Mi theihlouh a van lak chu gu ahi. A gu mipa pen guta chih in om hi. Mi van deihgoh ziak bang, mi hazaat man, taksap ziak bang leh a tuam tuam ziak bang a mi van vuksak chih hong piang khia hi di'n um ing. Bang chibang zawng in en mah le'ng guktakna kichi a kuamah mah pakta om di'n ginhuailou hi. Koi gam mah ah leng dan in phallou hial ding hi. Huchi hinapi in guktakna kichi theilou i om kei ding ua, hichi bang gamtat zong mun khempeuh ah om din um lai ing.

Anon leu leu ah, tua sa hiamgam zaw deuh, a neite theihpih a van thagum a kisuhsak om get. Hiai pen a tup kibang hilele a process tuam deuh zek. Van neite a dia bel dinmun lauhuai zaw ahilai hi. Himahleh van neitu a din' chance a om zaw, huaituh i hatna teng teng toh pang a sual kik ahimai. Hiai pen ahihleh kisuamna i chih te uh ahi leuleu. Hiai guktakna leh kisuamna i gam a kingakna tak ahi zou phial dio ka chi hi. A bikin min i theihlouh a van hon guksak pen i pawna zaw ua, i theih gegu kitheihlouhsak a van hon kiguksak pen poisakna i neikei zaw maimah uhi. Anihnih in dinmun kibang ahi. I etdan uh a tuam ahilel. Ahihlouhleh a thawn a i muh di a thawn a a mang leh houh poisalou ihi phiangsan uh hia?? Ei leh ei muhkhiaksa mah a i neih te kia it tuntun ihi zaw hia? Khangloh hun ta ei...thouta wow!! :P

Guktak amasa penpen in khelhna ahi. Guktak na hoih chih le om din ging ke'ng. Nang hinna dia mi van na guk a ngaih lehle huai le khelh na ahi veve ding, aziak bel Bible in guken a chi. A gute hiai chih un chih bel a omkei. Gulou dia hon order leh thupiak ahi top. Huaiziak a pathian thu awi te'n i guk louh d'u ahi lel a, a gu tei tei bel pathian thu awilou chih na ahi mai ua, i va hihpi luat di omlou a bang maimah maw?

Van i deih mahmah, lei bang i lei zoh pahlouh khat deih luat ziak in i va lei khong na a zaw i venbit zoh tuan keh ei a hilou pah maimah ding ahi. Mahni van mahni lalna innsung nge-nge ale bitlou chu theihsiam a haksa aka. Khovel le fair zou chiahlou a bang aka chaw? Lungmuanna khovel zaw hilou petmah aka! Bang loh ding?

Vaang a ngat mai ding maw? A'ike'h bit kisak louh ziak a van neilou di? Phone mantam ka lei sawm chiang bang in min hon guksak kha le uh pammaih mah di...chi'n ka ngaihtuah khanak khem hi. Pammaih law mahmah ding hiven. Neilou sa sa a lei ding, second khat thu a pilvan zohlouh ziakin mang mawk leh chu na pet ding hive'n maw. Bangziak a ka kho-ul kai a, ka hih theihna teng a pang ing a, ka siamna teng suah inga, huchia sum tamlou ka loh sa a van ka kaihkhop mi'n amau nuamtal na dia hon zatsak mawk d'u la? Kei hehlou di? Ken ngaidam mai di? Bangziak a hiai thil om thei ahia, fair lou ta lua a koi ve--ka ngaihtuah tuah chia..

I pawt kalin inn kongkhak ana kikal sia a, ann huanna cylinder ana om kei mawk! Stationary dawr a envelop lei, paikik lam lawmpa kia form-fill up di dan va dong zual dia gari park zok, a innsung ua dianglut pah, kihou sau kha zek, inn a gari zang ut a hon ngak om, kin a kin a taikik pah di chih le gari ana om ta lou! Phai hoh na gimsim ihmut bang lim sim zezen, mang lakloh laitak innteknu'n lamdangsakna leh beidot mel deuh mai a, "i gari uh omlou!" chia khovak hon vaidawn maimah. Zingthou phet ngeina bang a ann ngiam pham phei zawk in ak ann tah dia kisakleh a gil (akgil) toh ana mang mawk! Tuition lak di ziak a thoupah tingteng ngeina banglou taka kong kihong sa a ana om, dak pah leplep chih leh TV koihsekna table awng mawk. Gingta thei mahmah lou..

Gen seng ding ahi kei. Mihau pente leng kipak kei unteh.

High school kailai in nitak laisim zou ihmut suak mahmah ta, lumdia kisak chiang in ka innsak ua papi khatin chiangpum toh torchlight tawi kawm in duty di'n ka pa hon tawn zel hi. Kou lup hun chiah amau duty di'n hon kuan khiaksan zel uhi. Huai lai a gimpipi a ana pang uh ahihsam leh tu khang (generation) ate'n bang hiam bek ah ana kihamphatpih bek leh chih huaitel aka maw. Bang i lohta dia le? Van hon guksakte mituam tuam himahleh uh a thuaktute a dia kiziing mahmah ana hizel. Huaiziak a mipi etdan kibang vek sam lou ding. Huai bang kalah mi pilvang khenkhat a tuak kha ngeilou te a di bang a....issueless.

Hucibang i tuah chia police hilh pah ding ahi, chih ahi tangpi. A mithei ihihke'h zaw kinepna thawn ahi maimah ahi. YPA te hilh ding ahi chi le om. Huaile hithou...a guklai mit a mu ihihke'h....kinepna thawn! Hiai ten hihtheih vak anei kei uh. Pawlpi khat ahihsam ziakun hih ding hile uh le tutkhawm zek masak a poimoh zel dia, thusaupi a hon suak ding. En bang loh ta di la?

Khat kon gen ding, khat vei ka veng ua inn khat a kiluh a zankhat thu in TV puak khiak in a om mawk hi. A innsung bang iva muhleh nuih bang aza dek lehlam zezen hi. A gamtat du dan bang ka chiing ua, gen theih omsun chu, "gum mahmah uh e..." chih ahimai. Hiai inn luh zaw a thei ngei mah hiai inn omdan theisa ahi du chih ka gintak dan uh ahi. Ka veng uah muanmoh khat ka nei ua. Himahleh muanmoh lam theisak lou a nitak chia va dianglut geih ka sawm uhi. Huai ni zing in gutate sulnung dainawl peuh ka va dap uhi. A sulnung du muh ka nei kei uh. Kou gindan in chu rickshaw a puak hizomah din ka gingta uh. Veng sung ahihlouhtawp in veng pam deuh ah huai ni mah in riskshaw mang leng om din ka um ua, huchibang om ngei ngei leh a gutu kibang dia zong nop deuh di ahi chi'n ka bengvak mahmah uhi. Himahleh huchi bang vanmang thu ka za kei uh. Tuibuang, Bijang laka khamtheih zuak te inn valok mai di ahi d'aw ka chi ua himahleh khamtheih hihsek te apan ka thumuhdan un tulai van a kiguk chia Kwakta lam ngen a pawsuk uh chih hi leu leu. Damdawi toh va kheng zel uh. Kizop pih hoih pipi le nei uh chih ahi lai hi. Bangteng hileh vengsung ah le khamtheih hih omsam hive'n huai va ki dong himhim phot henla, amah ahihloih tawp ale mi hon kokmuh theih om di ahi chi'n lam et na lianpi ka nei lai uhi.

A nitak in ka kizui khia ua, kong ka va kiu ngei ua... Houpih utna nei ka hi uh, non potkhe zual man diam chi'n kamsiamtakin ka va zawn khia uhi. Huchi lou a sungte mai a va kidot na dan lah omlou ahih chia. Hiai lai bang a zaw kipikhiak a, siluang kipiak kik maimah te dan khong ka phok khe dun dun mai ve. Huai toh a kilamdanna om law din um ke'ng. A sungte kiang bang a kamsiam bang suah zezen hang! Gen pat di dan bang omlou pet mah. Himahleh sam khe ngal ihihleh chin ngohsuk pah. Zepzek louh a thutak a houlim theih kenteh chi.......kisiamtan huai kei mah e....bang ziak a khamtheih ana hih na mahmah a?? Ut ziak hilou ahi. Hon hehpih mah lehang... hiai bang thuak le poisa lou dia nou gamtang zel na hih chiang ua maw....kou TV mang se se ana gu kei leteh le na thuak tak himhim chi'n ki paa sak deuh mai in ka na uh ka sem puak romrom uhi. A mai bang ka tuam ua thudot na a khauh semsem hi. Hon kap a, ahihlouhda hon gen ngut ngut hi. Mit a muh lah hilou ahihchiah lung hon nuam pha non lou. Himahleh a gute'n thupesawntu bek na hi di ka chi thou thou uhi. Thudotna paizom zel. Nang na hih kei lehle a mi thei di na hi. Tulai a hiai kiim a che te kua te hiam? Ka chi zel uhi. A tawp in kou le chih ngaihna theilou in zingchiah damdawi na va lei chiah hon kan khe tei tei in, chi'n home work piak in ka pe mai uhi. Tua teng zoh in ka va kha kik uh a, a inn sung uh le ka lut non kei uhi. A sungte'n bang ana chih phet duam maw? Kou bel khutkhial kichi lou in ki paa sak deuh mai in ka om gemgem chiat uhi. Tu khonung ngaihtuah in bel a thuak di dan ka ngaihtuah in ka hehpih mah mah mai hi.

Thu ka muh dan un gutaten Kwakta a van piaksawn na leh kizoppih nei uh chih ahi. Huchi ahihleh van mang le pammaih (chih phet louh "gou" bang a neih ahi) tham thou ahihchiah ei a mah hive'n a thawn a iva muh kei tak leh le sen beh zek a va lak kik theih khak leh chi'n huai lam naih mai din hon ngen uhi. Kwakta va hoh a, a van guk te uh deliver dia kuan bang om zen zen leh chiamteh a Lamka kik touh chia thudot di chi peuh ka ngaihtuah dan ahi. Damdawi zuak te inn a va hoh a TV va gam zon mailouh lampi omlou tuk ahi ta hi. Huai dia Imphan bus first trip pen atuang didan in ka kihou uhi. Zingkal baih deuh in ka thou ua himahleh first trip ka lap kei uh. Bus ah ka tuangsuk ua mi muanmoh di dan om zeuh zeuh mah leh van a neikei ua, hiai bus sung a houlim pih di dan zong a omkei. Ka tungsuk khong ua, ei khamtheih hihlou [mihoihte :)] a din khamtheih zuak na mun a va mawk lut theih ding ahikei hi. Lampi ah ka ding top ua, a tawp in eimi mel pu deuh khat ka mu ua, ka va hohpih top uhi. Khamtheih lei ding mah a Kwakta hoh ahi a. Ka buai na uh leh ka thil hih sawm uh ka gen ua, "kon en di o..hiai lak ah honna ngak un," a chi hi. Ka ngak ua minit 5 di khong nung in hon kik hi. "Huchi di dan omlou hive aw," a hong chi hi. "Mundang ah le hon ve etsak ve, a noplouh kei d leh na hon panpih leh bangzah hiam bek ka hon hawm na kei dua.." ka chih leh, "awle "chipah gaih in ava diang khe nawn hi. Mun thum hiam a ava lut zoh nung in, khamtheih zuak te khat in ana leisawn a, huai in midang kia zuak khe non ta chih ahi. Omdan bel a khamtheih zuak te kia om nonlou, va mawk lak kik chu hithei nonlou ding. Tat kik theih di leh di louh le theih ahi ta kei hi. Bang teng hileh a leisawn te va kan khiak a, a TV mawng mawng va et chet masak ding ka chi uhi. A va diang khe non a, hon makaih ding valnou khat toh hon kik ta uhi. Lampi lian lam apat hon paitouhpih nilouh uhi. Unau Thadou te khua Gothol lampi lam ka monoh tou uhi. Lampi lian ka gamlat hiai hiai ua, gam mang theih na khop tan bang hon paipih uhi. Khenchiang bang in hon khem uh hita hia chih in om a, lung bang hon nuam ngel kei hi. A tawp in inn khat ah hon lutpih ua Meitei pau in hon ki hou bolbol uhi. Huchidan TV ka lei kha kei uh. Ka thei kha kei uh honna chih san maimah uhi. Mi gam ahi a genbeh ding a omkei. Aw guta koi gam hon tut na mai a? Hon ngai nang e, ka kiang ah hon pai inla ka hehlai puan bang hon nem ve aw....

Mang taktak eita ve!

Heh vilvel mai.

Lohsam a kik.

Lampi lian ka tungsuk non ua, eimi hidia gintak khat bel (naungek silna kuang chiah chiah) te khat tawi kawm in bus apat hon kum khe chet ka mulai hi. Kuate hiam poimoh leh deih mah mah lai khat hiven chin maw ka chi lel hi. Guta chia va mat mawk dan lah omkei. Kei leh kei ka ki en a, aikaw-han lel ka hi ve. Hilele a mel bel ka hoih et ngial hi. Tun bel ka thei nawn kei. Ka kik ua lam et bei takin ka om uhi.

Huchi in nibang zah hiam nung in huai ka vuak khelh pa uh toh ka kimu non ua, amah ahihlouhdan ka thei chiang ta uhi. Kisuanlah huai mahmah a lah hihtheih om nawn kei. Hilele paa deuh in kisik mel himhim ka paw utkei lai hi. "Muanmoh nei ka hi hilele amau ahihleh hihlou chu sure lou ka hi aw. Hun lemchang masa pen pen ah kon hilh dia na man dua, thu dong le uh teh hon pawt mai ding" hon chi hi. "Amau tulai a Lamka sunga che te ahi," hon chi lai hi. Tutung chu guta na zong pum a ki pum huat ahihchiah ka phur peuh hi. Himahleh a kawmzol maimai hi di'n ka um lel hi. Thei hile zong hon pawng hilh di'n ka ging kei hi. Ki vaw ek kha zawmah ahihteh.

Nitaklam khat ka lawmte toh ann nekhawm dia kisa a ka omkhawm lai un kin deuh in tua mipa a hon pai a, "..tualak om uh ei ka mi gente, va man n.." hon chi hi. Kou le omkhawm teng kim kei mah le ung, mi nih kia in a gen na lam ka delh ngal ua, tai in ka tai thoh zezen uhi. A gen na mun ka tung un ka nak hehu zezen uhi. Ka gal et masa ua, thawm ka ngai zek uhi. Om mah uh e...bang a i zat di chi in singkhuah ka zong uhi. Singkhuah om mawk kei, mat khak khak ka man ua, ka lawmpa'n bang singthem ki hal tumbang khat a toi veu vau sam hi. Thakhat in ka diang lut uhi. Nih a na om uh hi. Lung muang mah mah in khekham tuah leuh lauh kawm in tuangtung ah ana kizan uhi. Khonung ngaihtuah kik leh zaw a niteng khamkhop di mu, ana tawldam hiphot un...a ni nawn a manoh na di lam ngaihtuah khawm a ana om chu hi peuh mah du'n a gintak huai hi. Khat pen bang in puakak le silh lou in, a khut zung kalh tuah lep lap kawm in a dek ah ana kham hi. Tua bang a lungmuang leh khovel thil ngaihtuah a i tawldam lai mah a i Hondampa'n tuak phut di mah ngenta ihi uhi...

Kiphuguih uh hi'n ka thei. A ding pah pep pep ua, sat ngailou a thumang taka hon zui di uh ahi chih ka theih man uh kamdam in, "hon zui uah," ka chi lel ua huchin a man ka himai uhi. Mun thoveng ah ka paipih uhi. A ziak bel mi hon tam noi noi louh ka deih ziak uh ahi. Huchin lawmten bel hon zong khia uh a, thudotna ka pan ta uhi. A kampau uah chu mohneilou mah a bang uhi. Amau le hailou ahihchiang un sawt aki im zou kei uh. Kou guk mah ahi hon chi khekhong ta uhi. Hiai a hon chih khiak na di un bel koule khut leh khe ka hah lik mah mah ve ua.

A van in ka mukik kei ua, TV tang in a sum in ka muhkik thei uhi.

Hichibang gamtat tutmuang kawm leh awl a i ngaihtuah leh zaw a hehpih huai mah mah uhi. Hichi bang khong a kisat a kizep in amau ah hoihna a tun kei chih le i thei. Mahleh hiai bang lungsim sia ki pu kei leh hiai TV mang chu muhkik in a omkei ding. Pammaih hi nan chia maw!

Guta i mat te bang loh ding  ihi dua le?