Minam dangte toh kibang lou in la leh lapau a hausa minam i hi ua, i late un lapau leh khiakna neisawn hi. I pipute uh la a kihoupih in la a kipaih uhi. Lapau i neih pen i ngeina, i tawndan, i thupina, i hauhsakna leh i tuambiikna khat ahi hi.  

1. I.LA HONG PIANNA:

Leitung damsung in mihingte’n khatvei leh nopna i tuak ua, khatvei leh dahna i tuak hi. Dahna hiam nopna hiam ahihkeileh lungngaihna khat peuh i tuahte apan in la hong piangkhia hi. Ahihhang in, mi khempeuh in la a phuah theih leh a siam theih ahi mawk kei a, asiam deuh leh akiva deuh mi a om tuam hi. Laphuah siam leh lasak siam a om tuam hang in lapau leh akhiakna pen miteng in sin in kizil le hang sim theih leh siam theih veh ahi hi.

Midang-namdangte etna(muhna) ah i late uh athupi leh atheihnop-azaaknop huai lua hi khol lou kha diing hi. A aw-suah leh a aw-kaihte pen Zoumite’ aw-kaih hise ahihman in bil a zaak diing leh mit a et diing hi lou in, taksa mahmah toh kihel a sung kibual diing ahi hi. Khongaih-lungngaih late akisak ciang in, khosikmul thou in, hon nehnousak a, khitui-naptui luanlohzou hi. Sinletna late leh gam ngaihna late a kisak ciang in sinliansak in leh gam leh nam itna khangliansak hi. Tua bang in mihing lungsim sung ah nna sem in thaamden hi. 

1. II.LA IN MI’ LUNGSIM BUNPEN:

Pu-le-pate a kihou ciang un la a kihoupih in, la a kiphat(kipahtawi) in, la mah in a kihehnem uhi. La in hon lungdam baihsak in, la mah in hong khasesak in lungsim nasak in dahsak baih hi. 

1. III.LA PEN I NGEINA KHAT AHI:

Leitung mipil leh akhangtou minamte’n apil-asimnate uh lai a gelhkhia a akep mah bang un, pu-le-pate’n zong a ngeinate uh, a tangthute leh a khangthute uh la a phuak in na keem uhi. La ah minam khat’ ngaihsutna, khosakna, gamtatdan leh adangdang kikhum ahihman in la pen ngeina khat ah i ci hi. Gentehna diing in, vahui in, vahui’ haam ngeina bang lou in vakhu’ haam bangbang in hong haam mawkleh pen lamdang kisa diing a, vahui taktak ahi kici nuam lou kha diing hi. 

1. IV.LA I CIH THU, THU I CIH LA:

La peuhmah gen nei lou a amawkna a kiphuak leh kisa om lou hi. Gen nei lou(omze nei lou) leh khiakna nei lou a omleh pen la taktak cingzou lou leh la a laaktaak lou hizaw diing hi. I pupate’n lai ana mansak hang un tangthu, khangthu, leh adangdangte pen a lungsim sung uah na keem in akip-akawi in gen thei uhi. Ahizong in, tua tangthu leh khangthute a manthat louhna diing un la a phuak in, la in na sa uhi. Khangthu leh tangthu suut leh kansuite’n khanglui late, phuisamna late, paunaakte leh tangthu luite pansan lou in thu taktak a suutkhezou ngei kei diing uhi. 

1.                 1.Theibang ka seenlai in aw zubang ka momlai,

Simthu a cih a thu liilit diing sa’ng e;

Simthu a cih a thu liilit diing sa’ng e,

Zaila a cih zai biimbiam diing sa’ng, 

1.                  2.Simthu i cih kawlhei a taih diing sa’ng e,

Simthu i cih zaila hi e;

Zaila i cih simthu hi e,

Suunkim miimvabang i thuum zaila hi e.” 

1. V.LA IN MINAM KHAT I HIHNA KILANGSAK HI:

Tulaitak in sak leh khang, sim leh mal ah kikhen mahle hang i lakamte uh le hi lapaute uh kibang in kikhat lailai hi. Mi pawlkhat aa diing in lapau pen pau upa suak a, mi khenkhat aa diing in pautaang suak hi. Kawlgam-Vaigam a om Zoumite’ lapau/late pen kibang kawikawi ahihman in nial vual louh in hun khat lai in gam khat a na teengkhawm, tuikhuuk khat nekhawm, dawnkhawm leh kampau khat azangkhawm minam khat i hihlam hong cian hi. Phalam(Falam) leh Khalkha(Haka) lamte’n kampau(Pautaang) a azat uh ei Mallam Zoumite aa diing in lapau suak hi.Etsakna diing in,“laitual” cihna diing a lapau a “sumtual” i cih pen Khalkhate’n pautaang a azat uh ahi hi.

Tua mah bang in ei lamte’n “tong”(tongdam, tongluang,tongciam) i cih pen Khalkha leh Falamte’n kampau in a zang ua, Laizou leh Khalkhate’n “hui” a cih uh ei lamte’n “sai” i cih uh ahi a, himahleh lapau a i gen ciang in “huisai” ahihkeileh “vuisai” i ci hi. 

1. VI.LA KAIHDAN LEH A TAPDAN:

Zoumite pau ah kamciik leh laciik genkhiakna diing kammal geih om lou hi.

1. i.Laphuaktu in amuhna, atheihna, azaakna leh athuaknate pen muh theih thilte[nnate] toh genteh in etteh hi;
2. ii.Tua bang a gentehna, a ettehna ah hemkaih hi. Ahemkaih siamte pen “Laphuak siam, ahihkeileh laphuah siam” i cihte ahi uhi. 

1. a.La hemkaih:

Ngeina late kiphuahna ah, la akiphuah tek hang in a hemkaih siam kitam lou hi. Tua bang a la hemkaih a la kiphuakte pen la hoih in kigen hi. La hemkaih siam a minthang Pu Pumzakham in,

“Zaangkhen kawlciang ka tawi siam a,

Ka min in zaangtual ban e;

Vaimang tuunnu’n heh hong nepna,

Tuun aw, lia-le-taang bang e” ci hi.

Hiai a tung a la ah tungsiah miliante abiak siamna, mi liante hoihsak a agamtat siamna pen “zaangkhen kawlciang ka tawi siam a” ci hi. Miteng in thauka a ngah mengmeng louh uh aman ngah a, tua thauka lawng nih pha pen nungaak leh tangvaal bang a kikawi hilhel in tap a, “lia leh taang bang”ci hi. Kumpi ahihciang a “vaimang zuapa” kici hinapi, tua hunlai a England kumpinu[Qween Elizabeth] pen numei ahihman in kumpipa ci lou in “vaimang tuunnu” ci hi. 

1. b.Suang/Simsing: Suang lak ah piau a suangtum pen asakbel leh atoubel a kingaihsun ahi a, akip-akhou leh atou a sawt thu akigen ciang in,

“Ciau lumsuang bang gil hen aw” ahihkeileh leikha in lah ne lou, amuat lah muat thei lou vongnamsing, singgigil, dolsing, simsing i cihte toh a kigenteh ciang in,

“Simsing bang gil den hen” kici hi. 

1. c.Phualva/Phualngou nou: Zoumite’ ngeina vasate lak ah vaphual pen a thupi leh a kizahtaakpen ahi hi.

“Ava kilel kilel a e,

Va cih lai ah zaangphualva mah tungnung e;

Ami kilel kilel a e,

Mi cih lai ah ahau ii ta mah tungnung e”

Vaphual mou pi, Vaphual nupate’ nuntakdan, cih thute a kigen mangmoh leh akigeteh hi a, ngeina daan a zi khat pasal khat nei i hih bang un, mittaw-khelbaai in mahle hang, zite olsam in kima lou hi. Zi in zong ta pasal a neih khit leh a pasal asih hang inn, tua a tapa ngaak in, tulpih hi. Zi in apasal zahtaak in athu mang hi. Apasal in a zi apaalngulh phial zong in, zi in a pasal’ vaangtang in, a pasal’ vaang nuntaakpih hi. Tua hi a, tua nupate in hiai leitung kia hi lou in vaantung dong ah khat’ vaangtang a a omkhawm theihna diing un “laukha hualna” sialtaang sun uh hi. Nupate “laikha hualna”ciamtehna in, zi in vaphual mu(vaphual mei) ngah a, apasal in “mu kha leh aakgia sawnkaai” ngah hi. Zi pen vaphual kitangsak in, vaphual bang in kingaihsun hi. Tua ziak in zi akigen ciang in “phualngou nou” kici hi. Pu Thualchin in a zi asih in,

“Seen angkawi aw, phualngou nou aw,

Lungdeih ziingzin sa’ng e;

Ziingzin hilou ka anglai pan,

Leen heisa tual ah kia e” ci in la na phuak hi. 

1. d.Leen heisa: Zougam ah heisa paak pen paak hoih mahmah a kigen khat ahi hi. A mel hoih kia hi lou in, a gim zong namtui zawmah hi. A hoihdan pen a pawlam kia a hoih hi lou in, a sunggil akipat a vek a hoih ahi hi. Tua ahihman in nungaak/zi hoihte “heisa paak” toh kigenteh nuam mahmah hi. Pu Tuangngul in, 

“Mualdawn heisa hong paal e,

Phung tutawm lai hong kuai e;

Ei kiakna tumbang sa ve’ng e,

Leen heisa tual ah kia e” ciin “leen heisa” na tamsak hi. 

Azi sihna pen “tual ah kia” na ci hi. Paak hoih mahmah khat, vul in a kung apan anuai ah, leilak ah kekhia cih toh na tehkaak hi. 

1. e.Taauna, maauna, leh thuumna:

Mihingte lungleeng-khuangai a a om ciang un, taau a maau in thuum uhi. Vasa haam pawl khat toh na genteh uhi. Tanghawm/talawk haam pen “Lawkta taau”, vahui haam pen “huiva maau” ciin, vamiim haam pen “miimva thuum” ci uh hi. 

1. i.Lawkta taau:

“Thelkiak La” sung ah hibang in lawkta taauna,

“Zoulei lawkta poh taau va ngei e,

Na tuun awi hiam zua awi hiam?;

Kei poh tuun awi ing zua awi ing e,

Lawkta na taau dungsuun zel ing e” cih kimu hi. 

1. ii.Huiva maau:

“Seen puvon sabang ka kanna von chiin aw,

Zougam huiva a na maauna’n,

Lem in na zawngkhawmna’m aw” 

1. iii.Miimva thuum:

“Thuumthuum ing e, nuai simlei ah miimva thuum zil ing e;

Taautaau ing e, Zoudam kuam ah lawkta na taau zil ing e” 

1. f.Zouzam paak:

Paak lak ah zouzam paak pen ahoih mahmah khat a kigen ngeina toh kizui khat ahi hi. Asan, a-eng cih khawng akithangsak diak hi. Nungaak-tangvaalte pen “zouzam paak” toh kigenteh a, lou buuk kiang khawng leh lou lai khawng a kiciing nuam deuh ahihman in “buuktual zouzam” cih khawng in kilou hi. 

“Suunni vei sawt lailung zuan mabang pan ing,

Ommuan duangkuai ngaihnou in hong phawngta e;

Ka lohloh diing paal zouzam ka bah loh diing,

Zalai gual gen tumtai loh bang hul ing e” 

1. g.Suangkua paak/kuahsuang paalluun:

Suangkua paak-asan leh akaang-ahoih moh lou khat ahi. Apaak hoihna sang in apaakzu pen kithupi sehzaw hi. Phuitong paak leh vaupaak(sevaupaak)te’n zong paakzu nei uhi. Gamlapi apan hiai paakzute dawn(tawp) diing in tungleeng vasate’n a hong naih bang un mihau leh mi neizou(micing-misiamte) kinaih in kizuan hi.