. Kenle hoihtaka huai pasalpa ka et leh a smart mahmah mai a,hiai electric bulb them neng khawng gu ngal ken teh chin hiai pasalpa ka houpih hi.Bang thu toh kisai a hiai ka inn nunglam hong om na hia ,chia kadot leh aman,”kei ka hihleh Pathian nasem ka hi a,laibu tuam ka pua a hong ensak ding a kisa ka hi”achih kawmkawm in laipek khat certificate chih dan deuh ahon ensak a,MBC(Manipur Baptist convention) chih khong akigelh hi. Ken le ka lungsim in,laibu hon ensak nuam na hihleh bang dia inn konglam a hong lutlou na hia,ka chi hi.Huchin ka lawinun hiai a electric bulb tolkhia a,paw mang ahi ahon chihleh ken le ama kiangah bang chidan a hiai a bulb mang thei mawk hiam,chia ka dot leh a aw khong hong ling in, kin akin in katheikei, chih toh thuah in ahon kihep mangsan hiau hi.Kenle ka lawinu ka hehnem a pawi mahmah kei,ei sanga buai zaw hiding hiven, apoimohna a azat theihleh ahoih zaw ka chi hi.Huai zanih leh chih khong man lel,chin aneilaw dan in ka chi phanphan hi.Pathian nasem hingal bang dinga hiai themneng khong etlah a nei atel diam maw,ka chi a,himahleh huailaitaka ka lungsim a hong lang tuh bang hi hiam i chihleh hiai ahi.Pathian nasem khat  tasama guta hial tuh kei felzawhlouh ziak ahi,chin kei leh kei ka kimohsa hi.Ken thohlawmte tampipi thoh in or Pathian nasemte phungvuh in pan ana lakha hi leng zaw,ka chi hi. Amah mission worker himahleh nelou,talou a omlou theilou sam ding hia..ka chi hi. Tuni a, bang dinga mission workerte  khutdawh banga mimaipha  zonga om uh hi ding i chih leh alawhte uh tawmlua ,kidaih mahmah lou,haksalua ahihziak hi ding hi, chih ahon ngaihtuah khesak.Huai ziak in,Pathian nasemte gentheitaka,khutdawh banga koihtu tuh nang leh kei ana kihimaimah hi Mihing maivil ngailou din, akhalawh uh kidaihzai deuh in piak in omle uh bel,amaule kuamah khateh nen enlou in thudik thutang hon sat khe ngam ding un agintak huai.Huchi leh  mite khelhna ahon kheuh ngam pan ding ua,mite khelh kiphok in Pathian ah ahongtu lut ding uh a, i gam inam in salam leh khalam damna i ngahloh ding uhi..

Khotang en nonta leuleu le hang, i khojanga i buaipih thupipen uh bel bang dang hilou in,MLAs/MDCs  te kipahpihna a ankuanglui a, om ziazia chih khong ahi.Amaute i ngai neu in,i thusimkei ding chihna hipahlou in,amaute mipite vote a milian hongsuak ahi ua,amau eite ahonbat uh tuh bang hi hiam i chihleh ginomtaka khentuam neiloua, i naa ahon sepsak ding uh ahi.I gam leh nam a dia thilhoih nasep tuh amohpuak uh ahi.Huchi ding hinapi eilawi in,nak kipahpih law zezen,neilou sasa a sum kidong khawm in ankuangluipih sawmteitei.Khokhen khat ah, agendan un ankuanglui nanga sumthohzouloute bang tuam et pah uh,chih thu kaza a adik diam chih zaw ka thei kei.Sa nek pih chih laizang! Amau, kham zena aduhduh nezoute ahi ua,ei lawi in bel,Kristmas kumthak lopni lou ngal in i meh zom zou khol kei a hiven!

Kong pharisise zual dia,amaute nekpih dinga neilou sasa a sum,i  donte uh,mi kua hiam zuzuak or khamtheih zuak nekzonna nei khat kiangah,nek zonna ding lampi dang ana zong un,chin i sum donkhawmte uh va pe mawk in saptuam in delhzuipah le hang ,amaule ahong kingaihtuah tham ding ua, khamtheih,guihtheih zuak ahong khawl khamoh kei ding.Huchi leh inkuan khat bawlhoih zou i suak ding uh a,amau insung apan khosung susethei tampi, kiveng bit zou ngal mai ding hi.Hiai bang tuh YPA vai mahmah ahihbanah Kristian hindan tawisanna khat hong suak ding hi.Hichi banga mite dop kang theihna pen eiten kua hiam MLAsor MDCs te hih theih ding kia in ikoih a,hideklou hi.Pawlpi suan huai mahmah YPA or ZYA or sspp or adang dang organisation  i neihte pansan in, lawm vual liangvai,nekzonna a buai or haksatna tuamtuam neite panpih theihna ding lampi zongle hang om tham ding hi.I phattuamngaihna suah khele hang Lamka khojang leh asehvela miginalou,chia i gal et te,bang zah hiam bek kibawl hoihthei ding hi.Amaute mah almoh in,  tunding in bawlhoih le hang I tu ita khangah khamtheih guihtheih a awkna ding thang vang mahmahta ding hi.Huchilou a thaguma,muhdah bawl khamtheih zuak or hih i bet daih sawm mawkleh bel kizou deklo ding ahihbanah ei insung mahmah ah a gu hong lut zaw kha ding hi.

Huchi banga, mite domkang leh bawlhoihthei pawlpi i hihtheih nang un i Pawlpi heutute,kua hiam MLAs or MDCs te, mahni angmasialtaka maivil a kipumpeilouh ahoih ding hi.Ahuchi uh chihna hipahlou. Milian milalte apan pocket money ding or zukham nang sum tamlou enlah a,pawlpina i puak ngeingei leh bel,i pawlpi akichai vot ahong hih ding ban ah,khamtheih guihtheih zuak balwhoih i tupte nuaisiah leh sim moh i hong hi dinga,amaute toh kibual khawm in i pukse gawp ding hi.Huchilou a pawlpi heutu khat i hihleh MLAs,MDC or miliante zahtak tham a i om ngai hi.Huchhileh, kuan ahia dikloutaka government apan development fund chituamtuam hongpaite divert ngam ding?Kuan ahia khosunga thilchiin hoihlou ahih ngam ding?Ahihkeileh houh thilchiin hoihlou chingte toh kithubupa,pawlpi zuak zuak houh i hi lim uh hia,chih ki dot tuak mahmah.

Miten chiamnuih thutaka ana gensek khat tuh hiai bang ahi. Papi khat in azi lau law mahmah hiven,nikhat azi in  a insakpa kiangah”insakpa ka vokp uh atal aveh!”achihleh apasal in azi maipha zonna in,”aveh “ ana chi hi. Zite lauhziaka vokpi bang atal hisak mawk,chi o.Akoi abang hileh, akua kua in thudik thutang mah gumtintin in,vak tuh vak hisak in,mial tuh mial mah hisakleh hang i insung,i khotang leh i saptuam adam ngeingei ding.