I Lungsim ah vei guk I nei hiam, ngaih guk I nei hiam, kipahna guk I nei hiam aihkeh thangpaihna I neih hiam chiang in, ei kia a I puak tentun sang mah in kuahiam khat kiang ah I va gen khiak leh a puak le a zangkhai deuh se a bang hi. Hiai a tung a topic kipai “MISUAL TE KOI AH KIKHAWM DI KA HI UA” chih dan a thu gelh di’n kei leh kei bang ka kisit petmah a, a sim tu te’n le kei khawng gelh hial din zaw hi le a sa kei deuh maithei di uh chih le ka haih kei. Hilele I gen sa mah bang in, kana vei guk, ka lungsim hon kam khat a hih man in siam leh siam louh gen se lou in ka hon thai suk neknok di.
Kum 1730 lak vel in England gam ah Biak Inn thupi tak mai a om hi. Huai Biak Inn thupi tak mai a Pastor a hih leh William Cowper ahi hi. Saptuam member le a tam mahmah ua, a Biak Inn uh le a lun petmah hi. Mi hausa taktak, mi lian leh lal taktak, a gam ua mi thupi taktak te ngen phial in huai Biak Inn ah Pathian phat in ana kikhawm sek uhi. Huchi’n nikhat chu Nungak trop tak mai, Nawhchizuak, khotang in a muhsit mahmah mai chu huai Biak Inn, mi hausa leh high class taktak te kikhopna ah a hong lut ta mawk hi.
Mipi kikhawm te’n le lamdang sa hial in, huai Nungak trop tak mai leh MISUAL a sim chu a en nuam petmah ua, ana en heihai geuh ua, maksa lua in a en seuhsouh geuh uhi. Huchia kikhop a hong tawp tak in Pastor William Cowper in, huai Nungak hehpih huai tak mai a Saptuam mipi ten ana ten mahmah uh, a hong kikhop ziak a huai Biak Inn a mi a hong kikhop nawn louh di ana lau gu ten ta hi. Huchi’n huai Nungak trop tak mai chu ava houpih ta a, hiai Biak Inn ah hong kikhawm nawn lou ding in ava gen ta hi.
Huai Nungak trop tak mai in a hinkhua a dangtak dan te, khalam nawitui a dangtak taktak a hih dan te, Pathian thu a ngaih khiak ut dan te, a hin khua a beidot dan te Pastor pa kiang ah a gen ta hi. Huchi in gen mah leh Pastor William Cowper in hiai nu ziak in a Saptuam ua milian taktak te leh mi thupi taktak te a chan khak di a lau zel hi. Huchi’n huai Nungak in Pastor kiang ah, “ Pu aw, kou MISUAL TE KOI AH KIKHAWM DI KA HI UA…???” Chi’n a dong ta hi.
Nungak nu thu dot in Pastor pa lungsim a kam nak tel mai..! Misual te, mikhial te a dia Jesu Krist Saptuam sung ah MISUAL te a tat louh mawk pen in a lungsim a kam nak petmah mai hi. Huchi’n a hong houlim zom zel ua, counselling khawng neihpih in a thumsak ta hi. Huchi’n a thumna te dawng a om ahi ngei ding a. Huai nawhchizuak nungak chu a hong piangthak ta hi. Huai apat in a Biak Inn uah, misual te, drug addict te, kizuak te, zu ngawlvei te a ding bik in tutna leh mun special tak mai bawlsak in a om ta uhi. Huchi in hiai Bible chang Zakaria 13:1 leh huai Nungak nu testimony apat in hiai laa chu phuah in ana om ta hi.
Immanuel Nakliam Apan
Immanuel nakliam apan sisan lui hong luangkhia
Tua sisan lui migilou di'n,
Gitlouh silsiangna hi (3)
Tua sisan lui migilou di'n, Gitlouh silsiangna hi.
Gilou si ding a kilh un zong, tua lui muman in nuam;
Amah bang in gilou leng zong,
Tua ah ka siang ding hi (3)
Amah bang in gilou leng zong, Tua ah ka siang ding hi.
Ka it belamnou na si pha'n, thahat mansuah ngeilou;
Tatsa saptuam khial nawnlou dia
Hotkhiak a hih dong in (3)
Tatsa saptuam khial nawnlou dia, Hotkhiak a hih dong in.
Na liamma pan sisan lui luang, Muanna toh ka muh nung
Tatna itna hi ka thupi
Ka sih mateng gen ning (3)
Tatna itna hi ka thupi, Ka sih mateng gen ning.
Kei dang-awk pi hankhuk sung a daidide' ka zaal chiang,
Tuachiang' la ngaih zaw'n hon phat ning,
Hondam dia Na hatna (3)
Tuachiang' la ngaih zaw'n hon phat ning, Hondam dia Na hatna.
A tung a tangthu (chi mai le) ka sim khak apat in ka lungsim a hon kam den mawk hi. Ei sung ah en zual ta le hichi bang khawng le a tam mahmah ding in ka gingta sim mawk hi. Ahi lawtel vele maw, kei mahmah le ka hi a, nou le na hi thou di un ka gingta hi. I pianpih uh lungsim le hikha ding ahi. Midang te omdan hoih va gengen sang mah in I dem peih zaw mawk uhi. “ Huai pa le, huai nu le..nidang a huchi eive, huchi dan a om sek chi uh eive.” Hiam , “ Huai te khawng chu…tua le hichi lailai uh himah lou a mo…” Chih dan khawng himah maw le I gen te uh kha.
Ahi, I gen ut pen tak zaw a hong tuam kha maithei. Kuahiam khat, nidang a guta I chi hiam, misual I chi hiam khat bang Biak Inn khawng ah hong kikhawm lelah, “Huai Pa/Nu le..” chia ana huphurh sim awm tak a ana en pah mawk…!!! Kuahiam kizuak chia I na thei hiam khat Biak Inn hong kai bang I muh leh..mit sik a en geugau kawm a gimneih hi awm tak a ana hih heihai. Kuahiam khamtheih hih khat Biak Inn kai I muh le lah, “Hiai mipa/minu le Biak Inn a “KICK” zatna dia hong zang eilim vele maw..” chi hi awm tak a ana en heihai peuhset. Kuahiam zu ngolvei khat Biak Inn a hong kai lelah, “Zanitak bangzah tak dawn na maizen a na gim lah hong namtui sim hiauhiau a…” chi hi awm tak a ana engbawl heihai khemkhem.
Nikum lam deuh in ka ki naihpih mahmah khat in OD in hon na mualliam san hi. A bei ka theih phet in kenle ka omna apat gamla leh nai chih om lou in ka delh ngal a, lampi ah ka delh kawm in ka lawm te ka ban hilh hi. Lawm te khat in “ Aw, poi na e maw, a duh ne a si eive maw..” hon chih san hiau chu aw, dik zaw dik mah ei, hilele huai va ki chih khelkhel ngai lou hia. Hiai culture bang chik chiang a paih thei di I hi ua leh? Misual I chih te bang le khenkhat a ut mawng ua sual hi ding in ka koih thei kei mawk hi. Sual na kichi zaw chi tuamtuam a om ngal a. Huchia MISUAL chi thei dia mihoih kisa te bang chi tuk a hoih a hi tel di uh. Khamtheih-Guihtheih, tep leh muam a hih louh ziak ua mihoih kisa uh ei diam, mihoih a sim I hi di uam..? A dawn na zaw nou ana ki zong mai un. Misual a I sim te uh a hoih nang uh I va gen theih kei leh ei hoih I kisak bangbang in ana hoih heuhuau mai le hilou hiam?
Hichi bang ka ngaihtuah khak changin, lupna tung ah ihmu theilou zen in, “ MISUAL TE KOI AH KIKHAWM DI KA HI UA” chih dotna ka lungsim ah a ging tawp thei lou hi.