Tu ka kho nung ngaihtuah kik thak le, innkuan kim a tenkhawm lai, nu le pa banah sanggamte toh dam kim a om lai bang nuam lua ana hi in. Ka nu kiangah kon it, kon ngai lua kampau leh laithon khawng a ka chih khak ka ki sik het kei. Ka nu'n hon paisan nung kum kua bang hita mah le, hun ka zat khawm uh lou kuan, vok ann ding zong a ka kuanlai bang, ka hih khelh ziak a ka skul principal pa kiang a hon ton pih zel lai bang ka ngaihtuah kik thak thak le ngaih huai hina e huai hun lai te. Hantou a ka kuan chiang in a han mun ka va veh sek hi.

Ka lawmpa kik hun ding hong tun chiang in ki ngai na mah mah tuak ka hi ding ua, apai ma ni zan khovak zen in ka houlim tel uhi. Hon vai khah, Bliss ana lawm bawl inla nang a dia hon deihsak lo tel ka hi hon chi ngut ngut tel hi a pai ni zing in. Ka lawmpa'n hon paisan nung ken leng a kal lak lak in Bliss phone thou mah leng va pawt hoih ka sa khong hi. Zingkal khat ka call le a pa'n pick up hi vaw, nang kua e hon chi in chin, Bliss lawmte khat ka hi, ka houpih thei diam ka chih le, kon sam di hon chi vanglak. Amin tawn a sam in chin kizen e amin tawn dot ngai lou ka chi lungsim a. Bliss na phone ding hong pai, innpi lam ah pick up ou! Sawtlou nung in Bliss in le hon houpih pah in kisuanglah sim ahi dia ka surf uh bei in chin va lei zual ka hi. Ka pa'n hon tai lou hia chih bang in hon chiamnuih zomah ven. Exam hall ticket lak theihtaak na thei maw ka chih le, kana thei kha sam a. Tuzing Manipur express news a ki suah in chin na theih kei khak le ka chi a. Ka hoh dek a kon lak kep diam? Ka chih le, kei le ka lawmnu toh kong hoh dia, i pawt kawm kei di ua hon chih le ken le hun na neih uh le poi lou lua chi'n anneklim ni le chi'n phone ka koih hi.

Ziltawp ni zing hiven kei le hih ding dang tuan omlou biakinn a laabu cover bawl leng zou phial hiven chi'n annek zoh in kisa pah ting teng in college a exam hall ticket la din ka kuan tou vang vang hi. Tung baih lo kha ka hi dia office leng ana hong pan pan uhi. College khang lak a singpi hotel om hiven, Bliss te lawmta hong pai uh ngakna kawm chi’n singpi ka va dawn hi. Dak11 pel zek in lampi a ahong pai touh uh ka gaal muh a, gate bul ah ka na ngak bawl hi. Hong nui tou sei sai ua, alawmnu, Lun hon kimeltheih sak tuah in exam hall ticket ilak theih pah uh le ahoih ding ka chih le, kin chi na chia koi a pawt na'ng nei e chi'n hon dong uhi. Pawt na'ng ka nei kei in nou toh pawt ka ut a hi ka chih le, na zuau ei ve kua hiam te kiang a na pawt ut man khawng hi’n teh. Ka nuihsan le, adik himah maw hon chi zosop a. Ken le hilou honna ngak sawt lua ing a ka chih laizang leh, khai na neih le hon subuai mah mah lou ding ka hi uh hon chih tak chiang in ken le nei leng aw poilou i pawt khawm ding uh kon chi dia hia tuzing kon call in. A hong kisuanglah sim thak chian ken le khai le pai ni uh le singzu iva ne ding chi'n Thangzam road ka zuan tou uhi. Singzu dawr ka tun un ana bawl pan pan uh a hi ding ua ka ngak zek kawm un ka houlim kawm zel ua. Bliss in tuni ka lawmnu birthday eive hon chih guih le e bang dia na gen pah lou maw chi'n iplah sim kawm in, singzu i ne dah ding ua chau iva ne zaw ding uh ka chih le, hiai le ngak ta vang lak i ne ding ua, huai le i ne ding uh hon chi hi. Singzu ne zou in Nehru marg junction bul a Mizo te dawr ah chau ne din ka hong pai suk nawn uhi. Sunnung lam dak1 bang ana ging man a kinoh lo lou in kon ne nawn ua, lim kasa chiat mah mah uh. Bliss in hong baang in ka inn uah hih ding dang na neih keh chi'n hon zawn a, Lun in le theisiam sim thou a diam ah na va baang kei dia na va khak kawm in chi in a inn lam kon zuan uhi. Lam kim ah a Lun tawh ka kikhen uhi.

A inn uh kong tun tak chiang un naupang ana tam mah mah ua, cartoon channel en toh a kimawl tawh skul kai tawp chiat ngen ahi ding ua ana pha phet kei uhi. Bliss in le pangkhang lam ah i tu ding chi'n innsung ka lut suak uhi. Ka nau singpi bawl di'n kon sawl dia ka ni le kon sam ding a na tu zual in chi hon ding khiat san zual hi. Ka dak kimvel a huan a hoih neih mah mah uh. Annteh louhing ki ning chiing petmah, bazaar khawng a meh a lei tawm mah di uh ka chi hi. Huchia ding kawm a ka dak vel vel lai in a ni toh hong pai ua, eh ana chim mansim na hi hia chi'n hon chiamnuih tuak uhi. Hun na va zang nuam na uh hia le chi'n a ni’n hon dong tuak a, hi nuam lua ka chih le Bliss in, pawt na'ng nei zenpi hon zui hi hon chih le ken le dawng thuk pah in a chih sim sim pa tawh le lampi a kituahpih kha ung ua kisuanglah lo lai hi veng ka chih le, amai hong san tiu tiu a gen ding a thei kei. Innmun a naupang te tuition hilhsek a hihdan ka hon theihtak chian kei leng pai di'n ka kisak bawl le nang le na hong huh kei di maw chi'n ka pai ding hon phal kei. Naupangte homework teng khawng ka hon hihpih zawh in dak5 bang ging ding ahita. Ann nesa a na paiding a hi tuni naupangte lai non hilh pih a ka kipak chi kawm in apa pa Thang leng office kai tawp hong tung khedap khawng tol khiat sak in leh a kikhek na ding puan khawng la in ava buai zual hi.

Apa leng pangkhang lam a haichite tui buak din hong kisa in baltin hon khai phei a, kon meltheih ngei na bang hon chi hi. Ken leng dawng pah in, tuzing a hon call pa ka hi ka chih le. Aw kal masa a na hong pawt uh ka thei thak. Ana tu in haichi te tui kon buak dia ann ne sa in leng na pai ding aw hon chi hi. Ken leng kong buah pih ding ka chih le a hon phal kei. Huai ni a dorka pawlte'n bang sai uh hiam Bliss’nu, nu Ching leng gim mel deuh in hong tung a, hong pawt na hi maw chi kawm in ann leh meh huansa te hon ban et masa zaw zen hi. Bliss in leng na chim khak le tv ana en in chi'n ann nek ding dinning table ah aban ban in hon lem diu diau hi. Hong man siang vek chiang un ann ka hon ne ua houlim bang a nuam mah mah hi. Tua zan (ziltawpni) amau a dia tuailai kikhop ahi a, Bliss in kikhawm di'n hon zawn hi. Ka sanggampa jacket leng om ahi lung himoh ngai lou chi'n ka nial theih louh di zawng ngen in hon gen hi. Anu'n leng va kikhawm un na nau toh le hon chih behlap chiang ka nial ngam nawn kei hi. Ken leng aw le kong kikhawm ding ka chi khong hi. Annek zoh in kihah siang zek in, kikhawm di'n ka kuan uh hi. Kou kiang a nong tut ding hon chih ziak in, anau toh kei toh ka thum un line khat a ka tu khawm uh hi. Nop kasak louh khak ding hon maivil lo ze zen in chin ka kitheihmoh bawl kawm in ka hem et zel zel hi. Lasak a nuam in kikhawm mi leng a tam hi. Kikhop tawp in a pastor pa kiang bang a hon mellah in fel ka sa mah mah mai. Ka kiklam un kipathu bang hon gen a fel hon sak dan khawng. Na kamsiam tel mai ka chih chiang a ut het kei. Hong baang lai in tomchik hon chih ziak in ka va baang nawn a dak8:30 bang ging ding ahihtak toh paidin ka kisak bawl hi. Ka nau jacket silh suak inla na hong hoh nawn chiang in hon tawi le chin poi lou ahi hon chih ziak in ken leng ka silh suak hi. A nu leh pa kiangah nitak ann leh meh limtak hon nekpih ziak un kipathu gen in, Bliss in gate tan hong kha in mangpha ka kikhak uhi.

Akalnawn a khawmpi kipan ding ahih tak toh Bliss a hong tel deihsak lua in a veng uh ka tot khak nak le ka va baang tei tei sek hi. Zingkal khat ka call leh hong tel thei lou ding ahihdan hon gen in a kisuanglah mah mah hi. Kou saptuam hong veh ding mi khat gamdang apan ka zintun ngai un chin, buai ding ka hi hon chih chia’n aw poina e maw kon theisiam lua. Amah toh khawmpi zatkhawm ut lua hinapi hichi bang thil hong tun le ka kithalawp na teng a bei phial hi. Khawmpi zang zou Krismas bang leng nai hiai hiai ta. Hichi dan in lawmta bang in ka kithuah tou tou uhi. Akal lak lak in ka inn uah ka tonpih zel a, nitak ann nesak in ka va kha zel hi. Theihlouh kal in kum kim bang a hong ching man ka ki thuah nung uh. Lawmta bang in kithuah mah le ung ana ka kal ua itna gui ana zam suak khin tham ahih khit dan ka nih un ka haih tuak kei uh.

Cell phone chih bang om mai zen le tua lai khawng in, bang ka chi phet ta duam maw! Thohtani zingkal khat PCO apat ka call le, anu'n ana pick in chin Bliss damlou ei ve zan a biakinn sung a hong puk in chin damdoi in ka tun ua tuzing kal a pawt ta ka hi uh. Na mimal thumna ah na thei in aw.. hon chih le ka lungim a nuam het kei. Awle, nu Ching chi'n bang chi a bang natna nei a chih ka dong kei hi. Ann ka nek zoh chiah ka hong pawt ding chi'n phone ka koih hi. Inn lam zuan meng in, ann ne zou ka kisa pah a, bang puak ding ka de aw chi ka kingaihtuah lai in ka nu'n hon sam in, "Ann hum hek sak ngai ding, hih ding na neih kei le tun na va kuan diam?" Ka dawn het kei le ka room sung ah hong lut in, bang chi e Lian hon chi a. Ka lawmnu damlou va veh sawm a kisa tuh ka hi a, tunitak lam ann huan ding a omlai le zing chiah ka va hek sak mai diam ka chih le, hon en dih hon chi a. Huan ding om zen zen e, bang chi a bang naa a chi'n hon dong a. Zan a biakinn kai lai a puk, damdawi inn kitun a chi ua, ken le ka theisau kei. Va hoh in la bang hiam chi a nong zekai khak ding le inn vengte’ telephone in hon hilh in chi'n a pawt khia hi.

Ka nu pai khiat nung sawtlou in kei le kisa zou, Bliss te inn ka zuan veng veng hi. Ka tun in mi leng a veh a hoh ana om ua. Bliss nau nu'n hon muh in, e na hong pawt maw. Ka nu'n hong pawt ding ahi a chi a hiai lam ah hong pai in chi'n room sung ka zui lut hi. Room sung ka lut in ana mial sim a tukvelh kihong huihsiang poimoh ding ahih ka thei ngal a. Lupna tung ah lum dil del in ana om hi. Ihmu hia chi a anau ka dot le, va pai in hong hoh ding na hih ka hilh uh le kipaklua ahi. Ken le kong khak kiu zual in, kong lut thei diam ka chih le amit hong hak in oi na hong fel ngei. Tutna hon kai phei inla hiah hong tu in hon chi hi. Kei leng akiang nai chik ah ka va tu a, na damlouh lam tuzing na nu toh ka kihou ua thei pan ka hi, poi kasa. Zanitak na hoih ihmut hiam ka chih le, ihmu hoih mah ing ka tha a chau deuh a hon chi a. A khatvei na hiam ka chih le, a thumvei na ahi ta. Ka lungsim a nuam khol kei thumvei na bang ahih le. Damdoi a ki enkol (medication) kawm na hi hiam chi ka dot nawn le, a dai di de. A hon en kil kel hi. Kei leng tawlkhat ka daih di de le, a hong thoh khiat sawm in ka phal kei hi. Nisa lum ka awi nuam in ka nau na va sam diam chi'n hon ngen a. Awle ka va sam dia ana thou het ken chi'n anau ka va sam hi.

Innkong ah anu'n phek hon phah in kei leng varendah ah hong pawt khiat ding ka na ngak hi. Anau in a u khut lang khat len kawm in hong pawt khia ua, amel daang kasa mah mah. Phek tung ah tu in hu bang a hoih lak thak san hi. Nu Ching, tuzing ann ne lou hiam chi a ka dot le, tam lou zaw ne in hong hoih pah ding ahi lungkham ken. Bliss in hon en phei in, hiai ah hong tu in hon chi a. Pau lou in ka va tu hi. Ka min a hon sam in, a damtheih louh dan khawng leh hun paisa a thiltuah hon gen ka na ngai khia hi. Laibu khat na sim kon deihsak a, na pai chiang in kon pe ding. Tu'n zaw ka om le a nuam lo ta na mel kon muh le chi kawm in hon en a, nidang a nuihmai kawm a hon chih sek dan lou in. Maban bang chih na sawm a chi'n hon dong a. Ki graduate phot hen la written test piak theih theih ki pe le chi'n ka dawng hi. Tuni sawtpi na om ding ahi aw, ka pa le Thanlon lam a zin tunitak lam a hong tung kik di in chin. Annek chiang bang a na lawmpa bang chik chia hong pawt ding a chih khawng hon dong zel ahi. Huai hon chih in amel ka en a, ka nuih le bang chi e hon chi a, hampha ka ki sa na pa bang in kei lel tak hon minloh ka chi hi. Na chi kei a aw, ni dang a ka lawmpa bang zan chiang chouh a nam phil phel kawm a hong pawt sek in chin, ka pa'n lengla nitak a hong pawt mun lo te ki pahpih lou in chin nang suun chiang leh amau omlai a na hong pawt kipahpih lua a hi. Huai hon chih le ken le hunlem a la in, tu lel in ngaih na nei hiam? Nei din non gingta hiam? chi'n hon let dot a, a mel ka en a hon dot pen dawng lou in, ken hau a hau ka hi ka chih le a hong nui khe khong hi. Ken nei hon chih kawm in a kun suk hi. Ka dai dide a vantung lam khawng en in a hong dak touh ka ngak hi. Ka kiang a tupen ahi hon chih kawm in a hon en kil kel a, bang hiam ka gen ding lam en hi kawm tak in a hon en den hi. Ka hong nuih khiat le, a zum mah mah chih a mel ah a theih theih mai. "Bliss, ka thu gen ding ana ngai khia in. Nang toh kithuah nuam ka sa. Na lungsim le a za a na kiang a om om bang ka ut gige. Ken leng sawt pek a pat honna ngai khin ka hi. Hon ngai kia bektham lou k'on it mah mah" hiai ka gen le kipak lua a mittui bang hon dai mah mah hi. A khutzung ngat zit zet te len in ka zut sak thiam thiam hi. Lian, ken le nuam kasa na kiang a om, tawldam huai, na zai dam dan khawng leh mi na theihsiam dan ka mangngilh ngei kei ding. Ken le kon it. Hiai hon chih le ka kawi ut petmah a la kiim le kiang a mi om te ziak in ka kidek tei tei hi.

Huchia ka ki itdan khawng uh gen a ka omlai un a ni hong pai a na gil kial simta ding ua puri ka va lei ding chi'n pamzek a singpi dawr a zuan hi. Sunnung lam dak khat bang ana pelta a, singpi dawn kawm in, “Ni na siamgat na zou dek ta hia” ka chih le, “Tuni a zoh sawm tei tei ka hi, a na tu lai un la ken ka siamgat ka va sun zom nawn ding”, chi kawm in singpi noute khawm in innsung lam a tawi lut hi. Nu Ching leng hong pai in na om a nuam deuh hia bawi chi'n a sou khawng hong et sak kawm in ann ne sa a pai din hon gen hi. A pa uh leng hong tung phial dek ta ahihman in ken le tu tung kon huh ding ka chi hi. Bliss in leng a hon khou a mawk mawk. A nu kiah aksa meh i meh pih ding tutung hon chih le a nu'n ah ken leng huai ahi ka chih. Ka pau tuh kawm in ahihle ken kon bawl dia huan na phal uh le kon huan ding ka hon chih le anui tuak ua. Hon gingta lou sim na hi ding uh maw chi a ka dot le, mawk mawk nang hial in na hih ding hon phallou ka hi zaw chi'n anu'n annhuan innlam hon zot san hi. Bliss kiah lupna ah kitawldam sak inla ken na nu ann leh meh huan ka va huh ding ka chih le ka nau le om voi honna ngai lou ding uh ei khah chi'n hon nuihsan hi. A mel ka et chian zinglam a ka muh toh teh in a hoih lo ta. A sam tom toh a et lawm khop mai. Na kiang om det bang ka ut mai ka chih chiang, om den thei mai le chin ken le ka hon chi. Kawi ton ton bang ka ut mai. i dam dia, ki thuah leh thuzak kawm tou zel dia, Pathian in hon seh ahih nak le om khawm thei ding ihi chi kawm in thou in la inn sung lam i zuan phot ding. Inn sung lam ka zot pih a, a nu'n ana ki thuahpih lai in la kou nek le tak kon bawl ding. Lupna ah ka va sial a, Bliss ki tawldam sak lai in hon paisan lou ding ka hi chi kawm in a tal ka tawp sak hi. Room sung ka nutsiat dek in ka gaal et et a, tawl kisa mah mah ahi ding a mit si diu diau pah ngal hi.