Kalchar Hilhchetna
Eilak ah mi tamzawte’n kalchar tuh i nampuan khawng, zangta la leh lam, phit lam, dak lam, leh sannem la khawng sa mai le’ng kilawm kasa hi. “Culture” chih gen khe masapen Sociologist E.B. Tylor in, “Kalchar tuh mi khat in pawlpi khat a member a hihna ziak a a zil khiak theihna, thugin, siamna, lungput/nungtang, dan, chindante leh hihtheina leh thilchin tuamtuamte tunkhawm thil khat ahi” chi hi. MacIver in, “Kalchar tuh i literature, sahkhua, hun-awl zatna leh nopbawlna a i kithuah dan, i thil ngaihtuahdan ahi” chi hi. Anthropologist te’n mi kuahiam a kipan i laksawn omdan/nungtang (behavior) tuh kalchar chi uhi. Mihing ihihna a i thil hih tengteng, khosak dan, annek, an bawldan leh nek dan, puansilh leh puansilhdan, la leh lasak dan, lam leh lamdan, pau leh paudan, kihoudan na tan i kalchar hi mai hi. I kalchar in i puansilh/kicheina, pau, sahkhua leh sabiak, an/anbawldan/cuisine, social habits, music, arts, literature, chindan/custom, i nasaep dan,i khohei dan khawng natan huap vek hi.

Kalchar Poimohna
Ke’n kalchar ka na ngai poimoh ngei kei a, ka tempaina lam leng ahi kei himhim a, i khanglui late leh lam khawng ah kana lunglut ngei kei hi. Meiteite Thaban chongba lam khawng, drama ching khawng, a khuang zawl uh beng a lasa a lam khawng ngaihnat nak sang in zak dahhuai i sak sim ton bang om zomah thei hi. India gam thuk lam i lut a; Manipuri Dance bang India nangawn a a ngaih sang mahmah uh, Indian dance minthangpen 5te lak a khat nana hi mawk hi.
Colombia a ka om lai u’n kalchar poimoh dan ka thei dek pan hi. Colombia bang India a kipan gamla petmah a; a geographical distance kia hilou in, a gammi leh pau leh sahkhua natan tuam petmah hi. Himahleh, India kalchar khawng a mu khapeuh, a za kha peuh in ngaisang in ngaina petmah mawk uhi. Mi khat bang in, “Zan teng in All India Radio program Vividh Bharti a late ngai khelou in ka ihmu kei” chi hilhial hi. Student khat Colombo plan a India a lai va zil khat bang in leng Indian classical music, Ravi Shankar’ sitar khawng, Chaurasia’ tamngaimut khawng, santoor khawng ngaina mahmah a, sitar bang va zil hial hi. India’ Republic Day leh Independence Day khawng chiang in Indian classical program hoih pipi hon bawlsak a, amah compere a zang in Radio station 4 khawng ah ka suah gige uhi.
 
Colombia khopi Bogota a Ibero-American Cultural Show thupitak ah Odyssy Cultural troupe minthang mahmah Samjukta Panigrahi leh a pasal a hong tel ua, a popular mahmah ua, miteng in Indian cultural amau’ performance kia mu nuam uh hileh kilawm in amau performance a bawlna hall uah kal khat sung mi a dim phitphet zou gige a, gam dang a kipan troupe te performance bawlna hall dangte a awng gige hi. Manizales Intercontinental Cultural Fair ah Kathakali Cultural troupe a hong tel ua; Seminar toh a kithuah a, resource person ding in Indian culture a mi minthang mahmah Dr. Sunil Awasthi a hong pang hi. Indian troupe a popular mahmah a, Seminar leng lohching petmah hi. Dr. Awasthi in, “Kathakali Seminar tam ah ka tel mahmah ta a, India nangawn ah huchibang a ni 10 seminar a mi 100 tel gigena ka mu kha nai kei” chi hial hi.  

1998 in Indian Navy te’n Nehru Centenary lopna in long engine zanglou a puanlap kia zang a Yachting Round the Globe a bawl ua. South America gambuppi tumlam a Pacific Tuipi tung a Galapagos tuikulh gam ah khawl ua, huaiban a lei sukha lou a kha khat sung bang tuipi kia a khualzin ding ahihziak u’n tui dawn ding leh a poimoh tengteng uh va ngaihtuahpih ding in kava hoh hi. Galapagos a ka tunna hotel te bang in Hindi film Sholay leh Gandhi bang nei ua, ngaina petmah mawk uhi.

Ottawa ah Canada nupi/meithai Standefer, nidang a Imphal a IAS Officer Krishnamurthy’ zi om hi. Amah a pasal sih nung in a tanu 2te toh Ottawa ah teng uhi. Khatvei a in uah nitak an ne ding in hon chial ua. A in uh decorum, a curtain, furniture bang kim Manipuri himai. An bang leng Manipuri an, ironba khawng hi a, tuang tung a tubialsa in, nahtangteh tung ah hon nekpih uhi. A tanute bang Manipur a piang ka hi uh chi a kipah a kipak uhi. Huchi khop in kalchar in mihing lungsim leh hinkhua ah nasem thei hi.
 
Canada a Toronto khopi ah Naga nungak khat Ben Subong business bawl om hi. Khatvei a lawmnu, Ukhrul a missionary Pettigrew’ tunu toh Ottawa ah a hong zin ua, Hull (Ottawa) a Museum of Civilisation a ka va hoh pih ua leh Red Indiante culture ah Ben a lunglut law mahmah a, “Kou kalchar toh kibang a tam lua a, ka enchim thei kei, honna paisan mai u’n” a chi hial hi. Huchiin, globe lehlam pek a a thil muhte’n amah hihna kiphawk thakna, phetlou in a kalchar phawkthakna piangsak hi.

Maldives bang ah Indian kalchar ngaina petmah ua, film khawng leh film starte khawng ngaisang petmah uhi. Foreign Secretary Dr. Shahid bang in a tapa Lagaan film ah lunglut lua a, dialogue bang theisuak hi chi tel hi. Khatvei Rithik Roshan si chih zuau thu hong thang a; Maldives numei naupangte khawng kah a kap uh chi uhi.  

Huchi khop in kalchar poimoh a, mi’n ngaina, ngaisang uh na hi mawk hi. 2003 hiam in Supreme Court Justice Ruma Pal leh a pasal Kolkata High Court Advocate Maldives ah a hong zin ua. Indiate kalchar min a ngaihnat dan lamdang ka sak dan uh ka kikum kha ua, amah ngial in tuh “Research bawl ding a hoih hial hi” a chi hi.
Indiate kalchar in midangte lak a impact a neihdan thu khat ahi a; a poimoh mahmah tuh amau mah mimal hinkhua leh inkuan sung kikoldan ah leng naktak in impact nei hi. Gamdang a India mi tampite bang a khang 3na khawng hita ua, himahleh India a om hile uh a khosak ding bang u’n khosa ua, a kalchar uh taisan mawngmawnglou ua, gam tuam ah amau kia hiam, tawmchik lel va om le uh leng a kalchar uh pai hetlou ua, inkuan bubittak in khosa thei uhi.
Kalchar in nam, pawlpi leh mimal hinkhua a influence khiak dan Japan a ka zinlai u’n neuchik ka thei kha hi. Mi i muhkhak peuhmah in hon panpih ding a ki mansa hile uh kilawm hi. ‘Van lei lou ding’ chih lungput toh dawl lianpi khat ah kava lut ua. A sung a semte hon mukha peuh in nemtak in honna greet siausiau ua; van leilou ding pi ihih toh kisuanlah huai zawzen hi. Japan a bel thil man tam petmah a, department store khawng a tuh puannak maileng leingam ding hilou hi. Khat vei metro sung ah ka opposite uah nungak 3 a tu ua; “nou koi a hoh, koi a pai ding?” chiin hon dong ua. “Ka tunna hotel ua kik ding” ka chih ua leh, “Next stop ah kum unla, taklam ah kihei in pai le uchin gamlalou chik ah Electronic City om ahi” hon chi ua. Ka va hoh ua leh electronic van khawng kimantaktak a a zuakna mun uh ahi a; ‘bangmah lei lou ding’ chih lungputpen kizui zou talou in sana (watch) khat ka lei kha hi. Japan a zin, Sumo wrestling et louh theihlouh chiin en ding in ka kuan a. Underground metro a kipan kah khetou; putek khat hong pai a; Sumo wrestling a mawlna uh ka kan leh bangtan hiam hong tonpih a, “Huai a in tung green na mu hia?” hon chi a. Hichi a phatuamngaihna, mi panpih utna, mahni sang a midangte ngaih poimoh zawkna khawng a kalchar uh hi a, michih in a niteng hinkhua ua kuamah hilh leng hi nawnlou a a zat uh hi tel hi.
Eilak ah leng nidang in huchibang kalchar a na om a; kholak ah mi bang in honna vaw ta leh, i nute bang in “A poi uh na va khoih a a hi ding” hon chi ua, hon gum nuamlou uhi. Himahleh tuchiang in huchi hih nawn mellou hi. Tate khawng in kholak a buaina va bawl, nu-leh-pate’n pawng gup chih bang om thei hileh kilawm. Naupang khat skul a buaina bawl, a nu’n principal va kinakpih chih bang leng om.
Huai phet hilou in, pawlpi hinkhua, inkuan hinkhua leh mimal hinkhua a kichildan kalchar hoihtak i neihlouh ziak ahi diam, mi dangte chindan hiam, kalchar hiam, thil thak i zak khak peuh, i muh khak peuhpeuh i la lut pah zungzung uh a bang hi. Etsakna ding in damdawi kalchar, zudawn kalchar bang, facebook khawng leh mobile khawng bang a leng blue film bang suah thei khop hial bang om ta hileng kilawm tel hi. Huaite sang a leng lauhuai zaw culture of violence bang leng la lut khin ihih ding lauhuai mahmah hi. Colombia bang ah mulkimhuai taktak kithahna tam mahmah a; mi nautang in tuh haksa sa mahmah ua, ‘kou gam ah zaw kithahna khawng ka kalchar uh hi mai hi’ chi khawng ka za tam mahmah hi. Gabriel Garcia Marques in hichibang kithahna mulkimhuaitakte a laibu “Cien Anos de Solitud” (A Hundred Years of Solitude) ah gelh a, Nobel Prize la hial hi. Himahleh, huailai a kithahna mulkimhuai lua khawng tuchiang in ei lam bang ah leng om thei tham ding hileh kilawm hi.
Huaiziak in i pawlpi, khotang, leh mimal bitna ding leh khantouhna ding in i kalchar poimohdan thei a, i kalchar dinmun hoihtak a et thak a, i neihsa hoihtak tampite a phatuam theitawp a zat a, puah phat ngai om leh puah pha a, a poimoh ngial leh phuah thak ngai bang a om leleng phuah mai poimoh mahmah hi.

Zomite An (Cuisine) leh annekdan

Ke’n kum 30 sung gam tuamtuam, mun tuamtuam, kalchar tuamtuam lak a ka zin kualna a i kalchar toh kisai a thawmhauna, giautaunai chi phet diam, houh maizumna, zahlakna i chi hial diam ka na tuah tuh i an, i nekbawldan ah ahi. Huchibang a tuak kha nailoute’n bel “chi laizang!”, “settawk kawi!” na chi maithei uhi.  Milak  ah i va om a. Mi anne ding in i chial a, “Nou an mahmah nek ut ka hi, nou an hon huan u’n” a chih chiang u’n gen ding, etna ding vang mahmah hi. Dolhou meh maw?  Sathu meh maw? Sihzou pok maw? Hi nawn zensamlou e! Tuchiang in hiaite kia ne ihi nawn sam kei a; meh limtaktak bawl siam in i siam ta hi. Nidang a  i nekte bel “balanced diet” himahmah lou a, taksa hoihna ding leng himahmah lou a, nidang a singtang na khanglian kou chiang bang tuh “malnourished” ki hi mai hi; himahleh tuchiang in tuh singtang a tengte bang in leng nek hoihtaktak, limtaktak bawl theita uhiA ingredient leh flavor lah ei an mahmah hi; koimun peuh ah, khovel kilkal khat ah va om lengleng “ei an mahmah” kichi tinten, thil i muh peuh ei anhuan dan a huan louh kiduhlou. Ahihhang a lah nidang a thil i huan peuhmah, antehlom khawng, vok sathau khawng, dolhou khawng, tuibilh suk a i huan bang hi nawn teuhteuhlou, limtak tak in i bawl theita hi. Etsakna ding in kelsa huan bang kisiam petmah kasa hi. Keibang sa ka nek theih tawm mahmah a, a satak siang sitset loungak ne theilou ka hi a; abik in sa tuam deuh kelsa chih khawng tuh nek sawm bilbellou ka hi mawk hi. Himahleh, inlam ka pai in lawmte khat in “Kel hon goh ding ka hi” chi; ke’n “gou zenzen lou ding” chi a hah a hahpan. Ama’n “Na ut leh hong inla, na hong nek ut kei leleng ke’n tuh gou thouthou ding ka hi” a chi a. Ka va hoh leh neklouh malak in, lim kasa mahmah hi. Tuabang geih in midang khat in hon chi nawn a, ka sel zou kei a. Kava hoh leh lim kava sa mahmah hi. Tua i kelsa huan dang bang midangte lak ah leng lak tham ching mahmah ding hi (kizumpih naksang in). Huchimahbang in, i bawngsa huan dan khawng bang leng “palatable” mahmah hi. Tuabang in zawngtah, singthupi, anteh-louhing tuamtuam huan dan khawng. Ahihhang in ei an iva chih hialna ding om khollou a bang hi; a ziak bel formalize lou ihih ziak in.

Huaiziak in, hiai i kalchar element poimohtak, An leh Nek Bawldan poimoh ngaih a, Siamsinpawlpi leh Delhi Paite Indongtat te khawng in i nampuan bawldan kidemna a neih bang ua nekbawl kidemna bang organaiz zawzen a, nupi anhuan siamtaktakte a siamlam uh item khat hiam nih hiam bawlsak a, a menu/recipe hoihtak a gelh khiak a, a hoihpente kipahman bang pia a, a recipe ei an leh ei nekbawldan a rekoknaiz bawltuak mahmah hi.

    
 
N.T. Khankhup,
Gurgaon,
February 23, 2013