Bung 1
A HUAISIA KIDOUPI

Kuki leh a kaih zatamte’n Paite pau zangte’ tenna bial simsuah gam (South East) ahon ban lak hulhul ziak un, ZRA leh a kaihzatamte adi’n a mangbat huai in a lungzinhuai mahmah a, khua tamzaw alak khit ban uah, thuneihna liantak a neih ziak un, muanna leh bitna a dengdel sak mahmah hi. Paite te’n a lalgam tamzaw uh amansuah tak ziak un, tua lalgam tamzaw uh mansuahlouh a humbit teitei sawm in a pang nak mahmah uh hi. Paite-te ngeileng Zomi min a kipia a, Churachachandpur bial mun tamzaw ukkhum a, a lalgam uh ahihziak in, khahsuah louh sawm in a kisa bemten uhi.

June 1997, in Thadou Kuki pau zangte’n amau sang a milip tawmzaw Paite Pau zangte tung ah thilnget khat ana bawlkhum ua, himahleh, amau gam hausa ahihlouh ban ah, a zawnluat ziak in a thilnget pichin zoulou a, huai ziak in, June kal nihna, 1997 in Saikul ( huaibel paite pau zangte tenna khua) hon douluih mawk hi. Huai a thiltung thukkikna ding in, July 1997 in Paite-te’n Thadou-te tung ah gal hon puang pah ngal uhi. Huaiziak in, nauvei bang in hiai kidouna in Lamka bial, gamchih mualchihte hon gamnohta hi.

Tuabang kal ah, niteng tanchinbute ah, kidouna thu a kigen munpen a, mite’n leng bildoh pen in neisek uhi. Huchihlai in, India malsuah bial a om, Lamka khopi ah Apple lei nei leh Indian Royal Air Force a semngei Ginsiam tapa Mark Paite in hiai tanchin bu a kigelh, “Thadou galkap ding Zomi sepaih a tamthei lamlam tuailai kideih” chih a simkhak in a pona mahmah a, huai a a min khumlut ding in hong kipekhia hi. Hiai kidouna huaise tak ziak in , gam-le-nam iit tuailai suanhuai tampite’n sihna a tuakta uh, chih leng a thei a, himahleh, Thadoute gamtat dan hoih a saklouh ziak in, amaute huatna’n a dim a, galkap sepaih di’n a va kipelut ta hi.

Churachandpur bel singtangmite gendan in Lamka a kichi a, Hausa a kivaipuak in Hausa etkolna nuam ah bubit tak in ki-om hi. Hiai khua ah Ginsiam-te nupa a teeng ua, hiai khua a ding a mi neizou pawl leh suanhuai pawl a gen leng ahi uhi. Tapa khat leh numei khat a nei ua, innkuan kihou thei tak ahihban uah, sahkhua lam ah christian a hi uhi.

September 1997 ahi a, zingkal baihtak in dak hawmpa (postman) in laithon lianpi khat, Ginsiam-te a ding a vapia hi. Ginsiam in leng, tu zingkhangpi a bang laithon hiding ahia? Chikawm a phel in a sung a etleh, a lungsim loulam ahihkhak ziak in a nguai mahmah hi. A zi leng zing singpi pedia a hong paiphei leh, a pasal nguai mahmah a tu a mupah a, “U Siam bang ngaihtuah a hichi nguai dedu na hia? Tunitak na mang selua hia?” chia a dottak in, itpen endih hiai laithon I tapa hawmthoh Mark sapna ding aka, a chi a, huaitak in a maban ding uh a ngaihtuah ua, a lung uh a zing mahmah hi. Hiai laithon sung ah bel…..30th September, 1997

Dear Mark,
Na kiang ah hiai thil poimoh tak ka hon gen ut a, hehpihtak a hon pomsak di’n k’on ngen masa hi. Na min na hong khumlut dungzui in, hiai lai tungtawn a sap na hi a, Manipur gam, Tipaimukh bial ah langpang pawlte om uh chihthu zak ahi a, a kinthei bangpen a hong kisa a, zingchiang zingkal dak 9 ma ngei a, 107 division hqtr hong tung di’n k’on theisak hi.
Lai-at
Northern Command
Zomi Revolutionary Army 107 Battallion

Mark leng zingkal thou phet, “bang a na huchi lungkhamna uh? Bangthu ahia?” chi’n a kan a, a pa’n “bawi na hon su lungkham telmai, bangdia huai sepaih dia na va kipiak sese ahia? Nangla tapa k’on neihsun uh na hi ngal ?” a chi a. Huai nupa-te adi’n zaw bangchi tuk in a thuakgim huaidia? A tapa neihsun uh Mark lah zingchiang a kidouna phual a kuandia teelkhiak ahita ngal a, kidouna om sese lou hileh zaw maw? Mark Paite bel, October 10, 1984 in a piang a laizilna lam ah Class X tan sim in, khanvual tampi a nei a, laisiam theitak ahihban ah, michitak a hi a, laisiam mahleh chikmah in a kiliansak ngeikei. Huaiziak mah in mite’n polhnop asa thei ua, nungak panpan te’n hoih asa thei mahmah uhi. Ahihhang in, aman bel huailam pang himhim a sai nai vetkei. Tuate ziak leng ahidia, a nu-le-pan “bawi nangzaw kum 13 phet hi chin a, na nu-le-pate na su lunggim ngeimai, nanglou in hiai khovel bangchi’n ka zang ta phet ding uam maw?” a chihna san uh. Himahleh, aman, I gam-le-nam ka iit a, bangchi leh ken ka gam humbit theiding chih in dotna lianpi hon bawl ziak in, ana kipekhe kha mah h’ing a chi hi.

A nu-le-pa’n, a tapa uh dawnna a zak tak un a lungtqang kip asa mahmah ua, “Bawi aw nah on dawnna hoih kasa lua ua, ahihhang in, va kuan hilechin thauvui thautang lak a khosa ding na hihman in; hongs i zenzen lechin, kou nan a nu-le-pate ka teknung chiang ua, bangchi khosakding ban ah, hiai I innsung kua khut a omta ding ahia? Nanglah kou adia ka tapa neihsun uh hi chin a, huailam lou deuh a pan theihlouh ding hia?” a nu-le-pa’n a chi ua, “na hon theikhinta ve uale, bangdia hon khoukhou lai telding nahi ua oi! Tu in bel tawpkik ut lengle thil hithei nawn vuallah ahikei a, huai phetlou in, ken ka Nam ka Gam adia ka seplouh in kua’n hon sepsak a kua’n hon huh tuanding nasa ua hiam? Pasian kiang ah thungetna nei in, dam a innlum k’ong tunkik theihna ding in thuumna n’on neihsak zawkding uh ahi?” chih toh, bathroom lam ah maiphiat ding in a lutsan hi.

BUNG 2
GALKAP DIA KIPIAKNA

Ginsiam-te nupa a ding in lah, zingkhua hong vakleh a tapa neihsung uh Mark galkap a a kuankhiak ni ding lah ahita ngal a! a tapa neihsun uh ahihziak in a hawmthoh un a duat mahmah ngal ua. Aw! Huai Lamka khopi a, innkuan khosa theite adi’n a thuak haksa hinatel in chia! Hiai leitung bel ki-it kingaite khen a lungzuan ngaihtam sialna mun himahleh, miteng adi’n bel a hi lawmlawm keiding. Himahleh, amau innkuan a di’n zaw lungkhamna gam chihlouh vual ahikei himhim hi.

Zingkhua hongvakta ngei a, himahleh huai nupate’ adi’n zaw nidang sang in, nisuak nasan a etlawm kei zawtham ua, a huan sung ua singtehte nasan in thuakpih mah a bang nilnel maimah uhi. Mark’ kuankhiak ding a ngaingam mahmah kei ua, phal leng a phal mahmah kei uhi. Dam a mel kimu kik nawnding maw? Chih nasan theihphak ahihlouh ziak in, amau innkuan adi’n zaw…..
Aw Pathian tang a hon panpih, machiang ka lam-et u; dam a mel kimuh kik dong sian in hon kemden hen
Kichituah kawm a chibai kibuk in, a lawm Siamboi-te innlam zuan in Mark in a paisanta hi.

Mi tamzawte kihouna bel kidouna thu ngen ahi a, a khente’n a ngaihzawngte uh bang taan in a sun ua, khenkhatte mah in lah, a tanaute uh, a sanggamte uh leh a lawm iit mahmahte uh sun in a buai mahmah uhi. Huaiziak in, kuama’n hiai kidouna tuh a deihkei thei mahmah ua, a ning mahmah uhi. Galkap tute ngei in leng mahni gam chiat humbit teitei sawm in a pang nak mahmah uhi. Hiai kidouna in a tamzawte meithai sak in, a tamzaw te zi-le-ta bei bang, ne-le-pa neilou bang in koih a, mi tampite khitui luanna suak hi.

Second lieutenant in galkap dingte min a banban a hon simkhiak zoh in, a uniform ding uh leh a thautawi ding uh a banban in hon hawm daudau nawn a, a thupiak bel, kuamah hiai galkap a kuan dingte kitaisan louhding ban ah, nam-le-gam adia pang I hihdante theichiat a, hinna nasan taan ngam khop a panding chihte a tel hi. Mark leh a lawm dangte, Lieutenant thupiang bang in mahni van chiat tawikawm in a kisa souhsouh mai ua, a gamtat khohei dan un zong a fel tuak thei mahmah uhi.

Zinglam dak 10 in pau ngaihna tungtawn in mahni kikhenna ding khatchiat ken thuah ding chih hong kipuang khia a, huchihnung sawtlou inkisap khawmna dak a hong gingta hi. Thuumna a neihkhit un, Gari sung ah Mark leh a lawmte a lut souhsouh uhi. A hong lenkhiak nung uh sawtlou in, lenna sung ah mark a hong ihmu a mang a neipah hi. Sun nisat laitak ahi a, Ding’ leh Siamboi sabeng ding in munkhat ah a kuankhia ua, himahleh, vuahzuk khitnung sawt nailou ahihman in Sa’ sulnung zuihtheih ding a mu mang kei uhi. Nitum dong a a vaknung un leng a man zou mahmah kei uhi. Innlam zuanding chi’n Ding leh Siamboi khut kilen kawm in a hongpai ua, lampi a tui ana lian in, a lui kanlai uh a laizangtak a tun un Ding’ lawm Siamboi tuh tuktui khang in a taimangta. Huchia a ihmut lai in, a khanglou guih a, a taktak sa a a dakkhiak leh, a Mang’ a hihdan a theikhe thak hi.

Mark in a mang a ngaihtuah nilouh a, lamdang a sak sim ziak in a lungsim a nuam pha ngelkei hi. Huchia bangtan hiam hongtai nung un, Tipaimukh Road a, Mission Compound kichihna mun a hongtungta uhi. Mission Compound Camp apan Km 2 velding a gamla ah, Thadoute camp thupitak a om a, a battalion munpi uh a hi zomah hi. Huaiziak in, Mark leh a lawmte leng huai camp thupitak om pen luhkhe ding a thupiak in a om uhi.

Seppatni ahi a, October 12 leng ahita hi. Nitak dak 7 gingta ahihman in, Mark-te battalion tuh Thadou-te camp um ding in hong kisa ta uhi. Dai tak leh thawm neilou hial a, hongpai khiankhian in, amasate’n sikdai teptan zel ua, a zom ate’n thuaptou zel in hongpai uhi. Huchibang a a hongpai zel uleh, Thadou-te bunker sung apan thautang kuang zotzot kawm in a hong lengpawt ziahziah a, kikapna tuh kipan ahita mai hi. Thadou-te tuh a khauh mahmah ua, mualtung apan sukkap pawlbang, phaikap pawl bang a kikhen in, kilchih ah a kidaih zou mahmah uhi. Huaiziak in, Camp luhdia kuan lamte tuh a pangbuai simpah uhi.

Huailai tak a kidouna huaisiat dan zaw kuama’n manglam inle a man ut keiding! Bomb ging lah dai lou, kek kia bang a ngaih a ngaihthei mai, thautang lah vuahzu bangmai a zu in sawttak a kikaptuah ngekngek mai uhi. Khua hongvak pan hilhial chihding in, a kikap tuahna mun uh tuh munzaang (fix range) ana hi a, Mark lamte tuh a sit oh a liam toh a om zengzung tamai uhi. Kuamah a kingaihsak man a om tuankei ua buai petmah in a buai uhi. Huai a, si-le-liam a tamluat ziak un, amau lak ah, sehthum suah sehnih bang a hong sih hial chiang un a nungkik uh ngai a, nunglam a thaukap kawm in a tai suausuau tamai uhi. Nitaklam dak 2 in bel, thauging a da nom deuhta ahihman in, a si-le-liamte pawkhe pawl bang in kikhen theita uhi.

Maban sawn thei nawnlou a, a om taak ziak un, Headquarter lam apat nungkik ding a thupiak mu ua, Lamka lam manoh in nungkik suausuau maita uhi. Theihlouh kal in Mark’ leng thautang in kha kha in liamna hon tuak hi. Nipi kalkhat nung in, Mark lamte’n leng beihpi suahdi’n hong kisa thak nawn ua; bomb tampi petmah kapkhum in, a camp uh umkual in sual petmah in a sual uhi. Bomb gingte lah, amasa sang in nakpitak in ngaihzaw a, a ging duatduat geuh uhi. A tawptawp in, huai camp a om Thadou sepaih a sang a simte a kipekhe khong ua, a luhzou khong uhi.

BUNG 3
DAMDAWI INN AH MARK

Thadou-te camp Zomi leh a kaih zatam te’n a luhkhiak nung uh sawtlou in, sepaih a tamzaw tham a hong tunbeh ua, a laksak uh gamte luahkik thak sawm in Mark lawmte a kisaan mahmah uhi. A tamzaw thamte a kipiak khiat khit tak ziak un, tamlou chikte kia galbawl a hong suakta uhi. Huaiziak in, a omlaite douding in kilchih apan sepaih a zaa a simte a hong tunbeh souhsouh ua, a hong kinawn lut zungzung phet uhi. Huchi’n, a camp luhkhiaksate uh Thadoute’n ana za zel ua, a maban ua camp omte’n na za zel in a taikhe zel ua, baihlam tak in a luhzou ta uhi.

Mark ngeileng a liamna apan damsiang chiah naikei mahleh, sawtpi khua phawklou a a omna a kipan khua a hon phawk samta hi. A kiangnai a a muh masakpen bel, nungaknou nurse puansilh a ding ahi a, lamdang asa mahmah a, koimun a om ka hia chih nasan a theikhe zoukei hi. Nurse nu kiang ah, “na hon ngaihsiamna k’on ngen masa dia, hehpihtak in hiai mun leh ka omna san hon hilh ding in ka hon ngen hi?” Ding in a chihleh, Nurse nu’n Ding’ kiang ah, “tu’n bel ka hon hilh naikei dia, na hong damdeuh chiang in ka hon hilhzaw ding aw?” a chi a, himahleh, Ding’ in a nget teitei ziak in a tawp in Nurse nu’n Ding’ kiang ah a gen khongkhong hi.