GUTA TE A PAN LAMETNA OMSUN-MUMUNG TONSING
(chabi ka chih chiang in chabi a bol pen leh a hekna ka genna hi a, sim dan siam in)
Amasa pen in thil mang sapsap ding in nungak te a man chiang in mihing te ki lungmuang vet zo hi. Khovel a thil a mang chiang in nungak te kia mang thei hileh chih huai hi. I gen ut pen I gen ma in, gou man tam pipi, Activa, Sum, Bolero, Tv leh gou chi tuamtuam ana sumang te a ding in poi ka sak thu hiai I news/website tungtawn in ka puak hi.
Tulai in guta te changkang thei lo petmah ta ua, Gate hoih taktak a ki kalh, innkong hoihtak a ki kalh chih khawng bangmah a siatna om hetlou in luh thei ta uh hi. Bang chibang van zang a, bang siamna nei uh hiam chih genhak leh theih hak pi suak hi. Tulai a van a guk uh leh a gamtat dan uh ka ngaihtuah chiang in ka ngaihtuah na ah hiai hong lut hi. A minthang Pu Sarukh Khan te, Pi Rani te lenna tualpi Bombay khopi ah hi chibang ana tuak kha ngei ta ing. Khopi tung phet, theih na tawmchik toh inn ngak in hon pangsak uhi. Tui ka zat lai hong kang mawk ahih man in kin deuh in inntung lam a tanky ka va en hi. Innsung ka lut kik nawn dek leh ka inn kongkhak uh automatic lock ahih man in, Chabi ka tawi khak louh man in ka lut thei kei hi. A loh ding dan thei lou in lawmte hong pai ding inntung ah ka ngak hi. Chabi leh Phone leeng innsung ah aom vek hi.
Lawmte a hong tun phet un ka dinmun ka gen leh kin deuh in a hon diankhiak san ua, inn ah ana om in hon chi uhi. Ka theih thakthak leh nitak dak 9 bang gingta ahih man in, Bazar a chabi bawlte ana pai man ding uh lau a hon diankhiak san uh ana hi maimah. Chabi bawlte hon tonpih ua, Chabi bawlpan sikthem(piece or iron) lianlou zang in chabi ah hon guanglut hi(Chabi bawlten sikthem neuchik chik chabi a tuam dungzui a zat ding tampi bawlsa nei uhi). Chabi vang ah sikthem hon guanglut a, awlawl in hon hek hi. A hon hek zoh in sikthem hon dok khe nawn a, SIIK-HAAT zang in sikthem hon nawt jejet mai hi. Chabi bawlpan sikthem a guanglut uh leh a nawt khiak na ding teng a khut in thei hi ding a, a nawt zoh in huai sikthem pen toh chabi ki tuakchet a, inn hon na ding leh chabi ding in zat theih mai hi.
Khopi a hi chibang a siamna nei om ahih man in, mi PIL VELVEK deuh khat in (etsakna ding in: unau mosolman te) khopi techonoly hon pawlut hi ding in muangmoh tinten ing. Hi chibang technology zang ahih louh uh leh bel guta te Dawi pai hi maithei ding uh hi.
Awle, guta te’n I gou manpha tampi te a hon guk sak chiang un I it mahmah ua, I pona ua, hih theih lah I nei tuan kei uh hi. Ahih le guta te a pan lametna bang I nei lai ua le? Guta te apat lametna hoih tak leh liantak ka nei hi. Hiai Guta te’n a nasep uh hoihtak leh feltak in hon sunzom lai uh henla, I gou manpha tampi a hon guk sak lai le uh I gamsung a Employment Opportunity om na ding a 1st step hong suak ding hi. Tuni a ki pan BOLERO 200 beek a hon guk khiak sak zoh chiang in mihing te ki pil ding a, I inn chih(mi hausa te a ding in)/local chih a duty ding Security guard/Watchman khopi a mi’n a koih bangbang un en leeng ki koih ding a huai hun chiang in tuailai tampi ten guta te zar zou in sepna watchman/security gurad hon mu ding uhi. Huai hun chiang in Unemployment bang leeng bangzah hiam hon suveng zou ding hi. Huai ziak tulai a guta ten van a gukguk uh ei te a ding in “the 1st step to create employment opportunity for the uneducated and unskilled youths, and Arm forces pensioners” hong hi ding hi.