“Kou zaw tanau chih di himhim neilou keive ua” chi a thumkhah lua I hih leh zuau gen I hikha ding. Tawndan ngeina hoihtak nei a khat-le-khat kidomkang tuah ngen ihi ngal ua. Ei toh kinai deuh, I kikawm pih leh I ki zarzoh pih theih khak teng ‘Tanaute’ I kichi uh. A kilamdanna om sun bel a bawng tam deuh I om dia, a tawm deuh I om di chu. Gelh ding a sawl hikei mahleng gelh dia ka hong kisak chiang in a pat ding dan ka thei zozen kei a, ka pat hial chiang in a tawp ding dan ka buai zel. Bangteng hileh a thupi I gelhdan spelling pen buaipih kei phot le hang I chi ahi. High school a Buddhism, Socialism, Fascism chih khawng  i sim khak leh hiai le theisiam di’n I kikoih vek di uh aw. Bang teng I gen kha hiam ah, mehpok thuk khe leiloi phot le.

INNDONGTA a Innsung I kivaipuakna dan uh toh NAU MIN PHUAH dan kichiantak I neih mahmah uh ziak in ZOMI a piang khak hamphat huai kasa hi. Hiai bang Dan kichiantak neilou khovel a minam sang a simte’n zaw hon phawk pha kholkei mah le uh, kua theihpih louh in ka kisaktheihna mahmah khat ana hi tawntung hi. Huaiziak in, Indongta I bawl chiang un ei mah tanaute mah Innta ding in I kilatuah ua, midang deuh-sisan a kinai lua lou-I ngaihnat tuamte ZAWL di’n I la uhi. Innta ding in beh/phung dang I lak leh leng I pute lam hiam I makpa lamte hiam bek a hi deuh tangpi uh. Tuamah bang in naumin phuah ding naungek I neih chiang un leng I tanau nai mahmahte uh mah I phuaksak uhi. Min phuak peuh in LAL hiam VANLAL hiam a phuah theih vek a hihlouh bang in sum hau teng leng ‘tanaute’ va chih vek hitheilou hi. Huchi ahihleh TANAU I chih in kuateng huamkha a kuateng huam khalou hiam chih gen ding chi le’ng dawnna kichiantak muh haksa di’n um ing. Ahihkei leh, I nopni-dahni a innsung a hong gamtang teng kia I ‘tanaute’ hisak di I diam leh? Paite(MIL) a Inndongta thu suut dek mah bang kha zozen hang eih. Ko’n back phot deh.

Bangteng hileh, mihingte social being I hihna uh eimite mahmah in zang manpha se ka kisa hi. I pupate’n Nek tek pha, puak tek zaang ana chi ua, nopni-dahni a ki-uap a, nek leh nekhawm, thuak leh thuakkhawm dialdialte ihi uhi. Ahi a, kuate I ‘tanaute’ hi a kuate hilou chi a kikhen khe ding chi le’ng kikhen tham I hikei zel uh. A bawng a tam himhim le om mah ni, a tawm deuh le omkha mah ni, sum hauh ziak a tanau hauh loh leng om thei mah, ahi di mah. Huaiziak in, ei society ah tuh ‘tanau’ haute mah eng huai sak pen in a om aka. A nuam lam in programme khat peuh sai le ulah nop tuam se leh kilawm, vangtahna ziak in siatna khat tuak le uh lah a vehtu, panpihtu leh ngainatu (di) hau uh ahihman in a thuak uh nuam deuh ding bang in I na ngaihtuahsak mawk a. A biik in, pasal unau tamte bang hampha diak uh I sa. Tusuan-tasuan hon nei ua, innsung vai a kithuahkhawmna,etsakna dingin naumin phuahna,innlatna,leh thil dangdang a sai chiang un amau innsung mi ngen mah a mipi dia kidaih uh ahihman in nopchi se mah a bang aka.
Huai a mi paikhawm teng leng ‘tanau’ haulou deuh te’n a ‘tanaute’ uh kaihkhawm lah a, a kaihkhawmte zah khawng mah a pha thei mawk uhi. Enghuai uh chih chu a hi ber mai. Alehlam ah, kinai pi kikawm hetlou a khosa theite I hi thepthup zel uhi. Koi san hiam ah ‘huaite bawng zaw tam thou na ua kikawm khollou uh hiveh aw’ chih theih ding bang om ngei di’n I gingta. A mi bel tam, ahihhang a kithutuak hetlou, ai’hke’h unau-nau a dawnkhawm a kham khawm theite(a om zenzen leh) eng tuan khang, mate?? I tamna leng a hilou lam a zat sual theih, hichi mahbang a I tawmna leng manphatak a zat theih a hi veve hi.

Mihing mah ika, bang kilamdang luatna le om pouh kei, chi aw. I mel a tuam dungzui in I mizia uh leng a tuam chiat a, I ngaihdante uh leng a kibang kim kei. Mi khat in amah mizia tuam kinei chiat a, midang toh kimaingal a kineel pahpah thei pawl ki-om hi. Mi pawl khat leuleu lah midang toh kichimat pahpah theilou ki-om hi. Khovel bukimna leh kilawmna. Tuabang a mi toh kineel pahpah theite kamsiam ua, midangte lawm bawl in ngaihnat bawl suk tawmtawm thei chih khawng. Amau leng midang in tuabang mah in neel pah thei ua, a tawp chiang in ‘kitanau bawl’ thei pah uhi. Huai le sum a hauh deuh ua leh chih hi sese lai. Tuate mah aka ‘tanau haute’. Huaiziak in, ‘tanau’ I chih in gamgi neilou ahihna ah, midangte ‘ka tanaute’ ahi chi a pom siamte mah a hampha a himai uh.

Ahi a, ‘tanau’ I chih taktakte zaw pi-pu khang a ei toh sisan a kitanauna neite ahi tangpi uh chi leng sau lua gen khial di’n ka kigingta kei.  Amaute mah akei ua I nop- I haksat a I kiang ua om gige te. Amau a haksat hun ua leng I gaal-et mai dingte ahi kei ua, a nop ni ua leng I va kihelna dingte mah ahi uhi. Sisan a kinaihna neiloute peuhmah va midang bawl di chi ihi zenzen kei a, ‘tanau hau’ I chih teng leng a sum hauh ziak  uh I chi vek thei tuan samkei. Sum-le-pai hauhna ziak a ‘tanau’ hauh theih ahi maw, chi nuam I hizaw. Huchi ahihleh hauhsak di nak ut huai hinah e le! Ban ah, sum neihlouh ziak a ‘tanau’ naipen I chihte nangawn in hon gamlat thei ding mah uh eive, i chi nawn. Sum in vai a hawmna khovel a teng lai I hihchia, mite’ lak a niamzaw a kikoihna lungsim toh khovel zang tampi I om uh. Sum neihlouh ziak mah mi bang a gari a  kikhoh vangvang zouloute, lampi ah pai le’ng lah mi’ mai en ngamlou a pai deidei in. Meltheih leh lawm luite toh bang kituak kha nuam se. A ban a I pai lai leh ‘midanglou’ a I koihte khat toh kituak kha zawmah.

Houpih di’n kisa le’ng lah nuam kisa chiah lou, houpih kei le’ng amau poisa di zaw hi zenzen kei uh. Hilele maw, ‘bangmahlou kisathei’ hon chi nuam ding a bang uh. Koisan hiam a thilkhat thupi lua lou hih a vahohna bang a ana mukha chitchiat uh. A Inn ua vahoh, ahihkei leh lampi a kimuhna ah houpih le’ng lah ‘bang hon ngen zenhouh de aw’ chih lungsim toh kidawng himawk. Houpih kha sese dah le’ng hoih di hi a,chi in lungkimlouhna di khat hihkha i kisa hial aka. Kihoupih ihih leh a hoih hilai, kimu gegu na pi ei bangmah a hon muhlouh ziak ua kimuhkhembawl heihai chih khawng aka a nuamlou,a chih uh. En lah amau hihna leh a neih dante uh mi’ lak a ‘ka tanaute uh’ chi a I kisialpih luat lam theilou a hidi uam. Theita khang. Liasiangthou a “Dangka sum deihtaakna zaw siatna chiteng bulpi ahi” chih toh kituak hi sese kei lele nang nei zoulou na kisak ziak a kipiaksiat luat nalam a hiai teng ngaihtuah na hizaw hia le?? Himah e, himahleh sum nei deuh mi hileng zaw ei theihlouhte natan in lampi a hon muh chiang ua hon houpih nuam lawtel di ua gingta tinten ka hi, chi na hizaw hia?? Nei deuh le’ng zaw ei houpih masak ngailou a mite’n hon houpih di ua, ‘ka tanaute uh ahi’ a chih louh tawp ua ‘ka vengte uh ahi’, bek hon chi tawk di uh hive aw,na chi zaw hia? I gen voi, nang sum hauhlouh ziak in mi khenkhat na ‘tanau’ na chihte na nangawn in mi’ lak a hon zumpih a ‘ka tanaute ahi’ hon chi ngam nawnlou uh houh hizaw na ve. I ‘tanau’ teng in hon hichih uh chi I hi zenzen kei, a kuamah ngaihnat louh leh ten in I om I kichi ut tuan sam kei. Hichi kawmkal a hon deihsak, hon ngaina leh hon it mahmah ding mi ana om thou veve hi. I kamsiam louh toh, gamtat kilawm lah theilou I hihchia ‘tanau’ I chih sunsunte nasan hawldalh khak theih ahi a, lau sim maimah ke!

Michih in vualzawlna I dong dan uh kibanglou ahihman in, khenkhatte leuleu a vualzawlna don pen uh midang tampi in a hamphatpih ua,  ‘tanaute’ un lah naih lulut mai, chikmah a kithei ngeiloute nangawn toh ‘kitanau sak’ thei mawk hi. Lamdang lou pi, sum hau lel uh hiven. Nungakte kia sum haute ngai uh I sak leh tua chu amei-apa, atek-akhang in ngaina vek ta unchin, ‘tanau hau’ a hong suak mai uh. Miteng in ‘kou toh kinai ka hi uh’ chi nuam vekta uh ahihchia! Officer lian bang a hong hi zawmah ua, mi khenkhatte ngial houh ‘kitanau.’ lua hikei le uh le kikawm theihna ding lampi zong in ‘ei beh khat ihi’ a chi uhia, ‘ka pite’ nite’ tute di neive ua’ achi uhia, huai tantan zaw thei khang. Vaai khat sat le uh lah Vakul ann sam mah bang sak kheukhou hanga, a neihsa-lamsa un lah kankuah zou ngal. A kua-kua in kisuang chiat, kisaktheihpih chiat hang a, leitung a khatvei piang chiatchiat dia zaw hampha uh chihlouh gen ding a omkei. Ei nasan in le kisaktheihpih lua ihi I chi khin voi. Sial kang leh sial kang kingai chih dandeuh a  hausa leh hausa mah hong kimai kha pahpah nakkhem ua, ei toh kigamla suk nawn zel ika. ‘Kitanau’ hi nuam lua, hilele kinaihna gen di dan thei tuanlou in ka ‘cousin-te’ chi suk hang a. A naute uh lah ei naute mah toh ki-cousin sak hang a, cousin mother e, sister e ,brother, a hon hau nawn mahmah ngal ua. Numei khenkhat ngial houh a tanaute’ uh hihna,dinmun leh hauhsakna khawng Mou vanken a keng tel kha in mouthakna lam a va tiger sim chih khawng a gen mawkmawk ua. Ei mou neiloute’n zaw bangmah theiban khang maw? Sum kia zaw hivek sam ke’n chia, I ‘tanau’ ding zen pi omna leh khanletna mun kibatlouh ziak a kimidang et kha, a khonung a kitheikhe thak chih bel om thei tham mah e. A pii pen zaw sum mah hi, ka chi lai lai, ‘tanau’ I neihsa sunsunte henkhawmna ding leh a dang I neih beh zelna ding ua poimoh pen zaw. Chih leh, ‘sum’ leh ‘tanau’ I chih in bang kizopna nei uh a’i thahah a?? Sum hau, tanau haute mah aka leitung a hinna nangawn humbit theite. A neiloute lah natna, buaina leh huhamna in hon khen tuamlou ahihman in, piak ding a poimoh zah piak zohlouh ziak in hinna tampi I mansuahta uh. Niteng a thiltung ahi mai, ei lak mahmah ah leng ahi bok.

Sum hau hau chethei, a chihna society ua khosa I hi ua, pil in siam kholkei lehang le SUM hau taphot le zaw I paina lamlam mavang ding dan ana himah ve aw maw. Chi keive, koisan hiam ah Chief Guest bek in I va pang kha moh na! Himah e, sum in lawm leh ‘tanau’ ding tampi bawlthei mahleh a neiloute mah zaw lawmta sung, khotang leh saptuam ah ngeingaihlouh, nelhsiah leh tuambawl ahi tou gige lai. Khat in thu hon gen a, inn hoih a teng zoulou,, mi’ silh-le-ten bang nei zoulou, thohlawm tam thoh zou ngeilou chih ziak in I musit ua, a kam a thupawt pen bildoh lou in a MIMAL mahmah i en ua, “a gen kia siam” chi in comment zawsop hang! Himah lou maw? Huaipa nung in midang fel deuh khat hong ding a, a gen peuh I Amen suk pah dumdum uh. Ahihmah louh a, ama’n sum hau in thohlawm tampipi thoh gige ahihchia! Sum tam thoh zou ahih chia mipi kipaksak in kuapeuh ngaihnat a hon loh ta. “Amah zaw a gen siamlou na a, sep thoh lam hihthei zaw ahi” chi in makai ding in I telching pah velvol ua. Saptuam Upa dia hichi bang mite I hon telching hial chiang un amau a Kha omlou ahihman in a thugente uh leng ngaihkhiak a nuamkei. Damsung a Upa hih tel di chi in kisiamlouh sasa in Belampu nna sem bangzah hiam I lak uah a omkei ding I chi ngam kei. Tuateng ban a,mite’n ‘na Upa-pa uh le sumpung hawm hilou maw?’ hon chi ua, mi’ summuhna leh zeekna theihpih lou I hihchiang a gen ding theilou in I om. Kuapeuh adi’n sumpung hawm chih zaw a siangkei him ahi chih Laisiangthou mun tampi ah kimuthei hi. Tuaziak mah a ‘kisiamlouhtan’ sasa a Mang’ nnasem uh hikha moh ke’nteh, chi in zeldim thubawl mawk kei ni maw Guai? Pathian’ thaunilh a kei ua, ei va gen di om zenzen kei, amau toh Pathian kal hita hi. Felna zaw makai hihna ah poimoh mah e, Saptuam vai ahihchiang in bel neih-le-lam pen a khatna hikei thei leh. Thil khatpeuh a mun lou dinga a kikoih khak chiang in a et nuamlou kisa chiat ding in um ing. Khovel aka, I chi nawn mai di chu.

A chiil a Pathian in Adam A siam lai a  Evi toh a siam ton louh sese pen in khovel a bukim kei chih a gen khin hi. Leitung I chih pen a khial pen omlou-adik pen omlou, a pil pen omlou-a hai pen omlou ahi hi. A hau pen omlou- a zawng pen omlou, a se pen omlou- a hoih pen leng a omlouh na khovel ahi hi. Bukimlou I chi chi na ua lah a bukim dek lehlam tawk ka chi. Huaiziak in ki-eng tuam ding om khang, eng senglouh a dim in om. Ei le a nuai nung a pang hi tuankei ni, Pathian’ zar in. Vualzawlna I dong dan uh kibanglou ahihna ah, mi’n ana dong louh uh en I dong khak om dia, ei dong toh kibang lou deuh midang in ana dong kha thei zel hi. Sumhau leh neizou lua a I theihte’n leng ‘nei daih’ chih nei tuanlou uh ahih man in enghuai na ding tuan ka thei kei. Sum-le-pai a lungkimna I zon sung teng zaw lungkim ngeilou ding mah hi hang. Khutdoh hial lou, kipak tak a niteng a zat ding khop nei a om liailiai ihih leh hiai mah hilou di hia hauhsakna?? Ka chi a. Hiai thil neng nengte’ ziak in I hinkhua kisugenthei dah ni, chi zaw le houh a hi di e. Na innvengpa’n gamgi hon suan na chi a, tanau, sum leh mi muan ding neilou chih ziak in na pau ngam kei maithei. Leitung zaw Khovel Tawp hun ding ngakna maimai ahi. Chik chiah a tawp dia chih zaw theikhang, ei hinna a bei masa hia, Pathian in A misiangthoute hon la masa hia. Huai hun di ngak a  Kitengta neih a nek ngei teng ne, sep ngei teng mah sem a hun zang beibeite I hihman un puaknat luat ding leh kipahpih luat ding khovel ah a omkei. Midang ‘tanau hau’ I chihte leng va eng luatna di a omkei a, kuapeuh toh kilem a ‘tanau bawl’ suk pahpah theite mah hampha pen uh I chi ahi. ‘Tanau’ tawm kichi deuhte le, a neilou hizaw lou in a hong veh chiang ua alim-a al nesak zoulou, aduh-a deih uh pe zoulou, tutna hoih a I tutsak zoh nailouh ziak ua hong hoh zongsang lou uh a hi phot di’n I gingta. Kingaise naikei ni. Khovel I chih mi khat’ ading kia a vuahzu a midang khat’ ading a ni sa a hikei. Ei tung a nisa I chih lai in vuah in hon lap dekta a khat lam a ni sa dia kisa zong hikha thei hi.

Huaiziak in, a kihuai thei thei kihuai ni, kikhenna lam sang in hoih zaw mah. Ei Inndongta sung a taakna nei, I min phuahte, I min tap te kia I ‘tanaute’ chi mailou in, midang a tamthei pen toh kituah sam in ‘tanau bawl’ tawmtawm le.  Tanau I chihte’ sanga kuahiam I kikawmpih theih zaw midang leng om thei ahihman in ‘tanaute’ chi suk vek thei le huai di dan mah ana hi hi . A hauhsak ngial ualeh ‘bonus’ himai. Tua chiang in Tanau-ism zang siam ihi ding ua, a haute lah hauh dan siam, a zawngte leng zawng dan siam tak in ei mun chiat a kipaktak a om dialdial thei ding hi hang, chih khawng maimai hi.